Chandramukhi 2: ರಾಘವ ಲಾರೆನ್ಸ್ ಲಕಲಕ ನೋಟ, ಚಂದ್ರಮುಖಿ ಚಿತ್ರದ ಫಸ್ಟ್‌ ಲುಕ್‌ ಪೋಸ್ಟರ್‌ ಬಿಡುಗಡೆ, ನೆಟ್ಟಿಗರ ಪ್ರತಿಕ್ರಿಯೆ ಹೀಗಿದೆ
ಚಂದ್ರಮುಖಿ 2 ಸಿನಿಮಾ ಈ ಗಣೇಶ ಚತುರ್ಥಿಗೆ ಬಿಡುಗಡೆಯಾಗಲಿದೆ. ಕನ್ನಡ ತಮಿಳು ಸೇರಿದಂತೆ ಹಲವು ಭಾಷೆಗಳಲ್ಲಿ ಪ್ಯಾನ್‌ ಇಂಡಿಯಾದಲ್ಲಿ ಬಿಡುಗಡೆಯಾಗಲಿರುವ ಈ ಸಿನಿಮಾದ ಫಸ್ಟ್‌ ಲುಕ್‌ ಪೋಸ್ಟರ್‌ ಬಿಡುಗಡೆಯಾಗಿದೆ. ಈ ಸಿನಿಮಾದಲ್ಲಿ ಕಂಗನಾ ರಣಾವತ್, ರಾಘವ ಲಾರೆನ್ಸ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.
ಬಹುನಿರೀಕ್ಷಿತ ಚಂದ್ರಮುಖಿ 2 ಸಿನಿಮಾ ಸದ್ಯದಲ್ಲಿಯೇ ಬಿಡುಗಡೆಯಾಗಲಿದೆ. ಈ ಸಿನಿಮಾ ಸಾಕಷ್ಟು ನಿರೀಕ್ಷೆ ಹುಟ್ಟುಹಾಕಿದೆ. ಈ ಚಿತ್ರದ ಕುರಿತು ಅಪ್‌ಡೇಟ್‌ಗಾಗಿ ಕಾಯುತ್ತಿದ್ದ ಸಿನಿಪ್ರಿಯರಿಗೆ ಸೋಮವಾರ ಅಚ್ಚರಿಯೊಂದು ಕಾದಿತ್ತು. ಚಂದ್ರಮುಖಿ 2 ನಿರ್ದೇಶಕರು ಮತ್ತು ಚಿತ್ರತಂಡವು ಸೋಮವಾರ ಫಸ್ಟ್‌ ಲುಕ್‌ ಪೋಸ್ಟರ್‌ ಬಿಡುಗಡೆ ಮಾಡಿದ್ದಾರೆ. ಚಂದ್ರಮುಖಿ 2 ಫಸ್ಟ್‌ಲುಕ್‌ ಪೋಸ್ಟರ್‌ನಲ್ಲಿ ರಾಘವ ಲಾರೆನ್ಸ್ ಉಡುಗೆ ಎಲ್ಲರ ಗಮನ ಸೆಳೆದಿದೆ. ವೆಟ್ಟೈಯನ್ ಎಂಬ ರಾಜನ ಪೋಷಕು ಧರಿಸಿರುವ ರಾಘವ ಲಾರೆನ್ಸ್ ಅದ್ಭುತವಾಗಿ ಪೋಸ್ಟರ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ.
2005ರಲ್ಲಿ ಚಂದ್ರಮುಖಿ ಸಿನಿಮಾದ ಮೊದಲ ಆವೃತ್ತಿ ಬಿಡುಗಡೆಯಾಗಿತ್ತು. ಆಗ ಸೂಪರ್‌ ಸ್ಟಾರ್‌ ರಜನಿಕಾಂತ್‌ ಅವರು ಈ ಚಿತ್ರದಲ್ಲಿ ನಾಯಕನಾಗಿದ್ದರು. ಇದೀಗ ಈ ಚಿತ್ರದಲ್ಲಿ ರಾಘವ ಲಾರೆನ್ಸ್ ನಟಿಸಿದ್ದಾರೆ. ಪಿ ವಾಸು ನಿರ್ದೇಶನದ ಚಂದ್ರಮುಖಿ 2 ಚಿತ್ರದಲ್ಲಿ ಕಂಗನಾ ರಣಾವತ್ ಕೂಡ ನಟಿಸಿದ್ದಾರೆ.
