ಕಿರಿಕ್‌ ಪಾರ್ಟಿಯ ಬ್ಯಾಚುಲರ್‌ ಪಾರ್ಟಿ; ದಿಗಂತ್‌, ಯೋಗಿ, ಅಚ್ಯುತ್‌ ಕುಮಾರ್‌ ಕಾಮಿಡಿ ಸಿನಿಮಾ ನಾಳೆ ಬಿಡುಗಡೆ
Bachelor party release date: ಸ್ಯಾಂಡಲ್‌ವುಡ್‌ನಲ್ಲಿ ಕಾಟೇರದ ಸಕ್ಸಸ್‌ ಬಳಿಕ ಮುಂಬರುವ ಸಿನೆಮಾಗಳ ಕುರಿತೂ ನಿರೀಕ್ಷೆ ಹೆಚ್ಚಾಗಿದೆ. ಈ ಶುಕ್ರವಾರ (ಜನವರಿ 26) ಚಿತ್ರಮಂದಿರಗಳಲ್ಲಿ ದಿಗಂತ್‌, ಯೋಗಿ, ಅಚ್ಯುತ್‌ ಕುಮಾರ್‌ ನಟನೆಯ ಬ್ಯಾಚುಲರ್‌ ಪಾರ್ಟಿ ಸಿನಿಮಾ ಬಿಡುಗಡೆಯಾಗಲಿದೆ.
ಬೆಂಗಳೂರು: ರಕ್ಷಿತ್‌ ಶೆಟ್ಟಿ ಪ್ರೊಡಕ್ಷನ್‌ ಹೌಸ್‌ "ಪರಂವಃ ಸ್ಟುಡಿಯೋ" ನಿರ್ಮಾಣದ, ದಿಗಂತ್‌, ಯೋಗಿ, ಅಚ್ಯುತ್‌ ಕುಮಾರ್‌ ನಟನೆಯ ಬಹುನಿರೀಕ್ಷಿತ ಸಿನೆಮಾ ಬ್ಯಾಚುಲರ್‌ ಪಾರ್ಟಿ ಈ ಶುಕ್ರವಾರ ಅಂದರೆ ನಾಳೆ ಬಿಡುಗಡೆಯಾಗಲಿದೆ. ಕಿರಿಕ್‌ ಪಾರ್ಟಿ ತಂಡದ ಬಹುತೇಕ ಕಲಾವಿದರು ಇರುವ ಈ ಸಿನೆಮಾದ ಕುರಿತು ಸಿನಿಮಾ ಪ್ರೇಕ್ಷಕರಲ್ಲಿ ನಿರೀಕ್ಷೆ ತುಸು ಹೆಚ್ಚೇ ಇದೆ. ಇದೇ ಸಮಯದಲ್ಲಿ ಉಪಾಧ್ಯಕ್ಷ, ಕೇಸ್‌ ಆಫ್‌ ಕೊಂಡಾಣದಂತಹ ಸಿನೆಮಾಗಳು ಸ್ಯಾಂಡಲ್‌ವುಡ್‌ನಲ್ಲಿ ಬಿಡುಗಡೆಯಾಗುತ್ತಿವೆ. ಈ ಹಿಂದೆ ಕಿರಕ್‌ ಪಾರ್ಟಿ ಸಿನೆಮಾದಲ್ಲಿ ರಶ್ಮಿಕಾ ಮಂದಣ್ಣ ನಟಿಸಿದ್ದರು. ಕಿರಕ್‌ ಪಾರ್ಟಿ ಸಕ್ಸಸ್‌ ಬಳಿಕ ರಶ್ಮಿಕಾ ಮಂದಣ್ಣ ಬಳಿಕ ಟಾಲಿವುಡ್ ಪ್ರವೇಶಿಸಿದ್ದರು.
ಬ್ಯಾಚುಲರ್‌ ಪಾರ್ಟಿ- ಈ ಶುಕ್ರವಾರ ಬಿಡುಗಡೆ
ದಿಗಂತ್‌, ಲೂಸ್‌ ಮಾದ ಯೋಗಿ ಎಂಬ ಇಬ್ಬರು ಕನ್ನಡ ನಾಯಕ ನಟರು ಒಂದಾಗಿ ಈ ಸಿನೆಮಾದಲ್ಲಿ ನಟಿಸಿದ್ದಾರೆ. ಇವರ ಜತೆ ಅಚ್ಯುತಕುಮಾರ್‌ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಜನವರಿ 26 ರಂದು ಬಿಡುಗಡೆಯಾಗುತ್ತಿರುವ ಬ್ಯಾಚುಲರ್‌ ಪಾರ್ಟಿಯಲ್ಲಿ ಹಲವು ಹಾಸ್ಯ ಕಲಾವಿದರು, ಅತಿಥಿ ಕಲಾವಿದರು ನಟಿಸಿದ್ದಾರೆ. ಹೀಗಾಗಿ ಬ್ಯಾಚುಲರ್‌ ಪಾರ್ಟಿಯಲ್ಲಿ ಹಾಸ್ಯದ ರಸದೌತಣ ಹೆಚ್ಚೇ ಇರುವ ನಿರೀಕ್ಷೆಯಿದೆ. ಈಗಾಗಲೇ ಬಿಡುಗಡೆಯಾಗಿರುವ ಚಿತ್ರದ ಟ್ರೇಲರ್‌, ಹಾಡುಗಳು, ಪೋಸ್ಟರ್‌, ಫಸ್ಟ್‌ ಲುಕ್‌ ಎಲ್ಲವೂ ಸಖತ್‌ ಆಗಿದ್ದು, ಚಿತ್ರದ ನಿರೀಕ್ಷೆಯನ್ನು ಹೆಚ್ಚಿಸಿದೆ.
