Poonam Pandey Death: ಕನ್ನಡದ ಈ ಚಿತ್ರದಲ್ಲೂ ನಟಿಸಿದ್ದರು ಪೂನಂ ಪಾಂಡೆ; ಈಗ ಆ ಸಿನಿಮಾ ನಾಯಕನೂ ಬದುಕಿಲ್ಲ!
ಮಾದಕ ನಟಿ, ಮಾಡೆಲ್‌ ಪೂನಂ ಪಾಂಡೆ ನಿಧನರಾಗಿದ್ದಾರೆ. ಈ ನಡುವೆ ಇದೇ ನಟಿ ಕನ್ನಡದ ಸಿನಿಮಾವೊಂದರಲ್ಲಿಯೂ ಸೊಂಟ ಬಳುಕಿಸಿದ್ದರು. ಲವ್‌ ಇಸ್‌ ಪಾಯಿಸನ್‌ ಚಿತ್ರದಲ್ಲಿ ಐಟಂ ಹಾಡಿಗೆ ಹೆಜ್ಜೆ ಹಾಕಿದ್ದರು. ಹಳ್ಳಿ ಹೈದ ಪ್ಯಾಟೇಗೆ ಬಂದ ಶೋನ ವಿನ್ನರ್‌ ರಾಜೇಶ್‌ ಈ ಚಿತ್ರದ ನಾಯಕನಾಗಿ ನಟಿಸಿದ್ದ. ಸಿನಿಮಾ ಬಿಡುಗಡೆಗೂ ಮುನ್ನವೇ ರಾಜೇಶ್‌ ಸಹ ಸಾವನ್ನಪ್ಪಿದ್ದರು.
Poonam Pandey Death: ಬಾಲಿವುಡ್ ನಟಿ, ಮಾಡೆಲ್‌ ಆಗಿಯೂ ಗುರುತಿಸಿಕೊಂಡಿದ್ದ ಪೂನಂ ಪಾಂಡೆ, ನಿಧನರಾಗಿದ್ದಾರೆ. 32ನೇ ವಯಸ್ಸಿನಲ್ಲಿಯೇ ಕ್ಯಾನ್ಸರ್‌ಗೆ ತುತ್ತಾಗಿದ್ದಾರೆ. ಕಳೆದ ಮೂರು ದಿನಗಳ ಹಿಂದಷ್ಟೇ ಸೋಷಿಯಲ್‌ ಮೀಡಿಯಾದಲ್ಲಿ ವಿಡಿಯೋ ಶೇರ್‌ ಮಾಡಿದ್ದ ಇದೇ ನಟಿ, ಇದೀಗ ಇಲ್ಲವಾಗಿದ್ದಾರೆ. ಜಾಲತಾಣಗಳಲ್ಲಿ ಅವರ ಅಭಿಮಾನಿಗಳು ಮೌನವಾಗಿದ್ದಾರೆ. ಸಾವಿನ ಕಾರಣವೂ ಎಲ್ಲರನ್ನು ಅಚ್ಚರಿಗೆ ದೂಡಿದೆ. ಇದೀಗ ಇದೇ ನಟಿ ಕನ್ನಡದ ಸಿನಿಮಾದಲ್ಲೂ ಕಾಣಿಸಿಕೊಂಡಿದ್ದರು. ದುರಾದೃಷ್ಟವಶಾತ್‌ ಏನೆಂದರೆ, ಆ ಸಿನಿಮಾ ನಟನೂ ಕೆಲ ವರ್ಷಗಳ ಹಿಂದೆಯೇ ಇಹಲೋಕ ತ್ಯಜಿಸಿದ್ದರು.
