ಸಾಟಿಯಿಲ್ಲದ ಉಡುಗೊರೆ ನೀಡಿದ ದೇವರಿಗೆ ಧನ್ಯವಾದ; 28 ವರ್ಷದ ಸಿನಿ ಪ್ರಯಾಣದ ಕುರಿತು ಕಿಚ್ಚ ಸುದೀಪ್
ಕನ್ನಡ ಚಿತ್ರರಂಗದ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರು ಸ್ಯಾಂಡಲ್‌ವುಡ್‌ಗೆ ಆಗಮಿಸಿ 28 ವರ್ಷ ತುಂಬಿದೆ. ಸ್ಪರ್ಶ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ನ ನಾಯಕನಟನಾದ ಸುದೀಪ್ ಈಗ ಎಲ್ಲರಿಗೂ ಪ್ರೀತಿಯ ಬಿಗ್‌ಬಾಸ್‌. 28 ವರ್ಷದ ಸಿನಿ ಪ್ರಯಾಣ ನೆನಪಿಸಿಕೊಂಡು ಸುದೀಪ್ ಟ್ವಿಟ್ಟರ್‌ನಲ್ಲಿ ಸುದೀರ್ಘ ಪತ್ರ ಬರೆದಿದ್ದಾರೆ.
ಬೆಂಗಳೂರು: ಕೆಲವು ದಿನಗಳ ಹಿಂದೆಯಷ್ಟೇ ಬಿಗ್‌ಬಾಸ್‌ ಕನ್ನಡ ಗ್ರ್ಯಾಂಡ್‌ ಫಿನಾಲೆ ಮುಗಿಸಿಕೊಟ್ಟ ಕಿಚ್ಚ ಸುದೀಪ್ ಇದೀಗ ಮ್ಯಾಕ್ಸ್‌ ಸಿನಿಮಾದ ಶೂಟಿಂಗ್‌ನತ್ತ ಚಿತ್ತಹರಿಸಿದ್ದಾರೆ. ಇದೇ ಸಮಯದಲ್ಲಿ ಇವರು ಒಂದು ಗುಡ್‌ನ್ಯೂಸ್‌ ಹಂಚಿಕೊಂಡಿದ್ದಾರೆ. ಕನ್ನಡ ಚಿತ್ರರಂಗದ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರು ಸ್ಯಾಂಡಲ್‌ವುಡ್‌ಗೆ ಆಗಮಿಸಿ 28 ವರ್ಷ ತುಂಬಿದೆ. ಸ್ಪರ್ಶ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ನ ನಾಯಕನಟನಾದ ಸುದೀಪ್ ಈಗ ಎಲ್ಲರಿಗೂ ಪ್ರೀತಿಯ ಬಿಗ್‌ಬಾಸ್‌. 28 ವರ್ಷದ ಸಿನಿ ಪ್ರಯಾಣ ನೆನಪಿಸಿಕೊಂಡು ಸುದೀಪ್ ಟ್ವಿಟ್ಟರ್‌ನಲ್ಲಿ ಸುದೀರ್ಘ ಪತ್ರ ಬರೆದಿದ್ದಾರೆ.
ಕಿಚ್ಚ ಸುದೀಪ್ ಪತ್ರ
"ಈ ಅದ್ಭುತವಾದ ಮನರಂಜನಾ ಕ್ಷೇತ್ರದಲ್ಲಿ ಸುಂದರವಾದ 28 ವರ್ಷ ಕಳೆದಿರುವುದು ನನ್ನ ಬದುಕಿನ ಸುಂದರವಾದ ಭಾಗವಾಗಿದೆ. ಇಂತಹ ಸಾಟಿಯಿಲ್ಲದ ಕೊಡುಗೆ ನೀಡಿರುವ ದೇವರಿಗೆ ಧನ್ಯವಾದ ಹೇಳುವೆ" ಎಂದು ಸುದೀಪ್ ಹೇಳಿದ್ದಾರೆ.
"ನನ್ನ ಹೆತ್ತವರಿಗೆ, ಕುಟುಂಬಕ್ಕೆ, ನನ್ನೆಲ್ಲ ಅಮೂಲ್ಯ ಟೆಕ್ನಿಷಿಯನ್‌ಗಳಿಗೆ, ಬರಹಗಾರರಿಗೆ, ಪ್ರೊಡ್ಯುಸರ್‌ಗಳಿಗೆ, ನನ್ನ ಸಹನಟರಿಗೆ ಮಾಧ್ಯಮ, ಮನರಂಜನಾ ಚಾನೆಲ್‌ಗಳಿಗೆ, ವಿತರಕರಿಗೆ, ಪ್ರದರ್ಶಕರಿಗೆ, ವಕುಟಾ ಕುಟುಂಬದ ಎಲ್ಲರಿಗೆ ಮತ್ತು ನನ್ನ ಬದುಕಿನ ಪ್ರಯಾಣದ ಭಾಗವಾದ ಎಲ್ಲರಿಗೂ ಧನ್ಯವಾದ" ಎಂದು ಸುದೀಪ್ ಥ್ಯಾಂಕ್ಸ್‌ ಹೇಳಿದ್ದಾರೆ.
"ಅಭಿಮಾನಿಗಳ ರೂಪದಲ್ಲಿರುವ ನನ್ನೆಲ್ಲ ಸ್ನೇಹಿತರಿಗೆ ದೊಡ್ಡ ಹಗ್‌ ಮತ್ತು ಲೋಡ್‌ಗಟ್ಟಲೆ ಲವ್‌. ನನ್ನ ಬದುಕಿನ ಪ್ರಮುಖ ಗಳಿಕೆಯಿದು. ನೀವು ನನಗೆ ನೀಡಿರುವ ಪ್ರೀತಿಯೇ ನನ್ನ ಜೀವನದ ಪ್ರಮುಖ ಗಳಿಕೆ" ಎಂದು ಅವರು ಹೇಳಿದ್ದಾರೆ.
