ಅರೇ ಬಾಪ್‌ ರೇ.. ಉಪೇಂದ್ರ UI ಟೀಸರ್ ನೋಡಿ ಹುಬ್ಬೇರಿಸಿದ ಪಾಕಿಸ್ತಾನಿ ಯೂಟ್ಯೂಬರ್ಸ್‌
ಉಪೇಂದ್ರ ನಟನೆ ಮತ್ತು ನಿರ್ದೇಶನದ UI ಚಿತ್ರದ ಮೊದಲ ಟೀಸರ್ ಬಿಡುಗಡೆ ಆಗಿದ್ದು, ಕುತೂಹಲ ಮೂಡಿಸುತ್ತಿದೆ. ಕತ್ತಲಿನಲ್ಲಿಯೇ ಕೇವಲ ಧ್ವನಿಯ ಮೂಲಕವೇ ಸಿನಿಮಾಭಿಮಾನಿಗಳ ತಲೆಗೆ ಹುಳ ಬಿಟ್ಟಿದ್ದಾರೆ. ಇದೇ ಟೀಸರ್ ನೋಡಿ ಪಾಕಿಸ್ತಾನಿ ಯೂಟ್ಯೂಬರ್ಸ್‌ ಸಹ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
UI Teaser reviews: ರಿಯಲ್‌ ಸ್ಟಾರ್ ಉಪೇಂದ್ರ ಮತ್ತೆ ಸಿನಿಮಾ ನಿರ್ದೇಶನಕ್ಕೆ ಇಳಿದಿದ್ದಾರೆ ಎಂದಾಗಲೇ ನಿರೀಕ್ಷೆ ದೊಡ್ಡ ಮಟ್ಟಕ್ಕೆ ಸದ್ದು ಮಾಡಿತ್ತು. ಅದಾದ ಮೇಲೆ ಆ ಸಿನಿಮಾ ಶೀರ್ಷಿಕೆ ವಿಚಾರವಾಗಿಯೂ ಕುತೂಹಲ ಸೃಷ್ಟಿಸಿತ್ತು. A ಚಿತ್ರದಲ್ಲಿನ ನಾನು, ಉಪೇಂದ್ರ ಸಿನಿಮಾದಲ್ಲಿ ನೀನು, ಇವರೆಡನ್ನೂ ಸೇರಿಸಿ UI ಸಿನಿಮಾ ಘೋಷಿಸಿದ್ದರು ಉಪ್ಪಿ. ಅಲ್ಲಿಂದ ಬೇರಾವುದೇ ಅಪ್‌ಡೇಟ್‌ ಮಾತ್ರ ಸಿಕ್ಕಿರಲಿಲ್ಲ. ಇದೀಗ ತಮ್ಮ ಜನ್ಮ ದಿನದ ಪ್ರಯುಕ್ತ UI ಚಿತ್ರದ ಟೀಸರ್ ಬಿಡುಗಡೆ ಮಾಡಿದ್ದಾರೆ ಉಪೇಂದ್ರ. ಈ ಮೂಲಕ ಪ್ರೇಕ್ಷಕನ ತಲೆಗೆ ಮತ್ತೆ ಹುಳ ಬಿಡುವ ಕಾಯಕವನ್ನು ಮುಂದುವರಿಸಿದ್ದಾರೆ.
ಟೀಸರ್‌ನಲ್ಲಿ ಒಂದೇ ಒಂದು ದೃಶ್ಯ ಕಾಣದಂತೆ, ಕತ್ತಲಿನಲ್ಲಿಯೇ ಕುದುರೆ ಓಡಿಸಿ, ಲಾಂಗು ಮಚ್ಚುಗಳ ಸದ್ದು ಕೇಳಿಸಿ, ಕಿರುಚಾಟದ ಧ್ವನಿಯನ್ನೂ ಕಿವಿಗೆ ತಾಕಿಸಿ.. ಏನಿರಬಹುದು? ಉಪೇಂದ್ರ ಈ ಸಿನಿಮಾ ಮೂಲಕ ಹೇಳಹೊರಟಿರುವುದೇನು? ಎಂಬ ಕುತೂಹಲಕ್ಕೆ ಒಗ್ಗರಣೆ ಹಾಕಿದ್ದಾರೆ ರಿಯಲ್‌ ಸ್ಟಾರ್. ಇಂಥದ್ದೇ ಕಥೆ ಹೇಳುತ್ತಿದ್ದಾರೆ ಎಂಬ ಸಣ್ಣ ಸುಳಿವನ್ನೂ ಬಿಡುಗಡೆಯಾದ ಟೀಸರ್‌ನಲ್ಲಿ ಬಿಟ್ಟುಕೊಟ್ಟಿಲ್ಲ ಉಪೇಂದ್ರ. ಹೀಗೆ ಬಿಡುಗಡೆ ಆಗಿರುವ ಟೀಸರ್‌ಗೆ ನೋಡುಗರಿಂದಲೂ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ವಿದೇಶಿಗರು ಟೀಸರ್ ನೋಡಿ ಅಚ್ಚರಿ ವ್ಯಕ್ತಡಿಸುತ್ತಿದ್ದಾರೆ.
