Dhoomam trailer: ಫಹಾದ್ ಫಾಸಿಲ್ ಧೂಮಂ ಟ್ರೇಲರ್‌ನಲ್ಲೂ ಕೆಜಿಎಫ್‌ ಹವಾ; ಮತ್ತೊಂದು ಥ್ರಿಲ್ಲರ್‌ ಜಾಡು ಹಿಡಿದು ಬಂದ ಪವನ್‌ ಕುಮಾರ್
ಹೊಂಬಾಳೆ ಫಿಲಂಸ್ ನಿರ್ಮಾಣ ಮಾಡಿರುವ ಚೊಚ್ಚಲ ಮಲಯಾಳಂ ಧೂಮಂ ಚಿತ್ರದ ಟ್ರೇಲರ್ ಬಿಡುಗಡೆ ಆಗಿದೆ. ಪವನ್‌ ಕುಮಾರ್ ನಿರ್ದೇಶನದ ಈ ಚಿತ್ರದಲ್ಲಿ ಫಹಾದ್ ಫಾಸಿಲ್ ನಾಯಕನಾಗಿ ನಟಿಸಿದ್ದಾರೆ.
Dhoomam trailer: ಧೂಮಂ ಸಿನಿಮಾ ಘೋಷಣೆ ಆದಾಗಲೇ ಒಂದಷ್ಟು ಕುತೂಹಲ ಮೂಡಿಸಿತ್ತು. ಪವನ್‌ ಕುಮಾರ್ (Pawan Kumar) ನಿರ್ದೇಶನದ ಚಿತ್ರ ಎಂಬುದು ಒಂದೆಡೆಯಾದರೆ, ಹೊಂಬಾಳೆ ಫಿಲಂಸ್ (Hombale Films) ನಿರ್ಮಾಣದಲ್ಲಿ ತಯಾರಾಗುತ್ತಿರುವ ಸಿನಿಮಾ ಎಂಬ ಕಾರಣಕ್ಕೂ ಸದ್ದು ಮಾಡಿತ್ತು. ಇದೆಲ್ಲದರ ಜತೆಗೆ ನಟ ಫಹಾದ್ ಫಾಸಿಲ್ (fahadh faasil) ಈ ಚಿತ್ರದ ಹೀರೋ ಎಂದಾಗ ನಿರೀಕ್ಷೆ ಮಟ್ಟ ಆಕಾಶ ಮುಟ್ಟಿತ್ತು. ಇದೀಗ ಸದ್ದಿಲ್ಲದೆ ಟ್ರೇಲರ್ (Dhoomam Trailer) ಮೂಲಕ ಬಂದು, ಬಿಡುಗಡೆ ದಿನಾಂಕವನ್ನೂ ಘೋಷಣೆ ಮಾಡಿದೆ ಈ ಚಿತ್ರತಂಡ.
ಇದನ್ನೂ ಓದಿ: ಲೈಫ್‌ ಬ್ಯೂಟಿಫುಲ್‌ ಎಂದು ಹೊಸ ಫೋಟೋ ಹಂಚಿಕೊಂಡ ಯಶ್‌ ರಾಧಿಕಾ ಪಂಡಿತ್‌; ಇದು ಬೇಡ ಹೊಸ ಸಿನಿಮಾ ಅಪ್‌ಡೇಟ್‌ ಕೊಡಿ ಎಂದ ಫ್ಯಾನ್ಸ್‌
ಹಾಗಾದರೆ ಬಿಡುಗಡೆ ಆಗಿರುವ ಟ್ರೇಲರ್‌ನಲ್ಲೇನಿದೆ? ಸಮಯದ ವಿರುದ್ಧದ ಓಟದಲ್ಲಿ ಸಿಕ್ಕಿರುವ ಅವಿ (ಫಹಾದ್ ಫಾಸಿಲ್) ಮತ್ತು ದಿಯಾ (ಅಪರ್ಣ) ಸುತ್ತ ಈ ಚಿತ್ರ ಸುತ್ತುತ್ತದೆ. ಸುತ್ತ ಅಪಾಯ ಮತ್ತು ಮನಸ್ಸೊಳಗಿನ ಭಯವನ್ನು ಮೆಟ್ಟಿ ನಿಲ್ಲುವುದಕ್ಕೆ ಅವರಿಬ್ಬರೂ ಏನೆಲ್ಲಾ ತ್ಯಾಗಗಳನ್ನು ಮಾಡುತ್ತಾರೆ ಎಂಬುದೇ ಈ ಚಿತ್ರದ ಕಥೆ. ಇದೇ ಟ್ರೇಲರ್‌ನಲ್ಲಿ ಕೆಜಿಎಫ್‌ ಚಾಪ್ಟರ್‌ 2 ಚಿತ್ರದ ಸಣ್ಣ ತುಣುಕು ಕಾಣಿಸುತ್ತದೆ. ಸಿಗರೇಟ್‌ ಸೇದುವ ಯಶ್‌ ಅವರ ದೃಶ್ಯವೂ ಇದೆ.
