Puneeth Rajkumar: ಜೊತೆಗಿರದ ಜೀವ ಎಂದಿಗೂ ಜೀವಂತ, ಅಪರೂಪ ಸಿನಿಮಾಗೆ ಪುನೀತ್‌ ಹಾಡಿರುವ ಕೊನೆಯ ಹಾಡು ರಿಲೀಸ್; ಭಾವುಕರಾದ ಅಭಿಮಾನಿಗಳು
'ಅಪರೂಪ' ಚಿತ್ರಕ್ಕೆ ಪುನೀತ್‌ ರಾಜ್‌ಕುಮಾರ್‌ ಹಾಡಿರುವ ಯು ಆರ್‌ ಮೈ ಕರೀನಾ.. ಎಂಬ ಹಾಡು ಕೇಳುಗರ ಗಮನ ಸೆಳೆದಿದೆ. ಇದು ಅಪ್ಪು ಹಾಡಿರುವ ಕೊನೆಯ ಹಾಡಾಗಿದೆ. ಈ ಹಾಡಿಗೆ ಪ್ರಜ್ವಲ್‌ ಪೈ ಸಂಗೀತ ಇದ್ದು ವಿ ನಾಗೇಂದ್ರ ಪ್ರಸಾದ್‌ ಸಂಗೀತ ಬರೆದಿದ್ದಾರೆ.
ಪುನೀತ್‌ ರಾಜ್‌ಕುಮಾರ್‌ ಹೆಸರು ಕೇಳಿದರೇನೇ ಅಭಿಮಾನಿಗಳ ಮೈ ಪುಳಕಗೊಳ್ಳುತ್ತದೆ. ಹಾಗೇ ಅಪ್ಪು ಇಂದು ನಮ್ಮೊಂದಿಗೆ ಇಲ್ಲ ಎಂಬ ನೋವು ಕಾಡುತ್ತದೆ. ಪುನೀತ್‌ ನಮ್ಮೊಂದಿಗೆ ದೈಹಿಕವಾಗಿ ಇಲ್ಲದಿದ್ದರೂ ಅಭಿಮಾನಿಗಳ ಹೃದಯದಲ್ಲಿ ಅವರ ಸಿನಿಮಾಗಳ ಮೂಲಕ, ಡ್ಯಾನ್ಸ್‌, ಹಾಡುಗಳ ಮೂಲಕ ಎಂದೆಂದಿಗೂ ರಾರಾಜಿಸುತ್ತಿದ್ದಾರೆ.
ಅಪ್ಪು ದನಿಯಲ್ಲಿ ಟಪಾಂಗುಚ್ಚಿ ಹಾಡು
ಪುನೀತ್‌ ನಿಧನರಾದ ನಂತರ ಅವರು ಅಭಿನಯಿಸಿರುವ 'ಲಕ್ಕಿಮ್ಯಾನ್‌' ಹಾಗೂ 'ಜೇಮ್ಸ್‌' ಸಿನಿಮಾ ತೆರೆ ಕಂಡಿತ್ತು. ಈ ಚಿತ್ರಗಳನ್ನು ನೋಡಿ ಅಭಿಮಾನಿಗಳು ಕಂಬನಿ ಮಿಡಿದಿದ್ದರು. ಇನ್ಮುಂದೆ ನಮ್ಮ ಅಪ್ಪುವಿನ ಹೊಸ ಸಿನಿಮಾಗಳನ್ನು, ಅವರ ಹಾಡುಗಳನ್ನು ಕೇಳಲಾಗುವುದಿಲ್ಲ ಎಂದು ಬೇಸರ ಹೊರಹಾಕಿದ್ದರು. 'ಅಪರೂಪ' ಎಂಬ ಸಿನಿಮಾಗೆ ಅಪ್ಪು ಹಾಡಿರುವ ಹಾಡೊಂದನ್ನು ಚಿತ್ರತಂಡ ಇತ್ತೀಚೆಗೆ ರಿಲೀಸ್ ಮಾಡಿದ್ದು ಈ ಟಪಾಂಗುಚ್ಚಿ ಹಾಡು ಯೂಟ್ಯೂಬ್‌ನಲ್ಲಿ ಸದ್ದು ಮಾಡುತ್ತಿದೆ.
