ಆರ್‌ಆರ್‌ಆರ್‌ನಿಂದ ಸಪ್ತಸಾಗರದಾಚೆವರೆಗೆ: ಯಶ್‌ ಮುಂದಿನ ಸಿನಿಮಾ ಮಾಡಲಿರುವ ಪ್ರೊಡಕ್ಷನ್‌ ಹೌಸ್‌ನ 19 ಸಿನಿಮಾಗಳಿವು
Yash 19 by KVN Productions: ಕೆಜಿಎಫ್‌ ನಟ ಯಶ್‌ ಮುಂದಿನ ಸಿನಿಮಾದ ನೇತೃತ್ವವನ್ನು ಕೆವಿಎನ್‌ ಪ್ರೊಡಕ್ಷನ್‌ ಹೌಸ್‌ ವಹಿಸಲಿದೆ. ಸಖತ್‌, ಪೊಗರು, ಬೈಟು ಲವ್‌, ಆರ್‌ಆರ್‌ಆರ್‌, 777 ಚಾರ್ಲಿ, ಕೆಡಿ- ದಿ ಡೆವಿಲ್‌, ಮಾರ್ಟಿನ್‌ ಮುಂತಾದ ಸಿನಿಮಾಗಳ ಹಿಂದೆ ಇದೇ ಕೆವಿಎನ್‌ ಪ್ರೊಡಕ್ಷನ್‌ ಹೌಸ್‌ ಇತ್ತು.
ಬೆಂಗಳೂರು: ಕೆಜಿಎಫ್‌ ನಟ ಯಶ್‌ನ ಮುಂದಿನ ಸಿನಿಮಾದ ಟೈಟಲ್‌ ಘೋಷಣೆ ಇದೇ ಡಿಸೆಂಬರ್‌ 8ರಂದು ನಡೆಯಲಿದೆ. ಈ ಕುರಿತು ಯಶ್‌ ಅಧಿಕೃತವಾಗಿ ಪ್ರಕಟಿಸಿದ್ದಾರೆ. ಯಶ್‌ ಮುಂದಿನ ಸಿನಿಮಾದ ಕುರಿತು ಪ್ರೇಕ್ಷಕರಲ್ಲಿ ನಿರೀಕ್ಷೆ ಹೆಚ್ಚಾಗಿದೆ. ಇದೇ ಸಂದರ್ಭದಲ್ಲಿ ಯಶ್‌ ಮುಂದಿನ ಸಿನಿಮಾವು ಕೆವಿಎನ್‌ ಪ್ರೊಡಕ್ಷನ್‌ನಡಿಯಲ್ಲಿ ನಡೆಯಲಿದೆ ಎಂದು ಇನ್‌ಸ್ಟಾಗ್ರಾಂ ಪೋಸ್ಟ್‌ನಲ್ಲಿ ಯಶ್‌ ತಿಳಿಸಿದ್ದಾರೆ. ಇದೇ ಪ್ರೊಡಕ್ಷನ್‌ ಹೌಸ್‌ನಡಿಯಲ್ಲಿ ಇವರ ಸಿನಿಮಾ ಬಿಡುಗಡೆಯಾಗುವ ಸೂಚನೆ ಈ ಹಿಂದೆಯೇ ದೊರಕಿತ್ತು.
