‘ಖುಷಿ’ಯ ಅಲೆಯ ನಡುವೆ ರಕ್ಷಿತ್‌ ಶೆಟ್ಟಿಯ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದ ಖಜಾನೆಗೆ ಬಂದ ಹಣವೆಷ್ಟು?

SSE Day 2 box office: ರಕ್ಷಿತ್‌ ಶೆಟ್ಟಿ ಮತ್ತು ನಿರ್ದೇಶಕ ಹೇಮಂತ್‌ ಎಂ ರಾವ್‌ ಕಾಂಬಿನೇಷನ್‌ನ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾ ಮೊನ್ನೆ (ಸೆ. 1) ಶುಕ್ರವಾರವಷ್ಟೇ ಬಿಡುಗಡೆಯಾಗಿದೆ. ಚಿತ್ರಕ್ಕೆ ಎಲ್ಲೆಡೆಯಿಂದ ಪಾಸಿಟಿವ್‌ ರೆಸ್ಪಾನ್ಸ್‌ ಸಿಗುತ್ತಿದೆ. ದಿನದಿಂದ ದಿನಕ್ಕೆ ವೀಕ್ಷಕರ ಜತೆಗೆ ಸ್ಕ್ರೀನ್‌ಗಳ ಸಂಖ್ಯೆಯನ್ನೂ ಹೆಚ್ಚಿಸಿಕೊಳ್ಳುತ್ತಿದೆ ಈ ಸಿನಿಮಾ. ಆರಂಭದಿಂದಲೂ ನಿರೀಕ್ಷೆ ಮೂಡಿಸುತ್ತಲೇ ಬಂದಿದ್ದ ಈ ಸಿನಿಮಾ ಬಿಡುಗಡೆ ಬಳಿಕವೂ ಆ ನಿರೀಕ್ಷೆಯನ್ನು ಉಳಿಸಿಕೊಂಡಿದೆ. ಕಲೆಕ್ಷನ್‌ ವಿಚಾರದಲ್ಲಿಯೂ ಮುಂದಡಿಯನ್ನೇ ಇರಿಸಿದೆ ಈ ಸಿನಿಮಾ.

ಗೋಧಿ ಬಣ್ಣ ಸಾಧಾರಣ ಮೈಕಟ್ಟು ಸಿನಿಮಾದ ಬಳಿಕ ಅಂದರೆ ಸುದೀರ್ಘ 7 ವರ್ಷಗಳ ಬಳಿಕ ಈ ಜೋಡಿ ಪ್ರೇಮ ಕಥೆಯ ಮೂಲಕ ಆಗಮಿಸಿದೆ. ಆಫ್‌ಬೀಟ್‌ ಸಿನಿಮಾವಾದರೂ ನೋಡುಗರಿಂದ ಮೆಚ್ಚುಗೆಯನ್ನು ಪಡೆದು, ಬಾಕ್ಸ್‌ ಆಫೀಸ್‌ನಲ್ಲಿಯೂ ಒಳ್ಳೆಯ ಕಮಾಯಿಯನ್ನೇ ಮಾಡುತ್ತಿದೆ. ಹಾಗಾದರೆ ಈ ವರೆಗೂ ರಕ್ಷಿತ್‌ ಶೆಟ್ಟಿಯ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾ ಗಳಿಸಿದ್ದು ಎಷ್ಟು? ಇಲ್ಲಿದೆ ಉತ್ತರ.

ಕಲೆಕ್ಷನ್‌ ಎಷ್ಟು?

ಈ ವಾರ ಸಿನಿಮಾಗಳ ವಿಚಾರದಲ್ಲಿ ಹೆಚ್ಚು ಪೈಪೋಟಿ ಇರಲಿಲ್ಲ. ವಿಜಯ್‌ ದೇವರಕೊಂಡ ಮತ್ತು ಸಮಂತಾ ನಟನೆಯ ಖುಷಿ ಸಿನಿಮಾ ಕನ್ನಡಕ್ಕೂ ಡಬ್‌ ಆಗಿ ಬಿಡುಗಡೆಯಾದರೂ, ಬಾಕ್ಸ್‌ ಆಫೀಸ್‌ನಲ್ಲಿ ಅದಕ್ಕೆ ಪ್ರತಿಸ್ಪರ್ಧಿಯಾಗಿ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾ ತೆರೆಕಂಡಿದೆ.. ಮೊದಲ ದಿನದ ಮೊದಲ ಶೋದಿಂದಲೇ ಪಾಸಿಟಿವ್‌ ರೆಸ್ಪಾನ್ಸ್‌ ಪಡೆದುಕೊಂಡ ಹಿನ್ನೆಲೆಯಲ್ಲಿ ಗಳಿಕೆ ವಿಚಾರದಲ್ಲೂ ಮುಂದೆ ಸಾಗುತ್ತಿದೆ ರಕ್ಷಿತ್‌ ಸಿನಿಮಾ. ಮೊದಲ ಎರಡು ದಿನಗಳ ಕೆಲೆಕ್ಷನ್‌ ಲೆಕ್ಕ ಹಾಕಿದರೆ, 6ರಿಂದ 7 ಕೋಟಿ ಗಳಿಕೆ ಕಂಡಿದೆ ಎಂದು ಬಾಕ್ಸ್‌ ಆಫೀಸ್‌ ಪಂಡಿತರು ಹೇಳುತ್ತಿದ್ದಾರೆ.

ಭಾನುವಾರ ಮತ್ತಷ್ಟು ಅಧಿಕ

ಇನ್ನು ಭಾನುವಾರದ ಕಲೆಕ್ಷನ್‌ ಲೆಕ್ಕಾಚಾರ ಮೊದಲ ಎರಡು ದಿನಗಳಿಂತ ಜಾಸ್ತಿಯೇ ಇರುತ್ತದೆ. ವೀಕೆಂಡ್‌ ಆಗಿರುವುದರಿಂದ ಭಾನುವಾರ ಒಂದೇ ದಿನ 5 ಕೋಟಿ ಕಲೆಕ್ಷನ್‌ ಆಗುವ ಸಾಧ್ಯತೆ ಇದೆ. ಕರ್ನಾಟಕದಲ್ಲಿ ಚಿತ್ರಕ್ಕೆ ಒಳ್ಳೆಯ ರೆಸ್ಪಾನ್ಸ್‌ ಸಿಗುತ್ತಿರುವುದು ಒಂದೆಡೆಯಾದರೆ, ಸೋಷಿಯಲ್‌ ಮೀಡಿಯಾದಲ್ಲಿ ಈ ಸಿನಿಮಾ ಪಾಸಿಟಿಕ್‌ ಟಾಕ್‌ ಪಡೆದುಕೊಂಡಿದ್ದೇ ಹೆಚ್ಚು. ಈ ಮೂಲಕ ವಾರಾಂತ್ಯದಷ್ಟೊತ್ತಿಗೆ 14 ಕೋಟಿ ಸನಿಹಕ್ಕೆ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾ ಬಂದು ನಿಲ್ಲಲಿದೆ ಎಂದು ಊಹಿಸಲಾಗಿದೆ.

ಮನರಂಜನೆ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್‌ ಮಾಡಿ