ಹೇಗಿದೆ ಚಂದ್ರಮುಖಿ 2 ಪೋಸ್ಟರ್‌
ಇಂದು ಬಿಡುಗಡೆ ಮಾಡಲಾದ ಫಸ್ಟ್‌ ಲುಕ್‌ ಪೋಸ್ಟರ್‌ನಲ್ಲಿ ತಮಿಳು ನಟ ರಾಘವ ಲಾರೆನ್ಸ್ ಅವರ ವೆಟ್ಟೈಯನ್ ಅವರ ಅರಮನೆಯ ಮೆಟ್ಟಿಲು ಇಳಿಯುವಂತಹ ದೃಶ್ಯದ ಚಿತ್ರವಿದೆ. ಮರೂನ್‌ ಜನಾಂಗದ ಉಡುಗೆ ತೊಟ್ಟ ಇವರು ರಾಜನ ಆಭರಣಗಳನ್ನು ಧರಿಸಿ ಮಿಂಚುತ್ತಿದ್ದಾರೆ. ಈ ಉಡುಗೆಯಲ್ಲಿ ಭವ್ಯವಾಗಿ ಕಾಣಿಸುವ ಇವರ ನೋಟವೂ ಮೋಡಿ ಮಾಡುವಂತೆ ಇದೆ.
ಟ್ವಿಟರ್ ಅಂದರೆ ಎಕ್ಸ್‌ನಲ್ಲಿ ಈ ಪೋಸ್ಟರ್‌ ಹಂಚಿಕೊಳ್ಳಲಾಗಿದೆ. ರಾಘವ ಲಾರೆನ್ಸ್ ಅವರು ಹಂಚಿಕೊಂಡ ಈ ಪೋಸ್ಟರ್‌ ಜತೆಗೆ ಕ್ಯಾಪ್ಷನ್‌ ಕೂಡ ಬರೆಯಲಾಗಿದೆ. ಈ ಚಿತ್ರಕ್ಕಾಗಿ ರಜನಿಕಾಂತ್‌ ಆಶೀರ್ವಾದ ಬೇಡಿದ ರಾಘವ ಲಾರೆನ್ಸ್ ನಿಮ್ಮ ಬೆಂಬಲಕ್ಕೆ ಧನ್ಯವಾದ ಎಂದಿದ್ದಾರೆ. "ತಲೈವಾ ಸೂಪರ್‌ಸ್ಟಾರ್‌ ರಜನಿಕಾಂತ್‌ ಅವರಿಗೆ ಧನ್ಯವಾದಗಳು. ಇಲ್ಲಿ ವಟ್ಟೈಯನ್‌ನ ಫಸ್ಟ್‌ ಲುಕ್‌ ಅನ್ನು ನಿಮ್ಮ ಮುಂದಿಡುತ್ತಿದ್ದೇವೆ. ನಿಮ್ಮೆಲ್ಲರ ಆಶೀರ್ವಾದ ಬೇಕು. ಈ ಗಣೇಶ ಚತುರ್ಥಿಯಂದು ತಮಿಳು, ಹಿಂದಿ, ತೆಲುಗು, ಮಲಯಾಳಂ ಮತ್ತು ಕನ್ನಡದಲ್ಲಿ ಚಂದ್ರಮುಖಿ 2 ಸಿನಿಮಾ ಬಿಡುಗಡೆ ಮಾಡಲಾಗುತ್ತದೆ" ಎಂದು ಅವರು ಟ್ವಿಟ್ಟರ್‌ನಲ್ಲಿ ಬರೆದುಕೊಂಡಿದ್ದಾರೆ. ಲೈಕಾ ಪ್ರೊಡಕ್ಷನ್‌ ಕೂಡ ಪೋಸ್ಟರ್‌ ಹಂಚಿಕೊಂಡಿದೆ. "ಎರಡು ರೀತಿಯ ವರ್ತನೆ, ಶಕ್ತಿಶಾಲಿ, ವಟೈಯನ್‌ ರಾಜನ ಬೆದರಿಕೆಯ ನೋಟವನ್ನು ನೋಡಿ" ಎಂದು ಬರೆಯಲಾಗಿದೆ.
