ತಮಿಳು ಸಿನಿಮಾ ಪ್ರೋತ್ಸಾಹಿಸುವ ನಿಮಗೆ ಕಾವೇರಿ ಹೋರಾಟದಲ್ಲಿ ನಾನು ಸುದೀಪ್‌ ಮಾತ್ರ ಕಾಣೋದಾ; ದರ್ಶನ್ ಪ್ರಶ್ನೆ
ಕಾವೇರಿ ಪ್ರತಿಭಟನೆಯಲ್ಲಿ ದರ್ಶನ್ ಹೆಗಲ ಮೇಲೆ ಹಸಿರು ಶಾಲು ಹೊದ್ದಿದ್ದರು. ಸೋಷಿಯಲ್‌ ಮೀಡಿಯಾದಲ್ಲಿ ನಟರ ವಿರುದ್ಧ ಜನರು ಅಸಮಾಧಾನ ವ್ಯಕ್ತಪಡಿಸಿದ ವಿಚಾರವನ್ನು ದರ್ಶನ್ ಪ್ರಸ್ತಾಪಿಸಿದರು.
ಕಾವೇರಿ ಗಲಾಟೆ ಮತ್ತೆ ಕಾವೇರಿದೆ. ತಮಿಳುನಾಡಿಗೆ ನೀರು ಹರಿಸಬೇಕೆಂಬ ಕಾವೇರಿ ನಿರ್ವಹಣಾ ಪ್ರಾಧಿಕಾರದ ತೀರ್ಪನ್ನು ಸುಪ್ರೀಂ ಕೋರ್ಟ್‌ ಕೂಡಾ ಎತ್ತಿ ಹಿಡಿದಿದೆ. ಇದರ ಪ್ರಕಾರ 15 ದಿನಗಳ ಕಾಲ ತಮಿಳುನಾಡಿಗೆ ಪ್ರತಿದಿನ 5 ಸಾವಿರ ಕ್ಯೂಸೆಕ್ಸ್‌ ನೀರು ಹರಿಸಬೇಕಿದೆ. ಇದನ್ನು ವಿರೋಧಿಸಿ ಸೆಪ್ಟೆಂಬರ್‌ 26ರಂದು ಬೆಂಗಳೂರು ಬಂದ್‌ ಕರೆ ನೀಡಲಾಗಿದೆ.
ರೈತರನ್ನು ಬೆಂಬಲಿಸುತ್ತಿರುವ ಸ್ಟಾರ್‌ ನಟರು
ಮತ್ತೆ ಕಾವೇರಿ ವಿವಾದ ಆರಂಭವಾಗುತ್ತಿದ್ದಂತೆ ರೈತರು ಪ್ರತಿಭಟನೆ ಆರಂಭಿಸಿದ್ದಾರೆ. ತಮಿಳುನಾಡಿಗೆ ನೀರು ಬಿಟ್ಟು ಕರ್ನಾಟಕ ರೈತರಿಗೆ ಸಮಸ್ಯೆಯುಂಟುಮಾಡಬೇಡಿ ಎಂದು ಮನವಿ ಮಾಡುತ್ತಿದ್ದಾರೆ. ಜನ ಸಾಮಾನ್ಯರು ಮಾತ್ರ ಅಲ್ಲ, ಸೆಲೆಬ್ರಿಟಿಗಳು ಕೂಡಾ ಕಾವೇರಿ ನೀರು ಕುಡಿಯುತ್ತಿದ್ದಾರೆ. ಆದರೆ ಕಾವೇರಿ ಹೋರಾಟದಲ್ಲಿ ಯಾವ ನಟರೂ ಕಾಣಿಸುತ್ತಿಲ್ಲ ಎಂದು ಸೋಷಿಯಲ್‌ ಮೀಡಿಯಾದಲ್ಲಿ ವಿರೋಧ ವ್ಯಕ್ತವಾಗುತ್ತಿದ್ದಂತೆ ಸ್ಟಾರ್‌ ನಟರು ಕಾವೇರಿ ವಿಚಾರದಲ್ಲೂ ನಮ್ಮ ಹೋರಾಟ ಇದ್ದೇ ಇದೆ ಎಂದು ಮುಂದೆ ಬಂದಿದ್ದಾರೆ.