2014ರಲ್ಲಿ ಕನ್ನಡದಲ್ಲಿ ಲವ್‌ ಈಸ್‌ ಪಾಯಿಸನ್‌ ಅನ್ನೋ ಸಿನಿಮಾ ತೆರೆಕಂಡಿತ್ತು. ಆ ಸಿನಿಮಾದಲ್ಲಿ ಹಳ್ಳಿ ಹೈದ ಪ್ಯಾಟೇಗೆ ಬಂದ ರಿಯಾಲಿಟಿ ಶೋದಲ್ಲಿ ಫೇಮಸ್‌ ಆಗಿದ್ದ ರಾಜೇಶ್‌, ಲವ್‌ ಈಸ್‌ ಪಾಯಿಸನ್‌ ಚಿತ್ರದಲ್ಲಿ ನಾಯಕನಾಗಿದ್ದರೆ, ಶ್ರುತಿ ರಾಜ್‌ ನಾಯಕಿಯಾಗಿ ನಟಿಸಿದ್ದರು. ಆ ಸಿನಿಮಾದ ಹಾಡೊಂದರಲ್ಲಿ ಕುಣಿಯಲು ಪೂನಂ ಪಾಂಡೆ ಸಹ ಕನ್ನಡಕ್ಕೆ ಎಂಟ್ರಿಕೊಟ್ಟಿದ್ದರು. ಬಾಲಿವುಡ್‌ನಲ್ಲಿ ಅದಾಗಲೇ ಒಂದಷ್ಟು ಬೋಲ್ಡ್‌ ಹೇಳಿಕೆ ಮತ್ತು ಅರೇ ನಗ್ನ ಫೋಟೋಗಳ ವಿಚಾರಕ್ಕೆ ಪೂನಂ ಸುದ್ದಿಯಾಗಿದ್ದರು. ಆ ಕಾರಣಕ್ಕೆ ಅವರನ್ನು ಕನ್ನಡಕ್ಕೂ ಕರೆತರಲಾಗಿತ್ತು.
ಹಳ್ಳಿ ಹೈದ ಪ್ಯಾಟೇಗೆ ಬಂದ ರಿಯಾಲಿಟಿ ಶೋದಲ್ಲಿ ಜಂಗಲ್‌ ಜಾಕಿ ರಾಜೇಶ್‌ ವಿನ್‌ ಆದ ಬಳಿಕ, ನಂದನ್‌ ಪ್ರಭು ನಿರ್ದೇಶನದಲ್ಲಿ ಲವ್‌ ಇಸ್‌ ಪಾಯಿಸನ್‌ ಸಿನಿಮಾ ಶುರುವಾಗಿತ್ತು. ಈ ಚಿತ್ರದ ಐಟಂ ಹಾಡಿನಲ್ಲಿ ಸೊಂಟ ಬಳುಕಿಸಲು ಪೂನಂ ಪಾಂಡೆ ಆಗಮಿಸಿದ್ದರು. ಅದಾದ ಬಳಿಕ ಸಿನಿಮಾ ರಿಲೀಸ್‌ಗೂ ಮುನ್ನವೇ ಚಿತ್ರದ ನಾಯಕ ರಾಜೇಶ್‌ ಅಕಾಲಿಕ ನಿಧನರಾದರು. ಆತನ ಸಾವಿಗೂ ಪೂನಂ ಕಂಬನಿ ಮಿಡಿದಿದ್ದರು. ನೇರವಾಗಿ ಎಚ್‌.ಡಿ ಕೋಟೆಯ ಆತನ ಮನೆಗೆ ಹೋಗಿ ಸಾಂತ್ವನ ಹೇಳಿ ಬಂದಿದ್ದರು. ಆತನ ನಿಧನದ ಬಳಿಕ ಸಿನಿಮಾ ರಿಲೀಸ್‌ ಆಗಿತ್ತು. ಇದೀಗ ಇದೇ ನಟಿ ದುರಂತ ಅಂತ್ಯ ಕಂಡಿದ್ದಾರೆ.