ಈ ಹಿಂದೆ ನಿರ್ಮಾಪಕ ವೆಂಕಟ್‌ ಕೋಣಂಕಿ ನಾರಾಯಣ್‌ ಜತೆ ಯಶ್‌ ತೆಗೆಸಿಕೊಂಡಿರುವ ಫೋಟೋ ಈ ಕುರಿತು ಸೂಚನೆ ನೀಡಿತ್ತು. ಯಶ್‌ ಮುಂದಿನ ಪ್ಯಾನ್‌ ಇಂಡಿಯಾ ಸಿನಿಮಾಕ್ಕೆ ಇದೇ ಸಂಸ್ಥೆ ಹಣ ಹೂಡುವ ಸೂಚನೆ ದೊರಕಿತ್ತು. ಇದೀಗ ಯಶ್‌ ಇದನ್ನು ಅಧಿಕೃತಗೊಳಿಸಿದ್ದಾರೆ. ಕೆವಿಎನ್‌ ಪ್ರೊಡಕ್ಷನ್‌ ಹೌಸ್‌ ಈ ಹಿಂದೆ ಯಾವೆಲ್ಲ ಸಿನಿಮಾಗಳನ್ನು ನಿರ್ಮಿಸಿತ್ತು? ಯಾವ ಸಿನಿಮಾ ವಿತರಣೆ ಮಾಡಿತ್ತು? ಯಾವುದಕ್ಕೆ ಫಂಡಿಂಗ್‌ ಹಾಕಿತ್ತು? ಯಾವ ಸಿನಿಮಾ ಭರ್ಜರಿ ಯಶಸ್ಸು ಕಂಡಿತ್ತು ಎಂಬೆಲ್ಲ ಪ್ರಶ್ನೆಗಳು ನಿಮ್ಮಲ್ಲಿರಬಹುದು. ಭಾರತದ ಇತ್ತೀಚಿನ ಪ್ರಮುಖ ಚಿತ್ರಗಳ ಹಿಂದೆ ಈ ಕೆವಿಎನ್‌ ಪ್ರೊಡಕ್ಷನ್‌ ಇದೆ. ಅಂದರೆ, ವಿವಿಧ ಸಿನಿಮಾಗಳ ಪ್ರೊಡಕ್ಷನ್‌, ಡಿಸ್ಟ್ರಿಬ್ಯೂಷನ್‌, ಫಂಡಿಂಗ್‌ ಇತ್ಯಾದಿಗಳಿಗೆ ಕೆವಿಎನ್‌ ಪ್ರೊಡಕ್ಷನ್‌ಹೌಸ್‌ ನೆರವಾಗಿದೆ.
ಕೆವಿಎನ್‌ ಪ್ರೊಡಕ್ಷನ್‌ನಿಂದ ಯಶ್‌ ಸಿನಿಮಾ ನಿರ್ಮಾಣ
ಇಲ್ಲಿಯವರೆಗೆ ಸಾಕಷ್ಟು ಸಿನಿಮಾಗಳ ವಿತರಣೆ, ಕೆಲವು ಸಿನಿಮಾಗಳ ಪ್ರೊಡಕ್ಷನ್‌, ಫಂಡಿಂಗ್‌ನಲ್ಲಿ ಕೆವಿಎನ್‌ ನಿರತವಾಗಿತ್ತು. ಇದೀಗ ಯಶ್‌ ನಟನೆಯ ನೂರಾರು ಕೋಟಿಯ ಸಿನಿಮಾದ ನಿರ್ಮಾಣವನ್ನು ಕೆವಿಎನ್‌ ಮಾಡಲಿದೆ.
ಕೆವಿಎನ್‌ ಪ್ರೊಡಕ್ಷನ್‌ ಸಹಕಾರದಲ್ಲಿ ನೆರವಾದ ಕೆಲವು ಸಿನಿಮಾಗಳು
ಸಖತ್‌: ಸಿಂಪಲ್‌ ಸುನಿಯಾ ಸಖತ್‌ ಸಿನಿಮಾದಲ್ಲಿ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ನಟಿಸಿದ್ದರು. ಇದು ಕೆವಿಎನ್‌ ಪ್ರೊಡಕ್ಷನ್‌ ನಿರ್ಮಾಣದ ಸಿನಿಮಾ.
ಪೊಗರು, ಬೈಟು ಕೂಡ ಕೆವಿಎನ್‌ ಪ್ರೊಡಕ್ಷನ್‌ ಸಿನಿಮಾವಾಗಿದೆ.
ಆರ್‌ಆರ್‌ಆರ್‌: ನಿರ್ದೇಶಕ ಎಸ್‌ಎಸ್‌ ರಾಜಮೌಳಿ ನಿರ್ದೇಶನದ ಈ ಸಿನಿಮಾದ ಹಿಂದೆಯೂ ಕೆವಿಎನ್‌ ಪ್ರೊಡಕ್ಷನ್‌ ಇದೆ.
ಸೀತಾ ರಾಮನ್‌, ಗಾಳಿಪಟ ಚಿತ್ರವೂ ಕೆವಿಎನ್‌ ಪ್ರೊಡಕ್ಷನ್‌ನದ್ದು. ಇದೇ ರೀತಿ ಕಿಚ್ಚ ಸುದೀಪ್‌ ನಟನೆಯ ವಿಕ್ರಾಂತ್‌ ರೋಣ ಸಿನಿಮಾ ಕೂಡ ಕೆವಿಎನ್‌ ಪ್ರೊಡಕ್ಷನ್‌ನದ್ದು. ಇದಲ್ಲದೆ ಮಾನ್ಸೂನ್‌ ರಾಗ, 777 ಚಾರ್ಲಿ, ಅವತಾರ ಪುರುಷ, ತೋತಾಪುರಿ, ಟ್ವೆಂಟಿ ಒನ್‌ ಅವರ್ಸ್‌ ಚಿತ್ರದ ಹಿಂದೆಯೂ ಕೆವಿಎನ್‌ ಪ್ರೊಡಕ್ಷನ್‌ ಇದೆ.
