Radhika Pandit:ಅಕ್ಕನ ಬೆನ್ನ ಮೇಲೆ ತಮ್ಮನ ಸವಾರಿ, ಕ್ಯೂಟ್‌ ವಿಡಿಯೋ ಹಂಚಿಕೊಂಡ ರಾಧಿಕಾ ಪಂಡಿತ್‌.. ಆಯ್ರಾ ಇಂಗ್ಲೀಷ್‌ಗೆ ನೆಟಿಜನ್ಸ್‌ ಬೇಸರ
ರಾಧಿಕಾ ಪಂಡಿತ್‌ ಹಂಚಿಕೊಂಡಿರುವ ಈ ವಿಡಿಯೋಗೆ ಕೆಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇನ್ನೂ ಕೆಲವರು ಮಕ್ಕಳಿಗೆ ಕನ್ನಡ ಕಲಿಸಿ ಎಂದು ರಾಧಿಕಾಗೆ ಸಲಹೆ ನೀಡಿದ್ದಾರೆ. ನಿಮ್ಮ ಮಕ್ಕಳು ಯಾವಾಗಲೂ ಇಂಗ್ಲೀಷ್‌ನಲ್ಲೇ ಮಾತನಾಡುತ್ತಾರೆ ಎಂದು ಕೆಲವರು ಬೇಸರ ವ್ಯಕ್ತಪಡಿಸಿದ್ದಾರೆ.
ಸ್ಯಾಂಡಲ್ವುಡ್ ಸಿಂಡ್ರೆಲಾ ರಾಧಿಕಾ ಪಂಡಿತ್‌ ಮದುವೆ ಆದಾಗಿನಿಂದ ಸಿನಿಮಾಗಳಿಂದ ದೂರ ಉಳಿದಿದ್ದಾರೆ. ಮದುವೆ ನಂತರ ಕೂಡಾ ರಾಧಿಕಾ ಮೊದಲಿನಂತೆ ಸಿನಿಮಾಗಳಲ್ಲಿ ನಟಿಸುತ್ತಾರೆ ಎಂದು ಅಭಿಮಾನಿಗಳು ಆಸೆ ವ್ಯಕ್ತಪಡಿಸಿದ್ದರು. ಆದರೆ ರಾಧಿಕಾ ಗರ್ಭಿಣಿ ಆದ್ದರಿಂದ ನಟನೆಯಿಂದ ದೂರ ಸರಿದರು. ಮೊದಲ ಮಗುವಿಗೆ ಒಂದು ವರ್ಷ ತುಂಬುತ್ತಿದ್ದಂತೆ ರಾಧಿಕಾ ಮತ್ತೊಮ್ಮೆ ಕನ್ಸೀವ್‌ ಆದರು.
ಸದ್ಯಕ್ಕೆ ರಾಧಿಕಾ ಪಂಡಿತ್‌ ತಮ್ಮ ಮಕ್ಕಳ ಆರೈಕೆ ಮಾಡುತ್ತಾ, ಗೃಹಿಣಿಯಾಗಿ ಉಳಿದುಕೊಂಡಿದ್ದಾರೆ. ಮಕ್ಕಳು ಜನಿಸಿದಾಗಿನಿಂದ ಇಲ್ಲಿವರೆಗೂ ರಾಧಿಕಾ ಪಂಡಿತ್‌ ಹಾಗೂ ಯಶ್‌ ತಮ್ಮ ಸೋಷಿಯಲ್‌ ಮೀಡಿಯಾದಲ್ಲಿ ಮಕ್ಕಳ ಅನೇಕ ಫೋಟೋ, ವಿಡಿಯೋಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಈ ಕ್ಯೂಟ್‌ ವಿಡಿಯೋಗಳನ್ನು ನೋಡಿ ಅಭಿಮಾನಿಗಳು ಕೂಡಾ ಖುಷಿ ಪಡುತ್ತಿದ್ದಾರೆ. ನಿಮ್ಮ ಮಕ್ಕಳ ವಿಡಿಯೋಗಳನ್ನು ಹೀಗೆ ನಮ್ಮೊಂದಿಗೆ ಹಂಚಿಕೊಳ್ಳುತ್ತಿರಿ ಎಂದು ಫ್ಯಾನ್ಸ್‌ ಬೇಡಿಕೆ ಇಡುತ್ತಲೇ ಇದ್ದಾರೆ. ಏಪ್ರಿಲ್‌ 10 ರಂದು ಇಂಟರ್‌ನ್ಯಾಷನಲ್‌ ಸಿಬ್ಲಿಂಗ್‌ ಡೇಯಂದು ರಾಧಿಕಾ ತಮ್ಮ ಇಬ್ಬರು ಮಕ್ಕಳ ವಿಡಿಯೋವೊಂದನ್ನು ಹಂಚಿಕೊಂಡಿದ್ದಾರೆ.
