BBK 11: ಸಾಯುವವರೆಗೂ ಈ ವಿಗ್‌ ಮೇಲೆ ಪ್ರೀತಿ ಇರುತ್ತೆ; ವಿಗ್‌ ಕಳಚಿ ಸತ್ಯ ಧಾರಾವಾಹಿ ತಂಡಕ್ಕೆ ಧನ್ಯವಾದ ಹೇಳಿ ಭಾವುಕರಾದ ಗೌತಮಿ ಜಾಧವ್
ಬಿಗ್‌ ಬಾಸ್‌ ಸೀಸನ್‌ 11ಕ್ಕೆ ನಾಲ್ಕನೇ ಸ್ಪರ್ಧಿಯಾಗಿ ಎಂಟ್ರಿ ಕೊಟ್ಟವರು ಸತ್ಯ ಧಾರಾವಾಹಿ ಖ್ಯಾತಿಯ ಗೌತಮಿ. ಮನೆಯೊಳಗೆ ಸತ್ಯ ಲುಕ್‌ನಲ್ಲೇ ಎಂಟ್ರಿ ಕೊಟ್ಟ ಗೌತಮಿ ಜಾಧವ್, ಬಹಳ ಬೇಸರದಿಂದಲೇ ವಿಗ್‌ ತೆಗೆದಿದ್ದಾರೆ. ಕೊನೆ ಉಸಿರು ಇರುವರೆಗೂ ಈ ವಿಗ್‌ ಮೇಲೆ ಗೌರವ, ಪ್ರೀತಿ ಇದ್ದೇ ಇರುತ್ತದೆ ಎಂದು ಹೇಳಿಕೊಂಡು ಗೌತಮಿ ಭಾವುಕರಾಗಿದ್ದಾರೆ.
ಕಿರುತೆರೆ ಪ್ರಿಯರು ಕುತೂಹಲದಿಂದ ಕಾಯುತ್ತಿದ್ದ ಶೋ ಆರಂಭವಾಗಿದೆ. ಸೆಪ್ಟೆಂಬರ್‌ 29 ರಿಂದ ಬಿಗ್‌ ಬಾಸ್‌ ಕನ್ನಡ ಸೀಸನ್‌ 11 ಆರಂಭವಾಗಿದೆ. 17 ಸ್ಪರ್ಧಿಗಳು ದೊಡ್ಮನೆಗೆ ಎಂಟ್ರಿ ಕೊಟ್ಟಿದ್ದಾರೆ. ಅದರಲ್ಲಿ 10 ಸ್ಪರ್ಧಿಗಳು ಸ್ವರ್ಗಕ್ಕೆ ಉಳಿದ 7 ಸ್ಪರ್ಧಿಗಳು ನರಕಕ್ಕೆ ಸೇರಿದ್ದಾರೆ. ನರಕದಲ್ಲಿರುವವರು ಸ್ವರ್ಗವಾಸಿಗಳ ಕೆಲಸ ಮಾಡುತ್ತಿದ್ದಾರೆ.