ಜನರ ಪ್ರತಿಕ್ರಿಯೆ ಹೇಗಿದೆ?
ಚಂದ್ರಮುಖಿ'- 2 ಚಿತ್ರದಲ್ಲಿ ರಾಘವ ಲಾರೆನ್ಸ್ ಹಾಗೂ ಕಂಗನಾ ರಣಾವತ್ ಅವರು ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಇಂದು ಬಿಡುಗಡೆ ಮಾಡಲಾದ ಪೋಸ್ಟರ್‌ ಕುರಿತು ಜನರ ಪ್ರತಿಕ್ರಿಯೆ ನೀರಸವಾಗಿದೆ. ರಾಜ ವೆಟ್ಟೈಯನ್ ಅವತಾರದಲ್ಲಿ ರಾಘವ ಲಾರೆನ್ಸ್ ಕಾಣಿಸಿರುವ ರೀತಿ ಕೆಲವರಿಗೆ ಇಷ್ಟವಾಗಿಲ್ಲ. ಪ್ಯಾನ್‌ ಇಂಡಿಯಾ ಬಿಡುಗಡೆಯಾಗಲಿರುವ ಈ ಸಿನಿಮಾದ ಕುರಿತು ಜನರ ನಿರೀಕ್ಷೆ ಇದಕ್ಕಿಂತಲೂ ಹೆಚ್ಚಿತ್ತು ಎನ್ನಬಹುದು. ಈ ಪೋಸ್ಟರ್‌ ವಿನ್ಯಾಸ ಚೆನ್ನಾಗಿಲ್ಲ ಎನ್ನುವುದು ಬಹುತೇಕರ ಅಭಿಪ್ರಾಯ. ತಲೆ ಬೇರೆ, ದೇಹ ಬೇರೆ ಎನ್ನುವ ರೀತಿಯಲ್ಲಿ ಈ ಪೋಸ್ಟರ್‌ ಕಾಣಿಸುತ್ತಿದೆ ಎಂದು ಅನೇಕ ಜನರು ಬರೆದಿದ್ದಾರೆ.
ಆಪ್ತಮಿತ್ರದ ಪ್ರಭೆ
ಅಂದಹಾಗೆ ಚಂದ್ರಮುಖಿ ಸಿನಿಮಾಕ್ಕೂ ಸಾಹಸಸಿಂಹ ವಿಷ್ಣುವರ್ಧನ್‌ ನಟಿಸಿದ ಆಪ್ತಮಿತ್ರ ಸಿನಿಮಾಕ್ಕೂ ನಂಟಿದೆ. ಆಪ್ತಮಿತ್ರ ಸಿನಿಮಾವೇ ತಮಿಳಿನಲ್ಲಿ ಚಂದ್ರಮುಖಿ ಆಗಿ ರಿಮೇಕ್‌ ಆಗಿತ್ತು. ರಜನಿಕಾಂತ್‌ ಅವರು ಲಕ ಲಕ ಲಕ ಡೈಲಾಗ್‌ ಮೂಲಕ ಮೋಡಿ ಮಾಡಿದ್ದರು. ಈ ಸಿನಿಮಾದ ಸೀಕ್ವೇಲ್‌ ಪಾತ್ರವನ್ನೂ ರಜನಿಕಾಂತ್‌ ಮಾಡಬೇಕಿತ್ತು. ಆದರೆ, ಅವರು ಅದಕ್ಕೆ ಸಮ್ಮತಿಸಿರಲಿಲ್ಲ. ಹೀಗಾಗಿ, ಈ ಪಾತ್ರವನ್ನು ರಾಘವ ಲಾರೆನ್ಸ್‌ಗೆ ನೀಡಲಾಗಿತ್ತು. ರಾಘವ ಲಾರೆನ್ಸ್ ಅವರು ಚಂದ್ರಮುಖಿ 2ನಲ್ಲಿ ಲಕ ಲಕ ಲಕ ಎಂದು ಮೋಡಿ ಮಾಡುತ್ತಾರೋ ಎಂದು ಕಾದು ನೋಡಬೇಕಿದೆ.