ಬ್ಯಾಚುಲರ್‌ ಪಾರ್ಟಿ ಸಿನೆಮಾವು ಅಭಿಜಿತ್‌ ಮಹೇಶ್‌ ನಿರ್ದೇಶನದ ಸಿನೆಮಾ. ಇವರು ಕಿರಿಕ್‌ ಪಾರ್ಟಿ ಸಿನೆಮಾದ ಬರಹಗಾರ. ಯುವ ಜನತೆಯನ್ನು ಗಮನದಲ್ಲಿಟ್ಟುಕೊಂಡು ಅಭಿಜಿತ್‌ ಮಹೇಶ್‌ ಈ ಸಿನೆಮಾ ನಿರ್ದೇಶಿಸಿದ್ದಾರೆ. ಈಗಾಗಲೇ ಟ್ರೈಲರ್‌ ನೋಡಿದಾಗ ಈ ಸಿನೆಮಾದಲ್ಲಿ ಇಬ್ಬರು ಗೆಳೆಯರು ಬ್ಯಾಚುಲರ್‌ ಪಾರ್ಟಿ ಮಾಡಲು ಬ್ಯಾಂಕಾಂಕ್‌ಗೆ ಹೋದ ಬಳಿಕ ಆಗುವ ತಾಪತ್ರಯಗಳ ಕಥೆ ಇರುವುದು ಗೊತ್ತಾಗಿದೆ. ಈಗಾಗಲೇ ಈ ಟ್ರೈಲರ್‌ ಎರಡು ದಶಲಕ್ಷಕ್ಕಿಂತಲೂ ಹೆಚ್ಚು ವೀಕ್ಷಣೆ ಪಡೆದಿದೆ. ಟ್ರೈಲರ್‌ನಲ್ಲೇ ಸಾಕಷ್ಟು ಹಾಸ್ಯವಿದ್ದು, ಸಿನಿಮಾ ಪ್ರೇಮಿಗಳು ಖುಷಿಪಟ್ಟಿದ್ದಾರೆ.
ಕಿರಿಕ್‌ ಪಾರ್ಟಿ ಸಿನೆಮಾದಲ್ಲಿ ರಕ್ಷಿತ್‌ ಶೆಟ್ಟಿ ನಾಯಕ ನಟರಾಗಿದ್ದರು. ರಶ್ಮಿಕಾ ಮಂದಣ್ಣ ನಾಯಕಿಯಾಗಿದ್ದರು. ಇದೀಗ ರಕ್ಷಿತ್‌ ಶೆಟ್ಟಿ ಬ್ಯಾಚುಲರ್‌ ಪಾರ್ಟಿ ಸಿನೆಮಾವನ್ನು ನಿರ್ಮಾಣ ಮಾಡಿದ್ದಾರೆ. ಪರಂವಃ ಸ್ಟುಡಿಯೋಸ್‌ ಬ್ಯಾನರ್‌ನಡಿ ರಕ್ಷಿತ್‌ ಶೆಟ್ಟಿ ಮತ್ತು ಜಿಎಸ್‌ ಗುಪ್ತಾ ಅವರು ಈ ಸಿನೆಮಾ ನಿರ್ಮಾಣ ಮಾಡಿದ್ದಾರೆ.
ಬ್ಯಾಚುಲರ್‌ ಪಾರ್ಟಿ ಟ್ರೇಲರ್‌ ಯೂಟ್ಯೂಬ್‌ನಲ್ಲಿ ಈಗಲೂ ಟ್ರೆಂಡಿಂಗ್‌ನಲ್ಲಿದ್ದು ಹಲವು ದಶಲಕ್ಷ ವೀಕ್ಷಣೆ ಪಡೆದುಕೊಂಡಿದೆ. ದೂದ್‌ ಪೇಡ ದಿಗಂತ, ಲೂಸ್‌ ಮಾದ ಯೋಗಿ, ಅಚ್ಯುತ್‌ ಕುಮಾರ್‌ ಅವರ ಝಲಕ್‌ ಪ್ರೇಕ್ಷಕರಿಗೆ ಮೋಡಿ ಮಾಡಿದೆ. ಇದು ಸಖತ್‌ ಕಾಮಿಡಿ ಇರೋ ಸಿನಿಮಾ ಎಂದು ಜನರು ಮಾತನಾಡಿಕೊಳ್ಳುತ್ತಿದ್ದಾರೆ. ಇಂದು ಸಂಜೆ ಕೆಲವು ಚಿತ್ರಮಂದಿರಗಳಲ್ಲಿ ಬ್ಯಾಚುಲರ್‌ ಪಾರ್ಟಿ ಪ್ರೀಮಿಯರ್‌ ಶೋ ಪ್ರದರ್ಶನ ಇರಲಿದೆ. ನಾಳೆ ಅಧಿಕೃತವಾಗಿ ಚಿತ್ರಮಂದಿರಗಳಲ್ಲಿ ಬ್ಯಾಚುಲರ್‌ ಪಾರ್ಟಿ ಬಿಡುಗಡೆಯಾಗಲಿದೆ.
(This copy first appeared in Hindustan Times Kannada website. To read more like this please logon to kannada.hindustantime.com )