ನಿರ್ದೇಶಕ ಪವನ್‌ ಹೇಳುವುದೇನು?
‘ಕಳೆದ ಒಂದು ದಶಕದಿಂದ ಈ ಚಿತ್ರವನ್ನು ಮಾಡಬೇಕು ಎಂಬ ಪ್ರಯತ್ನದಲ್ಲಿದ್ದೆ. ಒಂದು ಅದ್ಭುತ ಚಿತ್ರ ಮಾಡುವ ನಿಟ್ಟಿನಲ್ಲಿ ಚಿತ್ರಕಥೆಯನ್ನು ಹಲವು ಬಾರಿ ತಿದ್ದಿದ್ದೆ. ಒಂದು ದಶಕದ ನನ್ನ ಕನಸನ್ನು ಇದೀಗ ಹೊಂಬಾಳೆ ಪ್ರೊಡಕ್ಷನ್ಸ್ ಸಂಸ್ಥೆಯು ನನಸು ಮಾಡಿದೆ. ಒಂದು ವಿಭಿನ್ನವಾದ ಕಥೆಯನ್ನು ತೆರೆಯ ಮೇಲೆ ತರುವುದಕ್ಕೆ ಕೈ ಜೋಡಿಸಿದೆ. ಹಲವು ಪ್ರತಿಭಾವಂತರ ತಂಡವನ್ನು ನೀಡಿ ಒಂದೊಳ್ಳೆಯ ಚಿತ್ರ ನೀಡುವುದಕ್ಕೆ ಸಂಪೂರ್ಣ ಸಹಕಾರ ನೀಡಿದೆ. ಈ ಚಿತ್ರ ಮತ್ತು ಕಥೆಯನ್ನು ಪ್ರೇಕ್ಷಕರು ಹೇಗೆ ಸ್ವೀಕರಿಸುತ್ತಾರೆ ಎಂಬ ಕುತೂಹಲ ನನಗಿದೆ’ ಎಂಬುದು ನಿರ್ದೇಶಕ ಪವನ್‌ ಕುಮಾರ್ ಮಾತು.
ಇದನ್ನೂ ಓದಿ: ಪಾಂಡ್ಯ 420 ಬಗ್ಗೆ ನಿಮಗೆ ಗೊತ್ತಾ? ಸಂಗೀತ ಕುಟುಂಬದಿಂದ ಬಂದವ ಆಗಿದ್ದು ಕಾಮಿಡಿಯನ್!; ಇಲ್ಲಿದೆ ಸಂದರ್ಶನ
ಜೂನ್‌ 23ರಂದು ಬಿಡುಗಡೆ
ಹೊಂಬಾಳೆ ಫಿಲಂಸ್ ಬ್ಯಾನರ್‌ನಲ್ಲಿ ‘ಧೂಮಂ’ ಸಿನಿಮಾ ನಿರ್ಮಾಣವಾಗಿದ್ದು, ಮಾಲಿವುಡ್‌ ಸಿನಿಮಾ ಕ್ಷೇತ್ರಕ್ಕೂ ಕಾಲಿರಿಸಿದೆ. ಮಲಯಾಳಂ ಜತೆಗೆ ಕನ್ನಡದಲ್ಲಿಯೂ ಈ ಚಿತ್ರ ಬಿಡುಗಡೆ ಆಗುತ್ತಿದೆ. ಟ್ರೇಲರ್‌ನಲ್ಲಿ ಸಿನಿಮಾ ಬಿಡುಗಡೆಯ ಬಗ್ಗೆಯೂ ಮಾಹಿತಿ ಚಿತ್ರತಂಡ ಮಾಹಿತಿ ನೀಡಿದೆ. ಜೂನ್‌ 23ರಂದು ಧೂಮಮ್‌ ಚಿತ್ರ ಬಿಡುಗಡೆ ಆಗಲಿದೆ.
ಫಹಾದ್ ಫಾಸಿಲ್, ಅಪರ್ಣ ಬಾಲಮುರಳಿ ಜತೆ ಕನ್ನಡದ ಅಚ್ಯುತ್ ಕುಮಾರ್ ಪೊಲೀಸ್‌ ಅಧಿಕಾರಿ ಪಾತ್ರದಲ್ಲಿದ್ದಾರೆ. ಇನ್ನುಳಿದಂತೆ ರೋಶನ್ ಮ್ಯಾಥ್ಯೂ, ವಿನೀತ್ ರಾಧಾಕೃಷ್ಣನ್, ಅನು ಮೋಹನ್, ಜಾಯ್ ಮ್ಯಾಥ್ಯೂ, ನಂದು ಮುಂತಾದವರು ನಟಿಸಿದ್ದಾರೆ. ಪೂರ್ಣಚಂದ್ರ ತೇಜಸ್ವಿ ಅವರ ಸಂಗೀತ, ಸುರೇಶ್ ಅವರ ಸಂಕಲನ ಮತ್ತು ಪ್ರೀತಾ ಜಯರಾಮನ್ ಅವರ ಛಾಯಾಗ್ರಹಣ ಈ ಚಿತ್ರಕ್ಕಿದೆ.
