Kannada OTT Movies: ಸದ್ದಿಲ್ಲದೆ ಒಟಿಟಿಗೆ ಬಂದ ಕನ್ನಡದ ಎರಡು ಕ್ರೈಂ ಥ್ರಿಲ್ಲರ್ ಚಿತ್ರಗಳು; ಯಾವ ಒಟಿಟಿಯಲ್ಲಿ ವೀಕ್ಷಣೆ?
OTT Kannada Movies: ಈ ವಾರ ಕನ್ನಡದ ಎರಡು ಸಿನಿಮಾಗಳು ಸದ್ದಿಲ್ಲದೆ ಒಟಿಟಿ ಅಂಗಳ ಪ್ರವೇಶಿಸಿವೆ. ವಿಭಿನ್ನ ಕಥೆಗಳನ್ನು ಹೊಂದಿರುವ ಈ ಎರಡು ಚಿತ್ರಗಳು ಕ್ರೈಮ್ ಥ್ರಿಲ್ಲರ್ ಜಾನರ್‌ಗೆ ಸೇರಿವೆ. ಹಾಗಾದರೆ ಆ ಸಿನಿಮಾಗಳು ಯಾವವು? ಸ್ಟ್ರೀಮಿಂಗ್ ವಿವರ ಸಹಿತ ಮಾಹಿತಿ ಇಲ್ಲಿದೆ.
Kannada OTT Movies: ಪರಭಾಷೆಗಳಿಗೆ ಹೋಲಿಸಿದರೆ ಕನ್ನಡದ ಸಿನಿಮಾಗಳು ಒಟಿಟಿಗೆ ಆಗಮಿಸುವುದೇ ಅಪರೂಪ. ಇದೀಗ ಸದ್ದಿಲ್ಲದೆ ಎರಡು ಸಿನಿಮಾಗಳು ಒಟಿಟಿ ಅಂಗಳಕ್ಕೆ ಕಾಲಿರಿಸಿವೆ. ಆ ಪೈಕಿ ನಾಟೌಟ್ ಮತ್ತು ಜೂಲಿಯೆಟ್ 2 ಸಿನಿಮಾಗಳು ಡಿಜಿಟಲ್‌ ಸ್ಟ್ರೀಮಿಂಗ್ ಆರಂಭಿಸಿವೆ. ಈ ಎರಡೂ ಸಿನಿಮಾಗಳು ಒಂದೇ ಒಟಿಟಿಗೆ ಆಗಮಿಸಿವೆ. ಕ್ರೈಮ್ ಥ್ರಿಲ್ಲರ್ ನಾಟ್ ಔಟ್ ಸಿನಿಮಾದಲ್ಲಿ ರವಿಶಂಕರ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಚಿತ್ರವನ್ನು ಅಂಬರೀಷ ಎಂ ನಿರ್ದೇಶಿಸಿದ್ದಾರೆ. ಮತ್ತೊಂದು ಕ್ರೈಮ್ ಥ್ರಿಲ್ಲರ್ ಶೈಲಿಯ ಜೂಲಿಯೆಟ್ 2 ಚಿತ್ರದಲ್ಲಿ ಬೃಂದಾ ಆಚಾರ್ಯ ನಟಿಸಿದ್ದಾರೆ.
ನಾಟ್ ಔಟ್
ನಾಟೌಟ್ ಸಿನಿಮಾ ಅಮೆಜಾನ್ ಪ್ರೈಮ್ ವೀಡಿಯೊ ಒಟಿಟಿಯಲ್ಲಿ ಸ್ಟ್ರೀಮಿಂಗ್ ಆರಂಭಿಸಿದೆ. ಈ ಚಿತ್ರವನ್ನು ನೋಡಲು ಇಂತಿಷ್ಟು ಹಣ ಪಾವತಿಸಿ ಬಾಡಿಗೆ ರೂಪದಲ್ಲಿ ನೋಡಬಹುದು. ಅಂದಹಾಗೆ, ನಾಟ್‌ಔಟ್‌ ಸಿನಿಮಾ ಜುಲೈ 19ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಿತ್ತು. ವಿಮರ್ಶೆ ದೃಷ್ಟಿಯಿಂದ ಪಾಸಿಟಿವ್‌ ಪ್ರತಿಕ್ರಿಯೆ ಪಡೆದ ಈ ಸಿನಿಮಾದಲ್ಲಿ ರವಿಶಂಕರ್ ಜೊತೆಗೆ ಅಜಯ್ ಪೃಥ್ವಿ, ರಚನಾ ಇಂದರ್, ಗೋಪಾಲ್ ಕೃಷ್ಣ ದೇಶಪಾಂಡೆ, ಕಾಕ್ರೋಚ್ ಸುಧಿ, ಸಾಲ್ಮನ್ ಮತ್ತು ಗೋವಿಂದೇ ಗೌಡ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಈ ಚಿತ್ರದಲ್ಲಿ ಒಂಟಿಕೊಪ್ಪಲು ದೇವರಾಜ್ (ರವಿ ಶಂಕರ್) ಒಬ್ಬ ಫೈನಾನ್ಷಿಯರ್. ಕನಸು ಬೆನ್ನಟ್ಟುವ ಯುವಕ ಅಜಯ್ (ಅಜಯ್ ಪೃಥ್ವಿ) ವೃತ್ತಿಯಲ್ಲಿ ಚಾಲಕ. ಇದೇ ಫೈನಾನ್ಷಿಯರ್ ಬಳಿ ಸಾಲ ಪಡೆದು ಆಂಬ್ಯುಲೆನ್ಸ್‌ ಖರೀದಿಸುತ್ತಾನೆ. ದುರಾದೃಷ್ಟವಶಾತ್‌, ಅದು ಕಳ್ಳತನವಾಗುತ್ತದೆ. ಇತ್ತ ದುಡ್ಡುಕೊಟ್ಟವನು ಹಣಕ್ಕಾಗಿ ಪೀಡಿಸಲು ಶುರು ಮಾಡುತ್ತಾನೆ. ಆಗ ಅಜಯ್ ಏನು ಮಾಡುತ್ತಾನೆ? ಅವನ ಮುಂದಿರುವ ದಾರಿ ಯಾವುದು? ಹೀಗೆ ಕ್ರೈಂ ಥ್ರಿಲ್ಲರ್ ಶೈಲಿಯಲ್ಲಿಯೇ ನೋಡಿಸಿಕೊಂಡು ಹೋಗುತ್ತದೆ.
