ತಂಗಲಾನ್‌, ಲಬ್ಬರ್ ಪಂದು ಸೇರಿ ಈ ದೀಪಾವಳಿಗೆ ಒಟಿಟಿಯಲ್ಲಿ ಸ್ಟ್ರೀಮ್‌ ಆಗಲಿರುವ ಕಂಟೆಂಟ್‌ಗಳು; ಮಿಸ್‌ ಮಾಡ್ಕೊಬೇಡಿ
ನೆಟ್‌ಫ್ಲಿಕ್ಸ್‌, ಅಮೆಜಾನ್‌ ಪ್ರೈಂ ವಿಡಿಯೋ, ಡಿಸ್ನಿ ಹಾಟ್‌ಸ್ಟಾರ್‌, ಜೀ5 ಸೇರಿದಂತೆ ವಿವಿಧ ಒಟಿಟಿ ವೇದಿಕೆಗಳಲ್ಲಿ ಅಕ್ಟೋಬರ್‌ 27 ರಿಂದ ನವೆಂಬರ್‌ 3ವರೆಗೆ ಸಿನಿಮಾಗಳು, ವೆಬ್‌ ಸೀರಿಸ್ ಸೇರಿದಂತೆ ವಿವಿಧ ಕಂಟೆಂಟ್‌ಗಳು ಸ್ಟ್ರೀಮ್‌ ಆಗಲಿವೆ. ಅವುಗಳಲ್ಲಿ ತಂಗಲಾನ್‌, ಲಬ್ಬರ್ ಪಂದು, ಮೇಯಳಗನ್‌ ಸಿನಿಮಾಗಳು ಪ್ರಮುಖವಾಗಿವೆ.
ದೀಪಾವಳಿ ಹತ್ತಿರ ಬಂತು. ಸಿಹಿ, ಪಟಾಕಿ, ಹೊಸ ವಸ್ತ್ರ, ಪೂಜೆ ಪುನಸ್ಕಾರ ಸೇರಿದಂತೆ ಆಪ್ತ ಸ್ನೇಹಿತರು, ಸಂಬಂಧಿಗಳು ಜೊತೆ ಸೇರಿ ಸಂಭ್ರಮಿಸುವ ಹಬ್ಬಕ್ಕೆ ಮತ್ತಷ್ಟು ಮೆರುಗು ನೀಡಲು ಒಟಿಟಿಯಲ್ಲಿ ಹೊಸ ಸಿನಿಮಾಗಳು ರಿಲೀಸ್‌ ಆಗುತ್ತಿವೆ. ಅಕ್ಟೋಬರ್‌ 27 ರಿಂದ ನವೆಂಬರ್‌ 3ವರೆಗೆ ನೆಟ್‌ಫ್ಲಿಕ್ಸ್‌, ಅಮೆಜಾನ್‌ ಪ್ರೈಂ ವಿಡಿಯೋ, ಡಿಸ್ನಿ ಹಾಟ್‌ಸ್ಟಾರ್‌, ಜೀ5 ಸೇರಿದಂತೆ ವಿವಿಧ ಒಟಿಟಿ ವೇದಿಕೆಗಳಲ್ಲಿ ಯಾವ ಯಾವ ಸಿನಿಮಾಗಳು ಸ್ಟ್ರೀಮಿಂಗ್‌ ಆರಂಭಿಸಲಿವೆ ನೋಡೋಣ.
ಚಿಯಾನ್‌ ವಿಕ್ರಮ್ ಅಭಿನಯದ ತಂಗಲಾನ್‌
ಬಹುನಿರೀಕ್ಷಿತ ಸಿನಿಮಾ ತಂಗಲಾನ್‌ ಅಕ್ಟೋಬರ್‌ 31 ರಂದು ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮಿಂಗ್‌ ಆರಂಭಿಸಲಿದೆ. ಕರ್ನಾಟಕದ ಕೋಲಾರ ಚಿನ್ನದ ಗಣಿಯಲ್ಲಿ ಕೆಲಸ ಮಾಡುವ ಗಣಿ ಕಾರ್ಮಿಕರ ಜೀವನದ ಸುತ್ತಲಿನ ಕಥೆಯನ್ನು ತಂಗಲಾನ್‌ ಚಿತ್ರದಲ್ಲಿ ತೋರಿಸಲಾಗಿದೆ. ಚಿತ್ರದಲ್ಲಿ ವಿಕ್ರಮ್, ಪಾರ್ವತಿ ತಿರುವೋತ್ತು, ಮಾಳವಿಕಾ ಮೋಹನನ್, ಡೇನಿಯಲ್ ಕಾಲ್ಟಗಿರೋನ್ , ಪಶುಪತಿ ಹಾಗೂ ಇನ್ನಿತರರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಸಿನಿಮಾ ಆಗಸ್ಟ್‌ 15 ರಂದು ಚಿತ್ರಮಂದಿರಗಳಲ್ಲಿ ರಿಲೀಸ್‌ ಆಗಿತ್ತು.
ಜೋಕರ್: ಫೋಲಿ ಎ ಡ್ಯೂಕ್ಸ್
ಡ್ಯುಯಲ್ ಐಡೆಂಟಿಟಿ ಸಮಸ್ಯೆ ಎದುರಿಸುತ್ತಿರುವ ಹಾಸ್ಯನಟನ ಸುತ್ತ ಸುತ್ತುವ ಕಥೆಯನ್ನು ಈ ಚಿತ್ರದಲ್ಲಿ ತೋರಿಸಲಾಗಿದೆ. ಪ್ರೀತಿಯಲ್ಲಿ ಬಿದ್ದ ನಂತರ ನಾಯಕನ ಜೀವನ ಹೇಗೆ ಬದಲಾಗುತ್ತದೆ ಅನ್ನೋದು ಬಹಳ ಇಂಟ್ರೆಸ್ಟಿಂಗ್‌ ಆಗಿದೆ. ಚಿತ್ರದಲ್ಲಿ ಲೇಡಿ ಗಾಗಾ, ಜೋಕ್ವಿನ್ ಫೀನಿಕ್ಸ್, ಝಾಜಿ ಬೀಟ್ಜ್, ಹ್ಯಾರಿ ಲಾಟೆ, ಜಾಕೋಬ್ ಲೋಫ್ಲ್ಯಾಂಡ್, ಬ್ರೆಂಡನ್ ಗ್ಲೀಸನ್ ಮತ್ತು ಟಿಮ್ ದಿಲ್ಲನ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಸಿನಿಮಾ ಪ್ರೈಮ್ ವಿಡಿಯೋದಲ್ಲಿ ಅಕ್ಟೋಬರ್‌ 29 ರಿಂದ ಸ್ಟ್ರೀಮಿಂಗ್‌ ಆಗಲಿದ್ದು ಬಾಡಿಗೆಗೆ ಲಭ್ಯವಿದೆ.
ತಮಿಳು ಸಿನಿಮಾ ಲಬ್ಬರ್ ಪಂದು
ಇಬ್ಬರು ಗಲ್ಲಿ ಕ್ರಿಕೆಟ್ ಸ್ಟಾರ್‌ಗಳ ಸುತ್ತ ಸುತ್ತುವ ಕಥೆ ಇರುವ ಲಬ್ಬರ್ ಪಂದು ತಮಿಳು ಸಿನಿಮಾ ಅಕ್ಟೋಬರ್‌ 31 ರಂದು ಡಿಸ್ನಿ ಪ್ಲಸ್‌ ಹಾಟ್‌ಸ್ಟಾರ್‌ನಲ್ಲಿ ಸ್ಟ್ರೀಮಿಂಗ್‌ ಆರಂಭಿಸಲಿದೆ. ನಾಯಕನು ಎದುರಾಳಿಯ ಮಗಳನ್ನು ಪ್ರೀತಿಸಲು ಅರಂಭಿಸಿದಾಗ ಇಬ್ಬರ ನಡುವಿನ ಪೈಪೋಟಿ ಇನ್ನಷ್ಟು ಹೆಚ್ಚಾಗುತ್ತದೆ. ಚಿತ್ರದಲ್ಲಿ ಹರೀಶ್ ಕಲ್ಯಾಣ್, ಸಂಜನಾ ಕೃಷ್ಣಮೂರ್ತಿ, ಸ್ವಸ್ತಿಕಾ, ಅಟ್ಟಕತ್ತಿ ದಿನೇಶ್, ಸಂಜನಾ ಗಲ್ರಾನಿ, ದೇವದರ್ಶಿನಿ, ಗೀತಾ ಕೈಲಾಸಂ ಹಾಗೂ ಇತರರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಮಿಥ್ಯ ಸೀಸನ್ 2 ವೆಬ್‌ ಸೀರಿಸ್
ಜುಹು ಮತ್ತು ರಿಯಾ ಎಂಬ ಇಬ್ಬರು ಸಹೋದರಿಯರ ಸುತ್ತ ಸುತ್ತುವ ಕಥೆ ಹೊಂದಿರುವ ಮಿಥ್ಯ ಸೀಸನ್ 2 ನವೆಂಬರ್‌ 2ರಿಂದ ಜೀ5ನಲ್ಲಿ ಸ್ಟ್ರೀಮ್‌ ಆಗಲಿದೆ. ಜುಹು ತನ್ನ ಕನಸಿನಂತೆ ಯಶಸ್ವಿ ಲೇಖಕಿಯಾಗಿ ಗೆಲುವು ಸಾಧಿಸುತ್ತಾಳೆ. ಆದರೆ ಕೆಲವೇ ದಿನಗಳಲ್ಲಿ ಆಕೆ ಕೃತಿಚೌರ್ಯದ ಆರೋಪ ಹೊತ್ತು ದೊಡ್ಡ ಸವಾಲುಗಳನ್ನು ಎದುರಿಸುತ್ತಾಳೆ. ಈ ನಡುವೆ ರಿಯಾ, ಸಹೋದರಿಯ ಪರಿಸ್ಥಿತಿಯ ಪ್ರಯೋಜನವನ್ನು ತೆಗೆದುಕೊಳ್ಳುತ್ತಾಳೆ. ಮುಂದೆ ಜುಹು ಈ ಸಮಸ್ಯೆಯಿಂದ ಹೇಗೆ ಹೊರ ಬರುತ್ತಾಳೆ ಎನ್ನುವುದು ಈ ವೆಬ್‌ ಸರಣಿ ಕಥೆ. ಹುಮಾ ಖುರೇಷಿ, ಆವಂತಿಕಾ ದಸ್ಸಾನಿ, ರಜಿತ್ ಕಪೂರ್, ಇಂದ್ರನೇಲ್ ಸೇನ್‌ಗುಪ್ತಾ, ಆವಂತಿಕಾ ಅಕೇರ್ಕರ್, ರುಷದ್ ರಾಣಾ ಮತ್ತು ಕೃಷ್ಣ ಬಿಷ್ತ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ದಿ ಡಿಪ್ಲೊಮ್ಯಾಟ್ ಸೀಸನ್ 2
ಯುಸ್‌ ರಾಜಕೀಯ ಸನ್ನಿವೇಶದ ಸುತ್ತ ಸುತ್ತುವ ದಿ ಡಿಪ್ಲೊಮ್ಯಾಟ್ ಸೀಸನ್ 2 ನೆಟ್‌ಫ್ಲಿಕ್ಸ್‌ನಲ್ಲಿ ಅಕ್ಟೋಬರ್‌ 31ರಿಂದ ಸ್ಟ್ರಿಮ್‌ ಆಗಲಿದೆ. ಯುಎಸ್‌ ಉಪಾಧ್ಯಕ್ಷರ ಮೇಲೆ ಕಥೆಯನ್ನು ಕೇಂದ್ರೀಕರಿಸಲಾಗಿದೆ. ಕೆರಿ ರಸೆಲ್, ರುಫಸ್ ಸೆವೆಲ್, ಅಲಿ ಅಹ್ನ್ ಮತ್ತು ಡೇವಿಡ್ ಗ್ಯಾಸಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಕಿಷ್ಕಿಂಧಾ ಕಾಂಡಮ್‌ ಮಿಸ್ಟರಿ ಥ್ರಿಲ್ಲರ್ ಸಿನಿಮಾ
ಮಂಗಗಳು ವಾಸಿಸುವ ಹಳ್ಳಿಯಲ್ಲಿ ಸಂಭವಿಸುವ ವಿಚಿತ್ರ ಘಟನೆಗಳ ಸುತ್ತ ಸುತ್ತುವ ಮಲಯಾಳಂ ಸಿನಿಮಾ ಇದು. ಈ ಮಿಸ್ಟರಿ ಥ್ರಿಲ್ಲರ್ ಸಿನಿಮಾದಲ್ಲಿ ಆಸಿಫ್ ಅಲಿ, ಅಪರ್ಣಾ ಬಾಲಮುರಳಿ, ಜಗದೀಶ್, ವಿಜಯರಾಘವನ್, ಮೇಜರ್ ರವಿ ಮತ್ತು ನಿಜಗಲ್ ರವಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಸಿನಿಮಾ ನವೆಂಬರ್‌ 1 ರಿಂದ ಡಿಸ್ನಿ + ಹಾಟ್‌ಸ್ಟಾರ್‌ನಲ್ಲಿ ಸ್ಟ್ರೀಮ್‌ ಆಗಿದೆ.
ಕಾರ್ತಿ ಹಾಗೂ ಅರವಿಂದ್‌ ಸಾಮಿ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವ ಮೇಯಳಗನ್‌ ಈಗಾಗಲೇ ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮ್‌ ಆಗುತ್ತಿದೆ. ಆಪ್ತರೊಂದಿಗೆ ನಿಮ್ಮಿಷ್ಟದ ಸಿನಿಮಾವನ್ನು ಮನೆಯಲ್ಲೇ ಕುಳಿತು ಎಂಜಾಯ್‌ ಮಾಡಿ.
