Seetha Rama: ಭಾರ್ಗವಿಯಿಂದ ಅವಮಾನದ ಉಡುಗೊರೆ ಸಿಗ್ತಿದ್ದಂತೆ, ರಾಮನಿಗೆ ದೊಡ್ಡ ನಮಸ್ಕಾರ ಹೇಳಿದ್ದಾಳೆ ಸೀತಾ!

Seetha Rama: Serial 54th Episode: ಸೀತಾಳ ಕಷ್ಟ ಪರಿಹಾರವಾಗುವ ಲಕ್ಷಣಗಳು ಕಾಣಿಸುತ್ತಿಲ್ಲ. ದೇವರು ವರ ಕೊಟ್ರೂ ಪೂಜಾರಿ ಕೊಡದ ಹಾಗಾಗಿದೆ ಸೀತಾಳ ಪರಿಸ್ಥಿತಿ. ಇನ್ನೇನು ಕೈಗೆ ಬಂತು ಎನ್ನುವಷ್ಟರಲ್ಲಿಯೇ ಅಡ್ವಾನ್ಸ್‌ ಸ್ಯಾಲರಿ ಕೈ ತಪ್ಪಿದೆ. ಮನೆ ಉಳಿಸಿಕೊಳ್ಳಬೇಕು ಎಂದು ಸಾವಿರ ಕನಸು ಕಟ್ಟಿಕೊಂಡಿದ್ದ ಸೀತಾಳ ಬಾಳಲ್ಲಿ ವಿಧಿ ಮತ್ತೆ ಆಟವಾಡಿದೆ.

ಅಚಾನಕ್‌ ಆಗಿ ಭಾರ್ಗವಿ ಆಫೀಸ್‌ಗೆ ಎಂಟ್ರಿಕೊಟ್ಟಿದ್ದರಿಂದ ರಾಮ ಮತ್ತು ಅಶೋಕನ ಪ್ಲಾನ್‌ಗಳು ತಲೆಕೆಳಗಾಗಿವೆ. ನೇರವಾಗಿ ಬಂದು ಅಶೋಕನಿಗೆ ಕ್ಲಾಸ್‌ ತೆಗೆದುಕೊಂಡಿದ್ದ ಭಾರ್ಗವಿ, ಬಾಸ್‌ ಚೇರ್‌ ಮೇಲೆ ಕೂತಿದ್ದಕ್ಕೆ ಅವಮಾನ ಮಾಡಿದ್ದಾಳೆ. ಇತ್ತ ಅವನನ್ನು ಹೊರಗೆ ಕಳುಹಿಸಿ, ಸೀತಾಳನ್ನು ಕರೆಸಿಕೊಂಡಿದ್ದಾಳೆ ಭಾರ್ಗವಿ.

ನೀವೆಲ್ಲ ಏನಂದುಕೊಂಡಿದ್ದೀರಾ? ಈ ಆಫೀಸ್‌ ಏನು ನಿಮ್ಮಪ್ಪಂದು ಅಂದುಕೊಂಡಿದ್ದೀರಾ ಎಂದು ಸೀತಾಳಿಗೆ ಪರೋಕ್ಷವಾಗಿ ಮಾತನಾಡಿದ್ದಾಳೆ ಭಾರ್ಗವಿ. 25 ಲಕ್ಷ ಹಣ ಅಡ್ವಾನ್ಸ್‌ ಸ್ಯಾಲರಿ ಬೇಕಾ ನಿಮಗೆ? ಎಂದು ಕೇಳಿದ್ದಾಳೆ ಭಾರ್ಗವಿ. ಎಷ್ಟು ಸಿಗಬಹುದು ಎಂಬುದು ನನಗೆ ಗೊತ್ತಿರಲಿಲ್ಲ. ರಾಮ್‌ ಅವರೇ ಹೇಳಿದ್ರು. ಹಾಗಾಗಿ ಅಪ್ಲೈ ಮಾಡಿದೆ ಎಂದಿದ್ದಾಳೆ ಸೀತಾ.

