ನೋ ವೇ ಛಾನ್ಸೇ ಇಲ್ಲ, ಕೃಷ್ಣಂ ಪ್ರಣಯ ಸಖಿ ಟೀಸರ್‌, ಟ್ರೇಲರ್‌ ಬಿಡುಗಡೆ ಆಗೋದೇ ಇಲ್ಲ; ನಿಮಗೆ ಸಿನಿಮಾ ನೋಡಲು ಆಮಂತ್ರಣ ಬಂತಾ?
Krishnam Pranaya Sakhi: ಗೋಲ್ಡನ್‌ ಸ್ಟಾರ್‌ ಗಣೇಶ್‌ ನಟನೆಯ ಕೃಷ್ಣಂ ಪ್ರಣಯ ಸಖಿ ಸಿನಿಮಾ ಬಿಡುಗಡೆಯ ಸನಿಹದಲ್ಲಿದೆ. ಆದರೆ, ಈ ಸಿನಿಮಾದ ಟೀಸರ್‌, ಟ್ರೇಲರ್‌ ಬಿಡುಗಡೆಯಾಗುತ್ತಿಲ್ಲ. ಈ ಸಿನಿಮಾದ ವೀಕ್ಷಕರಿಗೆ ಚಿತ್ರತಂಡ ನೀಡಿರುವ ಆಮಂತ್ರಣವೇ ಡಿಫರೆಂಟ್‌.
Krishnam Pranaya Sakhi: ಗೋಲ್ಡನ್‌ ಸ್ಟಾರ್‌ ಗಣೇಶ್‌ ನಟನೆಯ ಕೃಷ್ಣಂ ಪ್ರಣಯ ಸಖಿ ಸಿನಿಮಾ ಇದೇ ಆಗಸ್ಟ್‌ 15ರಂದು ಬಿಡುಗಡೆಯಾಗಲಿದೆ. ಈ ಸಿನಿಮಾದ ಟೀಸರ್‌, ಟ್ರೇಲರ್‌ ಯಾವಾಗ ಬಿಡುಗಡೆಯಾಗುತ್ತದೆ ಎಂದು ಕಾಯುತ್ತಿದ್ದೀರಾ? ನೋ ವೇ ಛಾನ್ಸೇ ಇಲ್ಲ, ಚಿತ್ರತಂಡ ಕೃಷ್ಣಂ ಪ್ರಣಯ ಸಖಿ ಟೀಸರ್‌, ಟ್ರೇಲರ್‌ ಬಿಡುಗಡೆ ಮಾಡೋದೇ ಇಲ್ವಂತೆ. ಹಾಗಾದರೆ, ಈ ಚಿತ್ರದ ಪ್ರಮೋಷನ್‌ ಹೆಂಗೆ ಗುರೂ? ಎಂದು ಆಲೋಚಿಸುತ್ತಿದ್ದೀರಾ. ಗಣೇಶ್‌ ನಟನೆಯ ಕೃಷ್ಣಂ ಪ್ರಣಯ ಸಖಿ ಸಿನಿಮಾದ ಪ್ರಮೋಷನ್‌ ಸ್ಟಾರ್ಟರ್ಜಿಯೇ ಡಿಫರೆಂಟ್‌.
ಸಿನಿಮಾವೊಂದು ಬಿಡುಗಡೆಯಾಗುವ ಮೊದಲು ಟ್ರೇಲರ್‌, ಟೀಸರ್‌, ಗ್ಲಿಂಪಸ್‌ ವಿಡಿಯೋಗಳ ಮೂಲಕ ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸುವುದು ಸಾಮಾನ್ಯ. ನಮ್ಮ ಸಿನಿಮಾ ಬಿಡುಗಡೆಯಾಗುತ್ತಿದೆ, ತಪ್ಪದೇ ಬನ್ನಿ ಎಂದು ಟೀಸರ್‌, ಟ್ರೇಲರ್‌ಗಳೇ ಆಮಂತ್ರಣ. ಆದರೆ, ಸಿನಿಮಾ ಬಿಡುಗಡೆಗೆ ಮುನ್ನ ಕೃಷ್ಣಂ ಪ್ರಣಯ ಸಖಿ ಸಿನಿಮಾದ ಟೀಸರ್‌, ಟ್ರೇಲರ್‌ ಬಿಡುಗಡೆ ಮಾಡದೆ ಇರಲು ಚಿತ್ರತಂಡ ನಿರ್ಧರಿಸಿದೆ. ಒಂದು ವರ್ಷದ ಹಿಂದೆ ಚಿತ್ರದ ಮೋಷನ್‌ ಟೀಸರ್‌ ಅನ್ನು ಸಂಗೀತದ ಧ್ವನಿಯಲ್ಲೇ ನೀಡಲಾಗಿತ್ತು.
