Friday Release: ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ, ಹೆಜ್ಜಾರು, ಕಡಲೂರ ಕಣ್ಮಣಿ ಸೇರಿದಂತೆ ಈ ಶುಕ್ರವಾರ 6 ಕನ್ನಡ ಸಿನಿಮಾ ಬಿಡುಗಡೆ
Kannada Movies Release this week: ಸ್ಯಾಂಡಲ್‌ವುಡ್‌ನಲ್ಲಿ ಈ ವಾರ ಸಾಲುಸಾಲು ಕನ್ನಡ ಸಿನಿಮಾಗಳು ರಿಲೀಸ್‌ ಆಗುತ್ತಿವೆ. ಕೆಲವೊಂದು ಸಿನಿಮಾಗಳು ಈಗಾಗಲೇ ಟ್ರೇಲರ್‌ ಮೂಲಕ ಗಮನ ಸೆಳೆದಿದ್ದು, ನಿರೀಕ್ಷೆ ಹೆಚ್ಚಿಸಿವೆ. ಈ ವಾರ ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ, ನಾಟೌಟ್‌, ಹೆಜ್ಜಾರು, ಬ್ಯಾಕ್‌ಬೆಂಚರ್ಸ್‌, ಹಿರಣ್ಯ ಮತ್ತು ಕಡಲೂರ ಕಣ್ಮಣಿ ರಿಲೀಸ್‌ ಆಗುತ್ತಿವೆ.
ಬೆಂಗಳೂರು: ಕನ್ನಡ ಚಿತ್ರರಂಗದಲ್ಲಿ ಹೊಸಬಗೆಯ ಸಿನಿಮಾಗಳು ಬಿಡುಗಡೆಯಾಗುತ್ತಿಲ್ಲ ಎನ್ನುವವರಿಗೆ ಉತ್ತರ ನೀಡುವಂತೆ ಈ ವಾರ ಮತ್ತು ಮುಂಬರುವ ವಾರಗಳಲ್ಲಿ ಡಿಫರೆಂಟ್‌ ಜಾನರ್‌ನ ಸಿನಿಮಾಗಳು ಬಿಡುಗಡೆಯಾಗಲು ಸಜ್ಜಾಗಿವೆ. ಈ ವಾರ ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ, ನಾಟೌಟ್‌, ಹೆಜ್ಜಾರು, ಬ್ಯಾಕ್‌ಬೆಂಚರ್ಸ್‌, ಹಿರಣ್ಯ ಮತ್ತು ಕಡಲೂರ ಕಣ್ಮಣಿ ಎಂಬ ಆರು ಕನ್ನಡ ಸಿನಿಮಾಗಳು ಬಿಡುಗಡೆಯಾಗುತ್ತಿವೆ. ಕೆಲವು ಸಿನಿಮಾಗಳ ಟ್ರೇಲರ್‌ ಈಗಾಗಲೇ ಕುತೂಹಲ ಕೆರಳಿಸಿವೆ. ಮಲಯಾಳಂ ಚಿತ್ರರಂಗದಲ್ಲಿ ಮಾತ್ರ ಡಿಫರೆಂಟ್‌ ಸಿನಿಮಾ ಬರೋದಲ್ಲ, ಕನ್ನಡದಲ್ಲೂ ಬರುತ್ತಿವೆ ಎನ್ನುವಂತೆ ಕೆಲವು ಚಿತ್ರಗಳ ಟ್ರೇಲರ್‌ಗಳು ಗಮನ ಸೆಳೆದಿವೆ. ಈ ವಾರ ಬಿಡುಗಡೆಯಾಗುವ ಕನ್ನಡ ಸಿನಿಮಾಗಳ ವಿವರ ಪಡೆಯೋಣ.
ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ
ಅರುಣ್‌ ಅಮುಕ್ತ ನಿರ್ದೇಶನದ ಸಿನಿಮಾವಿದು. ಈಗಾಗಲೇ ದುಬೈನಲ್ಲಿ ಪ್ರೀಮಿಯರ್‌ ಶೋ ಆದ ಸಿನಿಮಾವು ಕರ್ನಾಟಕದಲ್ಲಿ ನಾಳೆ ಅಂದರೆ ಜುಲೈ 19ರಂದು ಬಿಡುಗಡೆಯಾಗಲಿದೆ. “ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ’ ಸಿನಿಮಾದ ಹೆಸರೇ ಸೂಚಿಸುವಂತೆ ಇದು ಯುವ ಜನತೆಯನ್ನು ಗಮನದಲ್ಲಿಟ್ಟುಕೊಂಡು ಮಾಡಿರುವ ಚಿತ್ರ. ಈ ಸಿನಿಮಾದಲ್ಲಿ ಚಂದನ್‌ ಶೆಟ್ಟಿ, ಭಾವನಾ ಅಪ್ಪು, ಅಮರ್‌, ಮನಸ್ವಿ, ವಿವಾನ್‌, ಸುನಿಲ್‌ ಪುರಾಣಿಕ್‌, ಅರವಿಂದ ರಾಜ್, ಮಾನಸಿ, ಭವ್ಯ, ಅರವಿಂದ ರಾವ್‌, ಸಿಂಚನಾ, ರಘು ರಾಮನಕೊಪ್ಪ, ಕಾಕ್ರೋಚ್‌ ಸುಧಿ ಸೇರಿದಂತೆ ಹಲವು ಪ್ರತಿಭಾನ್ವಿತ ಕಲಾವಿದರು ನಟಿಸಿದ್ದಾರೆ.
ಹೆಜ್ಜಾರು
ಪ್ಯಾರಲಾಲ್‌ ಲೈಫ್‌ ಕಥೆ ಹೊಂದಿರುವ ಕಾರಣದಿಂದ ಹೆಜ್ಜಾರು ಸಿನಿಮಾ ನಿರೀಕ್ಷೆ ಹೆಚ್ಚಿಸಿದೆ. ಈಗಾಗಲೇ ಹೆಜ್ಜಾರು ಸಿನಿಮಾದ ಟ್ರೇಲರ್‌ ನೋಡಿ ಕಿಚ್ಚ ಸುದೀಪ್‌ ಸೇರಿದಂತೆ ಸಾಕಷ್ಟು ಜನರು ಮೆಚ್ಚಿಕೊಂಡಿದ್ದಾರೆ. ಜುಲೈ 19ರಂದು ಹರ್ಷಪ್ರಿಯ ನಿರ್ದೇಶನದ ಹೆಜ್ಜಾರು ಸಿನಿಮಾ ರಾಜ್ಯಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದೆ. ಇದು ಕನ್ನಡದ ಮೊದಲ ಪ್ಯಾರಲಾಲ್‌ ಕಥೆಯ ಸಿನಿಮಾ ಎನ್ನಲಾಗಿದೆ. ಗಗನ ಎಂಟರ್‌ಪ್ರೈಸಸ್‌ನಡಿ ಈ ಚಿತ್ರವನ್ನು ಎನ್‌ ವಿಮಲಾ ನಿರ್ಮಾಣ ಮಾಡಿದೆ. ಮಂಗಳೂರು ಸುತ್ತಮುತ್ತ ಚಿತ್ರೀಕರಣಗೊಂಡಿರುವ ಈ ಚಿತ್ರದಲ್ಲಿ ರಾಜ್ಯದ ವಿವಿಧ ಕಡೆಯ ಕಲಾವಿದರು ನಟಿಸಿದ್ದಾರೆ. ಈ ಚಿತ್ರದಲ್ಲಿ ಭಗತ್‌ ಆಳ್ವಾ ನಾಯಕ, ನಾಯಕಿಯಾಗಿ ಶ್ವೇತ ಡಿಸೋಜ ನಟಿಸಿದ್ದಾರೆ. ಗೋಪಾಲಕೃಷ್ಣ ದೇಶಪಾಂಡೆ, ನವೀನ್‌ ಕೃಷ್ಣ, ಅರುನ್‌ ಬಾಲರಾಜ್‌, ಮುನಿರಾಜ್‌, ವಿನೋದ್‌, ಭಾರತಿ ಸೇರಿದಂತೆ ರಂಗಭೂಮಿ ಹಿನ್ನೆಲೆಯ ಹಲವು ಕಲಾವಿದರು ನಟಿಸಿದ್ದಾರೆ.
ಕಡಲೂರ ಕಣ್ಮಣಿ
ರಾಮ್‌ ಪ್ರಸನ್ನ ಹುಣಸೂರು ನಿರ್ದೇಶನದ (ಕಥೆ, ಚಿತ್ರಕಥೆ, ಸಂಭಾಷಣೆಯೂ ಇವರದ್ದೇ) ಕಡಲೂರ ಕಣ್ಮಣಿ ಸಿನಿಮಾವು ಜುಲೈ 19ರಂದು ಬಿಡುಗಡೆಯಾಗುತ್ತಿದೆ. ಅರ್ಜುನ್‌ ನಗರ್‌ಕರ್‌ ಈ ಸಿನಿಮಾದ ನಾಯಕ. ಡಿಎಸ್‌ಕೆ ಸಿನಿಮಾಸ್‌ ಮೂಲಕ ಈ ಸಿನಿಮಾ ಬಿಡುಗಡೆಯಾಗುತ್ತಿದೆ.