ಸಾವಿನ ಸುತ್ತ ಅನುಮಾನಗಳ ಹುತ್ತ
ಇನ್ನು ಪೂನಂ ಸಾವಿನ ಸುತ್ತ ಹಲವು ಸುದ್ದಿಗಳು ಹರಿದಾಡುತ್ತಿವೆ. ಆ ಪೈಕಿ ಗರ್ಭಕೋಶ ಕ್ಯಾನ್ಸರ್‌ನಿಂದ ಪೂನಂ ಸಾವನ್ನಪ್ಪಿದ್ದಾರೆ ಎಂದು ಹೇಳಲಾಗುತ್ತಿದೆ. ಇನ್ನೊಂದೆಡೆ ಅತಿಯಾದ ಸಿಗರೇಟ್‌ ಸೇವನೆಯೂ ಈ ಸಾವಿಗೆ ಕಾರಣ ಎಂದೇ ಪುಕಾರು ಹಬ್ಬುತ್ತಿದೆ. ಆದರೆ, ಈ ಸಾವಿನಿಂದ ಪೂನಂ ಪಾಂಡೆ ಫ್ಯಾನ್ಸ್‌ ಮಾತ್ರ ಇನ್ನೂ ಚೇತರಿಸಿಕೊಂಡಿಲ್ಲ.
ಟೀಂ ಇಂಡಿಯಾ ವಿಶ್ವಕಪ್ ಗೆದ್ದರೆ ಬೆತ್ತಲಾಗುವೆ..
ಟೀಂ ಇಂಡಿಯಾ 2011ರ ಕ್ರಿಕೆಟ್ ವಿಶ್ವಕಪ್ ಗೆದ್ದರೆ ಭಾರತೀಯ ಕ್ರಿಕೆಟ್ ತಂಡಕ್ಕಾಗಿ ತಾವು ಬೆತ್ತಲಾಗುತ್ತೇನೆ ಎಂಬ ಭರವಸೆ ನೀಡಿದ್ದರು. 2011ರಲ್ಲಿ ಟೀಂ ಇಂಡಿಯಾ ವಿಶ್ವಕಪ್ ಜಯಸಿತ್ತು. ಆ ವರ್ಷ ಪೂನಂ ಪಾಂಡೆ ಅವರ ಹೇಳಿಕೆ ಭಾರಿ ಸದ್ದು ಮಾಡಿತ್ತು. ಬಿಸಿಸಿಐ ಹಾಗೂ ಪೂನಂ ಅವರ ಪೋಷಕರು ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ್ದರು. ನಂತರ ತಮ್ಮ ಹೇಳಿಕೆಯಿಂದ ಹಿಂದೆ ಸರಿದಿದ್ದರು.
ಪೂನಂ ನಟಿಸಿದ ಸಿನಿಮಾಗಳ ವಿವರ
ಇನ್ನು ಸಿನಿಮಾ ವಿಚಾರಕ್ಕೆ ಬಂದರೆ, 2013ರಲ್ಲಿ ದಿ ಅನ್‌ ಕ್ಯಾನಿ ಸಿನಿಮಾದಲ್ಲಿ ಪೂನಂ ನಟಿಸಿದ್ದರು. ಅದಾದ ಬಳಿಕ ನಶಾ, ಲವ್‌ ಇಸ್‌ ಪಾಯಿಸನ್‌, ಅದಾಲತ್‌, ಮಾಲಿನಿ ಅಂಡ್‌ ಕೋ, ಆ ಗಯೇ ಹೀರೋ, ದಿ ಜರ್ನಿ ಆಫ್‌ ಕರ್ಮ ಸಿನಿಮಾಗಳಲ್ಲೂ ಪೂನಂ ನಟಿಸಿದ್ದಾರೆ. ಸಿನಿಮಾಗಳ ಜತೆಗೆ ಕಿರುತೆರೆ ಮತ್ತು ರಿಯಾಲಿಟಿ ಶೋಗಳಲ್ಲಿಯೂ ಪೂನಂ ಅವರ ಹಾಜರಿ ಇರುತ್ತಿತ್ತು. 2022ರಲ್ಲಿ ಪ್ರಸಾರ ಕಂಡಿದ್ದ ಲಾಕ್‌ಅಪ್‌ ಶೋನಲ್ಲಿ ಕಂಟೆಸ್ಟೆಂಟ್‌ ಆಗಿ ಪೂನಂ ಭಾಗವಹಿಸಿದ್ದರು.
