OTT Updates: ದೀಪಾವಳಿ ರಜೆಯ ಮಜಾಗೆ ಮೆರುಗು ನೀಡಲು ಒಟಿಟಿಗೆ ಬರ್ತಿದೆ ಇಬ್ಬನಿ ತಬ್ಬಿದ ಇಳೆಯಲಿ; ಯಾವಾಗ, ಎಲ್ಲಿ ಸ್ಟ್ರೀಮಿಂಗ್‌?
ಚಂದ್ರಜಿತ್‌ ಬೆಳ್ಳಿಯಪ್ಪ ನಿರ್ದೇಶನದ ಇಬ್ಬನಿ ತಬ್ಬಿದ ಇಳೆಯಲು ಒಟಿಟಿಗೆ ಬರಲು ಸಜ್ಜಾಗಿದೆ. ಸೆಪ್ಟೆಂಬರ್‌ 5 ರಂದು ಸಿನಿಮಾ ಥಿಯೇಟರ್‌ಗಳಲ್ಲಿ ರಿಲೀಸ್‌ ಆಗಿತ್ತು. ಬಾಕ್ಸ್‌ ಆಫೀಸಿನಲ್ಲಿ ಸಿನಿಮಾ 50 ದಿನಗಳನ್ನು ಪೂರೈಸಿದೆ. ದೀಪಾವಳಿ ವೇಳೆಗೆ ಸಿನಿಮಾ ಅಮೆಜಾನ್‌ ಪ್ರೈಮ್‌ ವಿಡಿಯೋದಲ್ಲಿ ಸ್ಟ್ರೀಮಿಂಗ್‌ ಆರಂಭಿಸಲಿದೆ.
ಪರಮ್ವಃ ಸ್ಟುಡಿಯೋಸ್‌ ಬ್ಯಾನರ್‌ನಲ್ಲಿ ರಕ್ಷಿತ್‌ ಶೆಟ್ಟಿ ನಿರ್ಮಿಸಿರುವ ಇಬ್ಬನಿ ತಬ್ಬಿದ ಇಳೆಯಲಿ ಸಿನಿಮಾ ಸೆಪ್ಟೆಂಬರ್‌ 5 ರಂದು ತೆರೆ ಕಂಡಿತ್ತು. ಆರಂಭದಲ್ಲಿ ಸಿನಿಮಾಗೆ ಹೇಳಿಕೊಳ್ಳುವಂತ ರೆಸ್ಪಾನ್ಸ್‌ ಸಿಗದಿದ್ರೂ ನಂತರದ ದಿನಗಳಲ್ಲಿ ಸಿನಿಮಾ ನೋಡಲು ಸಿನಿಪ್ರಿಯರು ಚಿತ್ರಮಂದಿರಕ್ಕೆ ದೌಡಾಯಿಸಿದರು. ದಿನದಿಂದ ದಿನಕ್ಕೆ ಸಿನಿಮಾಗೆ ಪ್ರೇಕ್ಷಕರಿಂದ ಒಳ್ಳೆ ಪ್ರತಿಕ್ರಿಯೆ ಹರಿದುಬಂತು.
ಬಾಕ್ಸ್‌ ಆಫೀಸಿನಲ್ಲಿ 50 ದಿನಗಳನ್ನು ಪೂರೈಸಿದ ಇಬ್ಬನಿ ತಪ್ಪಿದ ಇಳೆಯಲಿ
ಇದೀಗ ಸಿನಿಮಾ ಚಿತ್ರಮಂದಿರಗಳಲ್ಲಿ 50 ದಿನಗಳನ್ನು ಪೂರೈಸಿದೆ. ಚಿತ್ರವನ್ನು ಚಂದ್ರಜಿತ್‌ ಬೆಳ್ಳಿಯಪ್ಪ ನಿರ್ದೇಶಿಸಿದ್ದಾರೆ. ಮೊದಲ ಪ್ರಯತ್ನದಲ್ಲೇ ಚಂದ್ರಜಿತ್‌, ಒಂದೊಳ್ಳೆ ಪ್ರಯತ್ನ ಮಾಡಿದ್ದಾರೆ. ಚಿತ್ರಕಥೆ ಹಾಗೂ ಕಲಾವಿದರ ಆಯ್ಕೆ ಬಗ್ಗೆಯೂ ನೋಡುಗರು ಸಂತೋಷ ವ್ಯಕ್ತಪಡಿಸಿದ್ದಾರೆ. ಥಿಯೇಟರ್‌ಗಳಲ್ಲಿ ಮಿಸ್‌ ಮಾಡಿಕೊಂಡವರು, ಈಗ ಮನೆಯಲ್ಲೇ ಸಿನಿಮಾ ಎಂಜಾಯ್‌ ಮಾಡಬಹುದು. ಹೌದು, ಇಬ್ಬನಿ ತಬ್ಬಿದ ಇಳೆಯಲಿ ಒಟಿಟಿಯಲ್ಲಿ ಸ್ಟ್ರೀಮಿಂಗ್‌ ಆರಂಭಿಸಲಿದೆ. ಅಮೆಜಾನ್‌ ಪ್ರೈಮ್‌ ವಿಡಿಯೋ, ಈ ಸಿನಿಮಾದ ಸ್ಟ್ರೀಮಿಂಗ್‌ ಹಕ್ಕು ಪಡೆದದ್ದು ಶೀಘ್ರದಲ್ಲೇ ಸಿನಿಮಾಗೆ ಒಟಿಟಿಗೆ ಬರಲಿದೆ ಎಂಬ ಮಾತು ಕೆಲವು ದಿನಗಳ ಹಿಂದೆಯೇ ಕೇಳಿಬಂದಿತ್ತು. ಆದರೆ ಸಿನಿಮಾ ಯಾವ ಪ್ಲಾಟ್‌ಫಾರ್ಮ್‌ನಲ್ಲಿ, ಯಾವ ದಿನ ಸ್ಟ್ರೀಮ್‌ ಆಗಲಿದೆ ಎಂಬ ನಿಖರ ಮಾಹಿತಿ ಇರಲಿಲ್ಲ.
