ಮೇ ತಿಂಗಳಿನಲ್ಲಿ ಒಟಿಟಿಯಲ್ಲಿ ಬಿಡುಗಡೆಯಾಗುವ ಸಾಧ್ಯತೆ ಇರುವ ಮಲಯಾಳಂ ಸಿನಿಮಾಗಳು; ಒಂದು ಬ್ಲಾಕ್ಬಸ್ಟರ್
ಮಲಯಾಳಂ ಒಟಿಟಿ ಸಿನಿಮಾಗಳು: ಮುಂದಿನ ತಿಂಗಳು ಅಂದರೆ ಮೇ ತಿಂಗಳಿನಲ್ಲಿ ಹಲವು ಮಲಯಾಳಂ ಸಿನಿಮಾಗಳು ಒಟಿಟಿಯಲ್ಲಿ ಬಿಡುಗಡೆಯಾಗುವ ಸಾಧ್ಯತೆ ಇವೆ. ಅವುಗಳಲ್ಲಿ ಒಂದು ಬ್ಲಾಕ್ಬಸ್ಟರ್ ಸಿನಿಮಾವೂ ಇದೆ. ಇವುಗಳಲ್ಲಿ ಕೆಲವು ಏಪ್ರಿಲ್ ಎಂಡ್‌ನಲ್ಲಿ ಬಿಡುಗಡೆಯಾಗಲಿವೆ.
ಮಲಯಾಳಂ ಒಟಿಟಿ ಸಿನಿಮಾಗಳು: ಕನ್ನಡ ಮಾತ್ರವಲ್ಲದೆ ಭಾರತದ ವಿವಿಧ ಭಾಷಿಕರು ಒಳ್ಳೆಯ ಮಲಯಾಳಂ ಸಿನಿಮಾವಿದ್ದರೆ ಒಟಿಟಿಯಲ್ಲಿ ನೋಡುತ್ತಾರೆ. ಬಹುನಿರೀಕ್ಷಿತ ಮಾಲಿವುಡ್ ಸಿನಿಮಾಗಳು ಮೇ ತಿಂಗಳಲ್ಲಿ ಒಟಿಟಿಗೆ ಬರಲಿವೆ ಎಂಬ ಸೂಚನೆಗಳಿವೆ. ಇವುಗಳಲ್ಲಿ ಬ್ಲಾಕ್ಬಸ್ಟರ್ ಚಲನಚಿತ್ರ ಆಲಪ್ಪುಳ ಜಿಮ್ಖಾನಾ ಕೂಡ ಸೇರಿದೆ. ಮುಂದಿನ ತಿಂಗಳು ಒಟಿಟಿಗೆ ಆಗಮಿಸುವ ಸಿನಿಮಾಗಳ ವಿವರ ಇಲ್ಲಿದೆ.
ಮರಣಮಾಸ್
ಮಲಯಾಳಂನ ಸ್ಟಾರ್ ಹೀರೋ ಬಾಸಿಲ್ ಜೋಸೆಫ್ ನಟಿಸಿರುವ ಚಿತ್ರ ಇದು. ಅವರು ಹಾಸ್ಯ ಮತ್ತು ಭಾವನಾತ್ಮಕ ದೃಶ್ಯಗಳೆರಡರಲ್ಲೂ ಎಲ್ಲರ ಗಮನ ಸೆಳೆದ ಶ್ರೇಷ್ಠ ನಟ. ಬಾಸಿಲ್ ನಟಿಸಿರುವ ಈ ಚಿತ್ರ ಏಪ್ರಿಲ್ 10ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಯಿತು. ಅವರ ಪೊನ್ಮನ್ ಚಿತ್ರ ಈಗಾಗಲೇ ಜಿಯೋಹಾಟ್‌ಸ್ಟಾರ್‌ನಲ್ಲಿ ಮತ್ತು ಅವರ ಪ್ರವಿಂಕುಡು ಶೋಪ್ಪು ಚಿತ್ರ ಸೋನಿಲೈವ್ ಒಟಿಟಿಯಲ್ಲಿ ಸ್ಟ್ರೀಮಿಂಗ್ ಆಗುತ್ತಿದೆ. ಹಾಸ್ಯ ಮತ್ತು ಡಾರ್ಕ್ ಕಾಮಿಡಿ ಪ್ರಕಾರದಲ್ಲಿರುವ ಈ ಸಿನಿಮಾ ಮೇ ತಿಂಗಳಲ್ಲಿ ಒಟಿಟಿಗೆ ಪ್ರವೇಶಿಸಲಿದೆ.
