ಗ್ರಾಮಾಯಣ ಚಿತ್ರದಲ್ಲಿ ಮೇಕಪ್‌ ಇಲ್ಲದೆ ನಟಿಸುತ್ತಿದ್ದೇನೆ, ಪಾತ್ರಕ್ಕಾಗಿ ಮೂಗು ಚುಚ್ಚಿಸಿಕೊಂಡಿದ್ದೇನೆ; ಮೇಘಾ ಶೆಟ್ಟಿ
ಡಾ. ರಾಜ್‌ಕುಮಾರ್‌ ಅವರ ಮೊಮ್ಮಗ ವಿನಯ್‌ ರಾಜ್‌ಕುಮಾರ್‌ ಅವರೊಂದಿಗೆ ನಟಿಸಲು ಅವಕಾಶ ಸಿಕ್ಕಿದ್ದಕ್ಕೆ ಬಹಳ ಖುಷಿಯಾಗುತ್ತಿದೆ. ಗ್ರಾಮಾಯಣ ಚಿತ್ರದಲ್ಲಿ ಚಾಲೆಂಜಿಂಗ್‌ ಪಾತ್ರ ನನ್ನದು. ಅದಕ್ಕಾಗಿ ನಾನು ರೆಡಿ ಆಗುತ್ತಿದ್ದೇನೆ. ಹಳ್ಳಿ ಹುಡುಗಿ ಪಾತ್ರದಲ್ಲಿ ನಟಿಸುತ್ತಿದ್ದೇನೆ.
ಕಿರುತೆರೆ ಮೂಲಕ ಬಣ್ಣದ ಬದುಕು ಆರಂಭಿಸಿ ಬೆಳ್ಳಿ ಪರದೆಯಲ್ಲಿ ಮಿಂಚುತ್ತಿರುವ ಮೇಘಾಶೆಟ್ಟಿ ಈಗ 'ಗ್ರಾಮಾಯಣ' ಸಿನಿಮಾಗೆ ನಾಯಕಿಯಾಗಿ ಆಯ್ಕೆ ಆಗಿದ್ದಾರೆ. ವಿನಯ್‌ ರಾಜ್‌ಕುಮಾರ್‌, ಈ ಚಿತ್ರದಲ್ಲಿ ನಾಯಕನಾಗಿ ನಟಿಸುತ್ತಿದ್ದು ಮೇಘಾ, ವಿನಯ್‌ಗೆ ಜೋಡಿಯಾಗಿ ನಟಿಸುತ್ತಿದ್ಧಾರೆ.
ಅಕ್ಟೋಬರ್‌ 4ರಿಂದ ಚಿತ್ರೀಕರಣ
'ಗ್ರಾಮಾಯಣ' ಸಿನಿಮಾ ಅನೌನ್ಸ್‌ ಆಗಿ ಬಹಳ ದಿನಗಳೇ ಕಳೆದಿವೆ. ಆದರೆ ಕಾರಣಾಂತರಗಳಿಂದ ಚಿತ್ರೀಕರಣ ಆರಂಭವಾಗಿರಲಿಲ್ಲ. ಈಗ ಚಿತ್ರತಂಡ ಸ್ಕ್ರಿಪ್ಟ್‌ನಲ್ಲಿ ಕೆಲವು ಬದಲಾವಣೆ ಮಾಡಿಕೊಂಡು ಶೂಟಿಂಗ್ ಆರಂಭಿಸಲು ಸಜ್ಜಾಗಿದೆ. ಅಕ್ಟೋಬರ್‌ 4 ರಿಂದ ಗ್ರಾಮಾಯಣ ಚಿತ್ರೀಕರಣ ಆರಂಭವಾಗಲಿದೆ. ಜೀ ಕನ್ನಡದ 'ಜೊತೆ ಜೊತೆಯಲಿ' ಧಾರಾವಾಹಿ ಮೂಲಕ ಬಣ್ಣದ ಬದುಕಿಗೆ ಬಂದ ಮೇಘಾ ಶೆಟ್ಟಿ ಒಂದು ವಿಡಿಯೋ ಆಲ್ಬಂ, ಗಣೇಶ್‌ ಜೊತೆ ತ್ರಿಬಲ್‌ ರೈಡಿಂಗ್‌, ಡಾರ್ಲಿಂಗ್‌ ಕೃಷ್ಣ ಜೊತೆ ತ್ರಿಬಲ್‌ ರೈಡಿಂಗ್‌ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಗ್ರಾಮಾಯಣ ಸೇರಿ ಇನ್ನೂ 2 ಸಿನಿಮಾಗಳಲ್ಲಿ ಮೇಘಾ ನಟಿಸುತ್ತಿದ್ಧಾರೆ.