ಯೂಟ್ಯೂಬ್‌ನಲ್ಲಿ ಟ್ರೇಲರ್‌ ರಿಲೀಸ್‌ ಆಗುತ್ತಿದ್ದಂತೆ, ಸಾಕಷ್ಟು ಮಂದಿ ಟ್ರೇಲರ್‌ಗೆ ಮೆಚ್ಚುಗೆ ಸೂಚಿಸಿದ್ದಾರೆ. ಇನ್ನು ಕೆಲವರು ಟ್ರೇಲರ್‌ಅನ್ನು ವಿಮರ್ಶೆ ಮಾಡಿದ್ದಾರೆ. ಆ ಪೈಕಿ ಪಾಕಿಸ್ತಾನಿಯರೂ UI ಸಿನಿಮಾದ ಟೀಸರ್ ಕಂಡು ಆಶ್ಚರ್ಯ ಹೊರಹಾಕಿದ್ದಾರೆ. "ಈ ಥರದ ಟೀಸರ್‌ಅನ್ನು ನಾವು ಈವರೆಗೂ ನೋಡಿಯೇ ಇಲ್ಲ. ನಿಜಕ್ಕೂ ಇದು ಸ್ಪೇಷಲ್‌ ಟೀಸರ್. ಕೇವಲ ಹಿನ್ನೆಲೆ ಧ್ವನಿ ಮೂಲಕವೇ ಕುತೂಹಲ ಕೆರಳಿಸಿದ್ದಾರೆ. ಕುದುರೆ ಓಡುವ ಶಬ್ದ, ತೊಟ್ಟಿಕ್ಕುವ ನೀರಿನ ಹನಿಗಳು, ಲಾಂಗು ಮಚ್ಚಿನ ಶಬ್ಧ, ಎಲ್ಲವೂ ಹೊಸತನದಿಂದ ಕೂಡಿದೆ. ಈ ಚಿತ್ರದ ಟ್ರೇಲರ್‌ ನೋಡಲು ನಾವು ಉತ್ಸುಕರಾಗಿದ್ದೇವೆ" ಎಂದು ತಮ್ಮ ಅನಿಸಿಕೆ ಹೇಳಿಕೊಂಡಿದ್ದಾರೆ ಮೆಂಟಲ್‌ ರಿಯಾಕ್ಷನ್ಸ್‌ ಯೂಟ್ಯೂಬ್‌ ಚಾನೆಲ್‌ನವರು.
ಪಾಕಿಸ್ತಾನಿಯರು UI ಚಿತ್ರದ ಟೀಸರ್ ರಿವ್ಯೂವ್‌ ನೀಡುತ್ತಿದ್ದಂತೆ, ಕೆಲವೊಂದಿಷ್ಟು ಮಂದಿ ಬಗೆಬಗೆ ರೀತಿಯಲ್ಲಿ ಕಾಮೆಂಟ್‌ ಹಾಕುತ್ತಿದ್ದಾರೆ. ಉಪ್ಪಿ ನಿರ್ದೇಶನದ ಸಿನಿಮಾಗಳನ್ನು ನೋಡಿ ಎಂದು ಕೆಲವರು ಹೇಳಿದರೆ, ಇನ್ನು ಕೆಲವರು ಉಪೇಂದ್ರ ಅವರ ಸಿನಿಮಾಗಳು ತುಂಬ ಯೂನಿಕ್‌ ಆಗಿರುತ್ತವೆ ಎಂಬುದನ್ನೂ ಕೇಳಿಕೊಂಡಿದ್ದಾರೆ. ಈ ನಡುವೆ ಇನ್ನು ಕೆಲವರು ಭಾರತೀಯ ಸಿನಿಮಾ ಹಿಸ್ಟರಿಯಲ್ಲಿ ಟಾಪ್‌ 50 ನಿರ್ದೇಶಕರ ಪೈಕಿ ಉಪೇಂದ್ರ ಸಹ ಒಬ್ಬರು ಎಂದೂ ಕಾಮೆಂಟ್‌ ಹಾಕಿದ್ದಾರೆ.
ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ
