Coffee with Karan: ನಯನತಾರಾ ಫ್ಯಾನ್ಸ್ ಆಕ್ರೋಶ...ಲೇಡಿ ಸೂಪರ್​​​ಸ್ಟಾರ್​​​ಗೆ ಅವಮಾನ ಮಾಡಿದ್ರಾ ಕರಣ್ ಜೋಹರ್​​​​...?

ಬಾಲಿವುಡ್​ ಫಿಲ್ಮ್ ಮೇಕರ್ ಕರಣ್ ಜೋಹರ್ ನಡೆಸಿಕೊಡುವ ಕಾಫಿ ವಿತ್ ಕರಣ್ -7 ಈಗಾಗಲೇ 3 ಎಪಿಸೋಡ್​​ಗಳು ಪ್ರಸಾರವಾಗಿವೆ. ಮೊದಲ ಎಪಿಸೋಡ್​​​​ನಲ್ಲಿ ಆಲಿಯಾ ಭಟ್-ರಣವೀರ್ ಕಪೂರ್​ ಎರಡನೇ ಎಪಿಸೋಡ್​​​​​ನಲ್ಲಿ ಜಾನ್ವಿ ಕಪೂರ್​​-ಸಾರಾ ಅಲಿಖಾನ್ ಹಾಗೂ ಮೂರನೇ ಎಪಿಸೋಡ್​​​​​ನಲ್ಲಿ ಸಮಂತಾ-ಅಕ್ಷಯ್ ಕುಮಾರ್ ಭಾಗವಹಿಸಿದ್ದಾರೆ.

ಕೆಲವೊಮ್ಮೆ ಕರಣ್ ಜೋಹರ್ ಫಿಲ್ಟರ್ ಇಲ್ಲದ ಮಾತುಗಳಿಗಾಗಲೇ ಎಲ್ಲರ ಕೋಪಕ್ಕೆ ಗುರಿಯಾಗುತ್ತಾರೆ. ತಿಳಿದೋ ತಿಳಿಯದೆಯೋ ವಿವಾದಕ್ಕೆ ಒಳಗಾಗುತ್ತಾರೆ. ಇದೀಗ ದಕ್ಷಿಣ ಭಾರತದ ನಟಿಯೊಬ್ಬರನ್ನು ಕರಣ್ ಜೋಹರ್ ತಮ್ಮ ಕಾರ್ಯಕ್ರಮದಲ್ಲಿ ಅವಮಾನ ಮಾಡಿದ್ದಾರೆ ಎನ್ನಲಾಗುತ್ತಿದೆ. ಕಳೆದ ಎಪಿಸೋಡ್​​​​ನಲ್ಲಿ ಸಮಂತಾ ಹಾಗೂ ಅಕ್ಷಯ್ ಕುಮಾರ್ ಭಾಗವಹಿಸಿದ್ದರು. ಈ ವೇಳೆ ಸಮಂತಾ ಅವರೊಂದಿಗೆ ಮಾತನಾಡುವಾಗ ಕರಣ್ ಜೋಹರ್, ಖ್ಯಾತ ನಟಿ ನಯನತಾರಾ ಅವರಿಗೆ ಅವಮಾನ ಮಾಡಿದ್ದಾರೆ ಎಂದು ಅವರ ಅಭಿಮಾನಿಗಳು ಆರೋಪಿಸಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿ ನಯನತಾರಾ ಅಭಿಮಾನಿಗಳು ಕರಣ್ ಹಾಗೂ ಅವರ ಕಾರ್ಯಕ್ರಮದ ವಿರುದ್ಧ ಅಸಮಾಧಾನ ಹೊರ ಹಾಕಿದ್ದಾರೆ.

ಖಾಸಗಿ ಸಂಸ್ಥೆಯೊಂದು ನಡೆಸಿದ ಸಮೀಕ್ಷೆಯೊಂದನ್ನು ಆಧರಿಸಿ ಕರಣ್ ಜೋಹರ್​, ಸಮಂತಾಗೆ ಒಂದು ಪ್ರಶ್ನೆ ಕೇಳಿದ್ದರು. ದಕ್ಷಿಣ ಭಾರತದಲ್ಲಿ ಈಗ ಟಾಪ್ ನಟಿ ಯಾರು ಎಂದು ಪ್ರಶ್ನಿಸಿದ್ದರು. ಇದಕ್ಕೆ ಸಮಂತಾ, ನಯನತಾರಾ ಎಂದು ಉತ್ತರಿಸಿದ್ದರು. ಆದರೆ ಸಮೀಕ್ಷೆ ಪ್ರಕಾರ ಸದ್ಯಕ್ಕೆ ಸಮಂತಾ ಆ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ. ಸಮಂತಾ ಉತ್ತರಕ್ಕೆ ಪ್ರತಿಕ್ರಿಯಿಸಿದ ಕರಣ್ ಜೋಹರ್, ನಯನತಾರಾ ನನ್ನ ಪಟ್ಟಿಯಲ್ಲಿ ಇಲ್ಲ ಎಂದಿದ್ದರು. ಸಮೀಕ್ಷೆ ಬಗ್ಗೆ ತಿಳಿದು ಕರಣ್ ಜೋಹರ್ ಬೇಕಂತಲೇ ಈ ಪ್ರಶ್ನೆ ಕೇಳಿದ್ದಾರೆ. ಈ ಮೂಲಕ ನಯನತಾರಾ ಅವರಿಗೆ ಕರಣ್ ಜೋಹರ್ ಅಪಮಾನ ಮಾಡಿದ್ದಾರೆ ಎಂದು ಲೇಡಿ ಸೂಪರ್​​ಸ್ಟಾರ್ ಅಭಿಮಾನಿಗಳು ಕರಣ್ ಅವರತ್ತ ಬೆರಳು ತೋರುತ್ತಿದ್ದಾರೆ. ಈ ವಿಡಿಯೋ ಕ್ಲಿಪಿಂಗ್ ಈಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದು, ಕರಣ್ ಜೋಹರ್ ವರ್ತನೆಗೆ ಆಕ್ಷೇಪ ವ್ಯಕ್ತವಾಗುತ್ತಿದೆ.

