Ganesh: ಬರ್ತ್‌ಡೇಗೂ ಮುಂಚೆ ಘೋಷಣೆ ಆಯ್ತು ಗಣೇಶ್‌ ಹೊಸ ಸಿನಿಮಾ; ಕೃಷ್ಣಂ ಪ್ರಣಯ ಸಖಿ ಚಿತ್ರಕ್ಕೆ ಮಲಯಾಳಿ ಮಾಳವಿಕಾ ನಾಯರ್‌ ನಾಯಕಿ
ಸ್ಯಾಂಡಲ್‌ವುಡ್‌ನ ನಟ ಗಣೇಶ್‌ ಜುಲೈ 2ರಂದು ಬರ್ತ್‌ಡೇ ಆಚರಿಸಿಕೊಳ್ಳಲಿದ್ದಾರೆ. ಈ ನಡುವೆಯೇ ಅವರ ಹೊಸ ಸಿನಿಮಾ ಘೋಷಣೆ ಆಗಿದೆ. ಚಿತ್ರಕ್ಕೆ ಕೃಷ್ಣ ಪ್ರಣಯ ಸಖಿ ಶೀರ್ಷಿಕೆ ಇಡಲಾಗಿದೆ. ನಾಯಕಿಯಾಗಿ ಮಲಯಾಳಿ ನಟಿ ಮಾಳವಿಕಾ ನಾಯರ್‌ ಚಂದನವನ ಪ್ರವೇಶಿಸಿದ್ದಾರೆ.
Ganesh Birthday: ಸ್ಯಾಂಡಲ್ವುಡ್ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಸದ್ಯ ಬರ್ತ್‌ಡೇ ಖುಷಿಯಲ್ಲಿದ್ದಾರೆ. ಇನ್ನೇನು ಅವರ ಹುಟ್ಟುಹಬ್ಬಕ್ಕೆ (ಜುಲೈ 2) ಒಂದೇ ದಿನ ಬಾಕಿ. ಈ ನಿಮಿತ್ತ ಅವರ ಅಭಿಮಾನಿ ವಲಯದಲ್ಲಿಯೂ ನಟನ ಹೊಸ ಸಿನಿಮಾಗಳ ಘೋಷಣೆ ಬಗ್ಗೆ ಕುತೂಹಲಗಳು ಗರಿಗೆದರಿವೆ. ಆ ಪೈಕಿ ಬರ್ತ್‌ಡೇಗೆ ಒಂದು ದಿನ ಮುಂಚಿತವಾಗಿಯೇ ಹೊಸ ಸಿನಿಮಾದ ಶೀರ್ಷಿಕೆಯ ಜತೆಗೆ ನಾಯಕಿ ಜತೆಗಿನ ಗಣೇಶ್‌ ಫೋಟೋ ಸಹ ರಿವೀಲ್‌ ಆಗಿದೆ.
ಅಂದಹಾಗೆ, ಆ ಚಿತ್ರವೇ ಕೃಷ್ಣಂ ಪ್ರಣಯ ಸಖಿ (Krishnam Pranaya Sakhi). ಈ ಸಿನಿಮಾದಲ್ಲಿ ಗಣೇಶ್‌ ನಾಯಕನಾಗಿ ಕಾಣಿಸಿಕೊಂಡರೆ, ಮಲಯಾಳಿ ನಟಿ ಮಾಳವಿಕಾ ನಾಯರ್‌ ನಾಯಕಿಯಾಗಿ ನಟಿಸುವ ಮೂಲಕ ಕನ್ನಡಕ್ಕೆ ಆಗಮಿಸಿದ್ದಾರೆ. ಇನ್ನು ಕನ್ನಡದಲ್ಲಿ ಹತ್ತು ಹಲವು ಸಿನಿಮಾ ನಿರ್ದೇಶನ ಮಾಡಿದ್ದ ನಿರ್ದೇಶಕ ಶ್ರೀನಿವಾಸ್‌ ರಾಜು ಈ ಚಿತ್ರಕ್ಕೆ ನಿರ್ದೇಶನ ಮಾಡುತ್ತಿದ್ದಾರೆ.
