Pepe OTT: ಸದ್ದಿಲ್ಲದೆ ಈ ಒಟಿಟಿಗೆ ಬಂದೇ ಬಿಡ್ತು ದೊಡ್ಮನೆ ಕುಡಿ ವಿನಯ್ ರಾಜ್‌ಕುಮಾರ್‌ ಪೆಪೆ ಸಿನಿಮಾ, ಆದ್ರೂ ಇಲ್ಲೊಂದು ಟ್ವಿಸ್ಟ್‌ ಇದೆ
Pepe OTT: ಆಗಸ್ಟ್‌ 30ರಂದು ರಾಜ್ಯಾದ್ಯಂತ ಚಿತ್ರಮಂದಿರದಲ್ಲಿ ಬಿಡುಗಡೆ ಆಗಿತ್ತು ವಿನಯ್ ರಾಜ್‌ಕುಮಾರ್‌ ನಟನೆಯ ಪೆಪೆ ಸಿನಿಮಾ. ಇದೀಗ ಇದೇ ಚಿತ್ರ ಒಟಿಟಿ ಅಂಗಳ ಪ್ರವೇಶಿಸಿದೆ. ಆದರೆ, ಇಲ್ಲೊಂದು ಟ್ವಿಸ್ಟ್‌ ಇದೆ. ಏನದು, ಯಾವ ಒಟಿಟಿಯಲ್ಲಿ ಈ ಸಿನಿಮಾ ವೀಕ್ಷಣೆಗೆ ಲಭ್ಯವಿದೆ? ಇಲ್ಲಿದೆ ಮಾಹಿತಿ.
Pepe OTT Release: ದೊಡ್ಮನೆ ಕುಟುಂಬದ ಕುಡಿ ವಿನಯ್ ರಾಜ್‌ಕುಮಾರ್‌ ನಾಯಕನಾಗಿ ನಟಿಸಿರುವ ಪೆಪೆ ಸಿನಿಮಾ ಚಿತ್ರಮಂದಿರಗಳಲ್ಲಿ ಹೆಚ್ಚು ಸದ್ದು ಮಾಡಲಿಲ್ಲ. ಆಗಸ್ಟ್‌ 30ರಂದು ರಾಜ್ಯಾದ್ಯಂತ ತೆರೆಕಂಡಿದ್ದ ಈ ಸಿನಿಮಾ, ಹೈಪ್‌ ಕ್ರಿಯೇಟ್‌ ಮಾಡಿದ್ದರೂ, ಒಂದು ವರ್ಗದ ಪ್ರೇಕ್ಷಕರ ಗಮನ ಸೆಳೆದಿತ್ತು. ಇದೀಗ ಇದೇ ಸಿನಿಮಾ ಒಟಿಟಿ ಅಂಗಳವನ್ನೂ ಪ್ರವೇಶಿಸಿದೆ. ಹಾಗಾದರೆ, ಯಾವ ಒಟಿಟಿಯಲ್ಲಿ ಈ ಸಿನಿಮಾ ವೀಕ್ಷಿಸಬಹುದು? ಇಲ್ಲಿದೆ ನೋಡಿ ಮಾಹಿತಿ.
ನಟ ವಿನಯ್ ರಾಜ್‌ಕುಮಾರ್‌ ಈ ವರೆಗೂ ಮಾಸ್‌ ಅವತಾರದಲ್ಲಿ ಕಾಣಿಸಿಕೊಂಡಿದ್ದಿಲ್ಲ. ಆ ಅವತಾರವನ್ನೂ ಪೆಪೆ ಮೂಲಕ ತೋರಿಸಿದ್ದರು ವಿನಯ್. ಇಲ್ಲಿಯವರೆಗೂ ಲವರ್‌ಬಾಯ್‌, ಪಕ್ಕದ್ಮನೆ ಹುಡುಗನ ರೀತಿಯಲ್ಲಿಯೇ ಹೆಚ್ಚು ಕಾಣಿಸಿದ್ದ ವಿನಯ್ ರಾಜ್‌ಕುಮಾರ್‌, ಪೆಪೆ ಚಿತ್ರದಿಂದ ಕೈಯಲ್ಲಿ ಮಚ್ಚು ಹಿಡಿದು ರಕ್ತಹರಿಸಿದ್ದರು. ವಿಮರ್ಶೆ ದೃಷ್ಟಿಯಿಂದ ಮಿಶ್ರ ಪ್ರತಿಕ್ರಿಯೆ ಪಡೆದ ಈ ಚಿತ್ರವೀಗ 34 ದಿನಗಳ ಬಳಿಕ ಒಟಿಟಿ ಪುರ ಪ್ರವೇಶ ಮಾಡಿದೆ.
