Tharun Sudhir: ‘ಬರೀ ದರ್ಶನ್‌ಗಷ್ಟೇ ಅಲ್ಲ ಸುದೀಪಣ್ಣನಿಗೂ ಸಿನಿಮಾ ಮಾಡ್ತಿನಿ, ಆದ್ರೆ..’; ನಿರ್ದೇಶಕ ತರುಣ್‌ ಸುಧೀರ್ ಮಾತು
ನಿರ್ದೇಶಕ ತರುಣ್‌ ಸುಧೀರ್ ಸದ್ಯ ಕಾಟೇರ ಸಿನಿಮಾ ಗೆದ್ದ ಖುಷಿಯಲ್ಲಿದ್ದಾರೆ. ಈ ನಡುವೆ ಸುದೀಪ್‌ ಅವರ ಜತೆಗೂ ಸಿನಿಮಾ ಮಾಡೋದು ಯಾವಾಗ ಎಂಬ ಪ್ರಶ್ನೆ ಎದುರಾಗಿದೆ. ಅದಕ್ಕೆ ನಿರ್ದೇಶಕರ ಉತ್ತರ ಹೀಗಿದೆ.
Tharun Sudhir: ಸ್ಯಾಂಡಲ್‌ವುಡ್‌ನಲ್ಲೀಗ ಕಾಟೇರ ಸಿನಿಮಾದ್ದೆ ಸದ್ದು. ಸಿನಿಮಾ ಬಿಡುಗಡೆಯಾಗಿ 20 ದಿನಗಳ ಮೇಲಾದರೂ, ಆ ಬಿರುಸಿನ ಸೆಳೆತ ಇನ್ನೂ ಕಡಿಮೆ ಆಗಿಲ್ಲ. ಇಂದಿಗೂ ಕೆಲವೆಡೆಗಳಲ್ಲಿ ಸಿನಿಮಾ ನೋಡಲು ತಂಡೋಪ ತಂಡವಾಗಿ ಜನರ ಆಗಮನವಾಗುತ್ತಿದೆ. ಉತ್ತರ ಕರ್ನಾಟಕ ಭಾಗದಲ್ಲಿ ಮನೆಮಂದಿಯೆಲ್ಲ ಹಳ್ಳಿಯಿಂದ ಚಿತ್ರಮಂದಿರಗಳತ್ತ ಆಗಮಿಸುತ್ತಿದ್ದಾರೆ. ತರುಣ್‌ ಸುಧೀರ್ ಅವರ ಗ್ರಾಮ್ಯ ಸೊಗಡಿನ ಕಥೆಗೆ ಜನ ಮನಸೋತಿದ್ದಾರೆ.
ಹೌದು, ಸದ್ಯ 200 ಕೋಟಿ ಗಳಿಕೆ ಕಂಡ ಕಾಟೇರ ಬಾಕ್ಸ್‌ಆಫೀಸ್‌ನಲ್ಲಿ ಮುನ್ನುಗ್ಗುತ್ತಿದ್ದರೆ, ಇತ್ತ ಸಿನಿಮಾದ ನಿರ್ದೇಶಕ ತರುಣ್‌ ಸುಧೀರ್ ಮುಂದಿನ ಕೆಲಸಗಳತ್ತ ಮುಖ ಮಾಡುತ್ತಿದ್ದಾರೆ. ಸದ್ಯ ಅವರ ಮುಂದಿನ ಸಿನಿಮಾ ಯಾವುದು ಎಂಬ ಬಗ್ಗೆ ಈ ವರೆಗೂ ಅಂತಿಮವಾಗಿಲ್ಲ. ಇತ್ತ ಕಾಟೇರ ಗುಂಗು ಇನ್ನೂ ಇಳಿದಿಲ್ಲ. ಈ ಸಿನಿಮಾವನ್ನು ಬೇರೆ ಬೇರೆ ಭಾಷೆಗಳಿಗೂ ತಲುಪಿಸುವ ನಿಟ್ಟಿನಲ್ಲಿ ತರುಣ್‌ ಮತ್ತವರ ತಂಡ ಕೆಲಸ ಮಾಡುತ್ತಿದೆ. ಈ ನಡುವೆ ಸುದೀಪ್‌ ಜತೆಗಿನ ಸಿನಿಮಾ ಬಗ್ಗೆಯೂ ತರುಣ್‌ ಸಂದರ್ಶನದಲ್ಲಿ ಮಾತನಾಡಿದ್ದಾರೆ.
ಸುದೀಪ್‌ ಜತೆ ಸಿನಿಮಾ; ತರುಣ್‌ ಏನಂದ್ರು?
ತರುಣ್‌ ಸುಧೀರ್ ಈ ವರೆಗೂ ಮೂರು ಸಿನಿಮಾಗಳನ್ನು ನಿರ್ದೇಶನ ಮಾಡಿದ್ದಾರೆ. ಚೌಕ, ರಾಬರ್ಟ್‌ ಮತ್ತು ಕಾಟೇರ. ಮೂರು ಸಿನಿಮಾಗಳೂ ಸೂಪರ್‌ ಹಿಟ್‌ ಪಟ್ಟಿ ಸೇರಿವೆ. ಹಾಗಾದರೆ ಮುಂದಿನ ಸಿನಿಮಾ ಯಾವುದು? ಈ ಬಗ್ಗೆ ನಿರ್ದೇಶಕ ತರುಣ್‌ ಅವರಿಗೆ ಪ್ರಶ್ನೆ ಎದುರಾಗಿದೆ. ಅದಕ್ಕೆ ಉತ್ತರಿಸಿದ ಅವರು, "ಸದ್ಯಕ್ಕೆ ಮುಂದಿನ ಸಿನಿಮಾ ಪ್ಲಾನ್‌ ಯಾವುದು ಎಂಬುದು ಗೊತ್ತಿಲ್ಲ. ಕಾಟೇರ ಸಿನಿಮಾ ಕೆಲಸಗಳೇ ನಡೆಯುತ್ತಿವೆ. ಇದನ್ನೇ ತಲುಪಿಸುವ ಕೆಲಸದಲ್ಲಿ ನಿರತರಾಗಿದ್ದೇವೆ. ಇದಾದ ಬಳಿಕ ಒಂದಷ್ಟು ದಿನ ಬ್ರೇಕ್‌ ಪಡೆದುಕೊಂಡು, ಮುಂದಿನ ಸಿನಿಮಾ ಬಗ್ಗೆ ನಿರ್ಧರಿಸಬೇಕು. ಒಂದಷ್ಟು ಲೈನ್‌ಗಳನ್ನೂ ಮಾಡಿಟ್ಟುಕೊಂಡಿದ್ದೇನೆ. ಅದರ ಮೇಲೆ ಕೆಲಸ ಆರಂಭಿಸಬೇಕು. ಹಾಗಾಗಿ ಯಾವುದು ಎಂದು ಈಗಲೇ ಹೇಳುವುದು ಕಷ್ಟ" ಎಂದಿದ್ದಾರೆ.
ಅವರೇ ಕರೆದು ಚಾನ್ಸ್‌ ಕೊಡಬೇಕು
ಈ ನಡುವೆ ಸುದೀಪ್‌ ಅವರಿಗೆ ಯಾವಾಗ ನಿರ್ದೇಶನ ಮಾಡ್ತಿರಿ ಎಂಬ ಪ್ರಶ್ನೆಗೆ, "ಇದು ನಾನಾಗಿಯೇ ಕೇಳುವಂಥದ್ದಲ್ಲ. ಅವರೇ ಕರೆದು ಅವಕಾಶ ಕೊಟ್ಟರೆ ಖಂಡಿತ ನಾನು ಸುದೀಪ್‌ ಸರ್‌ ಜತೆ ಸಿನಿಮಾ ಮಾಡ್ತಿನಿ. ಇದು ನಾನು ಚೂಸ್‌ ಮಾಡುವಂಥದ್ದಲ್ಲ. ಅವರು ನನ್ನನ್ನು ಮಾಡಬೇಕು. ಅವರು ಬಿಗ್ಗೆಸ್ಟ್‌ ಸೂಪರ್‌ಸ್ಟಾರ್‌. ನಂದಕಿಶೋರ್‌ ನಿರ್ದೇಶನ ಮಾಡಿದ್ದ ರನ್ನ, ಮುಕುಂದ ಮುರಾರಿ ಸಿನಿಮಾ ಸಮಯದಲ್ಲಿ ನಾನು ನಿರ್ದೇಶನ ವಿಭಾಗದಲ್ಲಿ ಕೆಲಸ ಕಲಿಯುತ್ತಿದ್ದೆ. ಆಗಿನಿಂದಲೂ ಸುದೀಪ್‌ ಸರ್‌ ಜತೆ ಒಡನಾಟವಿದೆ. ಅವರು ಮನಸು ಮಾಡಿ ಅವಕಾಶ ನೀಡಿದರೆ, ಖಂಡಿತ ಸಿನಿಮಾ ಮಾಡ್ತಿನಿ ಎಂದಿದ್ದಾರೆ ತರುಣ್‌ ಸುಧೀರ್.
200 ಕೋಟಿಯ ದಾಟಿದ ಕಾಟೇರ
ಈ ವರೆಗೂ ದರ್ಶನ್‌ ಅವರ ಬೇರಾವ ಸಿನಿಮಾ 200 ಕೋಟಿ ಗಳಿಸಿದ ಉದಾಹರಣೆ ಇರಲಿಲ್ಲ. ಈ ಹಿಂದೆ ರಿಲೀಸ್‌ ಆಗಿದ್ದ ಇದೇ ಜೋಡಿಯ ರಾಬರ್ಟ್‌ ಸಿನಿಮಾ 100 ಕೋಟಿ ಪ್ಲಸ್‌ ಗಳಿಸಿದ್ದನ್ನು ಬಿಟ್ಟರೆ, ಈ ಮಟ್ಟದ ಯಶಸ್ಸು ದರ್ಶನ್‌ ಅವರ ಬೇರಾವ ಸಿನಿಮಾಕ್ಕೂ ಸಿಕ್ಕಿರಲಿಲ್ಲ. ಒಂದೇ ವಾರದಲ್ಲಿ 100 ಕೋಟಿ ಗಡಿದಾಟಿದ್ದ ಕಾಟೇರ, ಇದೀಗ ಕೇವಲ 20 ದಿನಗಳಲ್ಲಿ 206 ಕೋಟಿ ಗಳಿಸಿದ್ದಾನೆ. ಟಿಕೆಟ್‌ ಬುಕಿಂಗ್‌ನಲ್ಲೂ ದಾಖಲೆ ಬರೆದ ಈ ಸಿನಿಮಾ ಬರೋಬ್ಬರಿ 1 ಕೋಟಿ ಟಿಕೆಟ್‌ ಮಾರಾಟ ಮಾಡಿಕೊಂಡಿದೆ. ಹೊಸ ವರ್ಷದ ಜತೆಗೆ ಸಂಕ್ರಾಂತಿ ಹಬ್ಬವನ್ನೂ ಈ ಸಿನಿಮಾ ಎನ್‌ಕ್ಯಾಶ್‌ ಮಾಡಿಕೊಂಡಿತ್ತು.
