Bigg Boss Kannada: ಬಿಗ್‌ ಬಾಸ್‌ 10ರ ಪ್ರೋಮೋ ರಿಲೀಸ್; ಈ ಬಾರಿ ಸಮ್‌ಥಿಂಗ್‌ ಸ್ಪೆಷಲ್!
ಅಂತೂ ಬಿಗ್‌ಬಾಸ್‌ ರಿಯಾಲಿಟಿ ಶೋ ಶುರುವಾಗುವ ಸೂಚನೆ ಸಿಕ್ಕಿದೆ. ಈವರೆಗೂ ಸಣ್ಣ ಸುಳಿವು ನೀಡದ ಕಲರ್ಸ್‌ ಕನ್ನಡ ವಾಹಿನಿ, ಕಿಚ್ಚನ ಬರ್ತ್‌ಡೇ ದಿನವೇ ಬಿಗ್‌ಬಾಸ್‌ ಸೀಸನ್‌ 10ರ ಮೊದಲ ಪ್ರೋಮೋ ಬಿಡುಗಡೆ ಮಾಡಿದೆ.
Bigg Boss Kannada 10: ಕನ್ನಡ ಕಿರುತೆರೆಯ ಬಿಗ್‌ ರಿಯಾಲಿಟಿ ಶೋ, ಬಿಗ್‌ಬಾಸ್‌ಗೆ ದಿನಗಣನೆ ಶುರುವಾಗಿದೆ. ಇಲ್ಲಿಯವರೆಗೂ ಅವರು, ಇವರು ಎಂಬಿತ್ಯಾದಿ ಹತ್ತಾರು ಸ್ಪರ್ಧಿಗಳ ಹೆಸರುಗಳು ಸೋಷಿಯಲ್‌ ಮೀಡಿಯಾ ಅಂಗಳದಲ್ಲಿ ತೇಲಿಬಂದಿದ್ದವು. ಆದರೆ, ಅವುಗಳಲ್ಲಿ ಯಾವುದು ಸರಿ, ಯಾವುದು ನಿಜ ಎಂಬುದು ಮಾತ್ರ ಅಧಿಕೃತ ಘೋಷಣೆ ಆದಾಗಲೇ ತಿಳಿಯುತ್ತದೆ. ಹಾಗಾದರೆ, ಬಿಗ್‌ಬಾಸ್‌ 10ನೇ ಸೀಸನ್‌ ಶುರುವಾಗುವುದಾದರೂ ಯಾವಾಗ? ಇನ್ನೇನು ಶೀಘ್ರದಲ್ಲಿ ಎನ್ನುತ್ತಿದೆ ಕಲರ್ಸ್‌ ಕನ್ನಡ ವಾಹಿನಿ.
ಕಳೆದ ಬಾರಿಯ ಅಂದರೆ 9ನೇ ಸೀಸನ್‌ ಸೆಪ್ಟೆಂಬರ್‌ 24ರಂದು ಪ್ರಸಾರ ಆರಂಭಿಸಿತ್ತು. ಇದೀಗ ಈ ಸಲದ ಬಿಗ್‌ಬಾಸ್‌ ಸೀಸನ್‌ 10ಕ್ಕೂ ಅದೇ ದಿನಾಂಕವೇ ನಿಗದಿ ಆಗಿದೆಯೇ? ಸದ್ಯಕ್ಕೆ ಅದನ್ನು ವಾಹಿನಿಯೇ ಅಧಿಕೃತವಾಗಿ ಘೋಷಿಸಬೇಕು. ಆದರೆ, ಇದೀಗ ಬಿಗ್‌ಬಾಸ್‌ನ ಮೊದಲ ಪ್ರೋಮೋ ಬಿಡುಗಡೆ ಆಗಿದೆ. ಈ ಮೂಲಕ ಬಹುದಿನಗಳಿಂದ ಕಾದಿದ್ದ ಬಿಗ್‌ಬಾಸ್‌ ವೀಕ್ಷಕರಿಗೆ ಸರ್ಪ್ರೈಸ್‌ ಕೊಟ್ಟಿದೆ. ಅದರಲ್ಲೂ ಈ ಶೋನ ನಿರೂಪಕ ಕಿಚ್ಚ ಸುದೀಪ್‌ ಅವರ ಬರ್ತ್‌ಡೇಗೇ ಈ ಪ್ರೋಮೋ ಬಿಡಗಡೆಯಾಗಿದೆ.
ಕಿಚ್ಚನ ಬರ್ತ್‌ಡೇ ಪ್ರಯುಕ್ತ ಪ್ರೋಮೋ
ಕಳೆದ 9 ಸೀಸನ್‌ಗಳು ಯಶಸ್ವಿಯಾಗಲು ಈ ಶೋನ ನಿರೂಪಕ ಕಿಚ್ಚ ಸುದೀಪ್‌ ಸಹ ಮುಖ್ಯ ಪಾತ್ರವಹಿಸಿದ್ದಾರೆ. ಇದೀಗ 10ನೇ ಸೀಸನ್‌ ಆರಂಭಕ್ಕೂ ಮುನ್ನವೇ, ಸುದೀಪ್‌ ಅವರ ಬರ್ತ್‌ಡೇ ದಿನವಾದ ಸೆ. 2ಕ್ಕೆ ಬಿಗ್‌ಬಾಸ್‌ ಸೀಸನ್‌ 10ರ ಮೊದಲ ಪ್ರೋಮೋ ಬಿಡುಗಡೆ ಆಗಿದೆ. ಅಸಲಿ ಆಟ ಇನ್ಮೇಲೆ ಶುರು ಎನ್ನುವುದರ ಜತೆಗೆ ಸಮ್‌ಥಿಂಗ್‌ ಸ್ಪೆಷಲ್ ಎಂದೂ ಪ್ರೋಮೋದಲ್ಲಿ ಬಿಗ್‌ಬಾಸ್‌ ಹೇಳಿದ್ದಾರೆ. ಆದರೆ, ಬಿಗ್‌ಬಾಸ್‌ ಯಾವಾಗ ಶುರು? ಎಂಬ ಬಗ್ಗೆ ದಿನಾಂಕ ಮಾತ್ರ ಪ್ರೋಮೋದಲ್ಲಿಲ್ಲ.
