Thalaivar 170: ತಲೈವರ್‌ ಚಿತ್ರದಲ್ಲಿ ಬಿಗ್‌ಬಿ; 32 ವರ್ಷಗಳ ಬಳಿಕ ರಜನಿಕಾಂತ್ ಜತೆ ಅಮಿತಾಬ್‌ ಬಚ್ಚನ್‌ ನಟನೆ
Amitabh Bachchan joins Rajinikanth Film: ರಜನಿಕಾಂತ್ ಅವರ ಮುಂಬರುವ ಚಿತ್ರ Thalaivar 170ಗೆ ಪ್ರಮುಖ ನಟರ ಸೇರ್ಪಡೆಯಾಗುತ್ತಿದೆ. ಕಾಲಿವುಡ್‌ನಿಂದ ಬಂದ ಲೇಟೆಸ್ಟ್‌ ಅಪ್‌ಡೇಟ್‌ ಪ್ರಕಾರ ರಜನಿಕಾಂತ್ ಅವರ ತಲೈವರ್‌ 170 ಚಿತ್ರದಲ್ಲಿ ಬಿಗ್‌ಬಿ ಅಮಿತಾಬ್‌ ಬಚ್ಚನ್‌ ನಟಿಸಲಿದ್ದಾರೆ. ಈ ಕುರಿತು ಲೈಕಾ ಪ್ರೊಡಕ್ಷನ್‌ ಅಧಿಕೃತ ಅಪ್‌ಡೇಟ್‌ ನೀಡಿದೆ.
ಬೆಂಗಳೂರು: ಸೂಪರ್‌ಸ್ಟಾರ್‌ ರಜನಿಕಾಂತ್ ಅವರ ಮುಂಬರುವ ಚಿತ್ರ ತಲೈವರ್‌ 170ಯಲ್ಲಿ ಭಾರತದ ಸಿನಿಜಗತ್ತಿನ ಬಹುಮುಖ ಪ್ರತಿಭೆಗಳು ನಟಿಸಲಿದ್ದಾರೆ. ಈಗಾಗಲೇ ದಕ್ಷಿಣ ಭಾರತದ ಕೆಲವರು ನಟರು ಈ ಟೀಮ್‌ಗೆ ಸೇರಿದ್ದಾರೆ. ಇದೀಗ ಬಾಲಿವುಡ್‌ನ ಬಿಗ್‌ಬಿ ಎಂದೇ ಖ್ಯಾತಿಪಡೆದಿರುವ ಅಮಿತಾಬ್‌ ಬಚ್ಚನ್‌ ಅವರು ತಲೈವರ್‌ ತಂಡಕ್ಕೆ ಸೇರ್ಪಡೆಯಾಗುವುದು ಖಚಿತವಾಗಿದೆ. ಈ ಕುರಿತು ಲೈಕಾ ಪೊಡಕ್ಷನ್‌ ಅಪ್‌ಡೇಟ್‌ ನೀಡಿದೆ.
"ಭಾರತೀಯ ಚಿತ್ರರಂಗದದ ಶಾಹೆನ್‌ಶಾ ಅವರಿಗೆ ಸ್ವಾಗತ. ತಲೈವರ್‌ 170 ಚಿತ್ರದ ತಂಡಕ್ಕೆ ಶ್ರೀಯುತ ಅಮಿತಾಬ್‌ ಬಚ್ಚನ್‌ ಆಗಮಿಸುತ್ತಿದ್ದಾರೆ. ಈ ಮೂಲಕ ಚಿತ್ರಕ್ಕೆ ಸರಿಸಾಟಿಯಿಲ್ಲದ ಏಕೈಕ ಪ್ರತಿಭೆ ಅಮಿತಾಬ್‌ ಬಚ್ಚನ್‌ ಅವರನ್ನು ಸ್ವಾಗತಿಸುತ್ತಿದ್ದೇವೆ" ಎಂದು ಲೈಕಾ ಪ್ರೊಡಕ್ಷನ್‌ ಸೋಷಿಯಲ್‌ ಮೀಡಿಯಾದಲ್ಲಿ ಅಪ್‌ಡೇಟ್‌ ನೀಡಿದೆ.