ಕಾಫಿ ವಿತ್ ಕರಣ್ ಕಾರ್ಯಕ್ರಮದ ಬಗ್ಗೆ ಬಹಳ ದಿನಗಳಿಂದ ಆಕ್ಷೇಪ ವ್ಯಕ್ತವಾಗುತ್ತಲೇ ಇದೆ. ಈ ಕಾರ್ಯಕ್ರಮ ಎಂದರೆ ಇದರಲ್ಲಿ ವಿವಾದ ಇದ್ದೇ ಇರುತ್ತದೆ. ಕರಣ್ ಜೋಹರ್​, ಕೇಳುವ ಪ್ರಶ್ನೆಗಳೆಲ್ಲಾ ಅಸಂಬದ್ಧವಾಗಿರುತ್ತದೆ ಎಂದು ಅನೇಕರು ಈ ಕಾರ್ಯಕ್ರಮದ ಬಗ್ಗೆ ವಿರೋಧ ವ್ಯಕ್ತಪಡಿಸುತ್ತಲೇ ಇದ್ದಾರೆ. ಇದಕ್ಕೆ ಪೂರಕ ಎಂಬಂತೆ ಈ ಸೀಸನ್​​​ನಲ್ಲಿ ಕೂಡಾ ಕರಣ್ ಜೋಹರ್ ಅಂತದ್ದೇ ಪ್ರಶ್ನೆಗಳನ್ನು ಕೇಳುವ ಮೂಲಕ ಮತ್ತೆ ವಿವಾದ ಹುಟ್ಟುಹಾಕುತ್ತಲೇ ಇದ್ದಾರೆ.

ಸಮಂತಾ ವಿಚಾರಕ್ಕೆ ಬರುವುದಾದರೆ, ನಾಗಚೈತನ್ಯ ಅವರಿಂದ ಡಿವೋರ್ಸ್ ಪಡೆದ ಬಳಿಕ ಅವರು ಎಂದಿನಂತೆ ಸಿನಿಮಾಗಳತ್ತ ಹೆಚ್ಚು ಗಮನ ನೀಡುತ್ತಿದ್ದಾರೆ. 'ಯಶೋದ', 'ಶಾಕುಂತಲಂ' ಸಿನಿಮಾಗಳ ನಂತರ ಅವರಿಗೆ ಬಾಲಿವುಡ್‌ನಲ್ಲೂ ಬೇಡಿಕೆ ಹೆಚ್ಚಾಗಿದೆಯಂತೆ. ಬಾಲಿವುಡ್ ಮಂದಿ 'ಫ್ಯಾಮಿಲಿ ಮ್ಯಾನ್‌ 2' ಸೀರೀಸ್​​​​​ನಲ್ಲಿ ಸಮಂತಾ ಅಭಿನಯ ನೋಡಿ ಮೆಚ್ಚಿಕೊಂಡಿದ್ದಾರೆ. ಇನ್ನಿತರ ಹಿಂದಿ ಪ್ರಾಜೆಕ್ಟ್‌ಗಳಲ್ಲಿ ಕೂಡಾ ಸಮಂತಾ ಹೆಸರು ಕೇಳಿಬರುತ್ತಿದೆ. ನಟ ವಿಕ್ಕಿ ಕೌಶಾಲ್‌ ಜೊತೆಗೂ ಸಮಂತಾ ಸಿನಿಮಾ ಮಾಡಲಿದ್ದಾರೆ ಎನ್ನಲಾಗುತ್ತಿದೆ. The Immortal Ashwatthama ಚಿತ್ರದಲ್ಲಿ ನಾಯಕಿಯಾಗಿ ಸಮಂತಾ ನಟಿಸಲಿದ್ದಾರಂತೆ. ಈ ಚಿತ್ರವನ್ನು 'ಉರಿ' ಸಿನಿಮಾ ಖ್ಯಾತಿಯ ಆದಿತ್ಯಧರ್​​​​ ನಿರ್ದೇಶನ ಮಾಡಲಿದ್ದಾರೆ ಎನ್ನಲಾಗಿದೆ.