ಕಾಟೇರ ನಾನು ನೋಡಿಲ್ಲ ಎಂದು ನಿಮಗೆ ಯಾರಾದ್ರೂ ಹೇಳಿದ್ರ? ದರ್ಶನ್‌ ಸಿನಿಮಾ ವೀಕ್ಷಣೆ ಕುರಿತು ಕಿಚ್ಚ ಸುದೀಪ್‌ ಉತ್ತರ
ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ನಟನೆಯ ಕಾಟೇರ ಸಿನಿಮಾವನ್ನು ಕಿಚ್ಚ ಸುದೀಪ್‌ ನೋಡಿದ್ದಾರ? ಈ ಪ್ರಶ್ನೆಗೆ ಸುದೀಪ್‌ ಒಗಟಿನಂತೆ ಉತ್ತರ ನೀಡಿದ್ದಾರೆ. ಕಾಟೇರ ಯಾವಾಗ ನೋಡ್ತಿರ ಎಂಬ ಅಭಿಮಾನಿಯ ಪ್ರಶ್ನೆಗೆ "ನಾನು ಈಗಾಗಲೇ ನೋಡಿಲ್ಲ ಎಂದು ನಿಮಗೆ ಯಾರಾದರೂ ಹೇಳಿದ್ದಾರೆಯೇ?" ಎಂದು ಸುದೀಪ್‌ ಉತ್ತರಿಸಿದ್ದಾರೆ.
ಸ್ಯಾಂಡಲ್‌ವುಡ್‌ನಲ್ಲಿ ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಮತ್ತು ಕಿಚ್ಚ ಸುದೀಪ್‌ ಒಂದಾನೊಂದು ಕಾಲದ ಸ್ನೇಹಿತರು. ಆದರೆ, ಇವರಿಬ್ಬರ ನಡುವಿನ ನಿಗೂಢ ಮೌನವಿದೆ. ಇಬ್ಬರ ಫ್ಯಾನ್ಸ್‌ ನಡುವೆ ಆಗಾಗ ಕೋಳಿ ಜಗಳವೂ ನಡೆಯುತ್ತ ಇರುತ್ತದೆ. ದರ್ಶನ್‌ ನಟನೆಯ ಕಾಟೇರ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ಬ್ಲಾಕ್‌ಬಸ್ಟರ್‌ ಸಿನಿಮಾವಾಗಿ ಹೊರಹೊಮ್ಮಿದೆ. ಈ ಸಿನಿಮಾವನ್ನು ಕಿಚ್ಚ ಸುದೀಪ್‌ ನೋಡಿದ್ದಾರ? ಎಂಬ ಪ್ರಶ್ನೆ ಬಹುತೇಕರಲ್ಲಿತ್ತು. ಇದಕ್ಕೆ ಸಂಬಂಧಪಟ್ಟಂತೆ ಕಿಚ್ಚ ಸುದೀಪ್‌ ನೀಡಿರುವ ಉತ್ತರ ಮತ್ತೆ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ಟ್ವಿಟ್ಟರ್‌ನಲ್ಲಿ ಕಿಚ್ಚ ಸುದೀಪ್‌ ಅವರಿಗೆ ಮ್ಯಾಡ್‌ ಮ್ಯಾಕ್ಸ್‌ ಎಂಬ ಹ್ಯಾಂಡಲ್‌ನಿಂದ "ಕಾಟೇರ ಯಾವಾಗ ನೋಡ್ತೀರ ಸರ್‌" ಎಂದು ಬಳಕೆದಾರರೊಬ್ಬರು ಪ್ರಶ್ನೆ ಕೇಳಿದ್ದರು. ಈ ಪ್ರಶ್ನೆಯಲ್ಲಿ ನೀವಿನ್ನೂ ಕಾಟೇರ ನೋಡಿಲ್ಲ, ಆದಷ್ಟು ಬೇಗ ನೋಡಿ, ನೀವು ನೋಡ್ತಿರಾ ಇಲ್ವ? ಇತ್ಯಾದಿ ಪ್ರಶ್ನೆಗಳು ಅಡಗಿದ್ದವು. ಈ ಪ್ರಶ್ನೆಗೆ ಕಿಚ್ಚ ಸುದೀಪ್‌ ಜಾಣತನದಿಂದ ಉತ್ತರ ನೀಡಿದ್ದಾರೆ.
"ನಾನು ಈಗಾಗಲೇ ನೋಡಿಲ್ಲ ಎಂದು ನಿಮಗೆ ಯಾರಾದರೂ ಹೇಳಿದ್ದಾರೆಯೇ?" ಎಂದು ಈ ಪ್ರಶ್ನೆಗೆ ಮರುಪ್ರಶ್ನೆಯ ರೂಪದಲ್ಲಿ ಸುದೀಪ್‌ ಉತ್ತರ ನೀಡಿದ್ದಾರೆ. ಈ ಉತ್ತರವೂ ಮತ್ತೆ ಹಲವು ಪ್ರಶ್ನೆಗಳನ್ನು ಹುಟ್ಟು ಹಾಕಿದೆ. ನಾನು ಈಗಾಗಲೇ ನೋಡಿಲ್ಲ ಎಂದು ಯಾರಾದರೂ ಹೇಳಿದ್ದಾರೆಯೇ ಎಂದು ಪ್ರಶ್ನಿಸುವ ಮೂಲಕ ಕಿಚ್ಚ ಸುದೀಪ್‌ ನಾನು ಈಗಾಗಲೇ ಈ ಸಿನಿಮಾ ನೋಡಿರಬಹುದು ಎಂದು ಅಭಿಮಾನಿಗಳ ಮನಸ್ಸಿಗೆ ಹುಳ ಬಿಟ್ಟಿದ್ದಾರೆ.
