Samyuktha Hegde: ಚಿತ್ರೀಕರಣದ ವೇಳೆ ನಟಿಗೆ ಪೆಟ್ಟು, ಆಸ್ಪತ್ರೆಗೆ ದಾಖಲು...ಅಲ್ಲಿ ನಡೆದಿದ್ದಾದ್ರೂ ಏನು..?

ಚಿತ್ರೀಕರಣದ ಸಮಯದಲ್ಲಿ ಎಷ್ಟೇ ಮುಂಜಾಗ್ರತೆ ವಹಿಸಿದರೂ ಕೆಲವೊಮ್ಮೆ ಅವಘಡಗಳು ಸಂಭವಿಸುತ್ತವೆ. ಇಂತಹ ಅನೇಕ ಘಟನೆಗಳನ್ನು ನಾವು ನೊಡಿದ್ದೇವೆ. ಇದೀಗ ಸ್ಯಾಂಡಲ್​​ವುಡ್ ನಟಿ ಸಂಯುಕ್ತ ಹೆಗ್ಡೆಗೆ ಚಿತ್ರೀಕರಣದ ಸಮದಯದಲ್ಲಿ ಪೆಟ್ಟಾಗಿದ್ದು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಸಂಯುಕ್ತ ಸದ್ಯಕ್ಕೆ 'ಕ್ರಿಮ್' ಚಿತ್ರೀಕರಣದಲ್ಲಿ ಬ್ಯುಸಿ ಇದ್ದಾರೆ. ಕಂಠೀರವ ಸ್ಟುಡಿಯೋದಲ್ಲಿ ಆ್ಯಕ್ಷನ್ ದೃಶ್ಯವೊಂದರಲ್ಲಿ ಅವರು ಭಾಗಿಯಾಗಿದ್ದಾಗ ಸಂಯುಕ್ತ ತಲೆ ಹಾಗೂ ಕಾಲಿಗೆ ಪೆಟ್ಟು ಬಿದ್ದಿದೆ. ಚಿತ್ರೀಕರಣದಲ್ಲಿ ಡ್ಯೂಪ್ ಬಳಸುವುದಾಗಿ ಹೇಳಿದ್ದರೂ ಸಂಯುಕ್ತ ಅದಕ್ಕೆ ಒಪ್ಪದೆ, ತಾವೇ ಆ್ಯಕ್ಷನ್ ದೃಶ್ಯಗಳನ್ನು ಮಾಡುವುದಾಗಿ ಪಟ್ಟು ಹಿಡಿದಿದ್ದರು. ಅದರ ಪರಿಣಾಮ ಅವರಿಗೆ ಪೆಟ್ಟು ಬಿದ್ದಿದೆ. ಕಾಲು ಉಳುಕಿದ್ದು ಸಂಯುಕ್ತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಆ್ಯಕ್ಷನ್ ದೃಶ್ಯಗಳನ್ನು ಫೈಟ್ ಮಾಸ್ಟರ್​ ಪ್ರಭು ಕೊರಿಯೋಗ್ರಫಿ ಮಾಡುತ್ತಿದ್ದರು ಎನ್ನಲಾಗಿದೆ. ಸಂಯುಕ್ತ ಆಸ್ಪತ್ರೆಯಲ್ಲಿರುವ ಪರಿಣಾಮ ಚಿತ್ರೀಕರಣವನ್ನು ಮುಂದೂಡಲಾಗಿದೆ.

ಕ್ರೀಮ್ ಚಿತ್ರವನ್ನು ಡಿ.ಕೆ. ದೇವೇಂದ್ರ ನಿರ್ಮಿಸುತ್ತಿದ್ದು ಅಭಿಷೇಕ್ ಬಸಂತ್ ನಿರ್ದೇಶಿಸುತ್ತಿದ್ದಾರೆ. ಸುನೋಜ್ ವೇಲಾಯುಧನ್ ಛಾಯಾಗ್ರಹಣ ಈ ಚಿತ್ರಕ್ಕಿದೆ. 'ಕ್ರಿಮ್' ನಾಯಕಿ ಪ್ರಧಾನ ಚಿತ್ರವಾಗಿದ್ದು ಇದುವರೆಗೂ ಸಂಯುಕ್ತ ಹೆಗ್ಡೆ ನಟಿಸಿರುವ ಸಿನಿಮಾಗಳಲ್ಲಿ ಇದು ಬಹಳ ವಿಭಿನ್ನವಾಗಿದೆಯಂತೆ. ಚಿತ್ರದ ಆ್ಯಕ್ಷನ್ ದೃಶ್ಯಗಳು ಚೆನ್ನಾಗಿ ಮೂಡಿ ಬಂದಿದೆ ಎಂದು ಚಿತ್ರತಂಡ ಹೇಳಿದೆ. ಸಂಯುಕ್ತ ಆದಷ್ಟು ಬೇಗ ಗುಣಮುಖರಾಗಿ ಬರುವಂತೆ ಸಿನಿಪ್ರಿಯರು ಹಾರೈಸಿದ್ದಾರೆ.

