Seetha Rama: ಚಿಕ್ಕಿ ಟಾರ್ಚರ್ ತಡೆಯೋಕಾಗ್ತಿಲ್ಲ; ಸೀತಾ ರಾಮ ಸೀರಿಯಲ್ ಭಾರ್ಗವಿ ಪಾತ್ರಕ್ಕೆ ಕೆಂಡ ಕಾರುತ್ತಿದ್ದಾರೆ ವೀಕ್ಷಕರು
ಸೀತಾ ರಾಮ ಧಾರಾವಾಹಿಯಲ್ಲಿ ನೆಗೆಟಿವ್‌ ಶೇಡ್‌ನಲ್ಲಿ ಅಬ್ಬರಿಸುತ್ತಿರುವ ಭಾರ್ಗವಿಗೆ ಇದೀಗ ರಾಜ್ಯದ ತುಂಬ ವಿಲನ್‌ಗಳೇ ಆಗಿದ್ದಾರೆ. ಅಂದರೆ, ಪಾತ್ರ ಮೂಡಿ ಬರುತ್ತಿರುವ ರೀತಿಗೆ ಮೆಚ್ಚುಗೆ ಜತೆಗೆ, ಹೀಗೂ ಇರ್ತಾರಾ ಎಂಬರ್ಥದಲ್ಲಿ ಕಾಮೆಂಟ್‌ ಪೋಸ್ಟ್‌ ಮಾಡುತ್ತಿದ್ದಾರೆ.
Seetha Rama: ಜೀ ಕನ್ನಡದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚು ವೀಕ್ಷಕರನ್ನು ಸಂಪಾದಿಸಿಕೊಳ್ಳುತ್ತಿರುವ ಧಾರಾವಾಹಿ ಎಂದರೆ ಅದು ಸೀತಾ ರಾಮ. ಈಗಾಗಲೇ 49 ಏಪಿಸೋಡ್‌ಗಳನ್ನು ಮುಗಿಸಿ ಇಂದಿಗೆ (ಸೆ. 21) 50ನೇ ಸಂಚಿಕೆಗೆ ಈ ಸೀರಿಯಲ್ ಕಾಲಿರಿಸಿದೆ. ಈ ಐವತ್ತು ಏಪಿಸೋಡ್‌ಗಳಲ್ಲಿ ವೀಕ್ಷಕರ ಮನ ಗೆದ್ದಿದೆ ಈ ಧಾರಾವಾಹಿ. ಪುಟಾಣಿ ಸಿಹಿಯ ಜತೆಗೆ ಸೀತಾಳ ಸಂಕಷ್ಟ, ದೊಡ್ಡ ಕಂಪನಿ ಮಾಲೀಕ ರಾಮನ ಧಾರಾಳತನ, ಸೂರ್ಯ ಪ್ರಕಾಶನ ಸೌಮ್ಯತೆ, ಗೆಳತನಕ್ಕೆ ಇನ್ನೊಂದು ಹೆಸರಾಗಿರುವ ಅಶೋಕ, ಮತ್ತೊಂದೆಡೆ ಹಗೆತನ ಸಾಧಿಸುವ ಭಾರ್ಗವಿ, ಪ್ರಿಯಾಳ ಇನೋಸೆನ್ಸ್‌.. ಹೀಗೆ ಒಂದಷ್ಟು ವೈಶಿಷ್ಟ್ಯತೆಗಳ ಹೂರಣವನ್ನು ಹೊತ್ತು ಕಿರುತೆರೆ ಪ್ರಿಯರ ಮನಸು ಗೆದ್ದಿದೆ ಸೀತಾ ರಾಮ.
