Sandalwood News: ಇನ್ನೂ ನಿಂತಿಲ್ಲ ದರ್ಶನ್ ಸುದೀಪ್‌ ಅಭಿಮಾನಿಗಳ ವಾರ್; ಟ್ವಿಟ್ಟರ್‌ನಲ್ಲಿ ಸ್ಟಾರ್‌ ನಟರ ವಿರುದ್ಧ ನೆಗೆಟಿವ್‌ ಟ್ರೆಂಡ್‌
ಸುದೀಪ್‌ ವಿರುದ್ಧ ಆರೋಪ ಕೇಳಿ ಬರುತ್ತಿದ್ದಂತೆ ದರ್ಶನ್ ಅಭಿಮಾನಿಗಳು ಸೋಷಿಯಲ್‌ ಮೀಡಿಯಾದಲ್ಲಿ ದರ್ಶನ್ ಕುರಿತು ನೆಗೆಟಿವ್‌ ಕಾಮೆಂಟ್‌ ಮಾಡಲು ಆರಂಭಿಸಿದ್ದಾರೆ. ಇದರಿಂದ ಕೋಪಗೊಂಡ ಸುದೀಪ್‌ ಅಭಿಮಾನಿಗಳು ಕೂಡಾ ದರ್ಶನ್ ವಿರುದ್ಧ ಕಾಮೆಂಟ್‌ ಮಾಡುತ್ತಿದ್ದಾರೆ.
ಚಿತ್ರರಂಗದಲ್ಲಿನ ಇತರ ಸಮಸ್ಯೆಗಳು ಕಡಿಮೆ ಆದರೂ ಫ್ಯಾನ್‌ ವಾರ್ ಮಾತ್ರ ಕಡಿಮೆ ಆಗುತ್ತಿಲ್ಲ. ಈ ಸಮಸ್ಯೆ ದಿನೇ ದಿನೆ ಹೆಚ್ಚಾಗುತ್ತಲೇ ಇದೆ. ಭಾರತೀಯ ಚಿತ್ರರಂಗದಲ್ಲಿ ಟಾಲಿವುಡ್‌ನಲ್ಲಿ ಫ್ಯಾನ್‌ ವಾರ್ ಹೆಚ್ಚಾಗಿದೆ. ಇದರ ನಂತರದ ಸ್ಥಾನ ಸ್ಯಾಂಡಲ್‌ವುಡ್‌ಗೆ ಎಂದರೆ ತಪ್ಪಾಗಲಾರದು. ಕನ್ನಡದಲ್ಲಿ ಸುದೀಪ್‌ ಹಾಗೂ ದರ್ಶನ್ ಅಭಿಮಾನಿಗಳ ಫ್ಯಾನ್‌ ವಾರ್ ಬಹಳ ವರ್ಷಗಳಿಂದ ಇದೆ.
