ತತ್ಸಮ ತದ್ಭವ ಟ್ರೇಲರ್ ರಿಲೀಸ್‌; ಸಿನಿಮಾವನ್ನು ಗೆಳೆಯ ಚಿರಂಜೀವಿ ಸರ್ಜಾಗೆ ಅರ್ಪಿಸಿದ ಚಿತ್ರತಂಡ
ಟ್ರೇಲರ್ ನೋಡಿದರೆ ಇದೊಂದು ಕೊಲೆಯ ಸುತ್ತ ಸುತ್ತುವ ಕಥೆ ಎಂಬುದು ತಿಳಿಯುತ್ತದೆ. ಈ ಸಿನಿಮಾವನ್ನು ಚಿರಂಜೀವಿ ಸರ್ಜಾಗೆ ಅರ್ಪಿಸಲಾಗಿದೆ.
ಮೇಘನಾ ರಾಜ್‌ ಕಮ್‌ ಬ್ಯಾಕ್‌ ಸಿನಿಮಾ 'ತತ್ಸಮ ತದ್ಭವ' ಟ್ರೇಲರ್ ರಿಲೀಸ್‌ ಆಗಿದೆ. ಆಗಸ್ಟ್‌ 27 ಭಾನುವಾರ ಬೆಳಗ್ಗೆ 10 ಗಂಟೆಗೆ ಚಿತ್ರತಂಡ ಟ್ರೇಲರ್ ರಿಲೀಸ್‌ ಮಾಡಿದೆ. ಬೆಂಗಳೂರಿನ ವಸಂತ ನಗರದ ಚಾಮುಂಡೇಶ್ವರಿ ಸ್ಟುಡಿಯೋದಲ್ಲಿ ನಡೆದ ಟ್ರೇಲರ್ ರಿಲೀಸ್‌ ಕಾರ್ಯಕ್ರಮದಲ್ಲಿ ಪ್ರಜ್ವಲ್‌ ದೇವರಾಜ್‌, ಮೇಘನಾ ರಾಜ್‌, ಪನ್ನಗಾಭರಣ ಸೇರಿದಂತೆ ಅನೇಕ ಸಿನಿ ಗಣ್ಯರು ಉಪಸ್ಥಿತರಿದ್ದರು.
ಗೆಳೆಯರೇ ಸೇರಿ ತಯಾರಿಸಿದ ಸಿನಿಮಾ
ಚಿರಂಜೀವಿ ಸರ್ಜಾ ಅವರನ್ನು ಮದುವೆ ಆದ ನಂತರ ಮೇಘನಾ ರಾಜ್‌, ಸಿನಿಮಾಗಳಿಂದ ಅಂತರ ಕಾಯ್ದುಕೊಂಡಿದ್ದರು. ಜೀವನದಲ್ಲಿ ಎಲ್ಲವೂ ಚೆನ್ನಾಗಿದೆ ಎಂದುಕೊಳ್ಳುವಷ್ಟರಲ್ಲಿ ಚಿರಂಜೀವಿ ಸರ್ಜಾ ಹೃದಯಾಘಾತದಿಂದ ನಿಧನರಾದರು. ಆ ಸಮಯದಲ್ಲಿ ಮೇಘನಾ 5 ತಿಂಗಳ ಗರ್ಭಿಣಿ. ಅದೇ ವರ್ಷ ಮೇಘನಾ ಗಂಡು ಮಗುವಿಗೆ ಜನ್ಮ ನೀಡಿದರು. ಒಂದೆಡೆ ಪ್ರೀತಿಸಿ ಮದುವೆ ಆದ ಚಿರು ದೂರಾದ ನೋವು, ಮತ್ತೊಂದೆಡೆ ಮಗ ಬಂದ ಖುಷಿ. ಮೇಘನಾ ಅವರನ್ನು ಹೇಗಾದರೂ ಈ ನೋವಿನಿಂದ ಹೊರ ತರಬೇಕು ಎಂದು ನಿರ್ಧರಿಸಿದ ಗೆಳೆಯರ ಗುಂಪು ಅವರನ್ನು ಮತ್ತೆ ಸಿನಿಮಾದಲ್ಲಿ ನಟಿಸುವಂತೆ ಪ್ರೇರೇಪಿಸಿದರು. ಅದರ ಫಲವೇ 'ತತ್ಸಮ ತದ್ಭವ' ಸಿನಿಮಾ.
ಸೆಪ್ಟೆಂಬರ್‌ 15 ರಂದು ತೆರೆಗೆ
ಸೆಪ್ಟೆಂಬರ್‌ 15 ರಂದು 'ತತ್ಸಮ ತದ್ಭವ' ಸಿನಿಮಾ ತೆರೆ ಕಾಣುತ್ತಿದೆ. ಅದಕ್ಕೂ ಮುನ್ನ ಚಿತ್ರತಂಡ ಟ್ರೇಲರ್ ರಿಲೀಸ್‌ ಮಾಡಿದೆ. ಟ್ರೇಲರ್ ನೋಡಿದರೆ ಇದೊಂದು ಕೊಲೆಯ ಸುತ್ತ ಸುತ್ತುವ ಕಥೆ ಎಂಬುದು ತಿಳಿಯುತ್ತದೆ. ಈ ಸಿನಿಮಾವನ್ನು ಚಿರಂಜೀವಿ ಸರ್ಜಾಗೆ ಅರ್ಪಿಸಲಾಗಿದೆ. ಟ್ರೇಲರ್ ಆರಂಭದಲ್ಲಿ ಚಿರು ಫೋಟೋ ಜೊತೆಗೆ ''ನಾವು ಕಂಡ ಕನಸಿನ ಪುಟ್ಟ ಹೆಜ್ಜೆ, ಗೆಳೆಯ ಇದು ನಿನಗಾಗಿ'' ಎಂಬ ವಾಕ್ಯ ಗಮನ ಸೆಳೆಯುತ್ತಿದೆ.
