ಹೌದು ಸ್ವಾಮಿ! Bigg Boss Kannada Season 11 ಬರ್ತಾಯಿದೆ; ತೆರೆಮರೆಯಲ್ಲಿಯೇ ಶುರುವಾಗಿದೆ ತಯಾರಿ, ಕೇಳಿಬರ್ತಿವೆ ಹತ್ತು ಹಲವು ಹೆಸರು
ಬಿಗ್‌ ಬಾಸ್‌.. ಕನ್ನಡ ಕಿರುತೆರೆಯ ದೊಡ್ಡ ರಿಯಾಲಿಟಿ ಶೋಗಳಲ್ಲಿ ಒಂದು. ಬೇರೆ ಬೇರೆ ಕ್ಷೇತ್ರಗಳ ಹತ್ತಾರು ಜನರನ್ನು ಒಂದೇ ಮನೆಯಲ್ಲಿ ಇರಿಸಿ, ಭಿನ್ನ ಮನಸ್ಥಿತಿಗಳ ಅಸಲಿ ಮುಖಗಳನ್ನು, ನವಿರು ಮನರಂಜನೆ ಮೂಲಕ ನೋಡುಗರ ಮುಂದಿಡುವುದೇ ಈ ಶೋನ ಮುಖ್ಯ ಉದ್ದೇಶ. ಇದೀಗ ಇದೇ ಬಿಗ್‌ ಬಾಸ್‌ ಕನ್ನಡ, BBK 11ರ ಮೂಲಕ ಆಗಮಿಸಲು ಸಜ್ಜಾಗುತ್ತಿದೆ.
Bigg Boss Kannada Season 11: ಬಿಗ್‌ ಬಾಸ್‌ ಕನ್ನಡ ಸೀಸನ್‌ 10 ನಿನ್ನೆ ಮೊನ್ನೆ ಮುಗಿದ ಹಾಗಿದೆ. ಸೀಸನ್‌ 10ರಲ್ಲಿ ಭಾಗವಹಿಸಿದ ಸ್ಪರ್ಧಿಗಳೂ ಬಿಗ್‌ ಬಾಸ್‌ ಗುಂಗಿನಿಂದ ಇನ್ನೂ ಆಚೆ ಬಂದಿಲ್ಲ. ಜನರ ಮನದಲ್ಲಿಯೂ ಹಾಗೆಯೇ ಇದೆ. ಹೀಗಿರುವಾಗಲೇ ಬಿಗ್‌ ಬಾಸ್‌ ಕನ್ನಡ ಸೀಸನ್‌ 11ರ ವಿಚಾರವಾಗಿಯೂ ಒಂದಷ್ಟು ಸುದ್ದಿಗಳು ಸೋಷಿಯಲ್‌ ಮೀಡಿಯಾದಲ್ಲಿ ಕೇಳಿಬರುತ್ತಿವೆ. ಅಂದರೆ, ಸ್ಪರ್ಧಿಗಳು ಯಾರಿರಬಹುದು ಎಂಬ ಲೆಕ್ಕಾಚಾರ ಹಾಕುವ ಕೆಲಸವೂ ನಡೆಯುತ್ತಿದೆ. ಕಿಚ್ಚ ಸುದೀಪ್‌ ಎಂದಿನಂತೆ ಮತ್ತೆ ಹೊಸ ಅವತಾರದ ಜತೆಗೆ ಗತ್ತಿನಲ್ಲಿಯೇ ವೇದಿಕೆ ಮೇಲೇರಲಿದ್ದಾರೆ. ಹಾಗಾದರೆ ಈ ರಿಯಾಲಿಟಿ ಶೋನ ಬಾಪ್‌ ಬಿಗ್‌ ಬಾಸ್‌ ಶುರುವಾಗುವುದು ಯಾವಾಗ? ಮುಂದೆ ಓದಿ.
ಬಿಗ್‌ ಬಾಸ್‌ ಕನ್ನಡ ಕಿರುತೆರೆಯ ದೊಡ್ಡ ರಿಯಾಲಿಟಿ ಶೋಗಳಲ್ಲಿ ಒಂದು. ಬೇರೆ ಬೇರೆ ಕ್ಷೇತ್ರಗಳ 16 ಜನರನ್ನು ಒಂದೇ ಮನೆಯಲ್ಲಿ ಇರಿಸಿ, ಭಿನ್ನ ಮನಸ್ಥಿತಿಗಳ ಅಸಲಿ ಮುಖಗಳನ್ನು, ನವಿರು ಮನರಂಜನೆ ಮೂಲಕ ನೋಡುಗರ ಮುಂದಿಡುವುದೇ ಈ ಶೋನ ಮುಖ್ಯ ಉದ್ದೇಶ. ಇದೀಗ ಇದೇ ಬಿಗ್‌ ಬಾಸ್‌ ಕನ್ನಡ ಮತ್ತೆ ಹೊಸ ಸೀಸನ್‌ ಮೂಲಕ ಆಗಮಿಸಲು ಸಜ್ಜಾಗುತ್ತಿದೆ. BBK ಸೀಸನ್‌ 10ರ ದೊಡ್ಡ ಯಶಸ್ಸಿನ ಬಳಿಕ, ಮತ್ತೊಂದು ಅಚ್ಚರಿಯ ಮೂಲಕ ವೀಕ್ಷಕರ ಎದುರು ಬರಲು ತರಹೇವಾರಿ ಪ್ಲಾನ್‌ಗಳ ಜತೆಗೆ ಆಗಮಿಸುತ್ತಿದೆ ಕಲರ್ಸ್‌ ಕನ್ನಡ ವಾಹಿನಿ. ಇದೀಗ ಸೀಸನ್‌ 11 ಇದೇ ಅಕ್ಟೋಬರ್‌ನಲ್ಲಿ ಪ್ರಸಾರ ಶುರುವಾಗಲಿದೆ.