ಇದನ್ನೂ ಓದಿ: ಸುದೀಪ್‌ ವೃತ್ತಿ ಜೀವನದಲ್ಲಿ ಬಹಳ ಮುಖ್ಯವಾದ ಘಟ್ಟ; ಹುಚ್ಚ ಚಿತ್ರಕ್ಕೆ 22 ವರ್ಷಗಳು, ತೆಲುಗಿನ ಈಗ ಸಿನಿಮಾಗೆ 11 ವರ್ಷಗಳ ಸಂಭ್ರಮ
'ಅಪರೂಪ' ಚಿತ್ರಕ್ಕೆ ಪುನೀತ್‌ ರಾಜ್‌ಕುಮಾರ್‌ ಹಾಡಿರುವ ಯು ಆರ್‌ ಮೈ ಕರೀನಾ ಎಂಬ ಹಾಡು ಕೇಳುಗರ ಗಮನ ಸೆಳೆದಿದೆ. ಇದು ಅಪ್ಪು ಹಾಡಿರುವ ಕೊನೆಯ ಹಾಡಾಗಿದೆ. ಈ ಹಾಡಿಗೆ ಪ್ರಜ್ವಲ್‌ ಪೈ ಸಂಗೀತ ಇದ್ದು ವಿ ನಾಗೇಂದ್ರ ಪ್ರಸಾದ್‌ ಸಂಗೀತ ಬರೆದಿದ್ದಾರೆ. ಪುನೀತ್‌ ಜೊತೆಗೆ ಸಂಗೀತ ರವೀಂದ್ರನಾಥ್‌ ಕೂಡಾ ದನಿಗೂಡಿಸಿದ್ದಾರೆ. ಅಪ್ಪು ಹಾಡಿರುವ ಈ ಸಿನಿಮಾ ಯಶಸ್ಸು ಗಳಿಸಲಿ ಎಂದು ಅಭಿಮಾನಿಗಳು ಹಾರೈಸುತ್ತಿದ್ದಾರೆ.
ಮಹೇಶ್‌ ಕುಮಾರ್‌ ನಿರ್ದೇಶನದ ಅಪರೂಪ
'ಅಪರೂಪ' ಚಿತ್ರಕ್ಕೆ ಅಜಿತ್‌ ಅತಿರಥ ಸಿನಿಮಾಗಳ ನಿರ್ದೇಶಕ ಮಹೇಶ್‌ ಕುಮಾರ್‌ ಆಕ್ಷನ್ ಕಟ್‌ ಹೇಳುತ್ತಿದ್ದಾರೆ. ಸುಗ್ಗಿ ಸಿನಿಮಾಸ್‌ ಈ ಚಿತ್ರವನ್ನು ನಿರ್ಮಾಣ ಮಾಡಿದೆ. ಈ ಲವ್‌ ಸ್ಟೋರಿ ಚಿತ್ರದಲ್ಲಿ ಮಂಡ್ಯದ ಸುಘೋಷ್‌ ನಾಯಕರಾಗಿ ನಟಿಸಿದ್ದಾರೆ. ಇದಕ್ಕೂ ಮುನ್ನ ಸುಘೋಷ್‌ ಅತಿರಥ ಚಿತ್ರದಲ್ಲಿ ನಾಯಕರಾಗಿ ನಟಿಸಿದ್ದರು. ಚಿತ್ರದಲ್ಲಿ ನಾಯಕಿಯಾಗಿ ಹೃತಿಕಾ ನಟಿಸಿದ್ದಾರೆ. ಇವರು ಖ್ಯಾತ ನಟಿ ಆಮನಿ ಅವರ ಸೊಸೆ ಎನ್ನುವುದು ವಿಶೇಷ. ಅಪರೂಪ ಸಿನಿಮಾದಲ್ಲಿ ಅವಿನಾಶ್‌, ಅರುಣಾ ಬಾಲರಾಜ್‌, ಕುರಿ ಪ್ರತಾಪ್‌, ವಿಜಯ್‌ ಚೆಂಡೂರ್‌, ಕಡ್ಡಿಪುಡಿ ಚಂದ್ರು ಹಾಗೂ ಇನ್ನಿತರರು ನಟಿಸಿದ್ದಾರೆ. ಚಿತ್ರವನ್ನು ಕೆಆರ್‌ಜಿ ಸ್ಟುಡಿಯೋಸ್‌ ವಿತರಣೆ ಮಾಡುತ್ತಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳನ್ನು ಓದಲು ಈ ಲಿಂಕ್‌ ಕ್ಲಿಕ್‌ ಮಾಡಿ