ಮತ್ತೆ ಶುರುವಾಯ್ತು ಫ್ಯಾನ್‌ ವಾರ್
ದೇವರು ವರ ಕೊಟ್ಟರೂ ಪೂಜಾರಿ ಕೊಡುವುದಿಲ್ಲ ಎಂಬ ಮಾತಿನಂತೆ, ಸ್ಟಾರ್‌ ನಟರು ಮುನಿಸು ಮರೆತರೂ ಅಭಿಮಾನಿಗಳು ಮಾತ್ರ ಅದಕ್ಕೆ ಫುಲ್‌ ಸ್ಟಾಪ್‌ ಇಡಲು ಬಿಡುವುದಿಲ್ಲ. ಬಹಳ ಆಪ್ತರಾಗಿದ್ದ ದರ್ಶನ್ ಹಾಗೂ ಸುದೀಪ್‌ ಕಾರಣಾಂತರಗಳಿಂದ ದೂರಾದರು. ಅಂದಿನಿಂದ ಆರಂಭವಾದ ಫ್ಯಾನ್‌ ವಾರ್ ಇಂದಿಗೂ ನಿಂತಿಲ್ಲ. 'ಕ್ರಾಂತಿ' ಸಿನಿಮಾ ಸಾಂಗ್‌ ರಿಲೀಸ್‌ ವೇಳೆ ಹೊಸಪೇಟೆಯಲ್ಲಿ ದರ್ಶನ್ ಮೇಲೆ ಚಪ್ಪಲಿ ಎಸೆತ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುದೀಪ್‌ ಟ್ವೀಟ್‌ ಮಾಡಿ ಬೇಸರ ವ್ಯಕ್ತಪಡಿಸಿದ್ದರು. ಯಾರೇ ಆಗಲಿ ಈ ರೀತಿ ಮಾಡುವುದು ಸರಿ ಅಲ್ಲ, ದ್ವೇಷವೇ ಎಲ್ಲದಕ್ಕೂ ಉತ್ತರ ಅಲ್ಲ ಎಂದಿದ್ದರು. ಸುದೀಪ್‌ ಟ್ವೀಟ್‌ಗೆ ದರ್ಶನ್ ಪ್ರತಿಕ್ರಿಯಿಸಿ ನಿಮ್ಮ ಕಾಳಜಿಗೆ ಧನ್ಯವಾದಗಳು ಎಂದು ರಿಪ್ಲೇ ಮಾಡಿದ್ದರು.
ಸುದೀಪ್‌ ವಿರುದ್ಧ ನಿರ್ಮಾಪಕರ ಆರೋಪ
ಬಹಳ ವರ್ಷಗಳ ನಂತರ ದರ್ಶನ್ ಹಾಗೂ ಸುದೀಪ್‌ ಈ ರೀತಿ ಟ್ವೀಟ್‌ ಮಾಡಿಕೊಂಡಿದ್ದನ್ನು ನೋಡಿ ಕೆಲವರು ಶಾಕ್‌ ಆಗಿದ್ದರು. ಜೊತೆಗೆ ಇಬ್ಬರೂ ಮುನಿಸು ಮರೆತು ಮೊದಲಿನಂತೆ ಒಂದಾಗಲಿ ಎಂದು ಹಾರೈಸಿದ್ದರು. ಎಲ್ಲವೂ ಸರಿ ಆಯ್ತು ಎನ್ನುವಷ್ಟರಲ್ಲಿ ಮತ್ತೆ ಈ ವಾರ್ ಮುಂದುವರೆದಿದೆ. ಇದಕ್ಕೆ ಕಾರಣ ಕೆಲವು ದಿನಗಳಿಂದ ಸುದೀಪ್‌ ವಿರುದ್ಧ ನಿರ್ಮಾಪಕ ಕುಮಾರ್‌ ಮಾಡಿರುವ ಆರೋಪ. ನಿರ್ಮಾಪಕರ ಬಳಿ ಹಣ ಪಡೆದು ಸುದೀಪ್‌ ಸಿನಿಮಾಗಳಲ್ಲಿ ನಟಿಸುತ್ತಿಲ್ಲ ಎಂದು ಕುಮಾರ್‌ ಆರೋಪಿಸಿದ್ದರು. ಇದರ ಬೆನ್ನ ಹಿನ್ನಲ್ಲೇ 'ಹುಚ್ಚ' ಸಿನಿಮಾ ನಿರ್ಮಾಪಕ ರೆಹಮಾನ್‌ ಕೂಡಾ ಸುದೀಪ್‌ ನನಗೆ ಕೊಡಬೇಕಿದ್ದ ಬಾಕಿ ಹಣ ನೀಡಿಲ್ಲ ಎಂದು ಆರೋಪ ಮಾಡಿದ್ದರು. ಇದೇ ವಿಚಾರವನ್ನು ಹಿಡಿದು ಈಗ ದರ್ಶನ್ ಹಾಗೂ ಸುದೀಪ್‌ ಅಭಿಮಾನಿಗಳು ಫ್ಯಾನ್‌ ವಾರ್ ಶುರು ಮಾಡಿದ್ದಾರೆ.
