Shree Gowri Serial: ಇರುವೆಗೂ ಕಷ್ಟ ಆಗಬಾರದು ಅನ್ನೋ ಅಪ್ಪನ ಮಗಳಿಗೆ ಪ್ರತಿ ರಾತ್ರಿ ಗ್ರಹಣ; ಜ. 29ರಿಂದ ಬರ್ತಿದೆ ಹೊಸ ಧಾರಾವಾಹಿ ‘ಶ್ರೀಗೌರಿ

Shree Gowri Serial: ಭಾಗ್ಯಲಕ್ಷ್ಮಿ, ಲಕ್ಷ್ಮಿ ಬಾರಮ್ಮದಂತಹ ಪರಿಪೂರ್ಣ ಮನರಂಜನೆಯ ದೈನಿಕ ಧಾರಾವಾಹಿಗಳನ್ನು ವೀಕ್ಷಕರಿಗೆ ಉಣಬಡಿಸುತ್ತಿರುವ ಕಲರ್ಸ್ ಕನ್ನಡ ಚಾನಲ್ ಇದೀಗ ಮತ್ತೊಂದು ಸೊಗಸಾದ ಕಥೆಯನ್ನು ಹೊತ್ತು ತರುತ್ತಿದೆ. ಜನವರಿ 29ನೇ ತಾರೀಖಿನಿಂದ ಹೊಸ ಧಾರಾವಾಹಿ 'ಶ್ರೀಗೌರಿ' ಪ್ರಸಾರವಾಗಲಿದೆ. ಸೋಮವಾರದಿಂದ ಶುಕ್ರವಾರದವರೆಗೆ ಪ್ರತಿ ರಾತ್ರಿ 8:30ಕ್ಕೆ ಈ ಸೀರಿಯಲ್‌ ವೀಕ್ಷಿಸಬಹುದು.

ಕಲರ್ಸ್ ಕನ್ನಡದ ಬಿಸಿನೆಸ್ ಹೆಡ್ ಪ್ರಶಾಂತ್ ನಾಯಕ್ ಪ್ರಕಾರ, 'ಶ್ರೀಗೌರಿಯ ಕಥೆ ಮತ್ತು ನಿರೂಪಣೆ ಎರಡೂ ವಿಭಿನ್ನವಾಗಿವೆ. ಅದರ ಜೊತೆಗೆ ಕರ್ನಾಟಕದ ನಯನ ಮನೋಹರ ಕರಾವಳಿಯಲ್ಲಿ ಚಿತ್ರೀಕರಣಗೊಂಡಿರುವುದು ಧಾರಾವಾಹಿಯನ್ನು ಮತ್ತಷ್ಟು ಚೆಂದಗೊಳಿಸಿದೆ. ಕಥೆಯ ತಿರುವುಗಳು ಮುಂದಿನ ಸಂಚಿಕೆಗಳಿಗಾಗಿ ತುದಿಗಾಲಲ್ಲಿ ಕಾಯುವಂತೆ ಮಾಡುವುದರಲ್ಲಿ ಯಾವ ಅನುಮಾನವೂ ಇಲ್ಲ ಎನ್ನುತ್ತಾರೆ ಅವರು.

ಇದನ್ನೂ ಓದಿ: ‘ನನ್ನ ಸಿಕ್ಸ್ತ್‌ ಸೆನ್ಸ್ ಹೇಳ್ತಿದೆ, ಆ ಸ್ಪರ್ಧಿಯೇ ಗೆಲ್ಲೋದು ಅಂತ!’ ಸಂದರ್ಶನದಲ್ಲಿ ಅಚ್ಚರಿಯ ಹೆಸರೇಳಿದ ನಮ್ರತಾ ಗೌಡ

ಕಮಲಿ ಬಳಿಕ ಶ್ರೀಗೌರಿ

ಕಮಲಿ ಸೀರಿಯಲ್‌ ಮೂಲಕ ನಾಡಿನ ಮನೆ ಮಂದಿಗೆ ಪರಿಚಿತರಾಗಿರುವ ನಟಿ ಅಮೂಲ್ಯ ಗೌಡ. ಕಮಲಿ ಧಾರಾವಾಹಿ ಬಳಿಕ ಕಳೆದ ವರ್ಷದ ಬಿಗ್‌ ಬಾಸ್‌ ಕನ್ನಡ ಸೀಸನ್‌ 9ರಲ್ಲಿ ಕಾಣಿಸಿಕೊಂಡು, ಮತ್ತಷ್ಟು ಫೇಮ್‌ ಗಿಟ್ಟಿಸಿಕೊಂಡಿದ್ದರು ಅಮೂಲ್ಯ. ಇದೀಗ 2024ರಲ್ಲಿ ಹೊಸ ಇನ್ನಿಂಗ್ಸ್‌ ಆರಂಭಿಸಿದ್ದಾರೆ. ಅಂದರೆ, ಶ್ರೀಗೌರಿ ಸೀರಿಯಲ್‌ ಮೂಲಕ ಆಗಮಿಸುತ್ತಿದ್ದಾರೆ. ಕಲರ್ಸ್‌ ಕನ್ನಡದಲ್ಲಿ ಇನ್ನೇನು ಇದೇ ಮಾಸಾಂತ್ಯಕ್ಕೆ ಈ ಧಾರಾವಾಹಿ ಪ್ರಸಾರ ಶುರುವಾಗಲಿದೆ.

