Martin Movie: ಧ್ರುವ ಸರ್ಜಾ ನಟನೆಯ ಮಾರ್ಟಿನ್‌ ಅಕ್ಟೋಬರ್‌ 11ರಂದು ರಿಲೀಸ್‌ ಕನ್ಫರ್ಮ್‌! ಬಿಡುಗಡೆಗಿಲ್ಲ ಯಾವುದೇ ವಿಘ್ನ
Dhruva Sarja Martin Movie: ಎಪಿ ಅರ್ಜುನ್‌ ನಿರ್ದೇಶನದ ಆಕ್ಷನ್‌ ಪ್ರಿನ್ಸ್‌ ಧ್ರುವ ಸರ್ಜಾ ನಟನೆಯ ಮಾರ್ಟಿನ್‌ ಸಿನಿಮಾ ಅಕ್ಟೋಬರ್‌ 11ರಂದು ಬಿಡುಗಡೆಯಾಗಲಿದೆ. ಅದರಂತೆ ರಿಲೀಸ್‌ ತಯಾರಿಯೂ ಶುರುವಾಗಿದ್ದು, ಬಾಕಿ ಉಳಿದ ಕೆಲಸಗಳನ್ನು ಮುಗಿಸಿಕೊಳ್ಳುತ್ತಿದೆ ಚಿತ್ರತಂಡ.
ಬೆಂಗಳೂರು: ಈ ವರ್ಷದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಮಾರ್ಟಿನ್‌ ಸಿನಿಮಾವು ಒಂದು. ಆಕ್ಷನ್‌ ಪ್ರಿನ್ಸ್‌ ಧ್ರುವ ಸರ್ಜಾ ನಟನೆಯ 5ನೇ ಸಿನಿಮಾ ಇದಾಗಿದೆ. ಈ ಸಿನಿಮಾಕ್ಕೆ ಕಥೆ ಬರೆದದ್ದು ಧ್ರುವನ ಮಾವ ಆಕ್ಷನ್‌ ಕಿಂಗ್‌ ಅರ್ಜುನ್‌ ಸರ್ಜಾ. ಈ ಸಿನಿಮಾದ ಮೂಲಕ ಧ್ರುವ ಸರ್ಜಾ ಮತ್ತು ನಿರ್ದೇಶಕ ಎ.ಪಿ.ಅರ್ಜುನ್‌ ಜತೆಯಾಗಿದ್ದಾರೆ. ಇದಕ್ಕೂ ಮೊದಲು ಧ್ರುವ ಸರ್ಜಾ ಈ ನಿರ್ದೇಶಕರ ಜತೆ 2012ರಲ್ಲಿ ‘ಅದ್ಧೂರಿ’ ಸಿನಿಮಾ ಮಾಡಿದ್ದರು. ನಿರ್ಮಾಪಕ ಉದಯ್‌ ಕೆ ಮೆಹ್ತಾ ಅವರ ಬಿಗ್‌ಬಜೆಟ್‌ನ ‘ಮಾರ್ಟಿನ್‌’ ಸಿನಿಮಾವು 2022ರ ದಸರಾ ಸಮಯದಲ್ಲಿ ಬಿಡುಗಡೆಯಾಗಬೇಕಿತ್ತು. ಸಿನಿಮಾ ನಿರ್ಮಾಣ ಮತ್ತು ನಿರ್ಮಾಣ ಬಳಿಕದ ಕೆಲಸಗಳಿಂದ ಮಾರ್ಟಿನ್‌ ಬಿಡುಗಡೆ ವಿಳಂಬವಾಗಿತ್ತು. 2021ರಲ್ಲಿ ಸೆಟ್ಟೇರಿದ ಸಿನಿಮಾ ಇನ್ನೂ ರಿಲೀಸ್‌ ಆಗಿಲ್ಲ.
ಮಾರ್ಟಿನ್‌ ಸಿನಿಮಾ ಬಿಡುಗಡೆ ಯಾವುದೇ ಕಾರಣಕ್ಕೂ ವಿಳಂಬವಾಗುವುದಿಲ್ಲ. ಭಾರತ ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿ ಮಾರ್ಟಿನ್‌ ಅನ್ನು ಈ ಮೊದಲೇ ನಿಗದಿಪಡಿಸಿದ ದಿನಾಂಕದಂದು ದೊಡ್ಡಮಟ್ಟದಲ್ಲಿ ರಿಲೀಸ್‌ ಮಾಡಲಾಗುವುದು ಎಂದು ‘ಹಿಂದೂಸ್ತಾನ್ ಟೈಮ್ಸ್ ಕನ್ನಡ’ಕ್ಕೆ ಮಾರ್ಟಿನ್‌ ನಿರ್ಮಾಪಕ ಉದಯ್‌ ಕೆ ಮಹ್ತಾ ಹೇಳಿದ್ದರು.