ನಾಲ್ಕನೇ ಸ್ಪರ್ಧಿಯಾಗಿ ಎಂಟ್ರಿ ಕೊಟ್ಟ ಗೌತಮಿ ಜಾಧವ್
ಈ ಸೀಸನ್‌ನಲ್ಲಿ ನಾಲ್ಕನೇ ಸ್ಪರ್ಧಿಯಾಗಿ ಎಂಟ್ರಿ ಕೊಟ್ಟಿದ್ದು ಕಿರುತೆರೆ ನಟಿ ಸತ್ಯ. ಶನಿವಾರ ಸಂಜೆ ಪ್ರಸಾರವಾದ ರಾಜಾ ರಾಣಿ ರೀ ಲೋಡೆಡ್‌ ಕಾರ್ಯಕ್ರಮದಲ್ಲೇ ಸತ್ಯ ಹೆಸರು ರಿವೀಲ್‌ ಆಗಿತ್ತು. ಗೌತಮಿ ನಾಗಪಂಚಮಿ ಧಾರಾವಾಹಿ ಮೂಲಕ ನಟನೆ ಆರಂಭಿಸಿದವರು. ಈ ಸೀರಿಯಲ್‌ನಲ್ಲಿ ಗೌತಮಿ ಜಾಧವ್, ನಾಗಿಣಿ ತಂಗಿ ನಾಗಲಕ್ಷ್ಮಿ ಪಾತ್ರದಲ್ಲಿ ನಟಿಸಿದ್ದರು. ಲೂಟಿ, ಆದ್ಯಾ, ಕಿನಾರೆ ಸಿನಿಮಾಗಳಲ್ಲಿ ಗೌತಮಿ ನಟಿಸಿದ್ದಾರೆ. ತಮಿಳು ಸಿನಿಮಾವೊಂದರಲ್ಲಿ ಕೂಡಾ ನಟಿಸಿದ್ದಾರೆ. ಆದರೆ ಆಕೆಗೆ ಹೆಸರು ತಂದುಕೊಟ್ಟದ್ದು ಸತ್ಯ ಧಾರಾವಾಹಿಯ ಸತ್ಯ ಪಾತ್ರ. ಈ ಸೀರಿಯಲ್‌ನಲ್ಲಿ ಆಕೆಯ ಲುಕ್‌ ಕೂಡಾ ಸಂಪೂರ್ಣ ಬದಲಾಗಿತ್ತು. ಇದಕ್ಕೂ ಮುನ್ನ ಸಿನಿಮಾ, ಧಾರಾವಾಹಿಗಳಲ್ಲಿ ನಟಿಸಿದರೂ ಆಕೆ ಖ್ಯಾತಿ ಗಳಿಸಿದ್ದು ಸತ್ಯ ಧಾರಾವಾಹಿ ಪಾತ್ರ.
ಗೌತಮಿಗೆ ಹೆಸರು ತಂದುಕೊಟ್ಟ ಸತ್ಯ ಧಾರಾವಾಹಿ
ಅದರಲ್ಲೂ ಧಾರಾವಾಹಿಯಲ್ಲಿ ಆಕೆಯದ್ದು ಟಾಮ್‌ ಬಾಯ್‌ ಪಾತ್ರ. ಮನೆ ಮಗಳಂತೆ ಅಲ್ಲ ಹುಡುಗನಂತೇ ಸದಾ ಡ್ರೆಸ್‌ ಹಾಕುವ, ಬಾಯ್‌ ಕಟ್‌ ಹೇರ್‌ಸ್ಟೈಲ್‌ನಲ್ಲಿದ್ದ ಖಡಕ್‌ ಹುಡುಗಿ ಸತ್ಯಳನ್ನು ಇಷ್ಟಪಡದ ಕಿರುತೆರೆ ವೀಕ್ಷಕರೇ ಇಲ್ಲ. ಹುಡುಗರು, ವಯಸ್ಸಾದವರಿಗೆ ಮಾತ್ರವಲ್ಲ, ಸತ್ಯ ಎಂದರೆ ಪುಟ್ಟ ಮಕ್ಕಳಿಗೂ ಬಹಳ ಇಷ್ಟ. ಅಷ್ಟರ ಮಟ್ಟಿಗೆ ಆ ಪಾತ್ರ ಎಲ್ಲರಿಗೂ ಇಷ್ಟವಾಗಿತ್ತು. ತಮಗೆ ಇಷ್ಟೆಲ್ಲಾ ಹೆಸರು ತಂದುಕೊಟ್ಟ ಸತ್ಯ ಪಾತ್ರದ ಬಗ್ಗೆ ಗೌತಮಿ ಭಾವುಕರಾಗಿದ್ದಾರೆ. ಮೊದಲ ದಿನ ತಾವು ಧರಿಸಿದ್ದ ವಿಗನ್ನು ಗೌತಮಿ ಕಳಚಿದ್ದಾರೆ. ಸತ್ಯ ಆಗಿ ಮನೆಗೆ ಎಂಟ್ರಿ ಕೊಟ್ಟ ಹುಡುಗಿ ಈಗ ಗೌತಮಿ ಆಗಿ ಬದಲಾಗಿದ್ದಾರೆ.
ವಿಗ್‌ ತೆಗೆದು ಭಾವುಕರಾದ ಖಡಕ್‌ ಸತ್ಯ
ವಿಗ್‌ ತೆಗೆಯೋಕೆ ಬಹಳ ಯೋಚನೆ ಮಾಡುತ್ತಿದ್ದೇನೆ, ನಾನು ಅಳುವುದಿಲ್ಲ ಎಂದು ಹೇಳಿ ಬಂದಿದ್ದೆ. ಈ ವೇದಿಕೆಗೂ ಇದೇ ರೂಪದಲ್ಲಿ ಬಂದಿದ್ದೇನೆ ಎಂದರೆ ಅದಕ್ಕೆ ಜನರ ಪ್ರೀತಿಯೇ ಕಾರಣ. ಇನ್ನು ಸ್ವಲ್ಪ ಹೊತ್ತಿನ ನಂತರ ನಿಮಗೆ ಕಾಣುವಂತ ಹುಡುಗಿಯೇ ನಿಜವಾದ ಗೌತಮಿ. ಮೊದಲ ಬಾರಿಗೆ ಬಹಳ ಯೋಚನೆ ಮಾಡಿ, ತೆಗೆಯಲು ಯೋಚನೆ ಮಾಡಿ ತೆಗೆಯುತ್ತಿರುವುದು ಎಂದು ಅಳುತ್ತಲೇ ಗೌತಮಿ ವಿಗ್‌ ತೆಗೆಯುತ್ತಾರೆ. ಗೌತಮಿ ವಿಗ್‌ ತೆಗೆಯುತ್ತಿದ್ದಂತೆ ಸಹ ಸ್ಪರ್ಧಿಗಳು ಆಕೆಯ ಉದ್ದ ಕೂದಲು ನೋಡಿ ಚಪ್ಪಾಳೆ ತಟ್ಟುತ್ತಾರೆ. ನನಗೆ ಈ ಅವಕಾಶ ನೀಡಿದ್ದಕ್ಕೆ ಬಿಗ್‌ ಬಾಸ್‌ಗೆ ಧನ್ಯವಾದಗಳು, ಗೌತಮಿಯ ಹೊಸ ಅಧ್ಯಾಯ ಆರಂಭವಾಗುತ್ತಿದೆ. ಈ ವಿಗ್‌ ಮೇಲಿನ ಗೌರವ, ಪ್ರೀತಿ ನಾನು ಸಾಯುವರೆಗೂ ಇರುತ್ತೆ ಎಂದು ಹೇಳಿಕೊಂಡು ಗೌತಮಿ ಭಾವುಕರಾಗಿದ್ದಾರೆ.
ಸತ್ಯ ಧಾರಾವಾಹಿ ಒಡಿಯಾ ಮೂಲದ ರೀಮೇಕ್
ಸತ್ಯ ಧಾರಾವಾಹಿಯನ್ನು ಸ್ವಪ್ನಕೃಷ್ಣ ನಿರ್ದೇಶಿಸುತ್ತಿದ್ದರು. ಧಾರಾವಾಹಿಯಲ್ಲಿ ಗೌತಮಿ ಜಾಧವ್ ನಾಯಕಿಯಾಗಿ ಸಾಗರ್‌ ಬಿಳಿಗೌಟ ನಾಯಕನಾಗಿ ನಟಿಸಿದ್ದಾರೆ. ಉಳಿದಂತೆ ಮಾಲತಿ ಸರ್‌ ದೇಶಪಾಂಡೆ, ಗಿರಿಜಾ ಲೋಕೇಶ್‌, ಶ್ರೀನಿವಾಸ ಮೂರ್ತಿ, ಅಭಿಜಿತ್‌ , ಪ್ರಿಯಾಂಕಾ ಹಾಗೂ ಇನ್ನಿತರರು ನಟಿಸಿದ್ದಾರೆ. ಸತ್ಯ, ಒಡಿಯಾದ ಸಿಂಧುರಾ ಬಿಂದು ಧಾರಾವಾಹಿಯ ರೀಮೇಕ್. ಇದು ಕನ್ನಡ ಸೇರಿ ತೆಲುಗು, ತಮಿಳು, ಬಾಂಗ್ಲಾ, ಮಲಯಾಳಂ, ಹಿಂದಿ ಭಾಷೆಗಳಲ್ಲಿ ಪ್ರಸಾರವಾಗಿತ್ತು.
ವಿಭಾಗ