Pushpa 2 Collection: 32 ದಿನಗಳಲ್ಲಿ 1831 ಕೋಟಿ ಗಳಿಸಿದ ಪುಷ್ಪ 2; ಬಾಹುಬಲಿಯನ್ನೂ ಮೀರಿಸಿ ದಂಗಲ್ ಮೇಲೆ ಕಣ್ಣಿಟ್ಟ ಪುಷ್ಪರಾಜ್
ಡಿಸೆಂಬರ್ 5ರಂದು ಬಿಡುಗಡೆಯಾದ ಮೊದಲ ದಿನವೇ 294 ಕೋಟಿ ಗಳಿಸಿದ್ದ ಪುಷ್ಪ 2 ಸಿನಿಮಾ ಇದೀಗ ಕಲೆಕ್ಷನ್ ವಿಚಾರದಲ್ಲಿ ಸಾರ್ವಕಾಲಿಕ ದಾಖಲೆ ಬರೆದಿದ್ದ ಬಾಹುಬಲಿ-2 ಚಿತ್ರವನ್ನು ಹಿಂದಿಕ್ಕಿದೆ. ಪುಷ್ಪ 32 ದಿನಗಳಲ್ಲಿ ವಿಶ್ವಾದ್ಯಂತ 1831 ಕೋಟಿ ರೂ ಗಳಿಸಿ ಈ ದಾಖಲೆ ನಿರ್ಮಿಸಿದೆ.
ಐಕಾನ್ ಸ್ಟಾರ್ ಅಲ್ಲು ಅರ್ಜುನ್ ಅಭಿನಯದ ಪುಷ್ಪ 2: ದಿ ರೂಲ್ ತನ್ನ ಅಬ್ಬರ ಮುಂದುವರೆಸಿದೆ. ಸಿನಿಮಾ ಬಿಡುಗಡೆಯಾದ ತಿಂಗಳಲ್ಲೇ ಬಾಹುಬಲಿ 2 ನಿರ್ಮಿಸಿದ್ದ ಆಲ್ಟೈಮ್ ರೆಕಾರ್ಡ್ ಅನ್ನೇ ಪುಡಿಗಟ್ಟಿದೆ. ದಿನದಿಂದ ದಿನಕ್ಕೆ ದಾಖಲೆಗಳ ಮೇಲೆ ದಾಖಲೆ ಬರೆಯುತ್ತಾ ಸಾಗುತ್ತಿರುವ ಪುಷ್ಪ ರಾಜ್ನ ಕಣ್ಣು ಇದೀಗ ದಂಗಲ್ ಮೇಲೆ ಬಿದ್ದಿದೆ. ಪ್ರಸ್ತುತ ಭಾರತದಲ್ಲೇ 1438 ಕೋಟಿ ಕಮಾಯಿ ಮಾಡಿರುವ ಅಲ್ಲು ಅರ್ಜುನ್, ರಶ್ಮಿಕಾ ಮಂದಣ್ಣ ಮತ್ತು ಫಹದ್ ಫಾಸಿಲ್ ಅಭಿನಯದ ಪುಷ್ಪ 2 ಚಿತ್ರ ಒಟ್ಟಾರೆ ವಿಶ್ವದಾದ್ಯಂತ 1831 ಕೋಟಿ ರೂಪಾಯಿ ಗಳಿಸಿ ಬಾಕ್ಸಾಫೀಸ್ನಲ್ಲಿ ಮುನ್ನುಗ್ಗುತ್ತಿದೆ. 32 ದಿನಗಳಲ್ಲೇ ಈ ಮೈಲಿಗಲ್ಲು ನೆಟ್ಟಿದ್ದು, ಪುಷ್ಪರಾಜ್ನ ಹವಾ ಇನ್ನೂ ತಗ್ಗಿಲ್ಲ ಎಂಬುದಕ್ಕೆ ಈ ಅಂಕಿಅಂಶವೇ ಸಾಕ್ಷಿ.