ಟ್ವಿಟ್ಟರ್‌ನಲ್ಲಿ ನೆಗೆಟಿವ್‌ ಟ್ರೆಂಡ್‌
ಸುದೀಪ್‌ ವಿರುದ್ಧ ಆರೋಪ ಕೇಳಿ ಬರುತ್ತಿದ್ದಂತೆ ದರ್ಶನ್ ಅಭಿಮಾನಿಗಳು ಸೋಷಿಯಲ್‌ ಮೀಡಿಯಾದಲ್ಲಿ ದರ್ಶನ್ ಕುರಿತು ನೆಗೆಟಿವ್‌ ಕಾಮೆಂಟ್‌ ಮಾಡಲು ಆರಂಭಿಸಿದ್ದಾರೆ. ಇದರಿಂದ ಕೋಪಗೊಂಡ ಸುದೀಪ್‌ ಅಭಿಮಾನಿಗಳು ಕೂಡಾ ದರ್ಶನ್ ವಿರುದ್ಧ ಕಾಮೆಂಟ್‌ ಮಾಡುತ್ತಿದ್ದಾರೆ. ಕನ್ನಡ ಚಿತ್ರರಂಗದಿಂದ ದರ್ಶನ್ ಅವರನ್ನು ಕನ್ನಡ ಚಿತ್ರರಂಗದಿಂದ ಬ್ಯಾನ್‌ ಮಾಡಿ ಎಂದು ಸುದೀಪ್‌ ಅಭಿಮಾನಿಗಳು #BanFlopStarDarshanandSaveKFI ನೆಗೆಟಿವ್‌ ಟ್ರೆಂಡ್‌ ಮಾಡಿದರೆ, ದರ್ಶನ್ ಅಭಿಮಾನಿಗಳು ಕೂಡಾ ಸುದೀಪ್‌ ವಿರುದ್ಧ #LossMakingLordKichcha ನೆಗೆಟಿವ್‌ ಟ್ರೆಂಡ್‌ ಆರಂಭಿಸಿದ್ದಾರೆ. ಇದು ಎಂದಿಗೆ ಕೊನೆಯಾಗುವುದೋ ಗೊತ್ತಿಲ್ಲ.
ಇನ್ನು ದರ್ಶನ್ ಸಿನಿಮಾಗಳ ವಿಚಾರಕ್ಕೆ ಬರುವುದಾದರೆ 'ಕ್ರಾಂತಿ' ನಂತರ 'ಕಾಟೇರ' ಸಿನಿಮಾದಲ್ಲಿ ಬ್ಯುಸಿ ಇದ್ದಾರೆ. ಈ ಚಿತ್ರವನ್ನು ರಾಕ್‌ಲೈನ್‌ ವೆಂಕಟೇಶ್‌ ನಿರ್ಮಿಸುತ್ತಿದ್ದು ತರುಣ್‌ ಸುಧೀರ್‌ ಆಕ್ಷನ್‌ ಕಟ್‌ ಹೇಳುತ್ತಿದ್ದಾರೆ. ಸುದೀಪ್‌ ಇತ್ತೀಚೆಗೆ ಹೊಸ ಸಿನಿಮಾವನ್ನು ಅನೌನ್ಸ್‌ ಮಾಡಿದ್ದಾರೆ. ಇದು ಕಿಚ್ಚ ಅಭಿನಯದ 46ನೇ ಸಿನಿಮಾ ಆಗಿದ್ದು ವಿಜಯ್‌ ಕಾರ್ತಿಕೇಯ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಕಲೈಪುಲಿ ಎಸ್‌ ಧಾನು ಬಂಡವಾಳ ಹೂಡಿದ್ದಾರೆ.