ಪೆಪೆ ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್‌ನಲ್ಲಿ ಹೊಸ ರಕ್ತಚರಿತ್ರೆಗೆ ವಿನಯ್ ರಾಜ್‌ಕುಮಾರ್‌ ಮುನ್ನುಡಿ ಬರೆದಿದ್ದರು. ವಿನಯ್ ಅವರ ಹೊಸ ಅವತಾರಕ್ಕೆ ಚಿತ್ರರಸಿಕರು ಫಿದಾ ಆಗಿದ್ದರು. ಟ್ರೇಲರ್‌ ನೋಡಿಯೇ ಬೆಚ್ಚಿದ್ದ ಪ್ರೇಕ್ಷಕನಿಗೆ, ಸಿನಿಮಾ ರುಚಿಸಿತ್ತು. ವಿನಯ್ ರಾಜ್‌ಕುಮಾರ್‌ ಹೀಗೂ ಕಾಣ್ತಾರಾ? ಈ ರೀತಿಯಲ್ಲಿಯೂ ನಟಿಸ್ತಾರಾ? ಎಂದು ಹುಬ್ಬೇರಿಸಿದ್ದರು. ನಿರ್ದೇಶಕ ಶ್ರೀಲೇಶ್‌ ನಾಯರ್‌ ಸಹ ತಮ್ಮ ಮೊದಲ ಪ್ರಯತ್ನದಲ್ಲಿಯೇ ದೊಡ್ಮನೆ ಕುಡಿಯನ್ನು ಬೇರೆ ರೀತಿಯಲ್ಲಿಯೇ ತೋರಿಸಿದ್ದರು. ಜಾತಿ ಸಂಘರ್ಷದ ಕಥೆಗೆ ರಕ್ತತರ್ಪಣ ಮಾಡಿದ್ದರು.
ಏನಿದು ವಿನಯ್ ರಾಜ್‌ಕುಮಾರ್‌ ಪೆಪೆ ಕಥೆ?
ಕೊಡಗಿನ ಬದವಾಳು ಗ್ರಾಮದ ಮಲಬಾರಿ ಮತ್ತು ರಾಯಪ್ಪ ಕುಟುಂಬಗಳ ನಡುವಿನ ವೈರತ್ವದ ಕಥೆಯೇ ಈ ಪೆಪೆ. ಸೇಡಿಗೆ ಸೇಡು ರಕ್ತಕ್ಕೆ ರಕ್ತ ಎಂಬಂತೆ ಇಲ್ಲಿ ದ್ವೇಷದ ದಳ್ಳುರಿಯೇ ಕಾಣಿಸುವುದು ಹೆಚ್ಚು. ರಾಯಪ್ಪನ ಮೊಮ್ಮಗ ಪ್ರದೀಪ್‌ ಅಲಿಯಾಸ್‌ ಪೆಪೆ (ವಿನಯ್ ರಾಜ್‌ಕುಮಾರ್‌) ಕೈಗೆ ರಕ್ತ ಅಂಟುವುದು ತಾಯಿಗೆ ಇಷ್ಟವಿಲ್ಲ. ಆದರೆ, ವಿಧಿಯಾಟ ಮಾತ್ರ ಬೇರೆ. ಅಲ್ಲಿ ನಡೆಯಬಾರದೆಲ್ಲವೂ ಘಟಿಸುತ್ತದೆ. ನೀರಿಗಾಗಿ ದೊಡ್ಡ ಸಮರವೇ ನಡೆಯುತ್ತದೆ. ಮೇಲ್ಜಾತಿ, ಕೆಳಜಾತಿಗಳ ನಡುವಿನ ಸಂಘರ್ಷದ ಜತೆಗೆ ಮಹಿಳಾ ದೌರ್ಜನ್ಯದ ಎಳೆಯೂ ಈ ಪೆಪೆಯಲ್ಲಿದೆ. ಇದೆಲ್ಲವನ್ನು ದಾಟಿ ಮೇಲ್ಜಾತಿಯ ಅಟ್ಟಹಾಸವನ್ನು ಹೇಗೆ ಕಥಾನಾಯಕ ಹುಟ್ಟಡಗಿಸುತ್ತಾನೆ ಎಂಬುದೇ ಕಥೆ.