ಸಸ್ಪೆನ್ಸ್‌ ಥ್ರಿಲ್ಲರ್‌ ಸಿನಿಮಾ
ಕ್ರೈಮ್‌ ಇನ್ವೆಸ್ಟಿಗೇಶನ್‌ ಟ್ರೈನಿಗಳಗೆ ತರಬೇತಿ ನೀಡುವ ಪೊಲೀಸ್‌ ಕಮಿಷನರ್‌ ಅಶೋಕ್‌ ಕುಮಾರ್‌ ಪಾತ್ರದಲ್ಲಿ ದೇವರಾಜ್‌ ಕಾಣಿಸಿಕೊಂಡಿದ್ದಾರೆ. ಕಾಣೆಯಾದ ಪತಿಯ ಹುಡುಕಾಟದಲ್ಲಿರುವ ಹಾರಿಕಾ ಎಂಬ ಮಹಿಳೆ ಪಾತ್ರದಲ್ಲಿ ಮೇಘನಾ ರಾಜ್‌, ಕೇಸ್‌ ಇನ್ವೆಷ್ಟಿಗೇಶನ್‌ ಮಾಡುವ ಪೊಲೀಸ್‌ ಅಧಿಕಾರಿ ಅರವಿಂದ್‌ ಅಶ್ವತ್ಥಾಮ ಪಾತ್ರದಲ್ಲಿ ಪ್ರಜ್ವಲ್‌ ದೇವರಾಜ್‌ ನಟಿಸಿದ್ದಾರೆ. ಕಾಣೆಯಾದ ಹಾರಿಕಾ ಪತಿ ಕೊಲೆಯಾಗಿದ್ದಾನೆ ಎಂದು ತಿಳಿದಾಗ ಇನ್‌ಸ್ಪೆಕ್ಟರ್‌ ಅಶ್ವತ್ಥಾಮ, ಯಾವ ರೀತಿ ಇನ್ವೆಸ್ಟಿಗೇಟ್‌ ಮಾಡುತ್ತಾರೆ? ಯಾರನ್ನೆಲ್ಲಾ ವಿಚಾರಣೆಗೆ ಒಳಪಡಿಸುತ್ತಾರೆ? ಅಪರಾಧಿ ಯಾರು? ಎಂಬುದೇ ಚಿತ್ರದ ತಿರುಳು.
ವಿಶಾಲ್‌ ಆತ್ರೇಯ ನಿರ್ದೇಶನದ 'ತತ್ಸಮ ತದ್ಭವ'
ಟ್ರೇಲರ್‌ಗೆ ಮೆಚ್ಚುಗೆಯ ಮಹಾಪೂರವೇ ಹರಿದುಬರುತ್ತಿದೆ. ಮೇಘನಾ ರಾಜ್‌ ಅವರನ್ನು ಬಹಳ ದಿನಗಳ ನಂತರ ತೆರೆ ಮೇಲೆ ನೋಡುತ್ತಿರುವುದಕ್ಕೆ ಸಿನಿಪ್ರಿಯರು ಸಂತೋಷ ವ್ಯಕ್ತಪಡಿಸಿದ್ದಾರೆ. ಪಿಬಿ ಸ್ಟುಡಿಯೋಸ್‌ ಅನ್ವಿತ್‌ ಸಿನಿಮಾಸ್‌ ಬ್ಯಾನರ್‌ ಅಡಿ 'ತತ್ಸಮ ತದ್ಭವ' ಚಿತ್ರವನ್ನು ಪನ್ನಗಾಭರಣ, ಸ್ಫೂರ್ತಿ ಅನಿಲ್‌, ಚೇತನ್‌ ನಂಜುಂಡಯ್ಯ ಜೊತೆ ಸೇರಿ ನಿರ್ಮಿಸಿದ್ದಾರೆ. ಚಿತ್ರಕಥೆ ಹಾಗೂ ನಿರ್ದೇಶನ ವಿಶಾಲ್‌ ಆತ್ರೇಯ ಅವರದ್ದು, ಚಿತ್ರದ ಹಾಡುಗಳಿಗೆ ವಾಸುಕಿ ವೈಭವ್‌ ಸಂಗೀತ ನೀಡಿದ್ದಾರೆ. ಪ್ರಜ್ವಲ್‌ ದೇವರಾಜ್‌, ಮೇಘನಾ ರಾಜ್‌ ಜೊತೆಗೆ ಗಿರಿಜಾ ಲೋಕೇಶ್‌, ಶ್ರುತಿ ಕೃಷ್ಣ, ಬಾಲಾಜಿ ಮನೋಹರ್‌, ಟಿಎಸ್‌ ನಾಗಾಭರಣ, ಅರವಿಂದ್‌ ಅಯ್ಯರ್‌, ರಾಜಶ್ರೀ ಪೊನ್ನಪ್ಪ, ವರುಣ್‌ ಶ್ರೀನಿವಾಸ್‌ ಹಾಗೂ ಇನ್ನಿತರರು ಸಿನಿಮಾದಲ್ಲಿ ನಟಿಸಿದ್ದಾರೆ.