ಮಾರ್ಟಿನ್‌ ಸಿನಿಮಾ ಬಿಡುಗಡೆ ದಿನಾಂಕ
ಮಾರ್ಟಿನ್‌ ಚಿತ್ರತಂಡ ಈಗಾಗಲೇ ಸಿನಿಮಾ ಬಿಡುಗಡೆ ದಿನಾಂಕ ಘೋಷಿಸಿದೆ. ಅಕ್ಟೋಬರ್‌ 11 ಮಾರ್ಟಿನ್‌ ಸಿನಿಮಾ ಬಿಡುಗಡೆಯಾಗುತ್ತಿದೆ ಎಂದು ಅಪ್‌ಡೇಟ್‌ ನೀಡಲಾಗಿದೆ. ಸೋಷಿಯಲ್‌ ಮೀಡಿಯಾ ಪೋಸ್ಟ್‌ಗಳಲ್ಲೂ ಆಗಾಗ ಧ್ರುವ ಸರ್ಜಾ ಈ ಅಪ್‌ಡೇಟ್‌ ನೀಡುತ್ತ ಇದ್ದಾರೆ. ಮಾರ್ಟಿನ್‌ ಬಿಡುಗಡೆ ಕುರಿತ ವದಂತಿಗಳ ನಡುವೆಯೂ ಧ್ರುವ ಅವರು ಅಕ್ಟೋಬರ್‌ 11ರಂದು ಮಾರ್ಟಿನ್‌ ಬಿಡುಗಡೆಯಾಗುತ್ತದೆ ಎಂದು ತಮ್ಮ ಇನ್‌ಸ್ಟಾಗ್ರಾಂ ಸ್ಟೋರಿಯಲ್ಲಿ ಅಪ್‌ಡೇಟ್‌ ನೀಡಿದ್ದರು.
ವಿದೇಶದ ಮಾರುಕಟ್ಟೆಗೆ ಮಾರ್ಟಿನ್‌ ಸಿನಿಮಾ ವಿತರಣೆ ಮಾಡುವ ಕುರಿತು ಸಾಕಷ್ಟು ಕೆಲಸಗಳು ನಡೆಯುತ್ತಿವೆ. ಸಾಗರೋತ್ತರ ಮಾರುಕಟ್ಟೆಗೆ ವಿತರಣೆ ಮಾಡುವ ಸಲುವಾಗಿ ಚಿತ್ರತಂಡ ನಿಗದಿಪಡಿಸಿದ ಮೊತ್ತಕ್ಕೂ, ವಿತರಕರ ನಿರೀಕ್ಷೆಗೂ ಹೊಂದಾಣಿಕೆಯಾಗಬೇಕು. ಮಾರ್ಟಿನ್‌ ಕುರಿತು ನಿರೀಕ್ಷೆಗಳು ಸಾಕಷ್ಟಿವೆ. ಆದರೆ, ಎಲ್ಲಾದರೂ ನಿರೀಕ್ಷಿತ ಮಟ್ಟದಲ್ಲಿ ಗಳಿಕೆ ಮಾಡದೆ ಇದ್ದರೆ ನಷ್ಟವಾಗಬಹುದು ಎಂಬ ಆತಂಕವೂ ವಿತರಕರಿಗೆ ಇರುತ್ತದೆ. ಇವನ್ನೆಲ್ಲ ಚಿತ್ರತಂಡ ಸಮರ್ಥವಾಗಿ ನಿಭಾಯಿಸಲಿದೆ. ಅಕ್ಟೋಬರ್‌ 11ರಂದೇ ಮಾರ್ಟಿನ್‌ ರಿಲೀಸ್‌ ಆಗಲಿದೆ ಎಂದು ಚಿತ್ರದ ನಿರ್ಮಾಪಕರು ಇದೀಗ ಸ್ಪಷ್ಟಪಡಿಸಿದ್ದಾರೆ.
ಈ ವರ್ಷ ಹಲವು ಕನ್ನಡ ಸಿನಿಮಾಗಳು ಬಿಡುಗಡೆಗೆ ಕಾಯುತ್ತಿವೆ. ಈ ಚಿತ್ರಗಳ ಕುರಿತು ಅಪ್‌ಡೇಟ್‌ ಪಡೆಯಲು ಹಿಂದೂಸ್ತಾನ್ ಟೈಮ್ಸ್ ಕನ್ನಡದ ಮನರಂಜನೆ ವಿಭಾಗಕ್ಕೆ ವಿಸಿಟ್‌ ಮಾಡಲು ಮರೆಯದಿರಿ.