ಈ ಹಿಂದಿನ ಐದಾರು ಸೀಸನ್‌ಗಳೆಲ್ಲವೂ ಅಕ್ಟೋಬರ್‌ ತಿಂಗಳಿನಲ್ಲಿಯೇ ಶುರುವಾಗಿವೆ. ಅದರಂತೆ, ಇನ್ನೇನು ಹೆಚ್ಚು ಸಮಯ ಬಾಕಿ ಉಳಿದಿಲ್ಲ. ಅಕ್ಟೋಬರ್‌ ಎರಡು ಅಥವಾ ಮೂರನೇ ವಾರದಲ್ಲಿ ಈ ಸಲದ ಬಿಗ್‌ ಶೋ ಆರಂಭವಾಗಲಿದೆ. ಈ ಬಗ್ಗೆ ವಾಹಿನಿ ಅಧಿಕೃತವಾಗಿ ಘೋಷಣೆ ಮಾಡದಿದ್ದರೂ, ತೆರೆಮರೆಯ ಕೆಲಸಗಳ ಬಗ್ಗೆ ಸೋಷಿಯಲ್‌ ಮೀಡಿಯಾದಲ್ಲಿಯೂ ಚರ್ಚೆ ನಡೆಯುತ್ತಿದೆ. ಈ ಸಲ ಯಾರೆಲ್ಲ ಬಿಗ್‌ ಬಾಸ್‌ ಮನೆಗೆ ಹೋಗಬಹುದು ಎಂಬ ಲೆಕ್ಕಾಚಾರಗಳೂ ಪ್ರೇಕ್ಷಕ ವಲಯದಲ್ಲಿ ಬಿಸಿಬಿಸಿ ಚರ್ಚೆಯಾಗುತ್ತಿವೆ. ಈ ಸಲದ ಕಾನ್ಸೆಪ್ಟ್‌ ಏನಿರಬಹುದು? ಎಂದೂ ಊಹಿಸುತ್ತಿದ್ದಾರೆ.
ಶುರುವಾಗಿದೆ ಮನೆಯ ವಿನ್ಯಾಸದ ಕೆಲಸ
ಬಿಗ್‌ ಬಾಸ್‌ ಶೋನಲ್ಲಿ ಬಿಗ್‌ ಬಾಸ್‌ ಮನೆಯೇ ಹೈಲೈಟ್. ಸೀಸನ್‌ನಿಂದ ಸೀಸನ್‌ಗೆ ಹೊಸ ಥರದ ಪರಿಕಲ್ಪನೆಯ ಮೂಲಕ ನೋಡುಗರ ಗಮನ ಸೆಳೆಯುತ್ತದೆ ಬಿಗ್‌ ಬಾಸ್‌ ಮನೆ. ಗಾರ್ಡನ್‌ ಏರಿಯಾ, ಲಿವಿಂಗ್‌ ಏರಿಯಾ, ಬೆಡ್‌ರೂಮ್‌ಗಳು, ಬಾತ್‌ರೂಮ್‌, ಕಿಚನ್‌ ರೂಮ್‌ ಹೀಗೆ ಎಲ್ಲದರ ವಿನ್ಯಾಸವೂ ಆಕರ್ಷಕವಾಗಿರುತ್ತದೆ. ಅದೇ ರೀತಿ ಇದೀಗ ಸೀಸನ್‌ 11ರ ಸಲುವಾಗಿಯೂ ಈಗಾಗಲೇ ಒಂದಷ್ಟು ಕೆಲಸ ಶುರುವಾಗಿದೆ ಎಂದೇ ಹೇಳಲಾಗುತ್ತಿದೆ.
ಹೊಸ ಪರಿಕಲ್ಪನೆ, ಕಾಮನ್‌ಮ್ಯಾನ್‌ಗೂ ಅವಕಾಶ?
