Ghost Trailer: ಘೋಸ್ಟ್ ಸಿನಿಮಾದ ಟ್ರೈಲರ್‌ ಬಿಡುಗಡೆ; ನಾನು ಬಂದ್ರೆ ಯುದ್ಧಭೂಮಿ ರುದ್ರಭೂಮಿ ಆಗುತ್ತೆ; ಶಿವಣ್ಣನ ಹಲವು ಲುಕ್‌ನ ಝಲಕ್‌
Shivarajkumar Ghost Trailer released: ಶಿವರಾಜ್‌ ಕುಮಾರ್‌ ನಟನೆಯ ಘೋಸ್ಟ್ ಸಿನಿಮಾದ ಟ್ರೈಲರ್‌ ಬಿಡುಗಡೆಯಾಗಿದೆ. ಇವರ ಗ್ಯಾಂಗ್‌ಸ್ಟಾರ್‌ ಲುಕ್‌, ಖಡಕ್‌ ಡೈಲಾಗ್‌ಗೆ ಅಭಿಮಾನಿಗಳು ಥ್ರಿಲ್‌ ಆಗಿದ್ದಾರೆ. ಕನ್ನಡ, ತೆಲುಗು, ತಮಿಳಿನಲ್ಲಿ ಘೋಸ್ಟ್ ಸಿನಿಮಾದ ಟ್ರೈಲರ್‌ ಬಿಡುಗಡೆಯಾಗಿದೆ. ಶಿವಣ್ಣ ಇದರಲ್ಲಿ ಹಲವು ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ.
ಬೆಂಗಳೂರು: ಸ್ಯಾಂಡಲ್ವುಡ್ ಮಾತ್ರವಲ್ಲದೆ ಭಾರತ ಚಿತ್ರರಂಗವೇ ಕಾದು ನೋಡುತ್ತಿದ್ದ ಘೋಸ್ಟ್ ಸಿನಿಮಾದ ಟ್ರೈಲರ್‌ ಬಿಡುಗಡೆಯಾಗಿದೆ. ಸೆಂಚುರಿ ಸ್ಟಾರ್‌ ಶಿವಣ್ಣ ಇಲ್ಲಿ ಗ್ಯಾಂಗ್‌ಸ್ಟಾರ್‌ ಆಗಿ ಕಾಣಿಸಿಕೊಂಡಿದ್ದು "ಇದು ಸಾಮ್ರಾಜ್ಯ ಕಟ್ಟೋ ಕಥೆಯಲ್ಲ, ಸಾಮ್ರಾಜ್ಯ ಧ್ವಂಸ ಮಾಡೋಕ್ಕೆ ಬಂದಿರೋದೆ ನಾನು" ಎಂದು ಅಬ್ಬರಿಸಿದ್ದಾರೆ. ಶಿವಣ್ಣನ ಖಡಕ್‌ ಲುಕ್‌ಗೆ ಪ್ರೇಕ್ಷಕರು ಫಿದಾ ಆಗಿದ್ದು, ಟ್ರೈಲರ್‌ ಬೆಂಕಿ ಎಂದು ಅಭಿಮಾನಿಗಳು ಹೇಳಿದ್ದಾರೆ.
ಕನ್ನಡ ಮಾತ್ರವಲ್ಲದೆ ತೆಲುಗು ಭಾಷೆಯಲ್ಲಿಯೂ ಟ್ರೈಲರ್‌ ಬಿಡುಗಡೆಯಾಗಿದೆ. ತೆಲುಗು ಟ್ರೈಲರ್‌ ಅನ್ನು ರಾಜಮೌಳಿ ಬಿಡುಗಡೆ ಮಾಡಿದ್ದಾರೆ. ಘೋಸ್ಟ್ ಸಿನಿಮಾದ ಟ್ರೈಲರ್‌ ಕನ್ನಡ, ತೆಲುಗು, ಮಲಯಾಳಂ ಮತ್ತು ತಮಿಳು ಭಾಷೆಯಲ್ಲಿ ಬಿಡುಗಡೆಯಾಗಿದೆ. ತಮಿಳು ಟ್ರೈಲರ್‌ ಅನ್ನು ಧನುಷ್‌ ಬಿಡುಗಡೆ ಮಾಡಿದ್ದಾರೆ. ಜವಾನ್ ಸಿನಿಮಾದ ಬಳಿಕ ತಮಿಳು ಪ್ರೇಕ್ಷಕರಿಗೆ ಶಿವಣ್ಣನ ಬಗ್ಗೆ ಕ್ರೇಜ್‌ ಹೆಚ್ಚಾಗಿದೆ.
ಹೇಗಿದೆ ಘೋಸ್ಟ್ ಟ್ರೈಲರ್‌?
ಟ್ರೈಲರ್‌ ಆರಂಭದಲ್ಲಿಯೇ ಹೆಡ್‌ಫೋನ್‌ ಹಾಕಿ ನೋಡಿ ಎಂಬ ಸಂದೇಶ ಬರುತ್ತದೆ. ಘೋಸ್ಟ್ ಟ್ರೈಲರ್‌ನ ಅದ್ಭುತ ಬಿಜಿಎಂ ಕೇಳಲು ಹೆಡ್‌ಫೋನ್‌ ಹಾಕಿಕೊಳ್ಳುವುದು ಉತ್ತಮ. "ಯುದ್ಧ, ಮಾನವ ಲೋಕದ ಮಾಗದ ಕರಗ, ಇಂತಹ ಯುದ್ಧಗಳಿಂದ, ಸಾಮ್ರಾಜ್ಯಗಳಿಂದ ಕಟ್ಟಿದ್ದಕ್ಕಿಂತ ಅಧಃಪತನವೇ ಜಾಸ್ತಿ. ಸಾಮ್ರಾಜ್ಯ ಕಟ್ಟಿರೋವರನ್ನ ಇತಿಹಾಸ ಮರೆತಿರಬಹುದು. ಆದರೆ... ಧ್ವಂಸ ಮಾಡೋನ ನನ್ನಂತವರನ್ನ ಎಂದಿಗೂ ಮರೆತಿಲ್ಲ" ಎಂದು ಟ್ರೈಲರ್‌ ಆರಂಭದಲ್ಲಿಯೇ ಶಿವಣ್ಣನ ಹಿನ್ನೆಲೆ ಧ್ವನಿ ಕೇಳಿಸುತ್ತದೆ. ಟ್ರೈಲರ್‌ನಲ್ಲಿ ಗನ್‌ ಹಿಡಿದ ಶಿವಣ್ಣ ಎಂಟ್ರಿ ಕೊಡೋ ದೃಶ್ಯವಿದೆ. ಜೈಲಿನೊಳಗೆ ಕೈದಿಗಳೆಲ್ಲ ತಲೆಬಗ್ಗಿಸಿ ಕುಳಿತ ದೃಶ್ಯವಿದೆ. ಅವರ ಮುಂದೆ ಶಿವಣ್ಣ ಡಾನ್‌ ಲುಕ್‌ ನೀಡಿದ್ದಾರೆ. ಫೈಟಿಂಗ್‌ನಿಂದ ಉರಿದ ಬೆಂಕಿಯಲ್ಲೇ ಸಿಗರೇಟ್‌ ಸೇದೋ ದೃಶ್ಯವಿದೆ. ಇದಾದ ಬಳಿಕ ಹೈಜಾಕ್‌ಗೆ ಸಂಬಂಧಪಟ್ಟ ಸಂಭಾಷಣೆಯೊಂದಿದೆ.
"ಇತಿಹಾಸ ಬರೆಯೋದೆ ತಾಕತ್ತು ಇರೋ ಮನುಷ್ಯನ ಬಗ್ಗೆ, ಸಲಾಂ ಹೊಡೆಯೋನ ಬಗ್ಗೆ ಒಂದೂ ಸಾಲು ಬರೆಯೋದಿಲ್ಲ" ಎಂಬ ಡೈಲಾಗ್‌ ಕೂಡ ಶಿವಣ್ಣನ ಅಭಿಮಾನಿಗಳನ್ನು ಸೆಳೆಯುತ್ತದೆ. "ಸಾಮಾನ್ಯವಾಗಿ ನಾನು ಯಾರ ತಂಟೆಗೂ ಹೋಗೋದಿಲ್ಲ. ಹಾಂ, ಸೋಲು ತಿನ್ನೋ ಭಯಕ್ಕಲ್ಲ, ನಾನು ಹೋದ್ರೆ ಯುದ್ಧ ಭೂಮಿ ರುದ್ರಭೂಮಿ ಆಗುತ್ತೆ" ಎಂದು ಶಿವಣ್ಣ ಅಬ್ಬರಿಸಿದ್ದಾರೆ.
ಈ ಟ್ರೈಲರ್‌ನ ಬ್ಯಾಕ್‌ ಗ್ರೌಂಡ್‌ ಮ್ಯೂಸಿಕ್‌ ಪ್ರಮುಖ ಆಕರ್ಷಣೆ. ಗ್ಯಾಂಗ್‌ಸ್ಟಾರ್‌ ಸಿನಿಮಾದಲ್ಲಿ ಗನ್‌ಗಳ ಮೊರೆತದ ಜತೆಗೆ ಶಿವಣ್ಣನ ಲುಕ್‌ ಕೂಡ ಗಮನ ಸೆಳೆಯುತ್ತದೆ. ಕಪ್ಪು ಕೋಟ್‌ ಧರಿಸಿ ಶಿವಣ್ಣ ಆಗಮಿಸೋ ದೃಶ್ಯ ಹಳೆಯ ಗ್ಯಾಂಗ್‌ಸ್ಟಾರ್‌ ವಾರ್‌ ನೆನಪಿಸಬಹುದು. ಒಟ್ಟಾರೆ, ಅಕ್ಟೋಬರ್‌ 19ರಂದು ಶಿವಣ್ಣನ ಅಭಿಮಾನಿಗಳಿಗೆ ಭರ್ಜರಿ ಸಿನಿಮಾವೊಂದು ಕಾದಿದೆ ಎನ್ನುವುದನ್ನು ಈ ಟ್ರೈಲರ್‌ ಸೂಚಿಸುತ್ತದೆ.
