Kollywood News: ಕಾಲಿವುಡ್‌ನಲ್ಲಿ ತಾರಕಕ್ಕೆ ಏರಿದ ರಜನಿಕಾಂತ್‌ ವಿಜಯ್‌ ಫ್ಯಾನ್‌ ವಾರ್; ಏನದು ತಲೈವಾ ಹೇಳಿದ ಹದ್ದು ಕಾಗೆ ಕಥೆ?
ಹದ್ದಿಗೆ ಸ್ವಾರ್ಥ ಸ್ವಭಾವ ಇದೆ. ಸೂಪರ್‌ ಸ್ಟಾರ್‌ ರಜನಿಕಾಂತ್‌ಗೆ ತನ್ನ ಹೆಸರನ್ನು ಹೇಳಿಕೊಳ್ಳುವ ಧೈರ್ಯ ಇಲ್ಲ ಎಂದು ಯೂಟ್ಯೂಬರ್‌ ಸಟ್ಟೈ ಮಾರನ್‌ ಟ್ವೀಟ್‌ ಮಾಡಿದ್ದಾರೆ. ಈ ಟ್ವೀಟ್‌ ಈಗ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ.
ಸೂಪರ್‌ಸ್ಟಾರ್‌ ರಜನಿಕಾಂತ್‌ ಅಭಿನಯದ 'ಜೈಲರ್‌ 'ಸಿನಿಮಾ ಬಿಡುಗಡೆಗೆ ಇನ್ನು 3 ದಿನಗಳಷ್ಟೇ ಬಾಕಿ ಇದೆ. ಚಿತ್ರದಲ್ಲಿ ಸೆಂಚುರಿ ಸ್ಟಾರ್‌ ಶಿವರಾಜ್‌ಕುಮಾರ್‌ ಕೂಡಾ ನಟಿಸಿದ್ದು ಸಿನಿಮಾ ನೋಡಲು ಇಬ್ಬರೂ ಸ್ಟಾರ್‌ಗಳ ಅಭಿಮಾನಿಗಳು ಕಾಯುತ್ತಿದ್ದಾರೆ. ಕರ್ನಾಟದಲ್ಲಿ ತಮಿಳು ವರ್ಷನ್‌ ಹೆಚ್ಚಿನ ಸ್ಕ್ರೀನ್‌ಗಳಲ್ಲಿ ತೆರೆ ಕಾಣುತ್ತಿರುವುದು ಕನ್ನಡ ಸಿನಿಪ್ರಿಯರಿಗೆ ಬೇಸರವಾಗಿದ್ದರೂ ಬುಕ್ಕಿಂಗ್‌ ಮಾತ್ರ ಜೋರಾಗಿ ಸಾಗುತ್ತಿದೆ.
ರಜನಿ ಹೇಳಿದ ಕಾಗೆ ಹದ್ದಿನ ಕಥೆ
'ಜೈಲರ್‌' ಅಬ್ಬರದ ನಡುವೆ ತಮಿಳುನಾಡಿನಲ್ಲಿ ತಲೈವಾ ರಜನಿಕಾಂತ್‌ ಹಾಗೂ ದಳಪತಿ ವಿಜಯ್‌ ಅಭಿಮಾನಿಗಳ ನಡುವೆ ಸ್ಟಾರ್‌ ವಾರ್ ಶುರುವಾಗಿದೆ. ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಯೂಟ್ಯೂಬರ್‌ ಒಬ್ಬರು ರಜನಿಕಾಂತ್‌ ವಿರುದ್ಧ ಗರಂ ಆಗಿದ್ಧಾರೆ. ರಜನಿ ವಿರುದ್ಧ ಟ್ವೀಟ್‌ ಮಾಡಿ ಸುದ್ದಿಯಾಗಿದ್ದಾರೆ. ಇತ್ತೀಚೆಗ ಚೆನ್ನೈನಲ್ಲಿ ಅದ್ಧೂರಿಯಾಗಿ ನಡೆದ ಜೈಲರ್‌ ಆಡಿಯೋ ರಿಲೀಸ್‌ ಕಾರ್ಯಕ್ರಮದಲ್ಲಿ ರಜನಿಕಾಂತ್‌ ಹೇಳಿದ ಕಾಗೆ ಹಾಗೂ ಹದ್ದಿನ ಕಥೆ ವಿಜಯ್‌ ಅಭಿಮಾನಿಗಳನ್ನು ಕೆರಳಿಸಿದೆಯಂತೆ. ಇದಕ್ಕಾಗಿ ವಿಜಯ್‌ ಅಭಿಮಾನಿಗಳು ತಲೈವಾ ಬಗ್ಗೆ ಕೋಪಗೊಂಡಿದ್ದಾರೆ.