ಬಾಸ್‌ ನಿಮಗಷ್ಟೇ ಅಡ್ವಾನ್ಸ್ ಸ್ಯಾಲರಿ ಕೊಟ್ಟಿದ್ದಾರೆ ಎಂದರೆ, ಉಳಿದವರು ನಿಮ್ಮ ಮತ್ತು ಬಾಸ್‌ ಬಗ್ಗೆ ಏನೆಲ್ಲ ಮಾತನಾಡಿಕೊಳ್ಳುತ್ತಾರೆ ಎಂದಿದ್ದಾಳೆ. ಸೀತಾಳ ಮೇಲಿನ ಕೋಪವನ್ನು ಅಲ್ಲೇ ಇದ್ದ ಮ್ಯಾನೇಜರ್ ಚರಣ್‌ ಮೇಲೆ ತೀರಿಸಿಕೊಂಡಿದ್ದಾಳೆ.‌ ಬಳಿಕ ಸೀತಾಳನ್ನು ಅಲ್ಲಿಂದ ಆಚೆ ಕಳಿಸಿದ್ದಾಳೆ. ಇತ್ತ ದುಡ್ಡು ಹೋಗುವುದನ್ನು ತಪ್ಪಿಸಿ ಕುಹಕ ನಗು ಬೀರಿದ್ದಾಳೆ ಭಾರ್ಗವಿ. ಇದೇ ನೋವಿನಲ್ಲಿ ಆಫೀಸ್‌ ಅವರ್‌ನಲ್ಲಿಯೇ ಆಫೀಸ್‌ನಿಂದ ಹೊರನಡೆದಿದ್ದಾಳೆ ಸೀತಾ.

ಇದನ್ನೂ ಓದಿ: ಮಾರ್ಕೆಟಿಂಗ್‌ ಮ್ಯಾನೇಜರ್‌ ಟು ಸೀರಿಯಲ್‌ ಹೀರೋ, ರೀಲ್‌ ರಾಮನ ರಿಯಲ್‌ ಕಥೆ; ಗಗನ್‌ ಚಿನ್ನಪ್ಪ ಸಂದರ್ಶನ

ಆಟೋ ಏರಿ ಸುಮ್ಮನೆ ಹೊರಟಿದ್ದಾಳೆ ಸೀತಾ. ಇದೇ ವೇಳೆ ರಾಮ ಆಡಿದ ಮಾತುಗಳು ಸೀತಾಳ ಎದುರು ಬರುತ್ತಿವೆ. ಇನ್ನೇನು ದುಡ್ಡು ಬಂದೇ ಬಿಡ್ತು ಅನ್ನೋ ರಾಮನ ಭರವಸೆ ಮಾತುಗಳು ಸೀತಾಗೆ ಮತ್ತಷ್ಟು ಮಗದಷ್ಟು ನೋವು ತರಿಸಿದೆ. ಇತ್ತ ಅಮ್ಮ ವಾಣಿಯ ಹುಟ್ಟು ಹಬ್ಬದ ದಿನದ ನಿಮಿತ್ತ ರಾಮ ದೇವಸ್ಥಾನದಲ್ಲಿದ್ದಾನೆ . ಅಮ್ಮನ ಹೆಸರಿನಲ್ಲಿ ವಿಶೇಷ ಅರ್ಚನೆ ಮಾಡಿಸುತ್ತಿದ್ದಾನೆ.