ಗಂಡು ದಿಕ್ಕಿಲ್ಲದ ಮನೆಯಲ್ಲಿ ಸೀತಾಗೆ ಸಿಹಿ, ಸಿಹಿಗೆ ಸೀತಾ. ಇಷ್ಟೇ ಇವರ ಜೀವನ. ಇವರ ಪುಟ್ಟ ಕುಟುಂಬಕ್ಕೆ ಬೆಸ್ಟ್‌ ಫ್ರೆಂಡ್‌ ರೂಪದಲ್ಲಿ ಬರುತ್ತಾನೆ ರಾಮ. ಹೀಗೆ ಸಾಗಿದ ಈ ಫ್ರೆಂಡ್‌ಶಿಫ್‌ನಲ್ಲಿ ಸದ್ಯಕ್ಕೆ ಕಾಣಿಸುತ್ತಿರುವುದು ಬರೀ ಗೆಳೆತನ. ಮನೆ ಉಳಿಸಿಕೊಳ್ಳಬೇಕೆನ್ನುವ ನಿಟ್ಟಿನಲ್ಲಿ ಸೀತಾ ಒದ್ದಾಡುತ್ತಿದ್ದರೆ, ಆಕೆಗೆ ಭರವಸೆ ತುಂಬುತ್ತಿದ್ದಾನೆ ರಾಮ. ರಾಮನಿಗೆ ಆತ್ಮೀಯನಾಗಿ ಅಶೋಕನ ಪಾತ್ರವೂ ಸೀರಿಯಲ್‌ನ ಹೈಲೈಟ್‌ಗಳಲ್ಲೊಂದು. ಅಂದುಕೊಂಡಂತೆ ಶ್ರೀಮಂತವಾಗಿಯೇ ಮೂಡಿಬರುತ್ತಿರುವ ಸೀತಾ ರಾಮ ಸೀರಿಯಲ್, ಟಿಆರ್‌ಪಿ ವಿಚಾರದಲ್ಲೂ ಮುಂದಡಿ ಇಟ್ಟಿದೆ. ಟಾಪ್‌ ಐದರಲ್ಲಿ ಎರಡನೇ ಸ್ಥಾನದಲ್ಲಿ ಸೀತಾ ರಾಮ ಭದ್ರವಾಗಿದೆ.
ಭಾರ್ಗವಿಯ ಹಗೆತನವೇ ಹೈಲೈಟ್
ಸೀತಾ ಮತ್ತು ರಾಮನ ಜತೆಗೆ ಭಾರ್ಗವಿಯ ಖಳ ನಾಯಕಿಯ ಪಾತ್ರವೂ ಈ ಧಾರಾವಾಹಿಯ ವಿಶೇಷತೆಯಲ್ಲೊಂದು. ಕಳೆದ ಕೆಲವು ವರ್ಷಗಳಿಂದ ಕಿರುತೆರೆ ಮತ್ತು ಸಿನಿಮಾ ಎರಡರಿಂದಲೂ ದೂರವೇ ಉಳಿದಿದ್ದ ನಟಿ ಪೂಜಾ ಲೋಕೇಶ್‌, ಸೀತಾ ರಾಮ ಧಾರಾವಾಹಿ ಮೂಲಕ ಕಂಬ್ಯಾಕ್‌ ಮಾಡಿದ್ದಾರೆ. ನೆಗೆಟಿವ್‌ ಪಾತ್ರದಲ್ಲಿ ಪೂಜಾ ಅವರನ್ನು ಕಂಡ ವೀಕ್ಷಕರು ಹಿಡಿ ಶಾಪ ಹಾಕುತ್ತಿದ್ದಾರೆ. ಸೀರಿಯಲ್ ವೀಕ್ಷಕರಿಗೂ ಭಾರ್ಗವಿ ವಿಲನ್ ಆಗಿ ಪರಿಣಮಿಸಿದ್ದಾರೆ. ನೋಡುಗರ ಮೇಲೆ ಅಷ್ಟರ ಮಟ್ಟಿಗೆ ಇವರ ಪಾತ್ರ ಪ್ರಭಾವ ಬೀರಿದೆ.
ಪರಭಾಷೆಯಲ್ಲಿ ನೆಗೆಟಿವ್‌ ರೋಲ್‌ ಮಾಡಿದ್ದ ಪೂಜಾ ಲೋಕೇಶ್‌ಗೆ ಕನ್ನಡದಲ್ಲಿ ನೆಗೆಟಿವ್‌ ರೋಲ್‌ ಸಿಕ್ಕಿದ್ದು, ಸೀತಾ ರಾಮ ಧಾರಾವಾಹಿಯಲ್ಲಿ. ಇದು ಅವರ ಮೊದಲ ನೆಗೆಟಿವ್‌ ಶೇಡ್‌ನ ಸೀರಿಯಲ್. ಈ ಚೊಚ್ಚಲ ಪ್ರಯತ್ನಕ್ಕಾಗಿ ಸಾಕಷ್ಟು ಹೋಮ್‌ ವರ್ಕ್‌ ಸಹ ಮಾಡಿರುವ ಪೂಜಾ, ಇದೀಗ ಗೆದ್ದ ಖುಷಿಯಲ್ಲಿದ್ದಾರೆ. ಸೋಷಿಯಲ್‌ ಮೀಡಿಯಾದಲ್ಲಿ ಅವರ ಪಾತ್ರಕ್ಕೆ ವ್ಯಾಪಕ ಪ್ರಶಂಸೆ ಸಿಗುತ್ತಿದೆ. ಜನ ಇವರನ್ನು ನೋಡಿ ಹಲ್ಲು ಮಸಿಯುತ್ತಿದ್ದಾರೆ. ಆ ಮಟ್ಟಿಗೆ ಈ ಪಾತ್ರ ನೋಡುಗರನ್ನು ಸೆಳೆಯುತ್ತಿದೆ. ತೆರೆ ಮೇಲೆ ಕಾಣುವ ಭಾರ್ಗವಿಯನ್ನು ಕಂಡು ನಿಗಿ ನಿಗಿ ಕೆಂಡ ಕಾರುತ್ತಿದ್ದಾರೆ ಕಿರುತೆರೆ ನೋಡುಗ ಮಂದಿ. ಇನ್ನು ಕೆಲವರು ಆ ಪಾತ್ರವನ್ನೇ ತೆಗೆಯಿರಿ ಎಂದೂ ಜೀ ಕನ್ನಡದ ಇನ್‌ಸ್ಟಾಗ್ರಾಂನಲ್ಲಿ ಕಾಮೆಂಟ್‌ ಹಾಕುತ್ತಿದ್ದಾರೆ.