"ನನ್ನ ಸಿನಿಪ್ರಯಾಣ ರೋಲರ್‌ಕಾಸ್ಟರ್‌ ರೈಡ್‌. ನಾನು ಇದರ ಪ್ರತಿಯೊಂದು ಕ್ಷಣವನ್ನು ಆನಂದಿಸಿದೆ. ನಾನು ದೋಷರಹಿತ ವ್ಯಕ್ತಿಯಲ್ಲ. ನಾನು ಪರ್ಫೆಕ್ಟ್‌ ಅಲ್ಲದೆ ಇರಬಹುದು. ಆದರೆ, ನನಗೆ ಬಂದ ಅವಕಾಶಗಳಲ್ಲಿ ಬೆಸ್ಟ್‌ ಆಗಿ ಕಾರ್ಯನಿರ್ವಹಿಸಲು ಪ್ರಯತ್ನಿಸಿದೆ. ನಾನು ಹೇಗೆ ಇರುವೆನೋ ಹಾಗೆಯೇ ನನ್ನನ್ನು ಒಪ್ಪಿಕೊಂಡ ಎಲ್ಲರಿಗೂ ಧನ್ಯವಾದಗಳು- ಕಿಚ್ಚ" ಎಂದು ಅವರು ಬರೆದಿದ್ದಾರೆ.
ಇವರ ಈ ಪತ್ರಕ್ಕೆ ಎಕ್ಸ್‌ನಲ್ಲಿ ಸಾಕಷ್ಟು ಅಭಿಮಾನಿಗಳು ಅಭಿನಂದನೆಗಳನ್ನು ತಿಳಿಸಿದ್ದಾರೆ. ಈ ಪತ್ರದ ಜತೆಗೆ ಸುದೀಪ್ ಬರೆದಿರುವ ಟಿಪ್ಪಣಿಯೂ ಹೃದಯಸ್ಪರ್ಶಿಯಾಗಿದೆ. "ಕೆಲವು ವರ್ಷಗಳ ಹಿಂದೆ ಕಂಟೀರವ ಸ್ಟುಡಿಯೋಗೆ ಅಂಬರೀಶ್‌ ಮಾಮಾನ ಜತೆ ಬ್ರಹ್ಮ ಫ್ಲೋರ್‌ಗೆ ಕಾಲಿಟ್ಟಂತೆ ಅನಿಸುತ್ತಿದೆ. ಈ ರೀತಿ ಕ್ಯಾಮೆರಾ ಎದುರಿಸಿ 28 ವರ್ಷಗಳಾದವು" ಎಂದು ಅವರು ಬರೆದಿದ್ದಾರೆ.
ಕಿಚ್ಚ ಸುದೀಪ್ ನಿನ್ನೆ ಆಸ್ಕ್‌ ಕಿಚ್ಚ ಹ್ಯಾಶ್‌ಟ್ಯಾಗ್‌ನಡಿ ಅಭಿಮಾನಿಗಳ ಪ್ರಶ್ನೆಗಳಿಗೆ ಉತ್ತರಿಸಿದ್ದಾರೆ. ಮ್ಯಾಕ್ಸ್‌ ಸಿನಿಮಾದಿಂದ ಹಿಡಿದು ಹಲವು ವಿಚಾರಗಳ ಕುರಿತು ಅಭಿಮಾನಿಗಳ ಪ್ರಶ್ನೆಗೆ ಸುದೀಪ್ ಉತ್ತರಿಸಿದ್ದಾರೆ. "ಸರ್, ನಿಮ್ದು ಮತ್ತೆ ದರ್ಶನ್ ಅವರದ್ದು ಸಮಸ್ಯೆಯನ್ನ ಯಾವಾಗ ಬಗೆಹರಿಸಿಕೊಳ್ಳುತ್ತೀರಾ? ಇನ್ನು ಎಷ್ಟು ಟೈಮ್ ತಗೋತೀರಾ" ಎಂದು ಪ್ರಶ್ನೆ ಮಾಡಿದ್ದಾರೆ. ಅದಕ್ಕೆ ಉತ್ತರಿಸಿದ ಸುದೀಪ್, "ಸಮಸ್ಯೆ ಏನೂ ಅಂತ ಇಬ್ಬರೂ ಹುಡುಕ್ತಾ ಇದ್ದೀವಿ" ಎಂದಷ್ಟೇ ಉತ್ತರ ನೀಡಿದ್ದಾರೆ. ಇನ್ನೊಬ್ಬ ಬಳಕೆದಾರ, ದರ್ಶನ್ ಮತ್ತು ಸುದೀಪ್ ಜತೆಗಿನ ಫೋಟೋ ಶೇರ್‌ ಮಾಡಿಕೊಂಡು, "ದರ್ಶನ್ ಬಗ್ಗೆ ಒಂದು ಮಾತು ಹೇಳಿ" ಎಂದಿದ್ದಾರೆ. ಅದಕ್ಕೆ ಸುದೀಪ್, "ನಾನು ಅವರಿಗೆ ಸದಾ ಒಳ್ಳೆಯದೇ ಆಗಲೆಂದು ಶುಭ ಹಾರೈಸುತ್ತೇನೆ" ಎಂದಿದ್ದಾರೆ. ಹೀಗೆ ಅಭಿಮಾನಿಗಳ ಜತೆಗೆ ಒಂದಷ್ಟು ಹೊತ್ತು ಸಮಯ ಕಳೆದಿದ್ದಾರೆ ಸುದೀಪ್.
ವಿಭಾಗ