ಸಮ್‌ಥಿಂಗ್‌ ಸ್ಪೆಷಲ್
ಬಿಡುಗಡೆ ಆಗಿರುವ ಪ್ರೋಮೋದಲ್ಲಿ ನಿಜಕ್ಕೂ ಸಮ್‌ಥಿಂಗ್‌ ಸ್ಪೆಷಲ್ ಇರಬಹುದು ಎನಿಸುತ್ತದೆ. ಅದಕ್ಕೆ ಕಾರಣ, ಬಿಗ್‌ಬಾಸ್‌ ಹೌಸ್‌ನ ಕ್ಯಾಮರಾಗಳನ್ನು ತೋರಿಸದೇ, ಬೀದಿ ಬೀದಿಯಲ್ಲಿ ಅಳವಡಿಸಿರುವ ಕ್ಯಾಮರಾಗಳನ್ನು ಪ್ರೋಮೋದಲ್ಲಿ ತೋರಿಸಿರುವುದು. ರಸ್ತೆಯಲ್ಲಿನ ಸಾಮಾನ್ಯ ಜನರ ಚಲನ ವಲನಗಳನ್ನು ಕ್ಯಾಮರಾದಲ್ಲಿ ಸೆರೆಹಿಡಿಯಲಾಗುತ್ತಿದೆ. ಈ ಮೂಲಕ ಹೊಸದೇನನ್ನೋ ಪರಿಚಯಿಸುವ ಲೆಕ್ಕಾಚಾರದಲ್ಲಿದೆ ಈ ಸಲದ ಬಿಗ್‌ಬಾಸ್‌ ಸೀಸನ್‌ 10. "ನಮಸ್ತೆ ಕರ್ನಾಟಕ, ಹೇಗಿದ್ದೀರಾ? ನನ್ನನ್ನು ಮಿಸ್‌ ಮಾಡಿಕೊಂಡ್ರಾ? ಇಟ್ಟ ನೋಟ ಗಟ್ಟಿಯಾಗಿದೆ. ಆಟ ಮತ್ತೆ ಶುರುವಾಗ್ತಿದೆ. ಆದರೆ ಈ ಬಾರಿ ಸಮ್‌ಥಿಂಗ್‌ ಸ್ಪೆಷಲ್" ಎಂಬ ಬಿಗ್‌ಬಾಸ್‌ ಹಿನ್ನೆಲೆ ಧ್ವನಿಯಲ್ಲಿ ಪ್ರೋಮೋ ಮೂಡಿಬಂದಿದೆ.
ಒಟಿಟಿ ಬಿಗ್‌ಬಾಸ್‌ ಇಲ್ವಾ?
ಸದ್ಯದ ಬೆಳವಣಿಗೆ ನೋಡುವುದಾದರೆ, ಒಟಿಟಿ ಬಿಗ್‌ಬಾಸ್‌ ಅನ್ನು ಕಲರ್ಸ್‌ ಕನ್ನಡ ವಾಹಿನಿ ಕೈ ಬಿಟ್ಟಂತಿದೆ. ಕಳೆದ ವರ್ಷ ಒಟಿಟಿ ಬಿಗ್‌ಬಾಸ್‌ನ ಮೊದಲ ಸೀಸನ್‌ ಆರಂಭವಾಗಿತ್ತು. ಆದರೆ, ಈ ಬಾರಿ ಅದರ ಸುಳಿವೇ ಇಲ್ಲ. ನೇರವಾಗಿ ಕಿರುತೆರೆಯ ಶೋನ 10ನೇ ಸೀಸನ್‌ನ ಪ್ರೋಮೋ ಬಿಡುಗಡೆ ಮಾಡಲಾಗಿದೆ. ಇದೆಲ್ಲದರ ಜತೆಗೆ ಇಲ್ಲಿಯವರೆಗೂ ಅಂದರೆ 9 ಸೀಸನ್‌ಗಳ ಹೊಣೆಯನ್ನು ವಾಹಿನಿ ಹೆಡ್‌ ಆಗಿದ್ದ ಪರಮೇಶ್ವರ್‌ ಗುಂಡ್ಕಲ್‌ ಹೊತ್ತಿದ್ದರು. ಇದೀಗ ಅವರ ಅನುಪಸ್ಥಿತಿಯಲ್ಲಿಯೇ ಶೋ ಶುರುವಾಗಲಿದೆ.
ಮನರಂಜನೆ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್‌ ಮಾಡಿ