ಇನ್ನೂ ಹಸಿಯಾಗಿರುವ ಅನಿಲ್ ಹಾಗೂ ಉದಯ್ ದುರಂತ

ಮಾಸ್ತಿಗುಡಿ ಚಿತ್ರೀಕರಣದ ಸಮಯದಲ್ಲಿ 100 ಅಡಿ ಎತ್ತರದಿಂದ ಹೆಲಿಕಾಪ್ಟರ್​​​ನಿಂದ ಕೆರೆಗೆ ಧುಮುಕಿದ್ದ ಅನಿಲ್ ಹಾಗೂ ಉದಯ್ ದುರಂತವನ್ನು ಇಂದಿಗೂ ಯಾರೂ ಮರೆತಿಲ್ಲ. ಚಿರಂಜೀವಿ ಸರ್ಜಾ ಹಾಗೂ ಚೇತನ್ ಅಭಿನಯದ ರಣಂ ಚಿತ್ರೀಕರಣದ ಸಮಯದಲ್ಲಿ ಸಿಲಿಂಡರ್ ಬ್ಲಾಸ್ಟ್ ಆಗಿ ಇಬ್ಬರು ಸಾವನ್ನಪ್ಪಿದ್ದರು. ಕಳೆದ ವರ್ಷ ಲವ್ ಯು ರಚ್ಚು ಚಿತ್ರೀಕರಣದ ಸಮಯದಲ್ಲಿ ವಿದ್ಯುತ್ ತಗುಲಿ ಅಸಿಸ್ಟಂಟ್ ಫೈಟರ್ ವಿವೇಕ್ ಸಾವನ್ನಪ್ಪಿದ್ದರು.

'ಕಿರಿಕ್ ಪಾರ್ಟಿ' ಚಿತ್ರದ ಮೂಲಕ ಬಣ್ಣದ ಲೋಕಕ್ಕೆ ಬಂದ ಸಂಯುಕ್ತ ಹೆಗ್ಡೆ

ಉತ್ತರ ಕರ್ನಾಟಕ ಮೂಲದ ಸಂಯುಕ್ತ ಹೆಗ್ಡೆ ರಕ್ಷಿತ್ ಶೆಟ್ಟಿ ಹಾಗೂ ಜಿ.ಎಸ್. ಗುಪ್ತಾ ನಿರ್ಮಾಣದ 'ಕಿರಿಕ್ ಪಾರ್ಟಿ' ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಬಂದರು. ನಂತರ 'ಕಾಲೇಜು ಕುಮಾರ' ಚಿತ್ರದಲ್ಲಿ ಕಾಣಿಸಿಕೊಂಡ ಅವರು 'ಕಿರಾಕ್ ಪಾರ್ಟಿ' ತೆಲುಗು ಚಿತ್ರದ ಮೂಲಕ ಟಾಲಿವುಡ್​​ಗೆ ಎಂಟ್ರಿ ಕೊಟ್ಟರು. ಅಲ್ಲಿಂದ ತಮಿಳಿಗೆ ಹೋದರು. ಕನ್ನಡದಲ್ಲಿ 'ಒಮ್ಮೆ ನಿಶ್ಯಬ್ಧ ಒಮ್ಮೆ ಯುದ್ಧ' ಸಿನಿಮಾದಲ್ಲಿ ನಟಿಸಿದ ನಂತರ ತಮಿಳು ಚಿತ್ರರಂಗದಲ್ಲೇ ಬ್ಯುಸಿ ಇದ್ದ ಆಕೆ, ಬಹಳ ದಿನಗಳ ನಂತರ 'ರಾಣ' ಚಿತ್ರದ ಮೂಲಕ ಕನ್ನಡಕ್ಕೆ ಬಂದಿದ್ದಾರೆ. ಸದ್ಯಕ್ಕೆ 'ತುರ್ತು ನಿರ್ಗಮನ' ಹಾಗೂ 'ಕ್ರೀಮ್' ಚಿತ್ರಗಳಲ್ಲಿ ಕೂಡಾ ಆಕೆ ನಟಿಸುತ್ತಿದ್ದಾರೆ. ಸಿನಿಮಾ ಹೊರತುಪಡಿಸಿ ಕೆಲವೊಂದು ರಿಯಾಲಿಟಿ ಶೋಗಳಲ್ಲಿ ಕೂಡಾ ಸಂಯುಕ್ತ ಹೆಗ್ಡೆ ಕಾಣಿಸಿಕೊಂಡಿದ್ದಾರೆ. ಕನ್ನಡದಲ್ಲಿ ಬಿಗ್ ಬಾಸ್​ ಸೀಸನ್ 5 , ಹಿಂದಿಯ ರೋಡೀಸ್​​​​ನಲ್ಲಿ ಕೂಡಾ ಅವರು ಭಾಗವಹಿಸಿದ್ದರು.