ಎಲ್ಲವೂ ಸರಿ ಹೋಗಬೇಕು ಎಂದಾಗ ಸರಿ ಹೋಗುತ್ತದೆ!
ದರ್ಶನ್‌ ಮತ್ತು ಸುದೀಪ್‌ ಸ್ನೇಹದ ಕುರಿತು ಹಲವು ವರ್ಷಗಳಿಂದ ಅಭಿಮಾನಿಗಳ ನಡುವೆ ಬೇಸರ ಇದೆ. ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ ಸಂಸದೆ ಸುಮಲತಾ ಅವರ ಹುಟ್ಟುಹಬ್ಬದಂದು ಇವರಿಬ್ಬರು ಒಂದೇ ವೇದಿಕೆಯಲ್ಲಿದ್ದರು. ಇಲ್ಲಿ ಇವರಿಬ್ಬರು ಮಾತನಾಡಬಹುದು ಎಂದು ಫ್ಯಾನ್ಸ್‌ ಅಂದುಕೊಂಡಿದ್ದರು. ಈ ಸಂದರ್ಭದಲ್ಲಿ ಪ್ರಶ್ನೆಯೊಂದಕ್ಕೆ ಉತ್ತರಿಸುತ್ತ ಸುದೀಪ್‌ ಹೀಗೆ ಹೇಳಿದ್ದರು.
"ಸುಮಲತಾ ಬರ್ತ್‌ಡೇ ಪಾರ್ಟಿಗೆ ನಾನು ಹೋಗಿದ್ದೆ. ಅಲ್ಲಿ ದರ್ಶನ್‌ ಬರ್ತಾರೆ ಎನ್ನುವ ವಿಷಯ ನನಗೆ ಮೊದಲೇ ಗೊತ್ತು. ನಾವಿಬ್ಬರು ಕಿತ್ತಾಡಿಕೊಂಡು ಜಗಳ ಮಾಡಿದ್ದೇವೆ ಎನ್ನುವುದು ಕಲ್ಪನೆಯಾಗಿದೆ. ಇಬ್ಬರ ನಡುವಿನ ಗೋಡೆ ಮುರಿಯಬೇಕು, ಆದರೆ, ಇಂತಹ ಕಲ್ಪನೆಗಳು ಇರಬಾರದು. ಪ್ರಶ್ನೆಗಳು ಬರ್ತಾವೆ ಹೋಗ್ತಾವೆ. ಒಳ್ಳೆಯದು ಇರ್ತಾವೆ, ಕೆಟ್ಟದೂ ಇರ್ತಾವೆ, ಇಬ್ಬರು ಶೇಕ್‌ಹ್ಯಾಂಡ್‌ ಮಾಡೋದು ದೊಡ್ಡ ವಿಚಾರವಲ್ಲ. ನಾವಿಬ್ಬರೂ ಮೆಚ್ಯೂರ್ಡ್‌. ಎಲ್ಲವೂ ಸರಿ ಹೋಗಬೇಕು ಎಂದಾಗ ಸರಿ ಹೋಗುತ್ತದೆ" ಎಂದು ಸುದೀಪ್‌ ಹೇಳಿದ್ದರು.
ಕಾಟೇರ ಸಿನಿಮಾ ಯಶಸ್ವಿಯಾದ ಬಳಿಕ ಸ್ಯಾಂಡಲ್ವುಡ್ ನಟಿಯರು, ನಟರಿಗೆ ಸಿನಿಮಾ ವೀಕ್ಷಣೆಗೆ ರಾಕ್‌ಲೈನ್‌ ವೆಂಕಟೇಶ್‌ "ಸೆಲೆಬ್ರಿಟಿ ಶೋ" ಆಯೋಜಿಸಿದ್ದರು. ಕಾಟೇರ ವೀಕ್ಷಣೆಗೆ ಕಿಚ್ಚ ಸುದೀಪ್‌ಗೂ ಆಮಂತ್ರಣ ನೀಡಲಾಗಿತ್ತು. ಈ ಕುರಿತು ಸ್ವತಃ ತರುಣ್‌ ಸುಧೀರ್‌ ಸ್ಪಷ್ಟಪಡಿಸಿದ್ದರು. ಕಿಚ್ಚ ಸುದೀಪ್‌ ಸದ್ಯ ಮ್ಯಾಕ್ಸ್‌ ಸಿನಿಮಾದ ಕ್ಲೈಮ್ಯಾಕ್ಸ್‌ ಶೂಟಿಂಗ್‌ನಲ್ಲಿ ಬ್ಯುಸಿಯಾಗಿರುವ ಕಾರಣ ಸೆಲೆಬ್ರಿಟಿ ಶೋಗೆ ಬರಲಾಗುತ್ತಿಲ್ಲ, ಆದರೆ, ಶೂಟಿಂಗ್‌ ಮುಗಿದ ಬಳಿಕ ನೋಡುತ್ತೇನೆ ಎಂದು ಸುದೀಪ್‌ ಹೇಳಿದ್ದರು ಎಂದು ತರುಣ್‌ ಕಿಶೋರ್‌ ಸುಧೀರ್‌ ಮಾಹಿತಿ ನೀಡಿದ್ದರು.