ಅಲಪ್ಪುಳ ಜಿಮ್ಖಾನಾ
ನಟ ನಸ್ಲೆನ್ ನಟಿಸಿದ ಚಿತ್ರ ಆಲಪ್ಪುಳ ಜಿಮ್ಖಾನಾ. ವಿಷು ಹಬ್ಬಕ್ಕೆ ಬಿಡುಗಡೆಯಾದ ಈ ಚಿತ್ರ ಬ್ಲಾಕ್ಬಸ್ಟರ್ ಆಗಿ ಬಾಕ್ಸ್‌ ಆಫೀಸ್‌ನಲ್ಲಿ 50 ಕೋಟಿ ರೂಪಾಯಿ ಬಾಚಿಕೊಂಡಿತ್ತು. ಈ ಚಿತ್ರವು ಕಾಲೇಜು ಪ್ರವೇಶಕ್ಕಾಗಿ ಬಾಕ್ಸಿಂಗ್ ಸ್ಪರ್ಧೆಗಳಲ್ಲಿ ಭಾಗವಹಿಸುವ ಕೆಲವು ವಿದ್ಯಾರ್ಥಿಗಳ ಸುತ್ತ ಸುತ್ತುತ್ತದೆ. ಈ ಚಿತ್ರ ಮೇ ತಿಂಗಳಲ್ಲಿ ಒಟಿಟಿಯಲ್ಲಿ ಬಿಡುಗಡೆಯಾಗುವ ಸಾಧ್ಯತೆ ಇದೆ.
ಬಾಜೂಕಾ
ಬಾಜೂಕಾ ಮಲಯಾಳಂ ಮೆಗಾಸ್ಟಾರ್ ಮಮ್ಮುಟ್ಟಿ ನಟಿಸಿರುವ ಗೇಮ್ ಥ್ರಿಲ್ಲರ್ ಚಿತ್ರ. ಈ ಚಿತ್ರವೂ ವಿಷು ಹಬ್ಬದ ಸಂದರ್ಭದಲ್ಲಿ ಬಿಡುಗಡೆಯಾಯಿತು. ಈ ಚಿತ್ರ ಆರಂಭದಲ್ಲಿ ಗಲ್ಲಾಪೆಟ್ಟಿಗೆಯಲ್ಲಿ ಉತ್ತಮ ಪ್ರದರ್ಶನ ನೀಡಿತು, ಆದರೆ ನಂತರ ಕ್ರಮೇಣ ಗಳಿಕೆ ಕಡಿಮೆಯಾಗಿತ್ತು. ಆಲಪ್ಪುಳ ಜಿಮ್ಖಾನಾ ಚಿತ್ರದ ತೀವ್ರ ಸ್ಪರ್ಧೆಯಿಂದಾಗಿ ಬಾಜೂಕಾ ಕ್ರೇಜ್ ಕಡಿಮೆಯಾಗಿದೆ. ಚಿತ್ರಮಂದಿರಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ಪಡೆದ ಈ ಬಜೂಕಾ ಚಿತ್ರವು ಮೇ ತಿಂಗಳಲ್ಲಿ ಒಟಿಟಿಯಲ್ಲಿ ಬಿಡುಗಡೆಯಾಗುವ ಸಾಧ್ಯತೆ ಇದೆ.