ಆಡಿಯೋ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ್ದ ತಲೈವಾ, ''ಹದ್ದಿನ ಗಾತ್ರ ಹಾಗೂ ಅದರ ತಾಕತ್ತನ್ನು ಅರ್ಥ ಮಾಡಿಕೊಳ್ಳದೆ ಕಾಗೆ, ಅದರೊಂದಿಗೆ ಹೋರಾಡಲು ಪ್ರಯತ್ನಿಸುತ್ತದೆ. ಹಾಗೇ ಹದ್ದು ಹಾರುವಷ್ಟು ಎತ್ತರಕ್ಕೆ ಎಂದಿಗೂ ಕಾಗೆ ಹಾರಾಟಲು ಸಾಧ್ಯವಿಲ್ಲ'' ಎಂದು ಹೇಳಿದ್ದರು. ಈ ಮಾತು ವಿಜಯ್‌ ಅಭಿಮಾನಿಗಳನ್ನು ಕೆರಳಿಸಿದೆ. ತಮಿಳು ಚಿತ್ರರಂಗದಲ್ಲಿ ಸೂಪರ್‌ ಸ್ಟಾರ್‌ ಯಾರು ಎಂಬ ಚರ್ಚೆ ಹಲವು ದಿನಗಳಿಂದ ನಡೆಯುತ್ತಿದೆ. ಈಗಾಗಲೇ ರಜನಿಕಾಂತ್‌ ಕಾಲಿವುಡ್‌ನಲ್ಲಿ ಸೂಪರ್‌ಸ್ಟಾರ್‌ ಎಂದು ಗುರುತಿಸಿಕೊಂಡಿದ್ದರೂ ದಳಪತಿ ಅಭಿಮಾನಿಗಳಿಗೆ ಆ ಬಿರುದಿನ ಮೇಲೆ ಕಣ್ಣಿತ್ತು ಎನ್ನಲಾಗಿದೆ. ರಜನಿಕಾಂತ್‌, ಆ ಮಾತುಗಳನ್ನು ವಿಜಯ್‌ ಕುರಿತಾಗಿ ಹೇಳಿದ್ದು ಅನ್ನೋದು ವಿಜಯ್‌ ಅಭಿಮಾನಿಗಳ ವಾದ.
ರಜನಿ ವಿರುದ್ಧ ಯೂಟ್ಯೂಬರ್‌ ಗರಂ
'ಜೈಲರ್‌' ಕಾರ್ಯಕ್ರಮದಲ್ಲಿ ರಜನಿ ಹೇಳಿದ ಮಾತುಗಳಿಗೆ ಸಟ್ಟೈ ಮಾರನ್‌ ಎಂಬ ಯೂಟ್ಯೂಬರ್‌ ''ಹದ್ದಿಗೆ ಮೇಲೆ ಏರುವ ಸಾಮರ್ಥ್ಯ ಬಿಟ್ಟರೆ ಬೇರೆ ಏನೂ ಗೊತ್ತಿಲ್ಲ. ಅದನ್ನು ಹೊರತುಪಡಿಸಿದರೆ ಹದ್ದು ಯಾವಾಗಲೂ ಏಕಾಂಗಿಯಾಗಿಯೇ ಇರುತ್ತೆ. ಹದ್ದಿಗೆ ಸ್ವಾರ್ಥ ಸ್ವಭಾವ ಇದೆ. ಸೂಪರ್‌ ಸ್ಟಾರ್‌ ರಜನಿಕಾಂತ್‌ಗೆ ತನ್ನ ಹೆಸರನ್ನು ಹೇಳಿಕೊಳ್ಳುವ ಧೈರ್ಯ ಇಲ್ಲ'' ಎಂದು ಟ್ವೀಟ್‌ ಮಾಡಿದ್ದಾರೆ. ಈ ಟ್ವೀಟ್‌ ಈಗ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ.
'ಜೈಲರ್‌' ಚಿತ್ರವನ್ನು ಸನ್‌ ಪಿಕ್ಚರ್ಸ್‌ ಬ್ಯಾನರ್‌ ಅಡಿ ನೆಲ್ಸನ್‌ ಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ. ಚಿತ್ರದ ಹಾಡುಗಳಿಗೆ ಅನಿರುದ್ಧ ರವಿಚಂದರ್‌ ಸಂಗೀತ ನೀಡಿದ್ದಾರೆ. ಈಗಾಗಲೇ ರಿಲೀಸ್‌ ಆಗಿರುವ ಕಾವಾಲಯ್ಯ ಹಾಡು ಸೂಪರ್‌ ಹಿಟ್‌ ಆಗಿದೆ. ಚಿತ್ರದಲ್ಲಿ ರಜನಿಕಾಂತ್‌ ಜೊತೆಗೆ ಮೋಹನ್‌ ಲಾಲ್‌, ಜಾಕಿಶ್ರಾಫ್‌, ಶಿವರಾಜ್‌ಕುಮಾರ್‌, ರಮ್ಯಕೃಷ್ಣನ್‌, ತಮನ್ನಾ ಭಾಟಿಯಾ, ನಾಗಬಾಬು, ಯೋಗಿ ಬಾಬು ಹಾಗೂ ಇನ್ನಿತರರು ನಟಿಸಿದ್ದಾರೆ. ಆಗಸ್ಟ್‌ 10 ರಂದು ಸಿನಿಮಾ ತೆರೆ ಕಾಣುತ್ತಿದೆ.