ಯಾವ ಒಟಿಟಿಯಲ್ಲಿ ಪೆಪೆ?
ಪೆಪೆ ಸಿನಿಮಾ ಆಗಸ್ಟ್‌ 30ರಂದು ರಾಜ್ಯಾದ್ಯಂತ ಬಿಡುಗಡೆ ಆಗಿತ್ತು. ಅದಾದ ಬಳಿಕ ಇದೀಗ ಒಟಿಟಿಗೆ ಆಗಮಿಸಿದೆ. ಅಮೆಜಾನ್‌ ಪ್ರೈಂ ಒಟಿಟಿಯಲ್ಲಿ ಈ ಸಿನಿಮಾ ವೀಕ್ಷಣೆಗೆ ಲಭ್ಯವಿದೆ. ಆದರೆ ಈ ಸಿನಿಮಾ ಭಾರತದ ವೀಕ್ಷಕರಿಗೆ ಸದ್ಯಕ್ಕೆ ಲಭ್ಯವಿಲ್ಲ. ಅಮೆರಿಕಾ ಮತ್ತು ಯೂರೋಪ್‌ನಲ್ಲಿನ ಪ್ರೈಂ ಚಂದಾದಾರರಿಗೆ ಈ ಸಿನಿಮಾ ವೀಕ್ಷಣೆಗೆ ಸಿಗಲಿದೆ. ಅದಾದ ಬಳಿಕ ಅಂದರೆ, ಮುಂದಿನ ವಾರ ಭಾರತೀಯ ಪ್ರೈಂ ಚಂದಾದಾರರೂ ಈ ಸಿನಿಮಾ ವೀಕ್ಷಣೆ ಮಾಡಬಹುದು.
ತಾರಾಗಣ ಮತ್ತು ತಾಂತ್ರಿಕ ಬಳಗ ಹೀಗಿದೆ..
ಶ್ರೀಲೇಶ್‌ ನಾಯರ್‌ ಕಥೆ ಬರೆದು ಪೆಪೆ ಸಿನಿಮಾ ನಿರ್ದೇಶಿಸಿದ್ದಾರೆ. ಪೂರ್ಣಚಂದ್ರ ತೇಜಸ್ವಿ ಸಂಗೀತ, ಅಭಿಷೇಕ್‌ ಜಿ ಕಾಸರಗೋಡು ಛಾಯಾಗ್ರಹಣ ನೀಡಿದ್ದಾರೆ. ಮನು ಶೇಡ್ಗಾರ್‌ ಸಂಕಲನವಿದೆ. ಅದೇ ರೀತಿ ತಾರಾಬಳಗದಲ್ಲಿ ವಿನಯ್ ರಾಜ್‌ಕುಮಾರ್‌. ಅರುಣಾ ಬಾಲರಾಜ್‌, ಮಯೂರ್ ಪಟೇಲ್, ಮೇದಿನಿ ಕೆಳಮನೆ, ನವೀನ್ ಪಡೀಲ್, ಯಶ್ ಶೆಟ್ಟಿ, ರವಿ ಪ್ರಸಾದ್ ಮಂಡ್ಯ ಸೇರಿ ಇನ್ನೂ ಹಲವರು ನಟಿಸಿದ್ದಾರೆ. ಉದಯ್‌ ಸಿನಿ ವೆಂಚರ್ಸ್‌ ಮತ್ತು ದೀಪಾ ಫಿಲಂಸ್‌ ಬ್ಯಾನರ್‌ನಲ್ಲಿ ಪೆಪೆ ಸಿನಿಮಾ ನಿರ್ಮಾಣವಾಗಿದೆ.