ದೀಪಾವಳಿಗೆ ಒಟಿಟಿಯಲ್ಲಿ ಸ್ಟ್ರೀಮಿಂಗ್‌ ಆರಂಭ
ಇದೀಗ ಮೂಲಗಳ ಪ್ರಕಾರ ಇಬ್ಬನಿ ತಬ್ಬಿದ ಇಳೆಯಲಿ ಸಿನಿಮಾ ಅಮೆಜಾನ್‌ ಪ್ರೈಮ್‌ ವಿಡಿಯೋಗೆ ಮಾರಾಟವಾಗಿದ್ದು ಬಹುಶ: ದೀಪಾವಳಿ ವೇಳೆಗೆ ಒಟಿಟಿಗೆ ಬರಬಹುದು ಎನ್ನಲಾಗುತ್ತಿದೆ. ಅಕ್ಟೋಬರ್‌ 31 ಅಥವಾ ನವೆಂಬರ್‌ 1 ರಂದು ಇಬ್ಬನಿ ತಬ್ಬಿದ ಇಳೆಯಲಿ ಸಿನಿಮಾ ಸ್ಟ್ರೀಮಿಂಗ್‌ ಆರಂಭಿಸಬಹುದು, ಅದೂ ಮಿಸ್‌ ಆದರೆ ನವೆಂಬರ್‌ ಮೊದಲ ವಾರದಲ್ಲಿ ಪಕ್ಕಾ ಸಿನಿಮಾ ಒಟಿಟಿಯಲ್ಲಿ ಪ್ರಸಾರವಾಗಲಿದೆ ಎಂಬ ಸುದ್ದಿ ಹರಿದಾಡುತ್ತಿದೆ. ಇಬ್ಬನಿ ತಬ್ಬಿದ ಇಳೆಯಲಿ ಸಿನಿಮಾ ತೆರೆ ಕಂಡ ದಿನವೇ ವಿಜಯ್‌ ದಳಪತಿ ಅಭಿನಯದ ಗೋಟ್‌ ಸಿನಿಮಾ ಬಿಡುಗಡೆ ಆಗಿತ್ತು. ನಮ್ಮ ಸಿನಿಮಾಗೆ ರಾಜ್ಯದಲ್ಲಿ ಸಿಕ್ಕಿದ್ದು 40 ಸ್ಕ್ರೀನ್‌ಗಳು ಮಾತ್ರ ಎಂದು ನಿರ್ದೇಶಕ ಬೆಳ್ಳಿಯಪ್ಪ ಬೇಸರ ವ್ಯಕ್ತಪಡಿಸಿದ್ದಾರೆ.
ಅಂಕಿತಾ ಅಮರ್‌, ವಿಹಾನ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಸಿನಿಮಾ
ಇಬ್ಬನಿ ತಬ್ಬಿದ ಇಳೆಯಲಿ ಚಿತ್ರದಲ್ಲಿ ವಿಹಾನ್‌ ಹಾಗೂ ಅಂಕಿತಾ ಅಮರ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಜೊತೆಗೆ ಮಯೂರಿ ನಟರಾಜ್‌, ಗಿರಿಜಾ ಶೆಟ್ಟರ್‌, ಕಿರಣ್‌ ರಾಜ್‌ ಹಾಗೂ ಇನ್ನಿತರರು ನಟಿಸಿದ್ದಾರೆ. ಚಿತ್ರದ ಹಾಡುಗಳಿಗೆ ಗಗನ್‌ ಬಡೇರಿಯಾ ಸಂಗೀತ ನೀಡಿದ್ದಾರೆ. ಈ ಸುಂದರ ಪ್ರೇಮಕಥೆಯನ್ನು ದೀಪಾವಳಿ ರಜೆಯಲ್ಲಿ ನಿಮ್ಮವರೊಂದಿಗೆ ಎಂಜಾಯ್‌ ಮಾಡಿ.