32 ವರ್ಷಗಳ ಬಳಿಕ ಅಮಿತಾಬ್‌- ರಜನಿ ಚಿತ್ರ
ರಜನಿಕಾಂತ್ ಮತ್ತು ಅಮಿತಾಬ್‌ ಬಚ್ಚನ್‌ ಅಭಿಮಾನಿಗಳು ಥ್ರಿಲ್‌ ಆಗಲು ಪ್ರಮುಖ ಕಾರಣವಿದೆ. ಇವರಿಬ್ಬರು ಜತೆಯಾಗಿ ಸಿನಿಮಾ ಮಾಡಿ ಬರೋಬ್ಬರಿ 32 ವರ್ಷಗಳು ಕಳೆದಿವೆ. ಇವರು 1991ರಲ್ಲಿ ಕೊನೆಯ ಬಾರಿ ಫ್ಯಾಮಿಲಿ ಡ್ರಾಮಾ ಹಮ್‌ನಲ್ಲಿ ಜತೆಯಾಗಿ ನಟಿಸಿದ್ದರು. ತಲೈವರ್‌ ಚಿತ್ರದಲ್ಲಿ ಮತ್ತೆ ಇವರು ಒಂದಾಗಲಿದ್ದಾರೆ. ಅಮಿತಾಬ್‌ ಬಚ್ಚನ್‌ ಅವರು ರಜನಿಕಾಂತ್ ಸಿನಿಮಾ, ಕೆಲಸಗಳನ್ನು ಮೊದಲಿನಿಂದಲೂ ಪ್ರೋತ್ಸಾಹಿಸುತ್ತ ಬಂದವರು. ರೋಬೊ ಚಿತ್ರದ ಪ್ರೆಸ್‌ ಕಾನ್ಫರೆನ್ಸ್‌ನಲ್ಲೂ ಅಮಿತಾಬ್‌ ಬಚ್ಚನ್‌ ಇದ್ದರು. ರೋಬೊ ಚಿತ್ರದಲ್ಲಿ ಅಮಿತಾಬ್‌ ಬಚ್ಚನ್‌ ಸೊಸೆ ಐಶ್ವರ್ಯ ರೈ ನಟಿಸಿದ್ದರು.
ತಲೈವರ್‌ 170 ಸಿನಿಮಾ ಹೆಸರಲ್ಲ
ಸದ್ಯ ಹೆಸರಿಡದ ಚಿತ್ರ "ತಲೈವರ್‌ 170"ಕ್ಕೆ ಪ್ರಮುಖ ನಟರು ಸೇರ್ಪಡೆಯಾಗುತ್ತಿದ್ದಾರೆ. ಈ ಸಿನಿಮಾದ ಕುರಿತು ಮಾರ್ಚ್‌ ತಿಂಗಳಲ್ಲಿ ಲೈಕಾ ಪ್ರೊಡಕ್ಷನ್‌ ಅಪ್‌ಡೇಟ್‌ ನೀಡಿತ್ತು. ಇದು ಜ್ಞಾನವೇಲು ಅವರ ನಿರ್ದೇಶನದ ಚಿತ್ರ. ತಲೈವಾರ 170ರ ಚಿತ್ರ. "ನನ್ನ 170ನೇ ಸಿನಿಮಾವನ್ನು ಜ್ಞಾನವೇಲು ನಿರ್ದೇಶಿಸಲಿದ್ದಾರೆ. ಸಾಮಾಜಿಕ ಸಂದೇಶದೊಂದಿಗೆ ಈ ಚಿತ್ರ ಪ್ರಮುಖ ಮನರಂಜನಾ ಚಿತ್ರವಾಗಿರಲಿದೆ" ಎಂದು 72 ವರ್ಷ ವಯಸ್ಸಿನ ನಟ ರಜನಿಕಾಂತ್ ಇತ್ತೀಚೆಗೆ ಚೆನ್ನೈ ಏರ್‌ಪೋರ್ಟ್‌ನಲ್ಲಿ ಪತ್ರಕರ್ತರಿಗೆ ಮಾಹಿತಿ ನೀಡಿದ್ದರು.
