Darshan Birthday: ನಿಮ್‌ ಅಪ್ಪನ್‌ ಹೆಸ್ರು ಉಳಿಸ್ಬುಟ್ಟೆ ಕಣಯ್ಯ; ಅಷ್ಟಕ್ಕೂ ದರ್ಶನ್‌ಗೆ ಹೀಗೆ ಹೇಳ್ತಿರೋದು ಯಾರಿರಬಹುದು?

Darshan Birthday: ಸ್ಯಾಂಡಲ್‌ವುಡ್‌ನ ಸ್ಟಾರ್‌ ನಟ ಚಾಲೆಂಜಿಂಗ್‌ ಸ್ಟಾರ್ ದರ್ಶನ್‌‌ ಬರ್ತ್‌ಡೇಗೆ ಇನ್ನೊಂದೇ ದಿನ ಬಾಕಿ ಉಳಿದಿದೆ. ಫೆ. 16ರಂದು ರಾಜ್ಯಾದ್ಯಂತ ಡಿಬಾಸ್‌ ಪರ್ವ ಶುರುವಾಗಲಿದೆ. ಅಂದರೆ, ಅವರ ಅಭಿಮಾನಿಗಳು ನೆಚ್ಚಿನ ನಟನ ಬರ್ತ್‌ಡೇಯನ್ನು ಹಬ್ಬದಂತೆ ಆಚರಿಸಲು ತೀರ್ಮಾನಿಸಿದ್ದಾರೆ. ಕಾಟೇರ ಅನ್ನೋ ಹಿಟ್‌ ಸಿನಿಮಾ ಸಹ ಅಭಿಮಾನಿಗಳನ್ನು ರಂಜಿಸಿತ್ತು. ಅದೇ ಖುಷಿಯಲ್ಲಿ ದರ್ಶನ್‌ ಕಟೌಟ್‌ಗೆ ಬೃಹತ್‌ ಹಾರ ಬೀಳಲಿದೆ. ಹತ್ತಾರು ಕಾರ್ಯಕ್ರಮಗಳಿಗೂ ಚಾಲನೆ ಸಿಗಲಿದೆ. ಈ ನಡುವೆ ಫ್ಯಾನ್ಸ್‌ ಸಿದ್ಧಪಡಿಸಿದ ಸಿಡಿಪಿ ಸಹ ಈ ಬಾರಿ ಸದ್ದು ಮಾಡ್ತಿದೆ.

ಸೋಷಿಯಲ್‌ ಮೀಡಿಯಾದಲ್ಲಿ ನೂರಾರು ಫ್ಯಾನ್‌ ಪೇಜ್‌ಗಳನ್ನು ಹೊಂದಿದ್ದಾರೆ ನಟ ದರ್ಶನ್‌. ಕೋಟ್ಯಂತರ ಅಭಿಮಾನಿಗಳನ್ನೂ ಸಂಪಾದಿಸಿದ್ದಾರೆ ಈ ನಟ. ಹೀಗಿರುವಾಗ ಇದೇ ನಟನಿಗೆ ಫ್ಯಾನ್ಸ್‌ ಕಡೆಯಿಂದಲೂ ಉಡುಗೊರೆ ಬೇಕಲ್ಲವೇ? ಹಾಗಾಗಿಯೇ ಈ ಸಲ ಪ್ರತಿ ಬಾರಿಗಿಂತ ವಿಶೇಷವಾದ ಸಿಡಿಪಿ (ಕಾಮನ್‌ ಡಿಸ್ಪ್ಲೇ ಫೋಟೋ) ಸೃಷ್ಟಿ ಮಾಡಿದ್ದಾರೆ ಫ್ಯಾನ್ಸ್‌. ಕಾಟೇರ ಸಿನಿಮಾದಲ್ಲಿನ ಒಂದು ಡೈಲಾಗ್‌ಅನ್ನೇ ಪ್ರಧಾನವಾಗಿರಿಸಿಕೊಂಡು, ಸಿಡಿಪಿ ರಚಿಸಿದ್ದಾರೆ.

ಇದನ್ನೂ ಓದಿ: ಗುಡ್‌ ಸೆಕ್ಸ್‌ ಒಂದು ರೀತಿ ಒಳ್ಳೇ ಊಟ ಇದ್ದಂತೆ; ಬೋಲ್ಡ್‌ ಮಾತಲ್ಲೇ ಮುತ್ತು ಉದುರಿಸಿದ ಅನುಪಮಾ ಪರಮೇಶ್ವರನ್‌ -ಟಿಲ್ಲು ಸ್ಕ್ವೇರ್ ಟ್ರೇಲರ್