ಜೂಲಿಯೆಟ್ 2
ಜೂಲಿಯೆಟ್ 2 ಚಿತ್ರದಲ್ಲಿ ಬೃಂದಾ ಆಚಾರ್ಯ ಪ್ರಮುಖ ಪಾತ್ರದಲ್ಲಿದ್ದಾರೆ. ನಾಯಕಿ ಪ್ರಧಾನದ ಈ ಸಿನಿಮಾ ಅಮೆಜಾನ್ ಪ್ರೈಮ್ ವೀಡಿಯೊದಲ್ಲಿ ಸ್ಟ್ರೀಮಿಂಗ್‌ಗೆ ಲಭ್ಯವಿದೆ. ಈ ಸಿನಿಮಾವನ್ನೂ ಇಂತಿಷ್ಟು ಹಣ ಪಾವತಿಸಿ ಬಾಡಿಗೆ ವಿಧಾನದಲ್ಲಿ ವೀಕ್ಷಣೆ ಮಾಡಬೇಕಿದೆ. ಒಂದಷ್ಟು ದಿನಗಳ ಬಳಿಕ ಇದು ಎಲ್ಲ ಪ್ರೈಂ ಚಂದಾದಾರಿಗೆ ಉಚಿತವಾಗಿ ವೀಕ್ಷಣೆಗೆ ಲಭ್ಯವಾಗಲಿದೆ. ಈ ಚಿತ್ರವನ್ನು ವಿರಾಟ್ ಬಿ ಗೌಡ ನಿರ್ದೇಶಿಸಿದ್ದಾರೆ. 2023ರ ಫೆಬ್ರವರಿಯಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದ್ದ ಈ ಸಿನಿಮಾ, ಇದೀಗ ಪ್ರೈಮ್ ವಿಡಿಯೋ ಒಟಿಟಿಯಲ್ಲಿ ಸ್ಟ್ರೀಮಿಂಗ್ ಪ್ರವೇಶಿಸಿದೆ.
ಜೂಲಿಯೆಟ್ 2 ಸಿನಿಮಾ ಅತ್ಯುತ್ತಮ ಬಾಕ್ಸರ್ ಆಗಬೇಕೆಂದು ಕನಸು ಕಾಣುವ ಜೂಲಿಯೆಟ್ (ಬೃಂದಾ ಆಚಾರ್ಯ) ಸುತ್ತ ಸುತ್ತುತ್ತದೆ. ಒಂದು ದಿನ ಜೂಲಿಯೆಟ್ ಮೇಲೆ ವ್ಯಕ್ತಿಯೊಬ್ಬ ದಾಳಿ ಮಾಡುತ್ತಾನೆ. ಈ ದಾಳಿಯಿಂದ ಆಕೆಗೆ ತಾನು ಬಾಲ್ಯದಲ್ಲಿ ಲೈಂಗಿಕ ದೌರ್ಜನ್ಯಕ್ಕೊಳಗಾದುದನ್ನು ನೆನಪಿಸುತ್ತದೆ. ಅಲ್ಲಿಂದ ಆಕೆ ಸೇಡು ತೀರಿಸಿಕೊಳ್ಳಲು ನಿರ್ಧರಿಸುತ್ತಾಳೆ. ಅದರ ರೋಚಕತೆ ಹೇಗಿರಲಿದೆ ಎಂಬುದನ್ನು ಸಿನಿಮಾದಲ್ಲಿಯೇ ನೋಡಬೇಕು.
ಜೂಲಿಯೆಟ್ 2 ಚಿತ್ರದಲ್ಲಿ ವಿರಾಟ್ ಬಿ ಗೌಡ, ಅನುಪ್ ಸಾಗರ್, ಖುಷ್ ಆಚಾರ್ಯ, ಶ್ರೀಕಾಂತ್ ಶ್ರೀಕಿ ಮತ್ತು ರಾಯ್ ಬಡಿಗರು ತಂಡದ ಜೊತೆಗೆ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಚಿತ್ರವನ್ನು ಲಿಖಿತ್ ಆರ್ ಕೋಟ್ಯಾನ್ ನಿರ್ಮಿಸಿದ್ದಾರೆ. ರಜತ್ ರಾವ್ ಸಂಗೀತ ನೀಡಿದ್ದಾರೆ.