ರಾಧಿಕಾ ಪಂಡಿತ್‌ ಹಂಚಿಕೊಂಡಿರುವ ಈ ವಿಡಿಯೋದಲ್ಲಿ ಯಥರ್ವ್‌, ಅಕ್ಕ ಆಯ್ರಾ ಮೇಲೆ ಸವಾರಿ ಮಾಡುತ್ತಿದ್ದಾನೆ. ಆಯ್ರಾ, ತನ್ನ ತಮ್ಮನನ್ನು ಬೆನ್ನ ಮೇಲೆ ಕೂರಿಸಿಕೊಂಡು ಇಂಗ್ಲೀಷ್‌ನಲ್ಲಿ Cartwood ಎಂದು ಹೇಳಿಕೊಂಡು ಕಷ್ಟ ಪಟ್ಟು ಮುಂದೆ ಚಲಿಸುತ್ತಿದ್ದಾಳೆ. ಕೊನೆಗೆ ಯಥರ್ವ್‌ ಅಕ್ಕನ ಮೇಲಿಂದ ಕೆಳಗೆ ಬೀಳುತ್ತಾನೆ. ಮಕ್ಕಳ ಆಟವನ್ನು ನೋಡುತ್ತಾ ರಾಧಿಕಾ ಪಂಡಿತ್‌ ಕೂಡಾ ಖುಷಿಯಾಗಿದ್ದಾರೆ. ಈ ಸುಂದರ ಕ್ಷಣವನ್ನು ತಮ್ಮ ಮೊಬೈಲ್‌ನಲ್ಲಿ ಸೆರೆ ಹಿಡಿದಿದ್ದಾರೆ.
ಈ ವಿಡಿಯೋಗೆ ಕೆಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇನ್ನೂ ಕೆಲವರು ಮಕ್ಕಳಿಗೆ ಕನ್ನಡ ಕಲಿಸಿ ಎಂದು ರಾಧಿಕಾಗೆ ಸಲಹೆ ನೀಡಿದ್ದಾರೆ. ''ನಿಮ್ಮ ಮಕ್ಕಳು ಯಾವಾಗಲೂ ಇಂಗ್ಲೀಷ್‌ನಲ್ಲೇ ಮಾತನಾಡುತ್ತಾರೆ'' ಎಂದು ಕೆಲವರು ಬೇಸರ ವ್ಯಕ್ತಪಡಿಸಿದ್ದಾರೆ. ''ಮಕ್ಕಳು ಕನ್ನಡ ಭಾಷೆಯಲ್ಲಿ ಮಾತಾಡದೇ ಇರೋದನ್ನ ನೋಡಿದ್ರೆ ನಿಮ್ಮ ಕನ್ನಡ ಪ್ರೀತಿ ಎಷ್ಟೆಂದು ಗೊತ್ತಾಗುತ್ತೆ'' ಎಂದು ಕೆಲವರು ಕಾಮೆಂಟ್‌ ಮಾಡಿದ್ದಾರೆ. ಮುದ್ದು ಮಕ್ಕಳ ಆಟ ಎಲ್ಲರಿಗೂ ಇಷ್ಟವಾದರೆ, ಅವರು ಇಂಗ್ಲೀಷಿನಲ್ಲಿ ಮಾತನಾಡುವುದು ಕೆಲವರಿಗೆ ಬೇಸರವಾಗಿದೆ.