"ನಾನು ನನ್ನ 170ನೇ ಸಿನಿಮಾಕ್ಕೆ ಸಿದ್ಧವಾಗುತ್ತಿದ್ದೇನೆ. ಚಿತ್ರದ ಹೆಸರು ಇನ್ನೂ ನಿರ್ಧರಿಸಲಾಗಿಲ್ಲ" ಎಂದು ರಜನಿಕಾಂತ್ ಹೇಳಿದ್ದಾರೆ.
ಅಮಿತಾಬ್‌ ಬಚ್ಚನ್‌ ಅವರು ಇದಕ್ಕೂ ಮೊದಲು ಬ್ರಹ್ಮಾಸ್ತ್ರ, ಗುಡ್‌ಬೈ, ಉಂಚೈ ಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ಗಣಪತ್‌, ಕಲ್ಕಿ ಇವರ ಮುಂಬರುವ ಚಿತ್ರಗಳು.
ಸೂಪರ್‌ಸ್ಟಾರ್‌ ರಜನಿಕಾಂತ್ ಮುಂದಿನ ಚಿತ್ರ ತಲೈವರ್‌ 170 ಚಿತ್ರಕ್ಕೆ ಪ್ರಮುಖ ನಟರ ಸೇರ್ಪಡೆಯಾಗುತ್ತಿದೆ. ಮಲಯಾಳದ ಪ್ರಮುಖ ನಟ ಫಹಾದ್‌ ಫಾಸಿಲ್‌ ತಲೈವಾರ್‌ ಚಿತ್ರದಲ್ಲಿ ನಟಿಸಲಿದ್ದಾರೆ ಎಂದು ಈಗಾಗಲೇ ಲೈಕಾ ಘೋಷಿಸಿದೆ. ಈ ಹಿಂದೆ ಬಾಹುಬಲಿ ನಟ ರಾಣಾ ದಗ್ಗುಬಟ್ಟಿ, ಮಂಜು ವಾರಿಯರ್, ರಿತಿಕಾ ಸಿಂಗ್ ಮತ್ತು ದುಶಾರಾ ವಿಜಯನ್ ಈ ಸಿನಿಮಾ ತಂಡಕ್ಕೆ ಸೇರ್ಪಡೆಯಾಗಿದ್ದರು.
ಜೈಲರ್ ಚಿತ್ರದಲ್ಲಿ ರಜನಿಕಾಂತ್ ಜೊತೆ, ಲಿಯೋದಲ್ಲಿ ವಿಜಯ್ ಜೊತೆ ಮತ್ತು ಇತ್ತೀಚೆಗಷ್ಟೇ ಶಾರುಖ್ ಖಾನ್ ಜೊತೆ ಜವಾನ್ ಚಿತ್ರದಲ್ಲಿ ಕೆಲಸ ಮಾಡಿದ್ದ ಅನಿರುದ್ಧ್ ರವಿಚಂದರ್ ಅವರು ಚಿತ್ರದ ಸಂಗೀತ ನಿರ್ದೇಶಕರಾಗಿ ಸೇರ್ಪಡೆಯಾಗಿದ್ದಾರೆ. ಟಿಜೆ ಜ್ಞಾನವೇಲು ಅವರು ಈ ಚಿತ್ರದ ನಿರ್ದೇಶಕರಾಗಿದ್ದಾರೆ. ಈ ಹಿಂದೆ ಸೂರ್ಯ ಅಭಿನಯದ ಜೈಭೀಮ್‌ನಂತಹ ಸಿನಿಮಾಗಳನ್ನು ಮಾಡಿದ್ದಾರೆ.