ಪಾತ್ರಕ್ಕಾಗಿ ಮೂಗು ಚುಚ್ಚಿಸಿಕೊಂಡಿರುವ ಮೇಘಾ ಶೆಟ್ಟಿ
''ಡಾ. ರಾಜ್‌ಕುಮಾರ್‌ ಅವರ ಮೊಮ್ಮಗ ವಿನಯ್‌ ರಾಜ್‌ಕುಮಾರ್‌ ಅವರೊಂದಿಗೆ ನಟಿಸಲು ಅವಕಾಶ ಸಿಕ್ಕಿದ್ದಕ್ಕೆ ಬಹಳ ಖುಷಿಯಾಗುತ್ತಿದೆ. ಗ್ರಾಮಾಯಣ ಚಿತ್ರದಲ್ಲಿ ಚಾಲೆಂಜಿಂಗ್‌ ಪಾತ್ರ ನನ್ನದು. ಅದಕ್ಕಾಗಿ ನಾನು ರೆಡಿ ಆಗುತ್ತಿದ್ದೇನೆ. ಹಳ್ಳಿ ಹುಡುಗಿ ಪಾತ್ರದಲ್ಲಿ ನಟಿಸುತ್ತಿದ್ದೇನೆ. ಆದ್ದರಿಂದ ಚಿತ್ರದಲ್ಲಿ ನಾನು ಮೇಕಪ್‌ ಇಲ್ಲದೆ ನಟಿಸುತ್ತಿದ್ದೇನೆ. ಪಾತ್ರಕ್ಕಾಗಿ ಮೂಗು ಚುಚ್ಚಿಸಿಕೊಂಡಿದ್ದೇನೆ. ಕಡೂರು, ಅರಸಿಕೆರೆ ಭಾಗದ ಸ್ಲಾಂಗ್‌ ಕಲಿಯುತ್ತಿದ್ದೇನೆ. ನಿರ್ದೇಶಕರು ಕೂಡಾ ಆ ಕಡೆಯವರೇ ಆಗಿದ್ದು ಅವರೂ ನನಗೆ ಅಲ್ಲಿನ ಭಾಷೆ ಕಲಿಯಲು ಸಹಾಯ ಮಾಡುತ್ತಿದ್ದಾರೆ'' ಎಂದು ಮೇಘಾ ಶೆಟ್ಟಿ ತಮ್ಮ ಪಾತ್ರದ ಬಗ್ಗೆ ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಪ್ರತಿನಿಧಿಯೊಂದಿಗೆ ಮಾತನಾಡಿದ್ದಾರೆ.
ದೇವನೂರು ಚಂದ್ರು ನಿರ್ದೇಶನದ ಸಿನಿಮಾ
'ಗ್ರಾಮಾಯಣ' ಚಿತ್ರವನ್ನು ದೇವನೂರು ಚಂದ್ರು ನಿರ್ದೇಶನ ಮಾಡುತ್ತಿದ್ದು ಯುಐ ಸಿನಿಮಾ ನಿರ್ಮಾಪಕರಾದ ಲಹರಿ ಫಿಲ್ಮ್ಸ್‌ನ ಜಿ ಮನೋಹರನ್‌ ಹಾಗೂ ವೀನಸ್‌ ಎಂಟರ್‌ಟೈನ್ಮೆಂಟ್‌ನ ಕೆಪಿ ಶ್ರೀಕಾಂತ್‌ ಜೊತೆ ಸೇರಿ ನಿರ್ಮಿಸುತ್ತಿದ್ದಾರೆ. ನವೀನ್‌ ಮನೋಹರನ್‌, 'ಗ್ರಾಮಾಯಣ' ಚಿತ್ರಕ್ಕೆ ಸಹ ನಿರ್ಮಾಪಕರಾಗಿದ್ದಾರೆ. ಚಿತ್ರದಲ್ಲಿ ವಿನಯ್‌ ರಾಜ್‌ಕುಮಾರ್‌, ಸಿಕ್ತ್‌ ಸೆನ್ಸ್‌ ಸೀನ ಎಂಬ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. 30 ದಿನಗಳ ಕಾಲ ಒಂದೇ ಹಂತದಲ್ಲಿ ಚಿತ್ರೀಕರಣ ನಡೆಯುತ್ತಿದೆ. ಚಿತ್ರದ ಹಾಡುಗಳಿಗೆ ಪೂರ್ಣಚಂದ್ರ ತೇಜಸ್ವಿ ಸಂಗೀತ ನೀಡುತ್ತಿದ್ದು ಯಶಸ್ವಿನಿ ಅಂಚನ್‌ ಎಂಬ ಯುವತಿ ಸಿನಿಮಾಟೋಗ್ರಾಫರ್‌ ಆಗಿ ಎಂಟ್ರಿ ಕೊಟ್ಟಿದ್ದಾರೆ. ಸಿನಿಮಾ ಬಗ್ಗೆ ಹೆಚ್ಚಿನ ಅಪ್‌ಡೇಟ್‌ ತಿಳಿಯಲು ಸಿನಿಪ್ರಿಯರು ಕಾಯುತ್ತಿದ್ದಾರೆ.
'ಗ್ರಾಮಾಯಣ' ಹೊರತುಪಡಿಸಿ ಮೇಘಾ ಶೆಟ್ಟಿ ಧನ್ವೀರ್‌ ಗೌಡ ಜೊತೆ 'ಕೈವ' ಸಿನಿಮಾ ಹಾಗೂ ಕವೀಶ್‌ ಶೆಟ್ಟಿ ಜೊತೆ 'ಆಪರೇಷನ್‌ ಲಂಡನ್‌ ಕೆಫೆ' ಚಿತ್ರದಲ್ಲಿ ನಟಿಸುತ್ತಿದ್ದಾರೆ.
