Sandalwood News: ಅಘೋರಿ ಪಾತ್ರದಲ್ಲಿ ನಟಿಸಿದ ರಾಧಿಕಾ ಕುಮಾರಸ್ವಾಮಿ; ಭೈರಾದೇವಿ ಸಿನಿಮಾದ ಟೀಸರ್ ನೋಡಿ
Radhika Kumaraswamy Films: ಕನ್ನಡ ನಟಿ ರಾಧಿಕಾ ಕುಮಾರಸ್ವಾಮಿ ಅವರು ನಟಿಸಿದ ಭೈರಾದೇವಿ ಸಿನಿಮಾ ಸದ್ಯದಲ್ಲಿಯೇ ಬಿಡುಗಡೆಯಾಗಲಿದೆ. ಈ ಚಿತ್ರದಲ್ಲಿ ರಾಧಿಕಾ ಕುಮಾರಸ್ವಾಮಿ ಅವರು ಅಘೋರಿ ಪಾತ್ರದಲ್ಲಿ ನಟಿಸಿದ್ದಾರೆ. ಭೈರಾದೇವಿ ಚಿತ್ರದ ಟೀಸರ್ ಹೇಗಿದೆ ನೋಡೋಣ ಬನ್ನಿ.
ಬೆಂಗಳೂರು: ಸ್ಯಾಂಡಲ್ವುಡ್ ನಟಿ ರಾಧಿಕಾ ಕುಮಾರಸ್ವಾಮಿಯವರನ್ನು ಸದ್ಯದಲ್ಲಿಯೇ ತೆರೆಯ ಮೇಲೆ ಅಘೋರಿ ಪಾತ್ರದಲ್ಲಿ ನೋಡಬಹುದು. ಹೌದು, ಭೈರಾದೇವಿ ಎಂಬ ಸಿನಿಮಾ ಬಿಡುಗಡೆಗೆ ಸಿದ್ಧವಾಗಿದ್ದು, ಈ ಚಿತ್ರದಲ್ಲಿ ರಾಧಿಕಾ ಕುಮಾರಸ್ವಾಮಿ ಅವರು ಅಘೋರಿ ಪಾತ್ರದಲ್ಲಿ ನಟಿಸಿದ್ದಾರೆ. "ನನ್ನ ಎರಡು ದಶಕದ ಸಿನಿಮಾ ವೃತ್ತಿ ಬದುಕಿನಲ್ಲಿ ಭೈರಾದೇವಿ ವಿಭಿನ್ನವಾಗಿದೆ. ಈ ಚಿತ್ರದಲ್ಲಿ ನಾನು ಇದೇ ಮೊದಲ ಬಾರಿಗೆ ಅಘೋರಿ ಪಾತ್ರದಲ್ಲಿ ನಟಿಸಿದ್ದೇನೆ. ನಾನು ಸ್ಮಶಾನವೆಂದರೆ ಭಯಪಡುವವಳು. ಆದರೆ, ಈ ಚಿತ್ರಕ್ಕಾಗಿ ಸ್ಮಶಾನದಲ್ಲಿಯೇ ಇದ್ದೆ. ಈ ಚಿತ್ರದ ಬಹುಭಾಗ ಚಿತ್ರೀಕರಣ ಸ್ಮಶಾನದಲ್ಲಿಯೇ ನಡೆದಿದೆ. ಶ್ರೀಜೈ ನಿರ್ದೇಶನದಲ್ಲಿ ಭೈರಾದೇವಿ ಚಿತ್ರ ತುಂಬಾ ಚೆನ್ನಾಗಿ ಮೂಡಿಬಂದಿದೆ" ಎಂದು ರಾಧಿಕಾ ಕುಮಾರಸ್ವಾಮಿ ಹೇಳಿದ್ದಾರೆ.
ಇದನ್ನೂ ಓದಿ: ಭೈರಾದೇವಿ ಟೀಸರ್, ಅಜಾಗ್ರತ ಚಿತ್ರದ ಪೋಸ್ಟರ್ ಬಿಡುಗಡೆ
ರಾಧಿಕಾ ಕುಮಾರಸ್ವಾಮಿ ಅವರು ತನ್ನ ಹುಟ್ಟುಹಬ್ಬದಂದು ಎರಡು ಸಿನಿಮಾಗಳ ಕುರಿತು ಅಪ್‌ಡೇಟ್‌ ನೀಡಿದ್ದಾರೆ. ಇದೇ ಸಂದರ್ಭದಲ್ಲಿ ಭೈರಾದೇವಿ ಸಿನಿಮಾದ ಟೀಸರ್ ಬಿಡುಗಡೆ ಮಾಡಲಾಗಿದೆ. ರಾಧಿಕಾ ಕುಮಾರಸ್ವಾಮಿ ನಟನೆಯ ಅಜಾಗ್ರತ ಎಂಬ ಚಿತ್ರವೂ ತೆರೆ ಕಾಣಲಿದ್ದು, ಆ ಸಿನಿಮಾದ ಪೋಸ್ಟರ್ ಬಿಡುಗಡೆ ಮಾಡಲಾಗಿದೆ. ಈ ಎರಡೂ ಸಿನಿಮಾಗಳನ್ನು ಶಮಿಕಾ ಎಂಟರ್‌ಪ್ರೈಸಸ್‌ ಮೂಲಕ ನಿರ್ಮಾಣ ಮಾಡಲಾಗುತ್ತಿದೆ ಎಂದು ರಾಧಿಕಾ ಕುಮಾರಸ್ವಾಮಿ ಮಾಹಿತಿ ನೀಡಿದ್ದಾರೆ.
