Seetha Rama: ಸೀತಾಳ ಕಷ್ಟ ಬಗೆಹರಿಯತ್ತೆ ಅಂತ ರಾಮ ಕಾಯ್ತಿದ್ರೆ ಭಾರ್ಗವಿ ಹೊಸ ವರಸೆ ಶುರುವಿಟ್ಟುಕೊಂಡಿದ್ದಾಳೆ

Seetha Rama: ಆಫೀಸ್‌ನ ಅವ್ಯವಹಾರದ ಬಗ್ಗೆ ರಾಮ, ಸೂರ್ಯಪ್ರಕಾಶ್‌ ಮತ್ತು ಅಶೋಕನ ನಡುವೆ ಮಾತುಕತೆ ನಡೆದಿದೆ. ಇದಕ್ಕೆಲ್ಲ ಮ್ಯಾನೇಜರ್‌ ಚರಣ್‌ಗಿಂತ ಮೇಲಿನವರ ಕೈವಾಡ ಇದೆ ಎಂದು ಅಶೋಕ ಹೇಳಿದ್ದಾನೆ. ಭಾರ್ಗವಿಯನ್ನೂ ಕರೆಸಿ ಒಂದು ಮಾತು ಕೇಳಿ ಎನ್ನುವ ಸೂರ್ಯಪ್ರಕಾಶನನ್ನು ತಡೆದಿದ್ದಾನೆ ಅಶೋಕ. ನಿಧಾನವೇ ಪ್ರಧಾನ ಎಂದೂ ಹೇಳಿದ್ದಾನೆ.

ಈ ಚರ್ಚೆಯ ನಡುವೆಯೇ ರಾಮನಿಗೆ ಸೀತಾಳಿಂದ ಫೋನ್‌ ಬರುತ್ತದೆ. ಅಡ್ವಾನ್ಸ್‌ ಸ್ಯಾಲರಿ ಸಿಗುತ್ತಾ ಎಂದು ಕೇಳುತ್ತಾಳೆ. ಇವತ್ತೇ ಖಂಡಿತ ಸಿಗುತ್ತೆ ಎಂದು ಭರವಸೆ ನೀಡುತ್ತಾನೆ ರಾಮ. ಇತ್ತ ಸಾಧನಾ ಮತ್ತು ಭಾರ್ಗವಿ ಮುಖಾಮುಖಿಯಾಗಿದೆ. ರಾಮನ ಮಾತಿಂದ ಪತಿ ಸತ್ಯ ಕುಡಿಯೋದನ್ನ ಕಡಿಮೆ ಮಾಡ್ತಿದ್ದಾರೆ ಅಂತ ಭಾರ್ಗವಿ ಮುಂದೆ ಹೇಳಿದ್ದಾಳೆ. ಜತೆಗೆ ಆಫೀಸ್‌ ಬಗ್ಗೆಯೂ ಮಾತನಾಡಿದ್ದಾಳೆ.

ಈ ವೇಳೆ ಯಾವುದೇ ಕಾರಣಕ್ಕೂ ಆಫೀಸ್‌ ಬಗ್ಗೆ ಮಾತನಾಡಬೇಡ ಎಂದಿದ್ದಾಳೆ ಭಾರ್ಗವಿ. ಹಾಗೇನಾದ್ರೂ ಕೇಳಿಸಿಕೊಂಡರೆ, ಅದನ್ನು ನನ್ನ ಮುಂದೆ ಹೇಳುವುದನ್ನೂ ಮರೀಬೇಡ ಎಂದೂ ಹೇಳಿದ್ದಾಳೆ. ಸಾಧನಾ ಹೋಗ್ತಿದ್ದಂತೆ, ಕುಡಕನ್ನ ಸರಿ ಮಾಡಿ, ಆಫೀಸ್‌ನ ಉದ್ಧಾರ ಮಾಡೋಕೆ ಹೊರಟಿದೆಯಾ ರಾಮ? ನಾನಿರೋವರೆಗೂ ಅವೆರಡೂ ನಾಯಿ ಬಾಲಾನೇ ಎನ್ನುತ್ತಾಳೆ ಭಾರ್ಗವಿ.

ಸೀತಾಳ ಅತ್ತಿಗೆ ಸುಲೋಚನಾ ಮತ್ತು ಲಾಯರ್‌ ರುದ್ರಪ್ರತಾಪ್‌ ಮಾತಿಗಿಳಿದಿದ್ದಾರೆ. ಸೀತಾ ಮನೆ ಮಾರಲ್ಲ ಎಂಬ ವಿಚಾರವನ್ನು ಸುಲೋಚನಾ, ಲಾಯರ್‌ ಮುಂದೆ ಹೇಳಿಕೊಂಡಿದ್ದಾಳೆ. ಸೀತಾ ಈ ರೀತಿ ನಿರ್ಧಾರ ತೆಗೆದುಕೊಳ್ಳಲು ಏನೋ ಕಾರಣ ಇರಬೇಕಲ್ಲ ಎಂದು ಪ್ರಶ್ನಿಸಿದ್ದಾನೆ ರುದ್ರಪ್ರತಾಪ್.‌ ಸುಲೋಚನಾಗೆ ಆವಾಜ್‌ ಹಾಕಿದ್ದಾನೆ. ನಾನು ಕಣ್ಣಾಕ್ಕಿದ್ದು ನನಗೇ ದಕ್ಕಬೇಕು ಎಂದಿದ್ದಾನೆ.

ರಾಮನ ಪ್ರತೀ ಮಾತನ್ನೂ, ಸತ್ಯನ ಮಾತನ್ನು ಕಳ್ಳಗಿವಿಯಿಂದ ಕೇಳಿಸಿಕೊಳ್ಳಲು ಮೈಕ್ರೋಫೋನ್‌ ಆರ್ಡರ್‌ ಮಾಡಿ ತರಿಸಿದ್ದಾಳೆ ಭಾರ್ಗವಿ. ಅದನ್ನು ಗಿಫ್ಟ್‌ ರೀತಿ ಸಾಧನಾಗೆ ನೀಡಿದ್ದಾಳೆ. ಆಫೀಸ್‌ನಲ್ಲಿ ಕೆಲಸದ ನಡುವೆಯೇ ಸೀತಾಳ ಅತ್ತಿಗೆಯ ಎಂಟ್ರಿಯಾಗಿದೆ. ಎಲ್ಲರ ಮುಂದೆಯೇ ಸೀತಾಳ ಮನೆ ಸಮಸ್ಯೆಯ ಬಗ್ಗೆ ಮಾತನಾಡಿದ್ದಾಳೆ. ರಾಮ್‌ ತನಗೆ ಸಹಾಯ ಮಾಡ್ತಿದ್ದಾರೆ ಎಂಬ ವಿಚಾರವನ್ನೂ ಸೀತಾ ಬಾಯ್ಬಿಟ್ಟಿದ್ದಾಳೆ. ಯಾವುದೇ ಕಾರಣಕ್ಕೂ ಮನೆ ಮಾರುವ ವಿಚಾರ ಕೈಬಿಡಬೇಡ ಎಂದು ಸಲಹೆ ನೀಡಿದ್ದಾಳೆ. ಹಾಗಾದರೆ ಸೀತಾ ತನ್ನ ನಿರ್ಧಾರ ಬದಲಿಸ್ತಾಳಾ?