ಕಳೆದ ವರ್ಷದ ಬಿಗ್‌ ಬಾಸ್‌ ಶೋ ಶುರುವಾಗುವುದಕ್ಕೂ ಮುನ್ನ ಯಾರೆಲ್ಲ ಸ್ಪರ್ಧಿಗಳು ಈ ಸಲದ ಶೋನಲ್ಲಿ ಇರ್ತಾರೆ ಎಂಬ ಬಗ್ಗೆ ಸಾಕಷ್ಟು ಹೆಸರುಗಳು ಕೇಳಿಬಂದಿದ್ದವು. ಆ ಪೈಕಿ ಸಮರ್ಥರು ಅಸಮರ್ಥರು ಎಂಬ ಆಧಾರದ ಮೇಲೆ ಎಂಟ್ರಿ ವೇಳೆಯೇ ವೋಟಿಂಗ್‌ ಪಡೆದು ಆಯ್ಕೆ ಆದವರನ್ನು ಬಿಗ್‌ ಮನೆಯೊಳಗೆ ಪ್ರವೇಶ ನೀಡಲಾಗಿತ್ತು. ಅದರಂತೆ, ಈ ಸಲವೂ ಸೋಷಿಯಲ್‌ ಮೀಡಿಯಾ ಇನ್‌ಫ್ಲುಯೆನ್ಸರ್‌ಗಳೂ ಶೋನಲ್ಲಿ ಇರಲಿದ್ದಾರೆ. ಸಿನಿಮಾ, ಕಿರುತೆರೆ ಜತೆಗೆ ಕಾಮನ್‌ ಮ್ಯಾನ್‌ ಪರಿಕಲ್ಪನೆಯೂ ಮುಂದುವರಿಯಲಿದೆಯಂತೆ ಎನ್ನಲಾಗುತ್ತಿದೆ.
ಕಾಂಟ್ರವರ್ಸಿ ಮಾಡಿದವರಿಗೇ ಆದ್ಯತೆ!?
ಟ್ರೋಲ್‌ ಆದವರು, ಕಾಂಟ್ರವರ್ಸಿ ಮೂಲಕ ಸದ್ದು ಗದ್ದಲ ಮಾಡಿದವರೇ ಕನ್ನಡದ ಬಿಗ್‌ಬಾಸ್‌ನಲ್ಲಿ ಕಾಣಿಸಿಕೊಳ್ಳುವುದು ಹೆಚ್ಚು. ಈಗಾಗಲೇ ಅಂಥ ಸಾಕಷ್ಟು ಜನ ಸ್ಪರ್ಧಿಗಳಾಗಿ ಭಾಗವಹಿಸಿ ಜನರ ಮನಸು ಗೆದ್ದ ಉದಾಹರಣಗಳಿವೆ. ಈ ಹಿಂದೆ ಹುಚ್ಚ ವೆಂಕಟ್‌ ಅವರೂ ಬಿಗ್‌ ಬಾಸ್‌ನಲ್ಲಿ ದೊಡ್ಡ ಸದ್ದು ಮಾಡಿದ್ದರು. ಕಳೆದ ಸೀಸನ್‌ನಲ್ಲಿ ಡ್ರೋನ್‌ ಪ್ರತಾಪ್‌, ಒಟಿಟಿ ಸೀಸನ್‌ನಲ್ಲಿ ಸೋನು ಶ್ರೀನಿವಾಸ್‌ ಗೌಡ ಆಗಮಿಸಿದ್ದರು. ಟ್ರೋಲ್‌ಗೆ ಆಹಾರ ಆಗ್ತಿದ್ದ ರಕ್ಷಕ್‌ ಬುಲೆಟ್‌ ಸಹ ಬಿಗ್‌ ಮನೆ ಪ್ರವೇಶಿಸಿದ್ದರು. ಅದರಂತೆ ಈ ಸಲ ಯಾರೆಲ್ಲ ಮನೆಗೆ ಎಂಟ್ರಿ ಕೊಡಬಹುದು ಎಂಬ ಕುತೂಹಲ ಎಲ್ಲರಲ್ಲೂ ಇದೆ.
ಇವರುಗಳ ಹೆಸರು ಮುನ್ನೆಲೆಗೆ..
ಸದ್ಯದ ಮಾಹಿತಿ ಪ್ರಕಾರ ಕಳೆದ ವರ್ಷ ಸದ್ದು ಮಾಡಿದ್ದ ‘ತುಕಾಲಿ ಸ್ಟಾರ್’ ಸಂತು ಅವರ ಪತ್ನಿ ಮಾನಸಾ, ಹುಡುಗಿ ವೇಷದಲ್ಲಿಯಲ್ಲಿ ಗಮನ ಸೆಳೆದ ಮಜಾಭಾರತ ಖ್ಯಾತಿಯ ರಾಘವೇಂದ್ರ, ಇವರ ಜತೆಗೆ ಇತ್ತೀಚೆಗಷ್ಟೇ ಮುಗಿದ ಬೃಂದಾವನ ಧಾರಾವಾಹಿ ಖ್ಯಾತಿಯ ವರುಣ್‌ ಆರಾಧ್ಯ ಸೇರಿ ಇನ್ನೂ ಹಲವರ ಹೆಸರು ಸೋಷಿಯಲ್‌ ಮೀಡಿಯಾದಲ್ಲಿ ಓಡಾಡುತ್ತಿದೆಯಾದರೂ, ಅಧಿಕೃವಾಗಿ ಶೋ ಶುರುವಾದಾಗಲೇ ಘೋಷಣೆ ಆಗಲಿದೆ.