ಬಾಹುಬಲಿ 2 ಸಿನಿಮಾ ಹಿಂದಿಕ್ಕಿದ ಪುಷ್ಪ 2
32 ದಿನಗಳಲ್ಲಿ ಪುಷ್ಪ-2 ವಿಶ್ವಾದ್ಯಂತ 1831 ಕೋಟಿ ಗಳಿಸಿದೆ ಎಂದು ಚಿತ್ರಕ್ಕೆ ಬಂಡವಾಳ ಹೂಡಿದ ಮೈತ್ರಿ ಮೂವಿ ಮೇಕರ್ಸ್ ತಮ್ಮ ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡಿದೆ. #Pushpa2TheRule ಈಗ ಭಾರತೀಯ ಚಿತ್ರರಂಗದ ಇಂಡಸ್ಟ್ರಿ ಹಿಟ್ ಆಗಿದ್ದು ಅತ್ಯಧಿಕ ಕಲೆಕ್ಷನ್ ಮಾಡಿದ ಸಿನಿಮಾ ಆಗಿದೆ. ವಿಶ್ವಾದ್ಯಂತ 32 ದಿನಗಳಲ್ಲಿ 1831 ಕೋಟಿಗಳ ಒಟ್ಟು ಮೊತ್ತವನ್ನು ದಾಟಿ ಈ ದಾಖಲೆ ಮಾಡಿದೆ. ಎಸ್ಎಸ್ ರಾಜಮೌಳಿ ಅವರ ಬಾಹುಬಲಿ 2 ಇದುವರೆಗೆ ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಸಿನಿಮಾ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿತ್ತು. ಪ್ರಭಾಸ್, ರಾಣಾ ದಗ್ಗುಬಾಟಿ, ತಮನ್ನಾ ಭಾಟಿಯಾ ಮತ್ತು ಅನುಷ್ಕಾ ಶೆಟ್ಟಿ ಸೇರಿದಂತೆ ದೊಡ್ಡ ತಾರಾಗಣ ಹೊಂದಿದ್ದ ಬಾಹುಬಲಿ - 2 ಚಿತ್ರವು 1800+ ಕೋಟಿ ಸಂಪಾದಿಸಿತ್ತು ಎಂದು ವರದಿಯಾಗಿತ್ತು. ಆದರೀಗ ಬಾಹುಬಲಿ 2 ಕಲೆಕ್ಷನ್ ಅನ್ನು ಪುಷ್ಪಾ 2 ಮುರಿದಿದೆ.
ದಂಗಲ್ ಕಲೆಕ್ಷನ್ ಬೀಟ್ ಮಾಡುವ ಸಾಧ್ಯತೆ
Sacnilk ಪ್ರಕಾರ ಪುಷ್ಪಾ 2 ಭಾರತದಲ್ಲಿ 32 ದಿನಗಳಲ್ಲಿ 1438 ಕೋಟಿ ಗಳಿಸಿದರೆ, ಬಾಹುಬಲಿ 1416.9 ಕೋಟಿ ರೂ ಗಳಿಸಿತ್ತು. ಅತಿ ಹೆಚ್ಚು ಗಳಿಕೆ ಮಾಡಿದ ಭಾರತೀಯ ಚಲನಚಿತ್ರವೆಂದರೆ ಅಮೀರ್ ಖಾನ್-ನಟನೆಯ ದಂಗಲ್. ಈ ಸಿನಿಮಾ ಸಹ ವಿದೇಶದಲ್ಲಿ ಹೆಚ್ಚಿನ ಹಣವನ್ನು ಗಳಿಸಿತ್ತು. ಭಾರತದಲ್ಲಿ 535 ಕೋಟಿ ಗಳಿಸಿತ್ತು. ಆದರೆ, ದಂಗಲ್ ವಿಶ್ವಾದ್ಯಂತ 2000 ಕೋಟಿ ಕಲೆಕ್ಷನ್ ಮಾಡಿದ್ದು, ಪುಷ್ಪ 2 ಆ ದಾಖಲೆ ಮೇಲೆ ಕಣ್ಣಿಟ್ಟಿದೆ. ದಂಗಲ್ ದಾಖಲೆಯನ್ನು ಪುಷ್ಪರಾಜ್ ಮುರಿಯುತ್ತಾನಾ ಇಲ್ಲವೇ ಎಂಬುದನ್ನು ಕಾದುನೋಡೋಣ.
ಪುಷ್ಪಾ 3 ಚಿತ್ರಕ್ಕೆ ಕಾತರ
ಪುಷ್ಪ 2: ದಿ ರೂಲ್ ಬಿಡುಗಡೆಯಾದ ಮೊದಲ ದಿನವೇ ಮೊದಲ ದಿನವೇ (ಡಿಸೆಂಬರ್ 5 ರಂದು) 294 ಕೋಟಿ ಕಲೆಕ್ಷನ್ ಮಾಡಿತ್ತು. ಪುಷ್ಪ 2 ಸಿನಿಮಾ ಸುಕುಮಾರ್ ಅವರ 2021ರ ಚಲನಚಿತ್ರ ಪುಷ್ಪ: ದಿ ರೈಸ್ನ ಉತ್ತರ ಭಾಗವಾಗಿದ್ದು, ಇದು 300 ಕೋಟಿಗೂ ಹೆಚ್ಚು ಸಂಪಾದನೆ ಮಾಡಿತ್ತು. ಪುಷ್ಪಾ 1, ಪುಷ್ಪಾ 2 ಬಹುದೊಡ್ಡ ಯಶಸ್ಸು ಕಂಡಿದ್ದು, ಪುಷ್ಪಾ 3 ನೇ ಚಿತ್ರಕ್ಕೆ ಅಲ್ಲು ಅರ್ಜುನ್ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಆದರೆ ಶೂಟಿಂಗ್ ಯಾವಾಗ ಆರಂಭವಾಗುತ್ತದೆ ಎಂಬುದು ಇನ್ನೂ ಮಾಹಿತಿ ಸಿಕ್ಕಿಲ್ಲ.