ಭೈರಾದೇವಿ ಟೀಸರ್‌ನಲ್ಲಿ ಏನಿದೆ?
ಈ ಟೀಸರ್‌ನಲ್ಲಿ ರಾಧಿಕಾ ಕುಮಾರಸ್ವಾಮಿ ಅವರ ಅಘೋರಿ ಪಾತ್ರದ ಚಿತ್ರಣವಿದೆ. ಅಘೋರಿ ಮುಖವಾಡ ಧರಿಸಿರುವ ರಾಧಿಕಾ ಕುಮಾರಸ್ವಾಮಿ ಅವರು ಮುಖವಾಡ ತೆರೆದು ತನ್ನ ಮುಖ ತೋರಿಸುವ ದೃಶ್ಯವಿದೆ. ಇದೇ ಸಮಯದಲ್ಲಿ ಈ ಚಿತ್ರಕ್ಕೆ ರವಿಶಂಕರ್‌ ಅವರು ಓಂ ಶಿವಾಯ, ನಮಃ ಶಿವಾಯ ಹಿನ್ನೆಲೆ ಧ್ವನಿ ನೀಡುತ್ತಿರುವ ಚಿತ್ರಣವಿದೆ. ಈ ಹಿಂದೆಯೇ ಭೈರಾದೇವಿ ಚಿತ್ರದ ಮೋಷನ್‌ ಪೋಸ್ಟರ್ ಬಿಡುಗಡೆಯಾಗಿದೆ. ಈ ಚಿತ್ರದಲ್ಲಿ ನಾಯಕ ರಮೇಶ್‌ ಅರವಿಂದ್‌ ಅವರು ಪೊಲೀಸ್‌ ಅಧಿಕಾರಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಒಂದು ಹಳೆಯ ಬಂಗಲೆ, ಅದರೊಳಗೆ ಹಾರರ್‌ ಅಂಶಗಳು ಇತ್ಯಾದಿಗಳನ್ನು ಮೋಷನ್‌ ಪೋಸ್ಟರ್‌ನಲ್ಲಿ ತೋರಿಸಲಾಗಿತ್ತು. ಮೋಷನ್‌ ಪೋಸ್ಟರ್‌ನಲ್ಲಿ ರಮೇಶ್‌ ಅರವಿಂದ್‌ರನ್ನು ತೋರಿಸಿದರೆ, ಇದೀಗ ಟೀಸರ್‌ನಲ್ಲಿ ರಾಧಿಕಾ ಕುಮಾರಸ್ವಾಮಿ ಪಾತ್ರವನ್ನು ಬಹಿರಂಗಪಡಿಸಲಾಗಿದೆ.
ಬಹುಭಾಷೆಗಳಲ್ಲಿ ಬಿಡುಗಡೆ
ಕನ್ನಡ ಮಾತ್ರವಲ್ಲದೆ ತೆಲುಗು ಮತ್ತು ತಮಿಳು ಭಾಷೆಗಳಲ್ಲಿಯೂ ಭೈರಾದೇವಿ ಚಿತ್ರ ಬಿಡುಗಡೆಯಾಗಲಿದೆ. ಈ ಮೂರು ಭಾಷೆಗೂ ಪ್ರತ್ಯೇಕವಾಗಿ ಶೂಟಿಂಗ್‌ ಮಾಡಲಾಗಿದೆ. ಹೆಚ್ಚಾಗಿ ಮಹಿಳಾ ಅಘೋರಿಗಳು ಕಾಣಸಿಗುವುದು ಅಪರೂಪ. ಮಹಿಳಾ ಅಘೋರಿಗಳ ಕುರಿತು ತಿಳಿದುಕೊಂಡು ಈ ಚಿತ್ರ ನಿರ್ಮಾಣ ಮಾಡಿದ್ದೇನೆ ಎಂದು ನಿರ್ದೇಶಕ ಶ್ರೀಜೈ ಹೇಳಿದ್ದಾರೆ.
ಇದೇ ರೀತಿ ಅಜಾಗ್ರತ ಚಿತ್ರವು ಬಹುಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ. ಅಜಾಗ್ರತ ಶೂಟಿಂಗ್‌ ಅಂತಿಮ ಹಂತದಲ್ಲಿದೆ. ಈ ಚಿತ್ರದಲ್ಲಿ ಸೈಕಲಾಜಿಕಲ್‌ ಕ್ರಮ್‌ ಥ್ರಿಲ್ಲರ್‌ ಕಥೆಯಿರಲಿದೆ ಎಂದು ಚಿತ್ರತಂಡ ಮಾಹಿತಿ ಹಂಚಿಕೊಂಡಿದೆ.
