Seetha Rama: ಸಿಹಿಯ ಹೆಲಿಕಾಪ್ಟರ್‌ ಕನಸನ್ನು ನನಸು ಮಾಡಲು ಹೊರಟಿದ್ದಾನೆ ರಾಮ; ಭಾರ್ಗವಿ ಪಾಲಿಗೆ ಗಣೇಶ ಹಬ್ಬವೇ ಅಪಶಕುನವಾಯ್ತಾ?

Seetha Rama: Serial 51th Episode: ತನ್ನ ಮನೆಗೆ ಬುಕ್‌ ಮಾಡಿದ್ದ ಗಣೇಶನನ್ನೇ ಸಿಹಿಗೆ ಕೊಂಡು ತಂದಿದ್ದಾನೆ ರಾಮ. ಗಣೇಶನ ಹತ್ತಿರ ಹೆಲಿಕಾಪ್ಟರ್‌ ಮೇಲೆ ಏರುವ ಆಸೆ ಈಡೇರುವಂತೆ ಬೇಡಿಕೊಂಡಿದ್ದಾಳೆ ಸಿಹಿ. ಇತ್ತ ರಾಮನ ಮನೆಯಲ್ಲೂ ಗಣೇಶ ಹಬ್ಬದ ಸಂಭ್ರಮ ಜೋರಾಗಿದೆ. ತಾನು ಬುಕ್‌ ಮಾಡಿದ ಗಣೇಶ ಮನೆಗೆ ಬಂದಿಲ್ಲ ಎಂಬ ಕಾರಣಕ್ಕೆ ಗಣಪತಿಯನೇ ಹೊರ ಕಳಿಸಿದ್ದಾಳೆ ಭಾರ್ಗವಿ.

ಈ ಗಣೇಶ ಈ ಮನೆಗೆ ಬೇಡ ಎಂದಿರುವ ಭಾರ್ಗವಿ, ಮನೆಗೆ ಬಂದ ದೇವರನ್ನೇ ವಾಪಾಸು ಕಳಿಸಿದ್ದಾಳೆ. ಇದೇ ವೇಳೆ ಭಾರ್ಗವಿ ಕೈಯಲ್ಲಿನ ದೀಪ ಆರಿ ಅಪಶಕುನವಾಗಿದೆ. ಶಾಂತಮ್ಮನ ವಠಾರದಲ್ಲಿ ಹಬ್ಬ ಕಳೆಗಟ್ಟಿದೆ. ಗಣೇಶನ ಸ್ಪರ್ಧೆಯ ತೀರ್ಪುಗಾರರಿಗೆ ತಮ್ಮ ಗಲ್ಲಿ ಗಣೇಶನ ಬಗ್ಗೆ ವಿವರಿಸಿದ್ದಾಳೆ ಸಿಹಿ. ಅಷ್ಟೇ ಅಲ್ಲ ಮೊದಲ ಪ್ರಶಸ್ತಿಯೂ ಸಿಕ್ಕಿದೆ. ಅದೇ ಖುಷಿಯಲ್ಲಿ ಬಂದ ನಗದು ಬಹುಮಾನವನ್ನು ಅಮ್ಮನ ಕೈಗೆ ಕೊಟ್ಟಿದ್ದಾಳೆ. ಫ್ರೆಂಡ್‌ ರಾಮನನ್ನು ಕರೆದುಕೊಂಡು ಹೋಗಿ ವಠಾರದ ಹುಡುಗರ ಜತೆಗೆ ಡಾನ್ಸ್‌ ಮಾಡಿದ್ದಾಳೆ.

