ಅದಾ.. ಇದಾ.. ಮತ್ಯಾವುದು? ಘೋಸ್ಟ್‌ ಚಿತ್ರದ ಬಗ್ಗೆ ಶಿವಣ್ಣನಿಗೇ ಗಲಿಬಿಲಿ ಮಾಡಿದ ನಿರ್ದೇಶಕರು
ಘೋಸ್ಟ್‌ ಸಿನಿಮಾ ಬಿಡುಗಡೆಗೆ ಹತ್ತಿರ ಬಂದಂತೆ ಹೊಸ ಹೊಸ ಅಪ್‌ಡೇಟ್‌ಗಳನ್ನು ನೀಡಲು ತುದಿಗಾಲ ಮೇಲೆ ನಿಂತಿದೆ. ಇದೀಗ ಸೆ. 22ರಂದು ಇದೇ ಚಿತ್ರದಿಂದ ಹೊಸ ಕಂಟೆಂಟ್‌ ಸಿಗಲಿದೆ.
Ghost: ಸ್ಯಾಂಡಲ್ವುಡ್ ಸೆಂಚುರಿ ಸ್ಟಾರ್‌ ಶಿವರಾಜ್‌ಕುಮಾರ್‌ ನಾಯಕನಾಗಿ ನಟಿಸಿರುವ ಘೋಸ್ಟ್‌ ಸಿನಿಮಾ ಸದ್ಯ ಪ್ರಚಾರದ ಕೆಲಸದಲ್ಲಿ ತೊಡಗಿಸಿಕೊಂಡಿದೆ. ಶಿವಣ್ಣನ ಬರ್ತ್‌ಡೇಗೆ ಬಿಗ್‌ ಡ್ಯಾಡಿ ಪ್ರೋಮೋ ಬಿಟ್ಟಿದ್ದ ಘೋಸ್ಟ್‌ ಸಿನಿಮಾ ತಂಡ ಇದೀಗ, ಮತ್ತೊಂದು ಕಂಟೆಂಟ್‌ ಹಿಡಿದು ಸಿನಿಮಾ ಪ್ರೇಮಿಗಳ ಮುಂದೆ ಬರಲು ಪ್ಲಾನ್‌ ಹಾಕಿದೆ. ಈ ವರೆಗೂ ಪ್ರಮೋಷನ್‌ ಕೆಲಸವನ್ನು ಕೊಂಚ ಭಿನ್ನವಾಗಿಯೇ ಮಾಡುತ್ತಿರುವ ನಿರ್ದೇಶಕ ಶ್ರೀನಿ, ಇದೀಗ ಶಿವಣ್ಣನಿಗೇ ಗೊಂದಲವನ್ನುಂಟು ಮಾಡಿದ್ದಾರೆ.
ಘೋಸ್ಟ್‌ ಸಿನಿಮಾ ಅಕ್ಟೋಬರ್‌ 19ರಂದು ವಿಶ್ವದಾದ್ಯಂತ ಬಿಡುಗಡೆ ಆಗಲಿದೆ. ರಿಲೀಸ್‌ ದಿನಾಂಕ ಘೋಷಣೆ ಆದ ಬಳಿಕ ಒಂದಿಲ್ಲೊಂದು ಕಾರಣಕ್ಕೆ ಸುದ್ದಿಯಲ್ಲಿರುವ ಈ ಸಿನಿಮಾ, ಕನ್ನಡದ ಜತೆಗೆ ತೆಲುಗು, ತಮಿಳು, ಮಲಯಾಳಂ, ಹಿಂದಿ ಭಾಷೆಯಲ್ಲಿಯೂ ಬಿಡುಗಡೆ ಆಗಲಿದೆ. ಈಗಾಗಲೇ ಚಿತ್ರದ ಶೂಟಿಂಗ್‌ ಕೆಲಸಗಳನ್ನು ಮುಗಿಸಿಕೊಂಡಿರುವ ಘೋಸ್ಟ್‌, ಈಗ ಅಭಿಮಾನಿಗಳಿಗೆ ಮತ್ತೊಂದು ಉಡುಗೊರೆ ನೀಡಲು ಮುಂದಾಗಿದೆ.
ಗೊಂದಲದಲ್ಲಿ ಶಿವಣ್ಣ!
ನಿರ್ದೇಶಕ ಎಂ.ಜಿ ಶ್ರೀನಿವಾಸ್ ಚಿತ್ರ ಘೋಷಣೆ ಆದ ದಿನದಿಂದಲೂ ಹೊಸ ರೀತಿಯಲ್ಲಿಯೇ ಸಿನಿಮಾವನ್ನು ನೋಡುಗರಿಗೆ ಪ್ರಸೆಂಟ್‌ ಮಾಡುತ್ತಿದ್ದಾರೆ. ಮೇಕಿಂಗ್‌, ಮ್ಯೂಸಿಕ್‌.. ಹೀಗೆ ಹಲವು ವಿಚಾರಗಳಿಗೆ ಸಂಬಂಧಿಸಿದಂತೆ ಸಿನಿಮಾ ಕುತೂಹಲ ಸೃಷ್ಟಿಸುತ್ತಿದೆ. ಇದೀಗ ಸಿನಿಮಾ ರಿಲೀಸ್‌ ಹತ್ತಿರ ಬಂದಂತೆ ಮತ್ತಷ್ಟು ಕಂಟೆಂಟ್‌ಗಳನ್ನು ಜನರ ಮಡಿಲಿಗೆ ಹಾಕಲು ನಿರ್ಧರಿಸಿದೆ. ಅದರಂತೆ ಹಾಡು ಬಿಡುವುದಾ, ಬಿಜಿಎಂ ಬಿಡುವುದಾ ಎಂಬ ಕನ್‌ಫ್ಯೂಷನ್‌ನಲ್ಲಿದೆ. ಸ್ವತಃ ಶಿವಣ್ಣನಿಗೂ ಇದು ಗೊಂದಲಕ್ಕೀಡು ಮಾಡಿದೆ.