ನಾಟ್‌ಔಟ್‌
ಈ ವಾರ ನಾಟೌಟ್‌/ನಾಟ್‌ಔಟ್‌ ಹೆಸರಿನ ಕನ್ನಡ ಸಿನಿಮಾವೊಂದು ಬಿಡುಗಡೆಯಾಗುತ್ತಿದೆ. ಈ ಸಿನಿಮಾ ಮೊದಲಾರ್ಧ ಉಚಿತ. ಅಂದರೆ, ಪ್ರೇಕ್ಷಕರನ್ನು ಸೆಳೆಯಲು ಚಿತ್ರದ ಮೊದಲಾರ್ಧವನ್ನು ಕೆಲವು ಚಿತ್ರಮಂದಿರಗಳಲ್ಲಿ ಉಚಿತವಾಗಿ ಜುಲೈ 19ರಂದು ನೋಡುವ ಅವಕಾಶವನ್ನು ಚಿತ್ರತಂಡ ನೀಡಿದೆ. ಮೊದಲಾರ್ಧ ಬೋರ್‌ ಆಯ್ತು, ಅರ್ಧಕ್ಕೆ ಎದ್ದು ಬಂದೆ ಎನ್ನುವವರು ಈ ಚಿತ್ರ ನೋಡಿ ಮುಂದೆ ಹಣ ನೀಡಿ ನೋಡಬೇಕಾ ಬೇಡ್ವ ಎಂದು ನಿರ್ಧರಿಸಬಹುದು. ಅಂಬರೀಶ್‌ ಎಂ ನಿರ್ದೇಶನದ ಈ ಚಿತ್ರದಲ್ಲಿ ಅಜಯ್‌ ಪೃಥ್ವಿ, ರಚನಾ ಇಂದರ್‌ ನಟಿಸಿದ್ದಾರೆ.
ಬ್ಯಾಕ್ ಬೆಂಚರ್ಸ್
ಈ ವಾರ ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ ಮಾತ್ರವಲ್ಲದೆ ಕಾಲೇಜು ವಿದ್ಯಾರ್ಥಿಗಳನ್ನು ಗಮನದಲ್ಲಿಟ್ಟುಕೊಂಡು ಬ್ಯಾಕ್‌ಬೆಂಚರ್ಸ್‌ ಎಂಬ ಸಿನಿಮಾವೂ ಬಿಡುಗಡೆಯಾಗುತ್ತಿದೆ. ಪಿಪಿ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ರಾಜಶೇಖರ್ 'ಬ್ಯಾಕ್ ಬೆಂಚರ್ಸ್' ಸಿನಿಮಾ ನಿರ್ಮಿಸಿದ್ದಾರೆ. 'ಬ್ಯಾಕ್ ಬೆಂಚರ್ಸ್' ಚಿತ್ರಕ್ಕೆ ಇವರೇ ಆಕ್ಷನ್‌ ಕಟ್‌ ಹೇಳಿದ್ದಾರೆ. ಈ ಸಿನಿಮಾದಲ್ಲಿರಂಜನ್, ಜತಿನ್ ಆರ್ಯನ್, ಆಕಾಶ್ ಎಂ ಪಿ, ಶಶಾಂಕ್ ಸಿಂಹ, ಸುಚೇಂದ್ರ ಪ್ರಸಾದ್, ಅರವಿಂದ್ ಕುಪ್ಳೀಕರ್, ಮಾನ್ಯ ಗೌಡ, ಕುಂಕುಮ್ ಹೆಚ್, ಅನುಷಾ ಸುರೇಶ್, ವಿಯೋಮಿ ವನಿತಾ, ಮನೋಜ್ ಶೆಟ್ಟಿ, ನಮಿತಾ ಗೌಡ, ವಿಕಾಸ್, ರನ್ನ, ವಿಜಯ್ ಪ್ರಸಾದ್, ಚತುರ್ಥಿ ರಾಜ್, ಗೌರವ್ ನಟಿಸಿದ್ದಾರೆ.
ಹಿರಣ್ಯ
ರಾಜವರ್ಧನ್‌ ನಾಯಕ ನಟನಾಗಿ ನಟಿಸಿರುವ ಹಿರಣ್ಯ ಸಿನಿಮಾವು ಜುಲೈ 19ರಂದು ಕರ್ನಾಟಕದ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಈ ಸಿನಿಮಾದ ಬೈಲಾ ಬೈಲಾ ಹಾಡಿಗೆ ಬಿಗ್‌ಬಾಸ್‌ ಮಾಜಿ ಸ್ಪರ್ಧಿ ದಿವ್ಯ ಸುರೇಶ್ ಡ್ಯಾನ್ಸ್‌ ಮಾಡಿದ್ದಾರೆ. ಇದು ಪ್ರವೀಣ್‌ ಅವ್ಯುಕ್ತ್‌ ನಿರ್ದೇಶನದ ಚಿತ್ರ. ರಾಜವರ್ಧನ್‌ಗೆ ನಾಯಕಿಯಾಗಿ ರಿಹಾನಾ ನಟಿಸಿದ್ದಾರೆ.