ಹಿರಣ್ಯ ಕಶಿಪು ಡೈಲಾಗ್‌ ಹೇಳಿದ್ದ ದರ್ಶನ್

ಹಾಗಾದರೆ ಈ ಸಲದ ಸಿಡಿಪಿಯ ವಿಶೇಷತೆ ಏನು? ಕಾಟೇರ ಸಿನಿಮಾದಲ್ಲಿ ಬರುವ ನಾಟಕದ ದೃಶ್ಯದಲ್ಲಿನ ದರ್ಶನ್‌ ಅಭಿನಯವೇ ಈ ಸಿಡಿಪಿಯ ಹೈಲೈಟ್.‌ ಹಿರಣ್ಯ ಕಶಿಪು ನಾಟಕದಲ್ಲಿ ತೆರೆಮೇಲೆ ಮಾತು ಬಾರದ ಚೊಂಗ್ಲಾ (ವೈಜನಾಥ್‌ ಬಿರಾದಾರ್)‌ ಅಭಿನಯ ತೋರುತ್ತಿದ್ದರೆ, ಅದೇ ವೇದಿಕೆಯ ಹಿಂಬದಿಯಲ್ಲಿ ದರ್ಶನ್‌ ಸಾಕ್ಷಾತ್‌ ಹಿರಣ್ಯ ಕಶಿಪು ರೀತಿಯಲ್ಲಿ ಕೈಯಲ್ಲಿ ಗದೆ ಹಿಡಿದು ಭಕ್ತ ಪ್ರಹ್ಲಾದ ಚಿತ್ರದ ಡೈಲಾಗ್‌ ಒಪ್ಪಿಸಿದ್ದರು. ಆ ಸಮಯದಲ್ಲಿ ಅಕ್ಕನ ಗಂಡ ಮಾದೇವಣ್ಣ ಬಂದು "ನಿಮ್‌ ಅಪ್ಪನ್‌ ಹೆಸ್ರು ಉಳಿಸ್ಬುಟ್ಟೆ ಕಣಯ್ಯ" ಎಂದು ಹೇಳಿದ್ದರು.

ಕಾಟೇರ ಥೀಮ್‌ನಲ್ಲಿ ಸಿಡಿಪಿ

ಇದೀಗ ಹಾಗೇ ಹೇಳಿದ ನಿಮ್‌ ಅಪ್ಪನ್‌ ಹೆಸ್ರು ಉಳಿಸ್ಬುಟ್ಟೆ ಕಣಯ್ಯ ಡೈಲಾಗ್‌ ಅನ್ನೇ ಪ್ರಧಾನವಾಗಿರಿಸಿಕೊಂಡು ಸಿಡಿಪಿ ಹೊಸೆದಿದ್ದಾರೆ ಫ್ಯಾನ್ಸ್‌. ಸೋಷಿಯಲ್‌ ಮೀಡಿಯಾದಲ್ಲಿ ಈ ಫೋಟೋವನ್ನು ಹರಿಬಿಡಲಾಗಿದೆ. ಡಿ ಬಾಸ್, ತೂಗುದೀಪ ಕಲಾ ಮಂಡಳಿ, ತೂಗುದೀಪ ಶ್ರೀನಿವಾಸ್‌ ಅವರ ಫೋಟೋ ಕೆಳಗೆ ಮರೆಯಲಾಗದ ಮಾಣಿಕ್ಯ ಎಂದು ಬರೆದು ನಮನ ಸಲ್ಲಿಸಲಾಗಿದೆ. ಒಟ್ಟಾರೆ, ಕಾಟೇರ ಥೀಮ್‌ನಲ್ಲಿ ಈ ಸಲದ ಸಿಡಿಪಿ ಮೂಡಿಬಂದಿದ್ದು, ಅವರ ಅಭಿಮಾನಿಗಳೂ ಫುಲ್‌ ಖುಷಿಯಾಗಿದ್ದಾರೆ.

ಇದನ್ನೂ ಓದಿ: ಬೃಂದಾವನ ಸೀರಿಯಲ್‌: ಊಟದ ಟೇಬಲ್‌ ಮುಂದೆ ಗಿರಿಜಾ ಹೈಡ್ರಾಮಾ; ಮಗನ ಸಂಸಾರದ ಬಗ್ಗೆ ದಾಕ್ಷಾಯಿಣಿ ಮನಸ್ಸಲ್ಲಿ ಮೂಡಿತು ಅನುಮಾನ

ಡೆವಿಲ್‌ ಫಸ್ಟ್‌ ಲುಕ್‌ ಗಿಫ್ಟ್‌

ಇನ್ನು ಮಿಲನಾ ಪ್ರಕಾಶ್‌ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಡೆವಿಲ್‌ ಸಿನಿಮಾದ ಫಸ್ಟ್‌ ಲುಕ್‌ ಬಿಡುಗಡೆಗೂ ಟೈಮ್‌ ಫಿಕ್ಸ್‌ ಆಗಿದೆ. ಇಂದು ಮಧ್ಯರಾತ್ರಿ 11;59ಕ್ಕೆ ಈ ಚಿತ್ರದ ಫಸ್ಟ್‌ ಲುಕ್‌ ಟೀಸರ್‌ ಬಿಡುಗಡೆ ಆಗಲಿದೆ. ಇದರ ಜತೆಗೆ ಕೆವಿಎನ್‌ ಪ್ರೊಡಕ್ಷನ್ಸ್‌ ಬ್ಯಾನರ್‌ನಲ್ಲಿ ನಿರ್ಮಾಣವಾಗಲಿರುವ ಮತ್ತು ಪ್ರೇಮ್‌ ನಿರ್ದೇಶನದ ಹೊಸ ಸಿನಿಮಾ ತಂಡದ ಕಡೆಯಿಂದಲೂ ಹೊಸ ಮಾಹಿತಿ ಸಿಗುವ ಸಾಧ್ಯತೆ ಇದೆ.

(You are reading this copy on "Hindustan Times Kannada". For latest updates on entertainment, OTT, Web series, Kannada film industry, Kannada serials, Reality shows visit kannada.hindustantimes.com)