ಡೊಮಿನಿಕ್ ಅಂಡ್ ದಿ ಲೇಡಿಸ್ ಪರ್ಸ್
ಮಮ್ಮುಟ್ಟಿ ನಟಿಸಿದ ಇನ್ನೊಂದು ಚಿತ್ರ ಡೊಮಿನಿಕ್ ಅಂಡ್ ದಿ ಲೇಡಿಸ್ ಪರ್ಸ್. ಈ ನಿಗೂಢ ಥ್ರಿಲ್ಲರ್ ಚಿತ್ರ ಈ ವರ್ಷದ ಜನವರಿ 23 ರಂದು ಬಿಡುಗಡೆಯಾಯಿತು. ಈ ಸಿನಿಮಾ ಒಟಿಟಿಗೆ ಯಾವಾಗ ಬರುತ್ತದೆ ಎಂಬ ವಿವರ ಅಧಿಕೃತವಾಗಿ ಲಭ್ಯವಿಲ್ಲ. ಕೆಲವು ವರದಿಗಳ ಪ್ರಕಾರ ಈ ಸಿನಿಮಾ ಮುಂದಿನ ತಿಂಗಳು ಒಟಿಟಿಯಲ್ಲಿ ರಿಲೀಸ್‌ ಆಗುವ ಸೂಚನೆಯಿದೆ. ಈ ಸಿನಿಮಾ ಅಮೆಜಾನ್‌ ಪ್ರೈಮ್‌ ವಿಡಿಯೋದಲ್ಲಿ ರಿಲೀಸ್‌ ಆಗಲಿದೆಯಂತೆ.
ಗೆಟ್ ಸೆಟ್ ಬೇಬಿ
ಗೆಟ್ ಸೆಟ್ ಬೇಬಿ ಕೂಡ ಫೆಬ್ರವರಿ 21 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಯಿತು, ಆದರೆ, ಅದು ಇನ್ನೂ ಒಟಿಟಿಗೆ ಬಂದಿಲ್ಲ. ಚೆಂಬನ್ ವಿನೋದ್ ಜೋಸ್, ಉನ್ನಿ ಮುಕುಂದನ್ ಮತ್ತು ನಿಖಿಲಾ ವಿಮಲ್ ನಟಿಸಿರುವ ಈ ಚಿತ್ರವು ಮೇ ತಿಂಗಳಲ್ಲಿ ಒಟಿಟಿಗೆ ಬರುವ ಸಾಧ್ಯತೆಯಿದೆ. ಮಾರ್ಕೊನಂತಹ ಆಕ್ಷನ್ ಥ್ರಿಲ್ಲರ್ ಮಾಡಿದ ನಂತರ ಉನ್ನಿ ಮುಕುಂದನ್ ಗೆಟ್ ಸೆಟ್ ಬೇಬಿ ಸಿನಿಮಾದಲ್ಲಿ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಬ್ರೋಮ್ಯಾನ್ಸ್
ಬ್ರೋಮ್ಯಾನ್ಸ್ ಒಂದು ಹಾಸ್ಯಮಯ ಚಿತ್ರವಾಗಿದ್ದು ಅರ್ಜುನ್ ಅಶೋಕನ್, ಮ್ಯಾಥ್ಯೂ ಥಾಮಸ್, ಸಂಗೀತ ಪ್ರತಾಪ್ ಮತ್ತು ಮಹಿಮಾ ನಂಬಿಯಾರ್ ನಟಿಸಿದ್ದಾರೆ. ಫೆಬ್ರವರಿ 14 ರಂದು ಪ್ರೇಮಿಗಳ ದಿನದಂದು ಬಿಡುಗಡೆಯಾದರೂ ಒಟಿಟಿಗೆ ಇನ್ನೂ ಆಗಮಿಸಿಲ್ಲ. ಇದು ಶಿಂಟೋ ಮತ್ತು ಬಿಂಟೋ ಸಹೋದರರ ಸುತ್ತ ಸುತ್ತುವ ಕಥೆ. ಶಿಂಟೋ ಕಾಣೆಯಾದ ನಂತರ, ಬಿಂಟೋ ಮತ್ತು ಅವನ ಸ್ನೇಹಿತರು ಅವನನ್ನು ಹುಡುಕಲು ಪ್ರಾರಂಭಿಸುತ್ತಾರೆ. ಈ ಚಿತ್ರ ಮೇ ತಿಂಗಳಲ್ಲಿ ಒಟಿಟಿಗೆ ಬರುವ ಸಾಧ್ಯತೆ ಇದೆ. ಹೀಗೆ ಹಲವು ಮಲಯಾಳಂ ಸಿನಿಮಾಗಳು ಒಟಿಟಿಗೆ ಆಗಮಿಸುವ ಸೂಚನೆಯಿದೆ.
Praveen Chandra B