ಗಣೇಶ ಇನ್ನೂ ಬಾರದಿದ್ದಕ್ಕೆ, ಪತಿ ವಿಶ್ವಜಿತ್‌ ಮೇಲೆ ಕೋಪಿಸಿಕೊಂಡ ಭಾರ್ಗವಿ, ನೇರವಾಗಿ ದೇವರಕೋಣೆಯಲ್ಲಿನ ಗಣಪನಿಗೇ ಕಡು ಕೋಪದಲ್ಲಿ ಕರ್ಪೂರ ಬೆಳಗಿ ಪೂಜೆ ಮಾಡಿದ್ದಾಳೆ. ಮಾವಯ್ಯನ ಆಗಮನವಾಗುತ್ತಿದ್ದಂತೆ, ಎಂದಿನಂತೆ ಒಳ್ಳೆಯವಳಂತೆ ಬದಲಾಗಿದ್ದಾಳೆ. ಪೂಜೆ ಬಳಿಕ ಇತ್ತ ಆದಷ್ಟು ಬೇಗ ಮನೆಗೆ ಬರ್ರಪ್ಪಾ ಅಂತಾ ಸೂರ್ಯ ಪ್ರಕಾಶನಿಂದ ಅಶೋಕನಿಗೆ ಫೋನ್‌ ಬಂದಿದೆ. ರಾಮ್‌ ಎಲ್ಲಿ ಎಂದು ಕೇಳಿದ್ದಕ್ಕೆ, ನನ್ನ ಜತೆಗೇ ಇದ್ದಾನೆ ಎಂದಿದ್ದಾನೆ ಅಶೋಕ.

ಶಾಂತಮ್ಮನ ವಠಾರದಲ್ಲಿ ಗಣೇಶನ ವಿಸರ್ಜನೆಗೆ ಕುಣಿತ ಶುರುವಾಗಿದೆ. ಮಕ್ಕಳ ಜತೆಗೆ ಮಕ್ಕಳಾಗಿ ರಾಮ ಕುಣಿಯುತ್ತಿದ್ದಾನೆ. ಹೀಗಿರುವಾಗಲೇ ಸಿಹಿ ಮೂರ್ಛೆ ಬಂದು ಬಿದ್ದಿದ್ದಾಳೆ. ಸಿಹಿ ಬಿದ್ದಿದ್ದನ್ನು ನೋಡಿದ ರಾಮ ಓಡೋಡಿ ಬಂದಿದ್ದಾನೆ. ಸೀತಾ ಕೂಡ ಆತಂಕದಲ್ಲಿಯೇ ಧಾವಿಸಿದ್ದಾಳೆ. ಸಕ್ಕರೆ ಕಾಯಿಲೆ ಇರೋದ್ರಿಂದ ಹೀಗಾಗಿದೆ ಎಂದು ಹೇಳಿದ ಡಾಕ್ಟರ್‌, ಸಿಹಿಗೆ ಟ್ರೀಟ್‌ಮೆಂಟ್‌ ನೀಡಿದ್ದಾರೆ. ಇದೇ ವೇಳೆ ಸಿಹಿ ಉಪವಾಸ ಮಾಡಿದ್ದು ಸೀತಾಳ ಗಮನಕ್ಕೂ ಬಂದಿದೆ.

ಡಾಕ್ಟರ್‌ ಹೋದ ಬಳಿಕ ಉಪವಾಸ ಹಾಳಾಯ್ತು ಅನ್ನೋ ಕಾರಣಕ್ಕೆ ಅಳುತ್ತಿದ್ದಾಳೆ ಸಿಹಿ. ಹೆಲಿಕಾಪ್ಟರ್‌ ಮೇಲೆ ಹೋಗುವುದಕ್ಕಾಗಿ ಉಪವಾಸ ಮಾಡಿದ್ದಾಗಿ ಸಿಹಿ ಹೇಳಿಕೊಂಡಿದ್ದಾಳೆ. ಇದರಿಂದ ರಾಮ್‌ ನೇರವಾಗಿ ನನ್ನ ಬಳಿ ಇದನ್ನು ಹೇಳುವುದಲ್ವಾ ಎಂದಿದ್ದಾಳೆ. ತಕ್ಷಣ ಸಿಹಿಯನ್ನು ಎತ್ತಿಕೊಂಡು ಹೊರನಡೆದಿದ್ದಾನೆ. ಸೀತಾ ಅವರೇ ನೀವು ಬನ್ನಿ ಎಂದು ಕರೆದಿದ್ದಾನೆ. ಹಾಗಾದರೆ, ಸಿಹಿಯ ಬಹುದೊಡ್ಡ ಆಸೆಯನ್ನು ಈಡೇರಿಸ್ತಾನಾ ರಾಮ್.‌ ಕಾದು ನೋಡಬೇಕು.