Sonu Sood: ಚಂದನವನದ ನಟಿ ಮಾನ್ವಿತಾ ಕಾಮತ್‌ ತಾಯಿಯ ಚಿಕಿತ್ಸೆಗೆ ಸೋನು ಸೂದ್ ಸಹಾಯ!
ಲಾಕ್‌ಡೌನ್‌ ಮತ್ತು ಕೋವಿಡ್‌ ಸಂದರ್ಭದಲ್ಲಿ ಸೋನು ಮಾಡಿದ ಕೆಲಸಗಳು ಒಂದೆರಡಲ್ಲ. ಹಣಕಾಸಿನ ನೆರವಿನ ಜತೆಗೆ ರೋಗಿಗಳಿಗೆ ಚಿಕಿತ್ಸೆಯನ್ನೂ ನೀಡಿ ದೇವರಾಗಿದ್ದರು. ಇದೀಗ ಇದೇ ಸೋನು ಸೂದ್ ಸ್ಯಾಂಡಲ್ವುಡ್ ನಟಿ ಮಾನ್ವಿತಾ ಕಾಮತ್‌ ಅವರ ತಾಯಿಯ ಚಿಕಿತ್ಸೆಗೂ ಸ್ಪಂದಿಸಿದ್ದಾರೆ. ಈ ವಿಚಾರವನ್ನು ಸ್ವತಃ ಮಾನ್ವಿತಾ ಟ್ವಿಟರ್‌ನಲ್ಲಿ ಶೇರ್‌ ಮಾಡಿಕೊಂಡಿದ್ದಾರೆ.
ಬೆಂಗಳೂರು: ಬಾಲಿವುಡ್ ನಟ ಸೋನು ಸೂದ್ ಕೇವಲ ತೆರೆ ಮೇಲಷ್ಟೇ ಹೀರೋ ಅಲ್ಲ, ತೆರೆಹಿಂದೆಯೂ ಅವರು ಹೀರೋ ಎಂಬುದನ್ನು ಈಗಾಗಲೇ ಸಾಬೀತುಪಡಿಸಿದ್ದಾರೆ. ಲಾಕ್‌ಡೌನ್‌ ಮತ್ತು ಕೋವಿಡ್‌ ಸಂದರ್ಭದಲ್ಲಿ ಸೋನು ಮಾಡಿದ ಕೆಲಸಗಳು ಒಂದೆರಡಲ್ಲ. ಹಣಕಾಸಿನ ನೆರವಿನ ಜತೆಗೆ ರೋಗಿಗಳಿಗೆ ಚಿಕಿತ್ಸೆಯನ್ನೂ ನೀಡಿ ದೇವರಾಗಿದ್ದರು. ಇದೀಗ ಇದೇ ಸೋನು ಸೂದ್ ಸ್ಯಾಂಡಲ್ವುಡ್ ನಟಿ ಮಾನ್ವಿತಾ ಕಾಮತ್‌ ಅವರ ತಾಯಿಯ ಚಿಕಿತ್ಸೆಗೂ ಸ್ಪಂದಿಸಿದ್ದಾರೆ. ಈ ವಿಚಾರವನ್ನು ಸ್ವತಃ ಮಾನ್ವಿತಾ ಟ್ವಿಟರ್‌ನಲ್ಲಿ ಶೇರ್‌ ಮಾಡಿಕೊಂಡಿದ್ದಾರೆ.
ಹೌದು, ಮಾನ್ವಿತಾ ಕಾಮತ್‌ ಅವರ ತಾಯಿ ಕಳೆದ ಕೆಲ ವರ್ಷಗಳಿಂದ ಕಿಡ್ನಿ ವೈಫಲ್ಯದಿಂದ ಬಳಲುತ್ತಿದ್ದರು. ಸೂಕ್ತ ಚಿಕಿತ್ಸೆಗಾಗಿ ಕಳೆದ ಕೆಲತಿಂಗಳಿಂದ ಸುತ್ತಾಡಿದರೂ, ಒಂದಿಲ್ಲೊಂದು ಸಮಸ್ಯೆ ಎದುರಾಗುತ್ತಿತ್ತು. ಹೀಗಿರುವಾಗಲೇ ಈ ಸಮಸ್ಯೆ ಬಗ್ಗೆ ತಮ್ಮ ವಾಟ್ಸಾಪ್‌ ಸ್ಟೇಟಸ್‌ ಹಾಕಿದ್ದ ಮಾನ್ವಿತಾಗೆ ಮಂಗಳೂರಿನ ಸೋನು ಸೂದ್ ಫೌಂಡೇಷನ್‌ ಸದಸ್ಯರೊಬ್ಬರು ಪ್ರತಿಕ್ರಿಯಿಸಿದ್ದರು. ಅದಾಗಿ ಕೆಲವೇ ಗಂಟೆಗಳಲ್ಲಿ ಬೆಂಗಳೂರಿನ ಅಪೋಲೋ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ಅನುವು ಮಾಡಿಕೊಡಲಾಗಿದೆ.
