ಕಾಟೇರ ಸಿನಿಮಾದ ಒಟ್ಟು ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಎಷ್ಟು? 4 ಐಟಿ ಇಡಿ ನೋಟಿಸ್‌ ಅಂದ್ರು ರಾಕ್‌ಲೈನ್‌ ವೆಂಕಟೇಶ್‌
ದರ್ಶನ್‌ ನಟನೆಯ ಕಾಟೇರ ಸಿನಿಮಾದ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಕುರಿತಾದ ವರದಿಗಳು ನಂಬರ್‌ ಗೇಮ್‌ ಎಂದು ನಿರ್ಮಾಪಕ ರಾಕ್‌ಲೈನ್‌ ವೆಂಕಟೇಶ್‌ ಅಭಿಪ್ರಾಯಪಟ್ಟಿದ್ದಾರೆ. ಸೋಷಿಯಲ್‌ ಮೀಡಿಯಾದ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ವರದಿಯಿಂದಾಗಿ ನಾಲ್ಕು ಐಟಿ ಇಡಿ ನೋಟಿಸ್‌ ಬಂದಿದೆ ಎಂದು ಅವರು ಹೇಳಿದ್ದಾರೆ.
ಬೆಂಗಳೂರು: ಸ್ಯಾಂಡಲ್‌ವುಡ್‌ನ ಬ್ಲಾಕ್‌ಬಸ್ಟರ್‌ ಸಿನಿಮಾ ಕಾಟೇರ ಇಲ್ಲಿಯವರೆಗೆ ಗಲ್ಲಾಪೆಟ್ಟಿಗೆಯಲ್ಲಿ ಎಷ್ಟು ಗಳಿಕೆ ಮಾಡಿದೆ ಎಂಬ ಕುತೂಹಲ ಎಲ್ಲರಲ್ಲಿಯೂ ಇದೆ. ಸಿನಿಮಾ ಬಿಡುಗಡೆಯಾದ ದಿನದಿಂದ ಕಾಟೇರ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ವರದಿ ಪ್ರತಿನಿತ್ಯ ಪ್ರಕಟವಾಗುತ್ತಿತ್ತು. ಸಚ್‌ನಿಲ್ಕ್‌.ಕಾಂ ವರದಿ ಮಾತ್ರವಲ್ಲದೆ ಸೋಷಿಯಲ್‌ ಮೀಡಿಯಾದಲ್ಲೂ ಬಾಕ್ಸ್‌ ಆಫೀಸ್‌ ವರದಿ ಪ್ರಕಟವಾಗುತ್ತಿತ್ತು. 100 ಕೋಟಿಗೆ ತಲುಪಿದ ಕಾಟೇರ ಕಲೆಕ್ಷನ್‌, 216 ಕೋಟಿಗೆ ತಲುಪಿದ ದರ್ಶನ್‌ ಸಿನಿಮಾ, 316 ಕೋಟಿಗೆ ತಲುಪಿದ ಕಾಟೇರ ಗಲ್ಲಾಪೆಟ್ಟಿಗೆ ಕಲೆಕ್ಷನ್‌ ಇತ್ಯಾದಿ ವರದಿಗಳು ಪ್ರಕಟವಾಗುತ್ತಿತ್ತು. ಆದರೆ, ಈ ಕುರಿತು ಇಲ್ಲಿಯವರೆಗೆ ಕಾಟೇರ ನಿರ್ಮಾಪಕರಾದ ರಾಕ್‌ಲೈನ್‌ ವೆಂಕಟೇಶ್‌ ತುಟಿಪಿಟಿಕ್‌ ಎಂದಿರಲಿಲ್ಲ. ಕಾಟೇರ ಸಿನಿಮಾಕ್ಕೆ 50 ದಿನ ತುಂಬಿದ ಮತ್ತು ಪ್ರಸನ್ನ ಚಿತ್ರಮಂದಿರಕ್ಕೆ 50 ವರ್ಷ ತುಂಬಿದ ಪ್ರಯುಕ್ತ ಆಯೋಜಿಸಿದ ವಿಶೇಷ ಕಾರ್ಯಕ್ರಮದಲ್ಲಿ ರಾಕ್‌ಲೈನ್‌ ವೆಂಕಟೇಶ್‌ ಈ ಕುರಿತು ಮಾತನಾಡಿದ್ದಾರೆ.