ದಂಡುಪಾಳ್ಯ ಸಿನಿಮಾ ಮೂಲಕವೇ ಗುರುತಿಸಿಕೊಂಡ ಶ್ರೀನಿವಾಸ್‌ ರಾಜು, ಶಿವಂ, ಬ್ರಾಹ್ಮಣ, ದಂಡಪಾಳ್ಯದ ಮೂರು ಸರಣಿ ಸಿನಿಮಾಗಳನ್ನು ಶ್ರೀನಿವಾಸ್‌ ರಾಜು ನಿರ್ದೇಶನ ಮಾಡಿದ್ದಾರೆ. ಇದೀಗ ಕಾಮಿಡಿ, ಪ್ರೀತಿ, ಸೆಂಟಿಮೆಂಟ್‌ ಸಿನಿಮಾಗಳೀಗೆ ಹೆಸರುವಾಸಿಯಾದ ಗಣೇಶ್‌ ಜತೆ ಕೃಷ್ಣಂ ಪ್ರಣಯ ಸಖಿ ಹೆಸರಿನ ರೊಮ್ಯಾಂಟಿಕ್‌ ಲವ್‌ಸ್ಟೋರಿ ಹಿಡಿದು ಬಂದಿದ್ದಾರೆ.
ಇನ್ನು ಈ ಸಿನಿಮಾ ಮೂಲಕ ನಾಯಕಿಯಾಗಿ ಆಗಮಿಸುತ್ತಿರುವ ನಟಿ ಮಾಳವಿಕಾ ನಾಯರ್‌ಗಿದು ಮೊದಲ ಕನ್ನಡ ಸಿನಿಮಾ. ಮಲಯಾಳಂ ಮತ್ತು ತೆಲುಗಿನ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ ಈ ನಟಿ, ಈಗ ಗಣೇಶ್‌ ಕೈ ಹಿಡಿದು ಸ್ಯಾಂಡಲ್‌ವುಡ್‌ಗೆ ಆಗಮಿಸಿದ್ದಾರೆ.
ಇದೀಗ ಗಣೇಶ್‌ ಅವರ ಬರ್ತ್‌ಡೇ ಪ್ರಯುಕ್ತ ಚಿತ್ರದ ಕೆಲವು ಫೋಟೋಗಳನ್ನು ಹಂಚಿಕೊಂಡಿರುವ ಚಿತ್ರತಂಡ, ಈಗಾಗಲೇ ಶೂಟಿಂಗ್‌ ಸಹ ಆರಂಭಿಸಿದೆ. ನಟ ಗಣೇಶ್‌ ನಾಯಕನಾಗಿ ನಟಿಸುತ್ತಿರುವ 41ನೇ ಸಿನಿಮಾ ಇದಾಗಿದೆ. ಈಗಾಗಲೇ ಬೆಂಗಳೂರಿನಲ್ಲಿ ಈ ಸಿನಿಮಾದ ಶೂಟಿಂಗ್‌ ನಡೆಯುತ್ತಿದೆ. ಬಳಿಕ ಮೈಸೂರಿನಲ್ಲಿ ಅದಾದ ಮೇಲೆ ರಾಜಸ್ಥಾನದಲ್ಲಿಯೂ ಕೆಲ ಭಾಗದ ಚಿತ್ರೀಕರಣ ನಡೆಯಲಿದೆ. ಅಲ್ಲಿಂದ ನೇರವಾಗಿ ಯೂರೋಪ್‌ಗೂ ಈ ತಂಡ ಪ್ರಯಾಣ ಬೆಳೆಸಲಿದೆ.
