ಗಣೇಶ್‌ ಚಿತ್ರದೊಂದಿಗೆ ಪೈಪೋಟಿ; ಶ್ರೀಲೀಲಾ ನಟನೆಯ ಸ್ಕಂದ ಪ್ಯಾನ್ ಇಂಡಿಯಾ ಸಿನಿಮಾ ಸೆ.28ಕ್ಕೆ ರಿಲೀಸ್
ಸಲಾರ್‌ ಸಿನಿಮಾ 2 ತಿಂಗಳು ಮುಂದಕ್ಕೆ ಹೋಗಿರುವುದು, ಅಂದರೆ, ನವೆಂಬರ್‌ 24 ಕ್ಕೆ ಪೋಸ್ಟ್‌ ಪೋನ್‌ ಆಗಿರುವ ವಿಚಾರ ತಿಳಿದ ಕೆಲವು ಸಿನಿಮಾ ನಿರ್ದೇಶಕ, ನಿರ್ಮಾಪಕರು ತಮ್ಮ ಸಿನಿಮಾಗಳನ್ನು ಸೆಪ್ಟೆಂಬರ್ 28ಕ್ಕೆ ಮುಂದೂಡಿದ್ದಾರೆ.
'ಕಿಸ್‌' ಸಿನಿಮಾ ಮೂಲಕ ಕರಿಯರ್‌ ಆರಂಭಿಸಿದ ನಟಿ ಶ್ರೀಲೀಲಾ ಈಗ ಕನ್ನಡಕ್ಕಿಂತ ಹೆಚ್ಚಾಗಿ ತೆಲುಗು ಸಿನಿಮಾಗಳಲ್ಲಿ ಬ್ಯುಸಿ ಇದ್ದಾರೆ. ಸ್ಟಾರ್‌ ನಟರೊಂದಿಗೆ ನಟಿಸುವ ಅವಕಾಶ ಪಡೆಯುತ್ತಿದ್ದಾರೆ. ಈ ಚೆಲುವೆ ನಟಿಸಿರುವ ಮತ್ತೊಂದು ತೆಲುಗು ಸಿನಿಮಾ ಬಿಡುಗಡೆಗೆ ಡೇಟ್‌ ಫಿಕ್ಸ್‌ ಆಗಿದೆ.
ರಾಮ್ ಪೋತಿನೇನಿ ಹಾಗೂ ಶ್ರೀಲೀಲಾ ನಟನೆಯ ಸಿನಿಮಾ
ರಾಮ್ ಪೋತಿನೇನಿ ಹಾಗೂ ಶ್ರೀಲೀಲಾ ನಟನೆಯ 'ಸ್ಕಂದ' ಪ್ಯಾನ್ ಇಂಡಿಯಾ ಸಿನಿಮಾ ಇದೇ ತಿಂಗಳು ಕೊನೆಯ ವಾರ ರಿಲೀಸ್ ಆಗುತ್ತಿದೆ. ಈ ಚಿತ್ರವನ್ನು ಸೆಪ್ಟೆಂಬರ್ 15ಕ್ಕೆ ರಿಲೀಸ್ ಮಾಡಲು ಮೊದಲು ದಿನಾಂಕ ಫಿಕ್ಸ್‌ ಮಾಡಲಾಗಿತ್ತು. ಆದರೆ, ಈಗ ತಂಡ ಸಿನಿಮಾ ರಿಲೀಸ್ ದಿನಾಂಕವನ್ನು ಎರಡು ವಾರ ಮುಂದಕ್ಕೆ ಹಾಕಿದೆ. ಸೆಪ್ಟೆಂಬರ್ 28 ಗುರುವಾರ, ಸ್ಕಂದ ಚಿತ್ರವನ್ನು ರಿಲೀಸ್ ಮಾಡಲು ಚಿತ್ರತಂಡ ಫೈನಲ್‌ ದಿನಾಂಕವನ್ನು ಫಿಕ್ಸ್‌ ಮಾಡಿದೆ. ಬೋಯಪಾಟಿ ಶ್ರೀನು ಆಕ್ಷನ್ ಕಟ್ ಹೇಳಿರುವ ಆಕ್ಷನ್ ಎಂಟರ್ ಟೈನರ್ 'ಸ್ಕಂದ' ಚಿತ್ರದ ಟ್ರೇಲರ್ ಹಾಗೂ ಹಾಡುಗಳು ಭಾರೀ ಸದ್ದು ಮಾಡಿವೆ. ಪ್ರೀ ರಿಲೀಸ್ ಬ್ಯುಸ್ನೆಸ್‌ನಲ್ಲೂ ದಾಖಲೆ ಬರೆದಿರುವ ಈ ಚಿತ್ರವನ್ನು ಶ್ರೀನಿವಾಸ್ ಸಿಲ್ವರ್ ಸ್ಕ್ರೀನ್ ಬ್ಯಾನರ್ ಅಡಿ ಶ್ರೀನಿವಾಸ್ ಚಿತ್ತೂರಿ ನಿರ್ಮಾಣ ಮಾಡಿದ್ದಾರೆ.