ಟೀಸರ್‌, ಟ್ರೇಲರ್‌ ಯಾಕಿಲ್ಲ ಗುರೂ?
ಇತ್ತೀಚೆಗೆ ಪವರ್‌ ಟಿವಿಗೆ ನೀಡಿದ ಸಂದರ್ಶನದಲ್ಲಿ ಈ ವಿಷಯದ ಕುರಿತು ಕೃಷ್ಣಂ ಪ್ರಣಯ ಸಖಿ ಸಿನಿಮಾದ ನಿರ್ದೇಶಕ ಶ್ರೀನಿವಾಸ ರಾಜು ಸ್ಪಷ್ಟಪಡಿಸಿದ್ದರು. ಕೃಷ್ಣಂ ಪ್ರಣಯ ಸಖಿ ಸಿನಿಮಾಕ್ಕೆ ಚಾಲ್ತಿಯಲ್ಲಿರುವ "ಟೀಸರ್‌ ಟ್ರೇಲರ್‌ ಟ್ರೆಂಡ್‌" ಬಿಟ್ಟಿರುವ ಕುರಿತು ಅವರು ವಿವರಿಸಿದ್ದಾರೆ. "ನಮ್ಮ ಅಂಗಡಿಯಲ್ಲಿ ಏನಿದೆ ಎಂದು ತೋರಿಸುವ ಸಲುವಾಗಿ ಟೀಸರ್‌, ಟ್ರೇಲರ್‌ ಬಿಡುಗಡೆ ಮಾಡಲಾಗುತ್ತದೆ. ಟೀಸರ್‌, ಟ್ರೇಲರ್‌ ಬಿಡುಗಡೆ ಮಾಡುವ ಮೂಲಕ ಸಿನಿಮಾದಲ್ಲಿ ಏನಿದೆ ಎಂದು ಸುಳಿವು ನೀಡಲಾಗುತ್ತದೆ. ಸಿನಿಮಾದ ಕುರಿತು ಜನರಲ್ಲಿ ಆಸಕ್ತಿ ಕೆರಳಿಸಲು ಇರುವ ಮಾರ್ಗ ಇದಾಗಿದೆ. ಆದರೆ, ಕೃಷ್ಣಂ ಪ್ರಣಯ ಸಖಿಗೆ ಇದು ಅಗತ್ಯವಿಲ್ಲ. ಈ ಪ್ರೇಮಕಥೆಗೆ ಸಂಗೀತವೇ ಆಹ್ವಾನ ಪತ್ರ. ಟಾರ್ಗೆಟ್‌ ಆಡಿಯನ್ಸ್‌ಗೆ ನಮ್ಮ ಸಿನಿಮಾದ ಹಾಡುಗಳ ಮೂಲಕವೇ ಆಹ್ವಾನ ನೀಡಿದ್ದೇವೆ" ಎಂದು ಅವರು ಹೇಳಿದ್ದಾರೆ.
ಪ್ರೇಕ್ಷಕರ ಕಲ್ಪನೆಗೆ ಬಿಟ್ಟದ್ದು
"ಕೆಲವೊಮ್ಮೆ ನಾವು ನಮ್ಮ ಸಮಾದಿಯನ್ನು ನಾವೇ ತೋಡಿಕೊಳ್ಳುತ್ತೇವೆ. ಟೀಸರ್‌/ಟ್ರೇಲರ್‌ ಮೂಲಕ ಸಿನಿಮಾದ ಪ್ರಮುಖ ಮಾಹಿತಿಯನ್ನು ಹೊರಬಿಡುತ್ತೇವೆ. ವೀಕ್ಷಕರು ಈ ಟ್ರೇಲರ್‌, ಟೀಸರ್‌ ನೋಡಿ ತಮ್ಮದೇ ಕಲ್ಪನೆ ಮಾಡಿಕೊಳ್ಳುತ್ತಾರೆ. ಯಾವುದೋ ನಿರೀಕ್ಷೆಯಲ್ಲಿ ಇರುತ್ತಾರೆ. ಇದು ಸಿನಿಮಾದ ಕುರಿತು ಒಂದಿಷ್ಟು ಹೈಪ್‌ ಉಂಟು ಮಾಡುತ್ತದೆ. ಆದರೆ, ನಾನು ನನ್ನ ಪ್ರೇಕ್ಷಕರಿಗೆ ನೀವು ಏನು ಬೇಕಾದರೂ ಕಲ್ಪನೆ ಮಾಡಿಕೊಳ್ಳಿ ಎಂಬ ಖಾಲಿ ಕ್ಯಾನ್ವಸ್‌ ನೀಡುತ್ತಿದ್ದೇನೆ. ಈಗಾಗಲೇ ಇದು ಲವ್‌ ಸ್ಟೋರಿ ಎಂದು ಎಲ್ಲಿರಿಗೂ ಗೊತ್ತು" ಎಂದು ಅವರು ಹೇಳಿದ್ದಾರೆ.