ಸೋನು ಸೂದ್ ಅವರ ಈ ಕಾರ್ಯಕ್ಕೆ ಟ್ವಿಟರ್‌ನಲ್ಲಿ ಧನ್ಯವಾದ ತಿಳಿಸಿದ ಮಾನ್ವಿತಾ, "ಈಗಷ್ಟೇ ಸೋನು ಸೂದ್ ಸರ್ ಅವರ ಜತೆಗೆ ಮಾತನಾಡಿದೆ. ಅವರು ನನ್ನ ತಾಯಿಗಾಗಿ ಮಾಡಿದ ಸಹಾಯಕ್ಕೆ ನಾನು ಮನಸ್ಪೂರ್ವಕವಾಗಿ ಧನ್ಯವಾದವನ್ನು ತಿಳಿಸುತ್ತೇನೆ. ನೀವು ನಿಜವಾಗಿಯೂ ಹೀರೊ ಸರ್. ತುಂಬು ಹೃದಯದ ಧನ್ಯವಾದಗಳು" ಎಂದು ಕೃತಜ್ಞತೆ ಸಲ್ಲಿಸಿದ್ದಾರೆ.
"ಫೌಂಡೇಷನ್‌ನ ಅಭಿಷೇಕ್‌ ರಾವ್‌ ಅವರಿಗೂ ನನ್ನ ಹೃತ್ಪೂರ್ವಕ ಕೃತಜ್ಞತೆಗಳು. ನನ್ನ ಕಷ್ಟದ ಸಮಯದಲ್ಲಿ ಅವರು ಮಾಡಿದ ಸಹಾಯ ಸಣ್ಣದಲ್ಲ. ನಮ್ಮ ಈ ಬಿಕ್ಕಟ್ಟಿನ ಸಮಯದಲ್ಲಿ ಸೋನು ಸೂದ್ ಸರ್ ನಿಜವಾಗಿಯೂ ದೇವರಂತೆ ಬಂದರು. ಅವರಿಂದಲೇ ನನ್ನ ತಾಯಿ ಇಂದು ಚೇತರಿಸಿಕೊಂಡಿದ್ದಾರೆ" ಎಂದು ಮತ್ತೊಂದು ಟ್ವಿಟ್‌ ಮಾಡಿದ್ದಾರೆ.
"ಜನರ ಉಳಿವಿಗಾಗಿ ಮಾನವೀಯತೆಯನ್ನು ಮಾರುವ ಈ ಕಾಲಘಟ್ಟದಲ್ಲಿ, ಡಾ.ಗುಕುಲನಾಥ್ ಅವರಂತಹ ವೈದ್ಯರು ನಮ್ಮಲ್ಲಿರುವುದು ಖುಷಿಯ ವಿಚಾರ. ಈ ಎಲ್ಲ ಕ್ರೆಡಿಟ್‌ ಸೋನು ಸೂದ್ ಮತ್ತು ಅಭಿಷೇಕ್‌ ಅವರಿಗೆ ಸಲ್ಲಬೇಕು. ಅಪೋಲೋ ಆಸ್ಪತ್ರೆಯಲ್ಲಿ ನನಗೆ ಸಹಾಯ ಮಾಡಿದ್ದಕ್ಕೂ ಧನ್ಯವಾದ" ಎಂದು ಸರಣಿ ಟ್ವಿಟ್‌ ಮಾಡಿದ್ದಾರೆ.
ಇದೇ 26ಕ್ಕೆ ಮಾನ್ವಿತಾ ನಟನೆಯ ಶಿವ 143 ಚಿತ್ರ ಬಿಡುಗಡೆ
ನಟ ಸಾರ್ವಭೌಮ ಡಾ. ರಾಜಕುಮಾರ್ ಮೊಮ್ಮಗ ಧೀರೇನ್ ರಾಮ್‌ಕುಮಾರ್ ನಾಯಕನಾಗಿ ನಟಿಸಿರುವ "ಶಿವ 143" ಚಿತ್ರ ಇದೇ ಆಗಸ್ಟ್ 26 ರಂದು ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದೆ. ಈಗಾಗಲೇ ಈ ಚಿತ್ರದ ಟ್ರೇಲರ್ ಹಾಗೂ ಹಾಡು ನೋಡುಗರ ಮನ ಗೆದ್ದಿದೆ. ನಾಯಕನ ಪರಿಚಯಿಸುವ ಟೀಸರ್ ಗೂ ಅಪಾರ ಜನಮನ್ನಣೆ ದೊರಕಿದೆ. ಈ ಚಿತ್ರದಲ್ಲಿ ಧೀರೇನ್‌ಗೆ ಜೋಡಿಯಾಗಿ ಮಾನ್ವಿತಾ ಕಾಮತ್‌ ನಟಿಸಿದ್ದರು. ಇತ್ತೀಚೆಗೆ ಅಶ್ವಿನಿ ಪುನೀತ್ ರಾಜಕುಮಾರ್ ಈ ಟೀಸರ್ ಬಿಡುಗಡೆ ಮಾಡಿ ಶುಭ ಹಾರೈಸಿದ್ದಾರೆ.