ರಕ್ಷಿತ್ ನಿರ್ಮಾಣದ ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಎ, ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿಯೂ ಕೆವಿಎನ್‌ ಪ್ರೊಡಕ್ಷನ್‌ ಫಂಡ್‌ ಮಾಡಿದ ಸಿನಿಮಾ. ಇದಲ್ಲದೆ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ನಟನೆಯ ಬಾನದಾರಿಯಲ್ಲಿ ಸಿನಿಮಾದ ಹಿಂದೆಯೂ ಕೆವಿಎನ್‌ ಪ್ರೊಡಕ್ಷನ್‌ಇದೆ.
ಇದೀಗ ನಿರ್ಮಾಣವಾಗುತ್ತಿರುವ ಬಹುನಿರೀಕ್ಷಿತ ಕೆಡಿ- ದಿ ಡೆವಿಲ್‌ ಸಿನಿಮಾದ ಪ್ರೊಡಕ್ಷನ್‌ ಉಸ್ತುವಾರಿ ಕೆವಿಎನ್‌ನದ್ದು. ಬುದ್ಧಿವಂತ 2 ಸಿನಿಮಾದ ಹಿಂದೆಯೂ ಇದೇ ಕೆವಿಎನ್‌ ಇದೆ. ಮಾರ್ಟಿನ್‌ ಸಿನಿಮಾಕ್ಕೆ ಕೆವಿಎನ್‌ ಪ್ರೊಡಕ್ಷನ್‌ ಫಂಡಿಂಗ್‌ ಮಾಡುತ್ತಿದೆ.
ಯಶ್‌ ಮುಂದಿನ ಸಿನಿಮಾ ಯಾವುದು?
ಕೆವಿಎನ್‌ ಪ್ರೊಡಕ್ಷನ್‌ನಡಿ ಯಶ್‌ ಮುಂದಿನ ಪ್ಯಾನ್‌ ಇಂಡಿಯಾ ಸಿನಿಮಾ ಯಾವುದು ಇರಬಹುದು ಎಂಬ ಕುತೂಹಲ ಎಲ್ಲರಲ್ಲಿಯೂ ಇದೆ. ಸದ್ಯಕ್ಕೆ ಈ ಸಿನಿಮಾದ ಪ್ರೊಡಕ್ಷನ್‌ ಹೌಸ್‌ನ ವಿವರ ಮಾತ್ರ ಲಭಿಸಿದೆ. ಸಿನಿಮಾವೊಂದರ ಯಶಸ್ಸಿನ ಬೆನ್ನೆಲುಬು ಆಗಿರುವ ನಿರ್ದೇಶಕರ ಕುರಿತು ವಿವರ ಲಭ್ಯವಿಲ್ಲ. ಸದ್ಯ ಪ್ರಶಾಂತ್‌ ನೀಲ್‌, ರಾಜಮೌಳಿ ಮುಂತಾದ ಪ್ರಮುಖ ನಿರ್ದೇಶಕರ ಸಿನಿಮಾಗಳು ಸೂಪರ್‌ಹಿಟ್‌ ಆಗುತ್ತಿವೆ. ಇದೇ ರೀತಿ ಜವಾನ್‌ ನಿರ್ದೇಶಕ ಅಟ್ಲಿ, ಸಂದೀಪ್‌ ರೆಡ್ಡಿ ವಂಗ ಮುಂತಾದವರೂ ನಿರೀಕ್ಷೆ ಹುಟ್ಟಿಸುತ್ತಿದ್ದಾರೆ. ಯಶ್‌ ಮುಂದಿನ ಸಿನಿಮಾದ ಸಾರಥ್ಯ ಯಾರ ಕೈಯಲ್ಲಿದೆ ಎಂಬ ಕುತೂಹಲ ಎಲ್ಲರಲ್ಲಿಯೂ ಇದೆ. ಇದನ್ನು ಓದಿ: Yash 19: ಕೊನೆಗೂ ದೊಡ್ಡ ಸಿಗ್ನಲ್‌ ಕೊಟ್ಟ ಯಶ್‌; ಲೋಡಿಂಗ್‌ ಆಗ್ತಿದೆ ರಾಕಿಂಗ್‌ ಸ್ಟಾರ್‌ ಹೊಸ ಸಿನಿಮಾ