ಹಾಡೇ ಆಮಂತ್ರಣ
ಈ ಮೂಲಕ ಈ ಲವ್‌ ಸ್ಟೋರಿಯ ಕಥೆಯ ತುಸು ಗುಟ್ಟು ಸಹ ಬಿಚ್ಚಿಡದೆ ಕುತೂಹಲ ಕೆರಳುವಂತೆ ಚಿತ್ರತಂಡ ಮಾಡಿದೆ. ಈಗಾಗಲೇ ಆರರಲ್ಲಿ ಮೂರು ಹಾಡುಗಳು ಬಿಡುಗಡೆಯಾಗಿವೆ. ಮೊದಲು ಚಿನ್ನಮ್ಮ ಹಾಡು ವೈರಲ್‌ ಆಗಿತ್ತು. ಈಗ ಎಲ್ಲಿ ನೋಡಿದರೂ ದ್ವಾಪರ ಹಾಡಿನದ್ದೇ ಮಾತು. ಅಷ್ಟೊಂದು ವೈರಲ್‌ ಆಗಿದೆ. ಯೂಟ್ಯೂಬ್‌ನಲ್ಲಂತೂ ದ್ವಾಪರ ಹಾಡು ನಂಬರ್‌ ಒನ್‌ ಟ್ರೆಂಡ್‌ನಲ್ಲಿದೆ.
"80, 90ರ ದಶಕದಲ್ಲಿ ಸಿನಿಮಾಗಳು ಟ್ರೇಲರ್‌, ಟೀಸರ್‌ ಇಲ್ಲದೆ ಬಿಡುಗಡೆಯಾಗುತ್ತಿದ್ದವು. ಆ ಸಂದರ್ಭದಲ್ಲಿ ಸಿನಿಮಾದ ಹಾಡುಗಳೇ ಪ್ರೇಕ್ಷಕರನ್ನು ಥಿಯೇಟರ್‌ಗೆ ಕರೆತರುತ್ತಿದ್ದವು" ಎಂದು ನಿರ್ದೇಶಕ ಶ್ರೀನಿವಾಸ್‌ ರಾಜು ನೆನಪಿಸಿದ್ದಾರೆ.
ಟೀಸರ್‌, ಟ್ರೇಲರ್‌ ಇಲ್ಲದೆ ಇದ್ದರೂ ಈ ಸಿನಿಮಾದ ಕುರಿತು ಪ್ರೇಕ್ಷಕರಲ್ಲಿ ಸಾಕಷ್ಟು ಕುತೂಹಲ ಮೂಡಿರುವುದು ಸುಳ್ಳಲ್ಲ. ಈ ಸಿನಿಮಾ ನೋಡಲು ಪ್ರೇಕ್ಷಕರಿಗೆ ವೈರಲ್‌ ಆಗಿರುವ ಹಾಡುಗಳೇ ಆಮಂತ್ರಣವಾಗಿದೆ. ಗಣೇಶ್‌ ಪಾಲಿಗೆ ಕೃಷ್ಣಂ ಪ್ರಣಯ ಸಖಿ ಮತ್ತೊಂದು ಮುಂಗಾರು ಮಳೆಯಾಗುವುದೇ? ಎಂಬ ನಿರೀಕ್ಷೆ ಮೂಡಿದೆ.
ಕೃಷ್ಣಂ ಪ್ರಣಯ ಸಖಿ ಸಿನಿಮಾದ ದ್ವಾಪರ ದಾಟಲು ಹಾಡು ಇಲ್ಲಿದೆ ಕೇಳಿ
ಕೃಷ್ಣಂ ಪ್ರಣಯ ಸಖಿ ಸಿನಿಮಾದ ಚಿನ್ನಮ್ಮ ಹಾಡು ಇಲ್ಲಿದೆ ಕೇಳಿ