ಮಾಸ್ ಅವತಾರದಲ್ಲಿ ರಾಮ್ ಪೋತಿನೇನಿ
ಇಷ್ಟು ದಿನಗಳ ಕಾಲ ಲವರ್ ಬಾಯ್ ಆಗಿ ಮಿಂಚಿದ್ದ ರಾಮ್ ಪೋತಿನೇನಿ, ಇದೇ ಮೊದಲ ಬಾರಿಗೆ 'ಸ್ಕಂದ' ಸಿನಿಮಾದಲ್ಲಿ ಮಾಸ್ ಅವತಾರದಲ್ಲಿ ನಟಿಸಿದ್ದಾರೆ. 'ಸ್ಕಂದ' ಚಿತ್ರಕ್ಕೆ ಸಂತೋಷ್ ಡಿಟೇಕ್ ಕ್ಯಾಮೆರಾ ವರ್ಕ್, ತಮನ್ ಎಸ್‌ಎಸ್ ತಮನ್ ಸಂಗೀತವಿದೆ. ಜೀ ಸ್ಟುಡಿಯೋಸ್ ಸೌತ್ ಹಾಗೂ ಪವನ್ ಕುಮಾರ್ ಅರ್ಪಿಸುತ್ತಿರುವ ಸ್ಕಂದ ಸಿನಿಮಾವನ್ನು, ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಅದ್ಧೂರಿಯಾಗಿ ನಿರ್ಮಾಣ ಮಾಡಲಾಗಿದೆ. ಸಿನಿಮಾ ತೆಲುಗು, ಕನ್ನಡ, ಹಿಂದಿ, ಮಲಯಾಳಂ ಹಾಗೂ ತಮಿಳು ಭಾಷೆಗಳಲ್ಲಿ ಏಕ ಕಾಲಕ್ಕೆ ತೆರೆ ಕಾಣುತ್ತಿದೆ.
'ಬಾನ ದಾರಿಯಲ್ಲಿ' ಚಿತ್ರದ ಜೊತೆ ಪೈಪೋಟಿ
ಸೆಪ್ಟೆಂಬರ್ 28ಕ್ಕೆ 'ಸಲಾರ್‌' ಸಿನಿಮಾ ರಿಲೀಸ್ ಆಗಬೇಕಿತ್ತು. ಆ ದಿನ ಸಲಾರ್‌ ತೆರೆ ಕಾಣುತ್ತಿದೆ ಎಂಬ ಕಾರಣಕ್ಕೆ ಕೆಲವೊಂದು ಚಿತ್ರತಂಡ ತಮ್ಮ ಚಿತ್ರವನ್ನು ಒಂದು ವಾರ ಮುಂಚಿತವಾಗಿ ರಿಲೀಸ್ ಮಾಡಲು ಪ್ಲಾನ್‌ ಮಾಡಿದ್ದರು. ಆದರೆ ಸಲಾರ್‌ ಸಿನಿಮಾ 2 ತಿಂಗಳು ಮುಂದಕ್ಕೆ ಹೋಗಿರುವುದು, ಅಂದರೆ, ನವೆಂಬರ್‌ 24 ಕ್ಕೆ ಪೋಸ್ಟ್‌ ಪೋನ್‌ ಆಗಿರುವ ವಿಚಾರ ತಿಳಿದ ಕೆಲವು ಸಿನಿಮಾ ನಿರ್ದೇಶಕ, ನಿರ್ಮಾಪಕರು ತಮ್ಮ ಸಿನಿಮಾಗಳನ್ನು ಸೆಪ್ಟೆಂಬರ್ 28ಕ್ಕೆ ಮುಂದೂಡಿದ್ದಾರೆ. 'ಸ್ಕಂದ' ಜೊತೆಗೆ ಸೆಪ್ಟೆಂಬರ್ 28ಕ್ಕೆ ತಮಿಳು, ಹಿಂದಿಯ ಇತರ ಸಿನಿಮಾಗಳು ತೆರೆ ಕಾಣುತ್ತಿವೆ. ಕನ್ನಡದಲ್ಲಿ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಅಭಿನಯದ 'ಬಾನ ದಾರಿಯಲ್ಲಿ' ಸಿನಿಮಾ ಕೂಡಾ ತೆರೆ ಕಾಣುತ್ತಿದೆ. 'ಸ್ಕಂದ' ಸಿನಿಮಾ ಕನ್ನಡದಲ್ಲಿ ಕೂಡಾ ರಿಲೀಸ್ ಆಗುತ್ತಿದ್ದು, ಗಣೇಶ್‌ ಸಿನಿಮಾ ಯಾವ ರೀತಿ ಪೈಪೋಟಿ ಮಾಡಲಿದೆ ಕಾದು ನೋಡಬೇಕು.