ಕಾವೇರಿ ಹೋರಾಟದಲ್ಲಿ ದರ್ಶನ್ ಭಾಗಿ
ಇತ್ತೀಚೆಗೆ, ದರ್ಶನ್ ರೈತ ಸಂಘಟನೆ ಹಮ್ಮಿಕೊಂಡಿದ್ದ ಕಾವೇರಿ ಹೋರಾಟಲ್ಲಿ ಭಾಗಿಯಾಗಿದ್ದರು. ಈ ವೇಳೆ ದರ್ಶನ್ ಹೆಗಲ ಮೇಲೆ ಹಸಿರು ಶಾಲು ಹೊದ್ದಿದ್ದರು. ಸೋಷಿಯಲ್‌ ಮೀಡಿಯಾದಲ್ಲಿ ನಟರ ವಿರುದ್ಧ ಜನರು ಅಸಮಾಧಾನ ವ್ಯಕ್ತಪಡಿಸಿದ ವಿಚಾರವನ್ನು ಪ್ರಸ್ತಾಪಿಸಿದ ದರ್ಶನ್, ಕಾವೇರಿ ವಿಚಾರದಲ್ಲಿ ತಮಿಳುನಾಡನ್ನು ವಿರೋಧಿಸುವ ಜನರು, ತಮಿಳು ಸಿನಿಮಾಗಳನ್ನು ಪ್ರೋತ್ಸಾಹಿಸುವ ಬಗ್ಗೆ ಮಾತನಾಡಿ ಟಾಂಗ್‌ ನೀಡಿದರು.
ನಾನು ಸುದೀಪ್‌, ಯಶ್‌, ಶಿವಣ್ಣ ಮಾತ್ರಾ ಕಾಣೋದಾ?
''ಕಾವೇರಿ ಹೋರಾಟಕ್ಕೆ ಆ ಹೀರೋ ಬರಲಿಲ್ಲ, ಈ ಹೀರೋ ಬರಲಿಲ್ಲ ಎನ್ನುತ್ತೀರಿ, ಮೊನ್ನೆ ಕರ್ನಾಟಕದಲ್ಲಿ ಒಂದು ತಮಿಳು ಸಿನಿಮಾ ರಿಲೀಸ್‌ ಆಗಿತ್ತು. ನಮ್ಮ ವಿತರಕ ಅದನ್ನು 6 ಕೋಟಿಗೆ ಖರೀದಿಸಿರು. ಸಿನಿಮಾ, ಕರ್ನಾಟಕದಲ್ಲಿ 37 ಕೋಟಿ ಲಾಭ ಮಾಡಿತು. ಆಗೇಕೆ ನೀವು ಯಾರೂ ಮಾತನಾಡಲಿಲ್ಲ? ಈಗ ದರ್ಶನ್, ಸುದೀಪ್‌, ಶಿವಣ್ಣ, ಯಶ್‌ ಮಾತ್ರ ಕಾಣಿಸೋದಾ? ಅವರ್ಯಾರೂ ನಿಮಗೆ ಕಾಣಿಸುತ್ತಿಲ್ವಾ?'' ಎಂದು ದರ್ಶನ್ ಜನರನ್ನು ಪ್ರಶ್ನಿಸಿದ್ದಾರೆ. ದರ್ಶನ್ ಬಾಯಲ್ಲಿ ಸುದೀಪ್‌ ಹೆಸರು ಬರುತ್ತಿದ್ದಂತೆ ಅಲ್ಲಿ ನೆರೆದಿದ್ದ ಜನರು ಅರಚಾಡಿದ್ದು ಕಂಡುಬಂತು.
ಅಭಿಮಾನಿಗಳು ಫುಲ್‌ ಖುಷ್‌
ಒಂದು ಕಾಲದಲ್ಲಿ ಆಪ್ತರಾಗಿದ್ದ ಸುದೀಪ್‌ ಹಾಗೂ ದರ್ಶನ್ ಮನಸ್ತಾಪದಿಂದ ದೂರಾಗಿದ್ದರು. ಬಹಳ ವರ್ಷಗಳ ನಂತರ ಇತ್ತೀಚೆಗೆ ಸುದೀಪ್‌, ದರ್ಶನ್ ಹೆಸರನ್ನು ದರ್ಶನ್ ಸುದೀಪ್‌ ಹೆಸರನ್ನು ಪ್ರಸ್ತಾಪಿಸುತ್ತಿದ್ದಾರೆ. ಸುಮಲತಾ ಬರ್ತ್‌ಡೇ ಪಾರ್ಟಿಯಲ್ಲಿ ದರ್ಶನ್ ಅವರನ್ನು ನೋಡಿದ್ದು ಬಹಳ ಖುಷಿ ಆಯ್ತು ಎಂದು ಇತ್ತೀಚೆಗೆ ಸುದೀಪ್‌ ಹೇಳಿದ್ದರು. ಇದೀಗ ದರ್ಶನ್, ಸುದೀಪ್‌ ಹೆಸರು ಹೇಳಿದ್ದನ್ನು ಕೇಳಿ ಅಭಿಮಾನಿಗಳು ಖುಷಿಯಾಗಿದ್ದಾರೆ.