ಯಶ್‌ ಸಿನಿಮಾಗಳ ವಿಚಾರಕ್ಕೆ ಬರುವುದಾದರೆ, ಕೆಜಿಎಫ್‌ 2 ರಿಲೀಸ್‌ ಆಗಿ ಒಂದು ವರ್ಷವಾಗುತ್ತಾ ಬಂದರೂ ಯಶ್‌ ಹೊಸ ಸಿನಿಮಾ ಅನೌನ್ಸ್‌ ಮಾಡಿಲ್ಲ. ರಾಕಿಭಾಯ್‌ ಮುಂದಿನ ಸಿನಿಮಾ ಅಪ್‌ಡೇಟ್‌ಗೆ ಅಭಿಮಾನಿಗಳು ಕಾಯುತ್ತಿದ್ದಾರೆ. ಆದರೆ ತೆಲುಗಿನ ದಿಲ್‌ ರಾಜು ಜೊತೆ ಯಶ್‌ ಸಿನಿಮಾ ಮಾಡಬಹುದು ಎಂಬ ಅನುಮಾನ ಎಲ್ಲರಿಗೂ ಕಾಡುತ್ತಿದೆ. ಇದಕ್ಕೆ ಕಾರಣ ದಿಲ್‌ ರಾಜು ಅವರ ಟ್ವೀಟ್‌.
ದಿಲ್‌ ರಾಜು ಏಪ್ರಿಲ್‌ 5 ಸಂಜೆ, ಟ್ಟಿಟ್ಟರ್‌ನಲ್ಲಿ #AskDilRaju ಸೆಷನ್‌ನಲ್ಲಿ ಭಾಗವಹಿಸಿದ್ದರು. ಈ ವೇಳೆ ಸಿನಿಪ್ರಿಯರು ನಿರ್ಮಾಪಕ ದಿಲ್‌ ರಾಜು ಅವರ ಸಿನಿಮಾ ಹಾಗೂ ಇನ್ನಿತರ ವಿಚಾರಗಳಿಗೆ ಸಂಬಂಧಿಸಿದಂತೆ ಪ್ರಶ್ನೆಗಳನ್ನು ಕೇಳಿದ್ದರು. ಅಭಿಮಾನಿಯೊಬ್ಬರು, 'ಯಶ್‌ ಜೊತೆ ಸಿನಿಮಾ ಮಾಡುತ್ತೀರ?' ಎಂಬ ಪ್ರಶ್ನೆಗೆ ದಿಲ್‌ ರಾಜು 'ಹೌದು' ಎಂದು ಉತ್ತರಿಸಿದ್ದಾರೆ. ಇದನ್ನು ನೋಡಿದ ಫ್ಯಾನ್ಸ್‌ ಥ್ರಿಲ್‌ ಆಗಿದ್ದಾರೆ. ಹೌದು ಎಂದು ಅವರು ಹೇಳಿದ ಮೇಲೆ ಖಂಡಿತ ಶೀಘ್ರದಲ್ಲೇ ಯಶ್‌ ಮುಂದಿನ ಸಿನಿಮಾ ಅಪ್‌ಡೇಟ್‌ ದೊರೆಯಲಿದೆ ಎಂದು ಖುಷಿ ಆಗಿದ್ದಾರೆ. ಸಿನಿಮಾ ಯಾವುದು? ಯಾರೆಲ್ಲಾ ನಟಿಸಲಿದ್ದಾರೆ? ಅದೂ ಕೂಡಾ ಪ್ಯಾನ್‌ ಇಂಡಿಯಾ ಸಿನಿಮಾನಾ ಎಂದು ನೂರಾರು ಪ್ರಶ್ನೆಗಳನ್ನು ಕೇಳುತ್ತಿದ್ದಾರೆ.