ಚಿತ್ರದ ತಾರಾಗಣದಲ್ಲಿ ಸಾಧುಕೋಕಿಲ, ರಂಗಾಯಣ ರಘು, ಶಶಿಕುಮಾರ್, ಶ್ರುತಿ, ಸುಧಾರಾಣಿ, ಶ್ರೀನಿವಾಸಮೂರ್ತಿ, ಶಿವಧ್ವಜ್ ಶೆಟ್ಟಿ, ಬೆನಕ ಗಿರಿ ಸೇರಿ ಹಲವರು ನಟಿಸುತ್ತಿದ್ದಾರೆ. ತ್ರಿಶೂಲ್ ಎಂಟರ್ಟೈನ್ಮೆಂಟ್ ಬ್ಯಾನರ್‌ನಲ್ಲಿ ಪ್ರಶಾಂತ್ ಜಿ ರುದ್ರಪ್ಪ ಈ ಚಿತ್ರಕ್ಕೆ ಬಂಡವಾಳ ಹೂಡುತ್ತಿದ್ದಾರೆ. ಅರ್ಜುನ್‌ ಜನ್ಯ ಅವರ ಸಂಗೀತ ಈ ಚಿತ್ರಕ್ಕಿರಲಿದೆ.
ಕೃಷ್ಣಂ ಪ್ರಣಯ ಸಖಿ ಶೂಟಿಂಗ್‌ ಸೆಟ್‌ನಲ್ಲಿ ಗಣೇಶ್‌ ಅವರ ಬರ್ತ್‌ಡೇ ಆಚರಣೆ
ಸಿನಿಮಾ ಸಂಬಂಧಿ ಈ ಸುದ್ದಿಯನ್ನೂ ಓದಿ
Shiva Rajkumar: ಬಿಗ್‌ ಡ್ಯಾಡಿ ಬಗ್ಗೆ ಘೋಸ್ಟ್‌ ಚಿತ್ರತಂಡದಿಂದ ಬಿಗ್‌ ಅಪ್‌ಡೇಟ್‌; ಶಿವಣ್ಣನ ಬರ್ತ್‌ಡೇಗೆ ಕಾದಿದೆ ಸರ್ಪ್ರೈಸ್‌
Shiva Rajkumar: ಸ್ಯಾಂಡಲ್ವುಡ್ ಸೆಂಚುರಿ ಸ್ಟಾರ್‌ ಶಿವರಾಜ್‌ಕುಮಾರ್‌ (Shiva rajkumar) ನಟನೆಯ ‘ಘೋಸ್ಟ್‌’ (Ghost) ಸಿನಿಮಾ ಹತ್ತು ಹಲವು ಕಾರಣಕ್ಕೆ ಕುತೂಹಲ ಮೂಡಿಸುತ್ತಲೇ ಇದೆ. ಫಸ್ಟ್‌ ಲುಕ್‌ ಮೋಷನ್‌ ಪೋಸ್ಟರ್‌ನಿಂದ ಶುರುವಾದ ಈ ಕ್ಯೂರಿಯಾಸಿಟಿ, ಶಿವಣ್ಣನ ವಿಂಟೇಜ್‌ ಲುಕ್‌ಗೂ ಫ್ಯಾನ್ಸ್‌ ಮಾರುಹೋಗಿದ್ದರು. ಅತ್ಯಾಧುನಿಕ ತಂತ್ರಜ್ಞಾನ ಬಳಕೆಯೂ ಈ ಸಿನಿಮಾದಲ್ಲಾಗುತ್ತಿದೆ ಎಂದಾಗ ಅಭಿಮಾನಿಗಳ ಕಣ್ಣರಳಿದ್ದವು. ತಾರಾಬಳಗದ ವಿಚಾರದಲ್ಲಿಯೂ ಈ ಸಿನಿಮಾ ನೆಕ್ಸ್ಟ್‌ ಲೆವೆಲ್‌ನಲ್ಲಿದೆ. ಇದೀಗ ಈ ಚಿತ್ರದಿಂದ ಬಿಗ್‌ ಅಪ್‌ಡೇಟ್‌ಗೆ ದಿನಗಣನೆ ಶುರುವಾಗಿದೆ. ಪೂರ್ಣ ವಿವರಕ್ಕೆ ಇಲ್ಲಿ ಕ್ಲಿಕ್‌ ಮಾಡಿ
