VK 29: ಇದು ಆಳಿದವರ ಕಥೆಯಲ್ಲ, ಅಳಿದು ಉಳಿದವರ ಕಥೆ! ‘ಕಾಟೇರ’ ಕಥೆಗಾರನ ಸಿನಿಮಾದಲ್ಲಿ ವಿಜಯ್
ವಿಜಯ್ ಬರ್ತ್‌ಡೇ ನಿಮಿತ್ತ VK29 ಚಿತ್ರದ ಪೋಸ್ಟರ್‌ ರಿಲೀಸ್‌ ಆಗಿದೆ. ಹುಲಿ ಮತ್ತು ಶ್ವಾನದ ಕಾದಾಟದ ಲುಕ್‌ ಕುತೂಹಲ ಮೂಡಿಸಿದೆ. ಇಲ್ಲಿ ಹುಲಿ ಯಾರು ಶ್ವಾನ ಯಾರು ಎಂಬುದನ್ನು ಕುತೂಹಲವಾಗಿಯೇ ಉಳಿಸಿದ್ದಾರೆ ನಿರ್ದೇಶಕ ಜಡೇಶ್ ಕುಮಾರ್ ಹಂಪಿ. ಪೋಸ್ಟರ್‌ ಅಡಿಯಲ್ಲಿ ಇದು ಆಳಿದವರ ಕಥೆಯಲ್ಲ, ಅಳಿದು ಉಳಿದವರ ಕಥೆ ಎಂಬ ಕ್ಯಾಪ್ಷನ್‌ ಸಹ ಕ್ಯೂರಿಯಾಸಿಟಿ ಹೆಚ್ಚಿಸಿದೆ.
Duniya Vijaykumar Birthday: ಕಾಟೇರ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ 200 ಕೋಟಿಯ ಮೈಲಿಗಲ್ಲು ತಲುಪಿದೆ. ದರ್ಶನ್‌ ಮತ್ತು ತರುಣ್‌ ಸುಧೀರ್‌ ಕಾಂಬಿನೇಷನ್‌ನಲ್ಲಿ ಬಂದ ಕಾಟೇರ ಕನ್ನಡದ ಪಾಲಿಗೂ ಅಷ್ಟೇ ವಿಶೇಷ. ಈ ಸಿನಿಮಾ ಗೆಲುವಿನ ರೂವಾರಿಯಲ್ಲಿ ಕಥೆಗಾರ ಜಡೇಶ್ ಕುಮಾರ್ ಹಂಪಿ ಅವ್ರದ್ದು ದೊಡ್ಡ ಪಾಲಿದೆ. ನೆಲದ ಘಮಲಿನ ಕಥೆ ಬರೆದು ನಾಡಿನ ಜನರನ್ನು ಸೆಳೆದ ಇದೇ ಕಥೆಗಾರ ಇದೀಗ ಮತ್ತೆ ನಿರ್ದೇಶಕನ ಕ್ಯಾಪ್‌ ಧರಿಸಲು ಸಿದ್ಧತೆ ನಡೆಸಿದ್ದಾರೆ. ಈ ಸಲ ದುನಿಯಾ ವಿಜಯ್ ಜತೆ ಸಿನಿಮಾ ಘೋಷಣೆ ಮಾಡಿದ್ದಾರೆ.
ಇಂದು (ಜ. 20) ದುನಿಯಾ ವಿಜಯ್ 50ನೇ ಬರ್ತ್‌ಡೇ. ಈ ವಿಶೇಷ ದಿನದ ನಿಮಿತ್ತ ಹುಟ್ಟೂರು ಆನೇಕಲ್‌ನ ಕುಂಬಾರಹಳ್ಳಿಯಲ್ಲಿ ಅಪ್ಪ, ಅಮ್ಮನ ಸಮಾಧಿ ಬಳಿ ಬರ್ತ್‌ಡೇ ಆಚರಿಸಿಕೊಂಡಿದ್ದಾರೆ. ಈ ನಡುವೆಯೇ ಭೀಮ ಸಿನಿಮಾದಿಂದ ಹೊಸ ಟೀಸರ್‌ ಬಿಡುಗಡೆ ಆಗಿದೆ. ಇಂಟ್ರೆಸ್ಟಿಂಗ್‌ ವಿಚಾರ ಏನೆಂದರೆ, ಗುರು ಶಿಷ್ಯರು ಸಿನಿಮಾ ನಿರ್ದೇಶಕ, ಕಾಟೇರ ಕಥೆಗಾರ ಜಡೇಶ್ ಕುಮಾರ್ ಹಂಪಿ ಜತೆಗೆ ವಿಜಯ್ ಕುಮಾರ್ ಕೈ ಜೋಡಿಸಿದ್ದಾರೆ. ತಾತ್ಕಾಲಿಕವಾಗಿ VK 29 ಎಂದು ಶೀರ್ಷಿಕೆ ಇಡಲಾಗಿದೆ.
ವಿಜಯ್ ಬರ್ತ್‌ಡೇ ನಿಮಿತ್ತ VK29 ಚಿತ್ರದ ಹೊಸ ಪೋಸ್ಟರ್‌ ರಿಲೀಸ್‌ ಆಗಿದ್ದು, ಹುಲಿ ಮತ್ತು ಶ್ವಾನದ ಕಾದಾಟದ ಲುಕ್‌ ಕುತೂಹಲ ಮೂಡಿಸಿದೆ. ಇಲ್ಲಿ ಹುಲಿ ಯಾರು ಶ್ವಾನ ಯಾರು ಎಂಬುದನ್ನು ಕುತೂಹಲವಾಗಿಯೇ ಉಳಿಸಿದ್ದಾರೆ ನಿರ್ದೇಶಕರು. ಪೋಸ್ಟರ್‌ ಅಡಿಯಲ್ಲಿ ಇದು ಆಳಿದವರ ಕಥೆಯಲ್ಲ, ಅಳಿದು ಉಳಿದವರ ಕಥೆ ಎಂಬ ಕ್ಯಾಪ್ಷನ್‌ ಸಹ ಕ್ಯೂರಿಯಾಸಿಟಿ ಹೆಚ್ಚಿಸಿದೆ. ಈಗಾಗಲೇ ಭೀಮ ಸಿನಿಮಾಕ್ಕೆ ಬಂಡವಾಳ ಹೂಡಿದ ಜಗದೀಶ್ ಗೌಡ ಅವರೇ ಈ ಚಿತ್ರವನ್ನೂ ನಿರ್ಮಾಣ ಮಾಡಲಿದ್ದಾರೆ.
ಚಂದನವನಕ್ಕೆ ವಿಜಯ್ ಪುತ್ರಿ ಮೋನಿಕಾ
ಮಣ್ಣಿನ ಕಥೆಗಳಿಗೆ ಹೆಸರುವಾಸಿಯಾಗಿರೋ ಜಡೇಶ್ ಕುಮಾರ್ ಹಂಪಿ VK29 ಮೂಲಕ ಮತ್ತೊಂದು ಸೊಗಡಿನ ಸಿನ್ಮಾ ಮಾಡೋ ಸೂಚನೆ ನೀಡಿದ್ದಾರೆ. ಈ ಸಿನಿಮಾದಲ್ಲಿ ದುನಿಯಾ ವಿಜಯ್ ಅವರ ಹಿರಿಯ ಮಗಳು ಮೋನಿಕಾ ತಂದೆಯ ಜೊತೆಗೆ ಮಗಳ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈಗಾಗಲೇ ನಟನಾ ತರಬೇತಿ ಪಡೆದಿರುವ ಮೋನಿಕಾ, ಈ ಸಿನಿಮಾ ಮೂಲಕ ಚಂದನವನ ಪ್ರವೇಶ ಪಡೆಯಲಿದ್ದಾರೆ. ಜತೆಗೆ ಮೋನಿಕಾ ಬದಲು ಸ್ಕ್ರೀನ್‌ ನೇಮ್‌ ಬೇರೆಯದ್ದನ್ನೇ ಇಡುವುದಾಗಿಯೂ ವಿಜಯ್ ತಿಳಿಸಿದ್ದಾರೆ.
ಭೀಮ ಬಳಿಕವೇ VK29 ಶುರು
ಸದ್ಯ ಭೀಮ ಸಿನಿಮಾದ ಬಹುತೇಕ ಕೆಲಸಗಳು ಮುಕ್ತಾಯವಾಗಿವೆ. ಬರ್ತ್‌ಡೇ ಪ್ರಯುಕ್ತ ಟೀಸರ್‌ ಸಹ ಬಿಡುಗಡೆ ಆಗಿದೆ. ಭೀಮ ಸಿನಿಮಾವನ್ನು ವಿಜಯ್ ಅವರೇ ನಿರ್ದೇಶನ ಮಾಡಿದ್ದಾರೆ. ಈ ಹಿಂದೆ ಸಲಗ ಚಿತ್ರಕ್ಕೂ ಆಕ್ಷನ್‌ ಕಟ್‌ ಹೇಳಿದ್ದರು. ಜಗದೀಶ್ ಗೌಡ ನಿರ್ಮಾಣದಲ್ಲಿ ಮೂಡಿಬರುತ್ತಿರುವ ಭೀಮ ಬಿಡುಗಡೆ ಬಳಿಕವೇ, VK29 ಸಿನಿಮಾ ಕೆಲಸಗಳಿಗೆ ಚಿತ್ರತಂಡ ಚಾಲನೆ ಕೊಡಲಿದೆ.