ಚೆನ್ನೈನಲ್ಲಿ ಒಜಿಎಂ ರಿಲೀಸ್‌
ಗಣೇಶ ಚೌತಿಗೆ ಘೋಸ್ಟ್‌ ಅಪ್‌ಡೇಟ್‌ ನೀಡಲು ಕಿರು ವಿಡಿಯೋ ಪೋಸ್ಟ್‌ ಮಾಡಿದೆ ಚಿತ್ರತಂಡ. ಹಾಡೂ ಅಲ್ಲ ಬಿಜಿಎಂ ಸಹ ಅಲ್ಲ.. ಇವೆರಡರ ಬದಲು ಒಜಿಎಂ ಬಿಡುಗಡೆ ಮಾಡಲು ಚಿತ್ರತಂಡ ಪ್ಲಾನ್‌ ಹಾಕಿದೆ. ವಿಶೇಷ ಏನೆಂದರೆ, ನಾಡಿದ್ದು ಅಂದರೆ ಸೆ. 22ರಂದು ಬೆಳಗ್ಗೆ 11 ಗಂಟೆಗೆ ಚೆನ್ನೈನ ಲೊಯಲಾ ಕಾಲೇಜಿನಲ್ಲಿ ಒಜಿಎಂ ಬಿಡುಗಡೆ ಆಗಲಿದೆ. ಈ ಒಜಿಎಂ ಹಾಡೋ ಅಥವಾ ಬಿಜಿಎಂ.. ಏನಿರಲಿದೆ ಎಂಬುದು ಅದು ಬಿಡುಗಡೆ ಆದ ಮೇಲಷ್ಟೇ ಗೊತ್ತಾಗಬೇಕಿದೆ.
ಈವರೆಗೂ ಘೋಸ್ಟ್‌ ಸಿನಿಮಾ ಇದೊಂದು ಗ್ಯಾಂಗ್‌ಸ್ಟರ್‌ ಚಿತ್ರ ಎಂದು ಬಹುತೇಕರ ಭಾವಿಸಿದ್ದರು. ಶಿವಣ್ಣನ ಲುಕ್‌, ಮಾಸ್‌ ಗೆಟಪ್‌ ನೋಡಿ ಭೂಗತ ಲೋಕದ ಸಿನಿಮಾ ಎನ್ನಲಾಗಿತ್ತು. ಆದರೆ, ಈ ಸಿನಿಮಾದಲ್ಲಿ ಕೆಲ ಭಾಗ ಅಷ್ಟೇ ಇದೆ. ಇನ್ನುಳಿದಂತೆ ಇದೊಂದು ಬೇರೆಯದ್ದೇ ಸಿನಿಮಾ ಎಂದು ಇತ್ತೀಚೆಗಷ್ಟೇ ಸ್ವಹಃ ಶಿವರಾಜ್‌ಕುಮಾರ್‌ ಹೇಳಿಕೊಂಡಿದ್ದರು. ಹಾಗಾದರೆ ಯಾವ ಥರದ ಸಿನಿಮಾ ಇದು ಎಂದು ಮತ್ತೆ ತಲೆಗೆ ಹುಳ ಬಿಟ್ಟಿದ್ದರು ಶಿವಣ್ಣ.
ಸಂದೇಶ ಪ್ರೊಡಕ್ಷನ್ಸ್‌ ಬ್ಯಾನರ್‌ನಲ್ಲಿ ನಿರ್ಮಾಣವಾಗಿರುವ ಈ ಸಿನಿಮಾದಲ್ಲಿ ಶಿವರಾಜಕುಮಾರ್, ಅನುಪಮ್ ಖೇರ್, ಜಯರಾಂ, ಸತ್ಯಪ್ರಕಾಶ್, ಪ್ರಶಾಂತ್ ನಾರಾಯಣನ್, ದತ್ತಣ್ಣ, ಅಭಿಜಿತ್ ಸೇರಿ ಸ್ಟಾರ್‌ ತಾರಾಬಳಗವೇ ಇದೆ. ಅರ್ಜುನ್‌ ಜನ್ಯ ಸಂಗೀತ, ಮಹೇನ್‌ ಸಿಂಹ ಛಾಯಾಗ್ರಹಣ ಈ ಚಿತ್ರಕ್ಕಿದೆ.
ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ
