ಧೀರೇನ್ ರಾಮ್‍ಕುಮಾರ್‌ಗೆ ಪ್ರೇಮ್‍ ಮಗಳು ನಾಯಕಿ; ‘ಟಗರು ಪಲ್ಯ’ ಚೆಲುವೆ ‘ಪಬ್ಬಾರ್’ ಚಿತ್ರದಲ್ಲಿ ನಟನೆ
‘ಟಗರು ಪಲ್ಯ’ ಚಿತ್ರದ ನಂತರ ‘ನೆನಪಿರಲಿ’ ಪ್ರೇಮ್‍ ಮಗಳು ಅಮೃತಾ ಪ್ರೇಮ್‍, ‘ಅಮ್ಮು’ ಎಂಬ ಚಿತ್ರದಲ್ಲಿ ನಟಿಸುವುದಕ್ಕೆ ಒಪ್ಪಿಕೊಂಡಿದ್ದರು. ಇದೀಗ ಅಮೃತಾ ಸದ್ದಿಲ್ಲದೆ ಹೊಸ ಚಿತ್ರದೊಂದಿಗೆ ವಾಪಸ್ಸಾಗುತ್ತಿದ್ದಾರೆ. ಈ ಬಾರಿ ಅವರು ಧೀರೇನ್ ರಾಮ್ಕುಮಾರ್ ಅಭಿನಯದ ಹೊಸ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆ ಆಗಿದ್ದಾರೆ. (ವರದಿ: ಚೇತನ್‌ ನಾಡಿಗೇರ್‌)
‘ಟಗರು ಪಲ್ಯ’ ಚಿತ್ರದ ನಂತರ ‘ನೆನಪಿರಲಿ’ ಪ್ರೇಮ್‍ ಮಗಳು ಅಮೃತಾ ಪ್ರೇಮ್‍, ‘ಅಮ್ಮು’ ಎಂಬ ಚಿತ್ರದಲ್ಲಿ ನಟಿಸುವುದಕ್ಕೆ ಒಪ್ಪಿಕೊಂಡಿದ್ದರು. ಅದು ಬಿಟ್ಟು ಬೇರೆ ಯಾವ ಚಿತ್ರವನ್ನೂ ಅವರು ಒಪ್ಪಿರಲಿಲ್ಲ. ಇದೀಗ ಅಮೃತಾ ಸದ್ದಿಲ್ಲದೆ ಹೊಸ ಚಿತ್ರದೊಂದಿಗೆ ವಾಪಸ್ಸಾಗುತ್ತಿದ್ದಾರೆ. ಈ ಬಾರಿ ಅವರು ಧೀರೇನ್ ರಾಮ್ಕುಮಾರ್ ಅಭಿನಯದ ಹೊಸ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆ ಆಗಿದ್ದಾರೆ.
‘ಶಿವ 143’ ಚಿತ್ರದ ನಂತರ ಧೀರೇನ್, ಒಂದೆರಡು ಚಿತ್ರಗಳಲ್ಲಿ ನಟಿಸುತ್ತಾರೆ ಎಂಬ ಸುದ್ದಿಯಾಗಿತ್ತಾದರೂ, ಯಾವುದೇ ಚಿತ್ರವೂ ಸೆಟ್ಟೇರಿರಲಿಲ್ಲ. ಇದೀಗ ಅವರು ಗೀತಾ ಶಿವರಾಜಕುಮಾರ್ ನಿರ್ಮಿಸುತ್ತಿರುವ ಹೊಸ ಚಿತ್ರದಲ್ಲಿ ನಾಯಕನಾಗಿ ನಟಿಸುತ್ತಿದ್ದು, ಈ ಚಿತ್ರಕ್ಕೆ ‘ಪಬ್ಬಾರ್’ ಎಂದು ಹೆಸರಿಡಲಾಗಿದೆ. ಈ ಹಿಂದೆ ‘ಶಾಖಾಹಾರಿ’ ಚಿತ್ರವನ್ನು ನಿರ್ದೇಶಿಸಿದ್ದ ಸಂದೀಪ್‍ ಸುಂಕದ್‍ ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದು, ಧೀರೇನ್‍ಗೆ ನಾಯಕಿಯಾಗಿ ಅಮೃತಾ ನಟಿಸುತ್ತಿರುವುದು ವಿಶೇಷ. ಈ ಚಿತ್ರದ ಮುಹೂರ್ತ ಇಂದು ನಡೆಯಲಿದೆ.
ಧೀರೇನ್, ‘ಶಾಖಾಹಾರಿ’ ಚಿತ್ರ ನೋಡಲು ಬಂದಿದ್ದಾಗ ಸಂದೀಪ್‍ ಸುಂಕದ್‍ ಪರಿಚಯವಾಯಿತಂತೆ. ಒಂದೊಳ್ಳೆಯ ಕಥೆ ಇದ್ದರೆ ಹೇಳಿ ಎಂದು ಆಗಲೇ ಹೇಳಿದ್ದರಂತೆ. ಅದರಂತೆ ಸಂದೀಪ್‍ ತಮ್ಮ ಸ್ಟಾಕ್‍ನಲ್ಲಿದ್ದ ಒಂದು ಕಥೆಯನ್ನು ಹೇಳಿದ್ದಾರೆ. ಅದು ಇಷ್ಟವಾಗಿ, ಧೀರೇನ್ ನಟಿಸಲು ಮುಂದಾದರಂತೆ. ಆ ನಂತರ ಶಿವರಾಜಕುಮಾರ್ ಮತ್ತು ಗೀತಾ ಶಿವರಾಜಕುಮಾರ್ ಕಥೆ ಕೇಳಿ, ಚಿತ್ರವನ್ನು ನಿರ್ಮಿಸುವುದಕ್ಕೆ ಮುಂದಾಗಿದ್ದಾರೆ.
‘ಶಾಖಾಹಾರಿ’ ಚಿತ್ರದ ಕಥೆ ತೀರ್ಥಹಳ್ಳಿಯಲ್ಲಿ ನಡೆದರೆ, ಈ ಚಿತ್ರದ ಕಥೆ ಕರ್ನಾಟಕದಿಂದ ಹಿಮಾಚಲ ಪ್ರದೇಶದವರೆಗೂ ನಡೆಯಲಿದೆ. ಈ ಚಿತ್ರಕ್ಕಾಗಿ ಧೀರೇನ್ ತಮ್ಮ ಲುಕ್‍ ಬದಲಿಸಿಕೊಂಡಿದ್ದಾರೆ. ಈ ಚಿತ್ರಕ್ಕಾಗಿಯೇ ಸುಮಾರು 12 ಕೆಜಿ ತೂಕವನ್ನು ಅವರು ಇಳಿಸಿಕೊಂಡಿದ್ದಾರಂತೆ. ಇದೊಂದು ನೈಜ ಚಿತ್ರವಾಗಲಿದ್ದು, ಹೀರೋಯಿಸಂ, ನಾಯಕನ ವಿಜೃಂಭಣೆ ಯಾವುದೂ ಇರುವುದಿಲ್ಲವಂತೆ. ಈ ಚಿತ್ರದಲ್ಲಿ ಧೀರೇನ್ ಮತ್ತು ಅಮೃತಾ ಜೊತೆಗೆ ಅಚ್ಯುತ್‍ ಕುಮಾರ್‍, ಗೋಪಾಲಕೃಷ್ಣ ದೇಶಪಾಂಡೆ ಮುಂತಾದವರು ನಟಿಸುತ್ತಿದ್ದಾರೆ.
Praveen Chandra B