ಭಾರ್ಗವಿ ಪಾತ್ರಕ್ಕೆ ರಾಶಿ ಕಾಮೆಂಟ್‌
- ಧಾರಾವಾಹಿ ನೋಡೋದು ಕೇವಲ ಖುಷಿಗಾಗಿ. ನಿಮ್ಮ ವಿಲನ್ ಪಾತ್ರಗಳು ಕೊಡೋ ಟಾರ್ಚರ್ ನೋಡಿ ಟೆನ್ಷನ್ ಪಡೋದಕ್ಕೆ, ತಲೆಕೆಡಿಸಿಕೊಳ್ಳೋದಕ್ಕೆ ನಿಮ್ಮ ಧಾರಾವಾಹಿ ಏಕೆ ನೋಡ್ಬೇಕು. ಧಾರಾವಾಹಿ ನೋಡುವಾಗ ಖುಷಿ ಆಗ್ಬೇಕು.. ಟೆನ್ಷನ್ ಅಲ್ಲ.
- ಭಾರ್ಗವಿ ಆಕ್ಟಿಂಗ್‌ ಚೆನ್ನಾಗಿಲ್ಲ. ಹೆವಿ ಓವರ್‌ ಆಯ್ತು. ಹಳ್ಳಿ ಕಡೆ ಡ್ರಾಮಾ ಮಾಡುವವರ ಮನೆಯಲ್ಲಿ ಮಾತಾಡೋ ಥರ ಇದೆ.
- ಈ ಭಾರ್ಗವಿನ ಜಾಸ್ತಿ ತೋರಿಸ್ಬೇಡಿ ಇಂಟ್ರೆಸ್ಟ್‌ ಹೋಗ್ಬಿಡುತ್ತೆ ನೋಡೋಕೆ
- ಭಾರ್ಗವಿ ಸೀನ್‌ ಬೇಡ, ಅವರನ್ನು ತೆರೆಮೇಲೆ ನೋಡೋದೇ ಕಷ್ಟ
- ಪೂಜಾ ಮ್ಯಾಮ್‌ ನಿಮ್ಮ ಆಕ್ಟಿಂಗ್‌ ಸೂಪರ್‌, ಸೀತಾ ರಾಮದಲ್ಲಿ ಸಖತ್‌ ಆಗಿ ಮೂಡಿ ಬರ್ತಿದೆ.
- ನೀವು ಎಂಥವರು ಅಂತ ನನಗೆ ಗೊತ್ತು, ವಿಲನ್ ರೋಲ್‌ ಮಾಡಬೇಡಿ. ನಿಮ್ಮನ್ನು ಆಥರ ನೋಡೋಕೆ ಆಗಲ್ಲ
- ಸೀತಾ ರಾಮದಲ್ಲಿ ನಿಮ್ಮ ನಟನೆ ನೋಡೋದೆ ಚೆಂದ.
- ಭಾರ್ಗವಿ ಪಾತ್ರ ನ ಇನ್ನು ಪ್ರಭುದ್ದವಾಗಿ ನಟಿಸಿ... ಮತ್ತಷ್ಟು ಕೀರ್ತಿ, ಯಶಸ್ಸು ನಿಮ್ಮದೇ
- ಖಡಕ್‌ ವಿಲನ್
- ನಿಮ್ಮ ನಟನೆ ಸೂಪರ್‌, ಬಟ್‌ ಮನೆಯಲ್ಲಿ ನಿಮ್ಮನ್ನು ದಿನಾ ಬೈತಾರೆ