ಶ್ರೀಗೌರಿ ಕಥೆ ಏನು?

ಎರಡು ವಿಭಿನ್ನ ಜಗತ್ತುಗಳಿಂದ ಬಂದ ಇಬ್ಬರ ಬದುಕುಗಳು ಕರಾವಳಿ ತೀರದ ಊರೊಂದರಲ್ಲಿ ಸಂಧಿಸಿದ ಮೇಲೆ ಏನೆಲ್ಲ ನಡೆಯುತ್ತದೆ ಎನ್ನುವುದು ಶ್ರೀಗೌರಿ ಕಥೆ. ಇಲ್ಲಿನ ಘಟನಾವಳಿಗಳೆಲ್ಲ ಪ್ರೀತಿ ಮತ್ತು ತ್ಯಾಗಗಳಿಂದ ತುಂಬಿಹೋಗಿವೆ. ವಿಚಿತ್ರ ಕಾಯಿಲೆಯಿಂದ ಬಳಲುತ್ತಿರುವ ಶ್ರೀಗೌರಿಯ ತಂದೆಗೆ ಅದನ್ನು ಮುಚ್ಚಿಟ್ಟು ಮಗಳಿಗೊಂದು ಮದುವೆ ಮಾಡಿಸುವ ಆಸೆ. ಊರಿಗೆ ಉಪಕಾರಿ ಮನೆಗೆ ಮಾರಿಯಂತಿರುವ ಅದೇ ಊರಿನ ಹುಡುಗ ಅಪ್ಪುಗೆ ಅಮ್ಮನೇ ಜೀವನ. ಅಪ್ಪು ಮತ್ತು ಶ್ರೀಗೌರಿ ಭೇಟಿಯಾದ ಮೇಲೆ ಕಥೆ ಪಡೆದುಕೊಳ್ಳುವ ತಿರುವುಗಳ ಸರಮಾಲೆ ಸ್ವಾರಸ್ಯಕರವಾಗಿದೆ.

ಇದನ್ನೂ ಓದಿ: ಹಂಸಗೀತೆಗೆ ಹೆಜ್ಜೆ ಹಾಕಲಿದ್ದಾರೆ ಭಾವನಾ ರಾಮಣ್ಣ, ನೃತ್ಯ ರೂಪಕವಾಗುತ್ತಿದೆ ತರಾಸು ಕಾದಂಬರಿ

ಕಂಬಳ ಪ್ರಮುಖ ಆಕರ್ಷಣೆ

ಈ ಕತೆಯಲ್ಲಿ ಕಂಬಳವೂ ಪ್ರಮುಖ ಪಾತ್ರ ವಹಿಸಿರುವುದು ಮತ್ತೊಂದು ವಿಶೇಷ ಆಕರ್ಷಣೆ. ಬಿಗ್ ಬಾಸ್ ನಿಂದ ಹೆಸರಾದ ಅಮೂಲ್ಯ ಗೌಡ ಶ್ರೀಗೌರಿಯಾಗಿ ಮತ್ತೆ ಧಾರಾವಾಹಿ ಜಗತ್ತಿಗೆ ಮರಳಿರುವುದು ಇನ್ನೊಂದು ವಿಶೇಷ. ನಾಯಕನ ಪಾತ್ರದಲ್ಲಿ ಕಾರ್ತಿಕ್ ಅತ್ತಾವರ್ ಅಭಿನಯಿಸುತ್ತಿದ್ದಾರೆ. ಜೊತೆಗೆ ಸುನಿಲ್ ಪುರಾಣಿಕ್, ನಂದಿನಿ ಗೌಡ, ಗಾಯತ್ರಿ ಪ್ರಭಾಕರ್, ಸಂಜಯ್ ಸೂರಿಯಂಥ ಹಲವು ಜನಪ್ರಿಯ ತಾರೆಗಳು ಈ ಧಾರಾವಾಹಿಗೆ ರಂಗೇರಿಸಲಿದ್ದಾರೆ. ರಾಪಿಡ್ ಲೈವ್ ಎಂಟರ್ಟೈನ್ಮೆಂಟ್ ಸಂಸ್ಥೆ ಶ್ರೀಗೌರಿ ಧಾರಾವಾಹಿಯನ್ನು ನಿರ್ಮಾಣ ಮಾಡುತ್ತಿದೆ. ಜನವರಿ 29ರಿಂದ ರಾತ್ರಿ 8;30ಕ್ಕೆ ಶ್ರೀಗೌರಿ ಕಲರ್ಸ್‌ ಕನ್ನಡದಲ್ಲಿ ಪ್ರಸಾರವಾಗಲಿದೆ.

ಇದನ್ನೂ ಓದಿ: ಕೆಂಪೇಗೌಡರ ತವರಲ್ಲಿ ಸರಿಗಮಪ, ಡ್ರಾಮಾ ಜೂನಿಯರ್ಸ್‌ ಮಹಾಸಂಗಮ; ಮನರಂಜನೆಯ ರಸದೌತಣಕ್ಕೆ ಸಜ್ಜಾದ ಮಾಗಡಿ