ಕಾಕತಾಳೀಯವೋ ಏನೋ ಎಂಬಂತೆ, ರಾಮ ಇದ್ದ ದೇವಸ್ಥಾನಕ್ಕೇ ಸೀತಾಳ ಆಗಮನವಾಗಿದೆ. ಮನೆಯಲ್ಲಿ ಸಿಹಿ ತಾತ ಅಜ್ಜಿ ಜತೆಗೆ ಮಾತಿಗಿಳಿದಿದ್ದಾಳೆ. ಅಡ್ಡಹೆಸರಿನ ವಿಚಾರಕ್ಕೆ ತನ್ನ ಹೆಸರಿನ ಮುಂದೆ ಸೀತಾ ಹೆಸರನ್ನು ಸೇರಿಸಿಕೊಳ್ಳುವ ಬಗ್ಗೆ ಮಾತನಾಡಿದ್ದಾಳೆ. ಇತ್ತ ಆಫೀಸ್‌ನಲ್ಲಿ ಸೀತಾ ಬಿಟ್ಟು ಹೋದ ಲಂಚ್‌ ಬಾಕ್ಸ್‌ ಹಿಡಿದು ಊಟಕ್ಕೆ ಬಂದಿದ್ದಾಳೆ. ಅಲ್ಲಿ ಅಶೋಕ ಎದುರಾಗಿದ್ದಾನೆ. ಸೀತಾ ಎಲ್ಲಿಎಂದಿದ್ದಕ್ಕೆ, ಅಡ್ವಾನ್ಸ್‌ ಸ್ಯಾಲರಿ ಸಿಗುತ್ತಿದ್ದಂತೆ, ಬೇಗ ಹೋದಳು ಎಂದಿದ್ದಾಳೆ.

ಅರೇ ನೀವೆನಿಲ್ಲಿ. ನಾನು ಇಲ್ಲಿ ಬರೋ ವಿಷ್ಯಾ ಯಾರಿಗೂ ಹೇಳಿಯೇ ಇಲ್ಲ, ಆಫೀಸ್‌ ಸಮಯದಲ್ಲಿ ನೀವು ಎಲ್ಲಿಯೂ ಹೊರ ಹೋಗುವುದಿಲ್ಲವಲ್ಲ. ಅಡ್ವಾನ್ಸ್‌ ಸ್ಯಾಲರಿ ಸಿಕ್ಕಿದ್ದಕ್ಕೆ ಕಂಗ್ರಾಟ್ಸ್‌ ಹೇಳಿದ್ದಾನೆ ರಾಮ. ಕೈ ಮುಗಿದು, ಇನ್ಮೇಲೆ ನೀವು ಯಾವ ವಿಷಯಕ್ಕೂ ಮಧ್ಯ ಬರಬೇಡಿ ರಾಮ್‌. ನನ್ನ ಪಾಡಿಗೆ ನನ್ನನ್ನು ಬಿಟ್ಟು ಬಿಡಿ ಎಂದಿದ್ದಾಳೆ ಸೀತಾ.

ನನಗೆ ಸ್ಯಾಲರಿ ಅಡ್ವಾನ್ಸ್‌ ಬೇಕು ಅಂತ ಹೇಳಿದ್ನಾ? ನನ್ನ ಬಗ್ಗೆ ನಿಮ್ಮ ಮನಸಲ್ಲೇನಿದೆ? ಎಂದು ರಾಮ್‌ಗೆ ಪ್ರಶ್ನೆ ಮಾಡುತ್ತಿದ್ದಾಳೆ ಸೀತಾ. ಇತ್ತ ಸೀತಾಳ ಮಾತು ಕೇಳಿ ರಾಮ್‌ ಗಲಿಬಿಲಿಗೊಂಡಿದ್ದಾನೆ. ಸೀತಾ ಏನು ಹೇಳುತ್ತಿದ್ದಾರೆ ಎಂಬ ಗೊಂದಲಕ್ಕೀಡಾಗಿದ್ದಾನೆ. ಪ್ರಾಮಾಣಿಕವಾಗಿ ಬರೋ ದುಡ್ಡು ಅಷ್ಟೇ ಸಾಕು, ಈ ಅಡ್ಡದಾರಿಯಿಂದ ಬರೋ ದುಡ್ಡು ನನಗೆ ಬೇಡ ಎಂದಿದ್ದಾಳೆ. ಭಾರ್ಗವಿಯೇ ಇದಕ್ಕೆಲ್ಲ ಕಾರಣ ಎಂಬ ವಿಚಾರ ರಾಮ್‌ಗೆ ಗೊತ್ತಾಗಲಿದೆಯೇ? ಆಫೀಸ್‌ನಲ್ಲಿ ನಡೆದ ವಿಚಾರವನ್ನು ಅಶೋಕ, ರಾಮನ ಮುಂದೆ ಹೇಳುತ್ತಾನಾ?

ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