ಅಕ್ಟೋಬರ್‌ 19ರಂದು ವಿಶ್ವದಾದ್ಯಂತ ಘೋಸ್ಟ್ ಬಿಡುಗಡೆ
ಸ್ಯಾಂಡಲ್ವುಡ್ ನಟ ಶಿವರಾಜ್‌ಕುಮಾರ್‌ ನಾಯಕನಾಗಿ ನಟಿಸಿರುವ ಘೋಸ್ಟ್ ಸಿನಿಮಾ ಅಕ್ಟೋಬರ್‌ 19ರಂದು ವಿಶ್ವದಾದ್ಯಂತ ಬಿಡುಗಡೆ ಆಗಲಿದೆ. ಸಂದೇಶ್ ಪ್ರೊಡಕ್ಷನ್ಸ್ ಬ್ಯಾನರ್‌ನಲ್ಲಿ ಸಂದೇಶ್ ಎನ್‌ ನಿರ್ಮಿಸಿರುವ, ಶ್ರೀನಿ ನಿರ್ದೇಶನದ ಘೋಸ್ಟ್ ಸಿನಿಮಾ, ಈಗಾಗಲೇ ಹಲವು ಕಾರಣಕ್ಕೆ ಕುತೂಹಲ ಮೂಡಿಸಿದೆ. ಇದೀಗ ಇದೇ ಚಿತ್ರದ ಸ್ಯಾಟಲೈಟ್‌, ಡಿಜಿಟಲ್‌ ಹಕ್ಕು ದೊಡ್ಡ ಮೊತ್ತಕ್ಕೆ ಮಾರಾಟವಾಗಿವೆ. ಆರ್ ಆರ್ ಆರ್, ಜವಾನ್ ಸೇರಿದಂತೆ ಅನೇಕ ಸೂಪರ್ ಹಿಟ್ ಚಿತ್ರಗಳನ್ನು ವಿತರಣೆ ಮಾಡಿರುವ ಪೆನ್ ಸ್ಟುಡಿಯೋ ಸಂಸ್ಥೆ ಈಗ ಘೋಸ್ಟ್ ಚಿತ್ರದ ವಿತರಣಾ ಹಕ್ಕನ್ನು ಪಡೆದುಕೊಂಡಿದೆ.
ಘೋಸ್ಟ್ ಟ್ರೈಲರ್‌ಗೆ ನೆಟ್ಟಿಗರ ಪ್ರತಿಕ್ರಿಯೆ
ಘೋಸ್ಟ್ ಸಿನಿಮಾದ ಟ್ರೈಲರ್‌ಗೆ ನೂರಾರು ಪ್ರತಿಕ್ರಿಯೆಗಳ ಸುರಿಮಳೆಯೇ ಆಗುತ್ತಿದೆ. "ಶಿವಣ್ಣನನ್ನು ಯಾಕೆ ಎಲ್ಲರೂ ಇಷ್ಟಪಡುತ್ತಾರೆ, ಎಂದರೆ ಈ ಟ್ರೈಲರ್‌ ನೋಡಿ" ಎಂದು ಒಬ್ಬರು ಕಾಮೆಂಟ್‌ ಮಾಡಿದ್ದಾರೆ. "ಹಾಲಿವುಡ್, ಬಾಲಿವುಡ್, ಟಾಲಿವುಡ್ ಎಲ್ಲಿ ಹೋದರೂ ಇಂದು ಸ್ಯಾಂಡಲ್‌ವುಡ್‌ನದ್ದೇ ದರ್ಬಾರ್‌, ಟ್ರೈಲರ್‌ ಮಾತ್ರ ಬೆಂಕಿ" ಎಂದು ಅಭಿಮಾನಿಯೊಬ್ಬರು ಕಾಂಮೆಂಟ್‌ ಮಾಡಿದ್ದಾರೆ. ಕನ್ನಡ ಟ್ರೈಲರ್‌ ಮಾತ್ರವಲ್ಲದೆ, ತೆಲುಗು, ತಮಿಳು ಟ್ರೈಲರ್‌ಗಳಿಗೂ ನೂರಾರು ಕಾಮೆಂಟ್‌ಗಳು ಬಂದಿದ್ದು, ಎಲ್ಲರೂ ಸೂಪರ್ ಎನ್ನುತ್ತಿದ್ದಾರೆ.