ಕಾಟೇರ ಕಲೆಕ್ಷನ್‌ ಕುರಿತು ರಾಕ್‌ಲೈನ್‌ ವೆಂಕಟೇಶ್‌ ಏನಂದ್ರು?
"ನೀವೇ ಹೇಳ್ತಿರಿ ಅಲ್ವ? ಮಾಧ್ಯಮಗಳಲ್ಲಿ, ಸೋಷಿಯಲ್‌ ಮೀಡಿಯಾಗಳಲ್ಲಿ 216 ಕೋಟಿ, 316 ಕೋಟಿ ಎಂದು ಹೇಳಿದ್ದೀರಿ. ನೀವು ಮಾಡಿರುವ ನಂಬರ್‌ ಸ್ಟೇಟ್‌ಮೆಂಟ್‌ಗೆ, ನಂಬರ್‌ ಗೇಮ್‌ಗೆ ನನಗೆ ನಾಲ್ಕು ನೋಟಿಸ್‌ ಬಂದಿದೆ. ಮೊದಲು ಇನ್‌ಕಾಂ ಡಿಪಾರ್ಟ್‌ಮೆಂಟ್‌ನವರು ಮಾತ್ರ ಬರ್ತಾ ಇದ್ರು. ಈಗ ಎನ್‌ಫೋರ್ಸ್‌ಮೆಂಟ್‌ ಡಿಪಾರ್ಟ್‌ಮೆಂಟ್‌ನವರೂ ಬರ್ತಾ ಇದ್ದಾರೆ" ಎಂದು ರಾಕ್‌ಲೈನ್‌ ವೆಂಕಟೇಶ್‌ ಹೇಳಿದಾಗ ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ಗೆ ನಗು ತಡೆಯಲಿಲ್ಲ. ಪ್ರೇಕ್ಷಕರೂ ಸಿಳ್ಳೆ ಹೊಡೆದರು.
"ನಾನೇನು ಮಾಡಿದೆ ಗೊತ್ತ ಅದಕ್ಕೆ, ಈ ರೀತಿ ನಂಬರ್‌ ಕೊಟ್ಟವರ ಲಿಂಕ್‌ ಮತ್ತು ಮೊಬೈಲ್‌ ಸಂಖ್ಯೆ ನೀಡಿದ್ದೇನೆ. ಅವರನ್ನೆಲ್ಲ ಪೊಲೀಸ್‌ ಠಾಣೆಗೆ ಕರೆದು ಲೆಕ್ಕ ಕೊಡಿ ಎಂದು ಕೇಳ್ತಾರೆ. ನಾನು ನನ್ನ ಲೆಕ್ಕವನ್ನು ಯಾವಾಗ ಬೇಕಾದರೂ ಕೊಡುವೆ. ನನ್ನ ಆಫೀಸ್‌ ಬಾಗಿಲು ಯಾವಾಗಲೂ ತೆರೆದಿರುತ್ತದೆ" ಎಂದು ರಾಕ್‌ಲೈನ್‌ ವೆಂಕಟೇಶ್‌ ಹೇಳಿದ್ದಾರೆ.
ಕಾಟೇರ ಟೈಟಲ್‌ ಕುರಿತು ದರ್ಶನ್‌ ಮಾತು
"ಕಾಟೇರ ಸಿನಿಮಾದ ಯಶಸ್ಸಿನ ಬಗ್ಗೆ ಏನೂ ಹೇಳುವುದಿಲ್ಲ. ಈಗಾಗಲೇ ಮಾತನಾಡಿದ್ದೇವೆ. ಈ ಸಂದರ್ಭದಲ್ಲಿ ಕೆಲವು ಕ್ಲಾರಿಫಿಕೇಷನ್‌ ಕೊಟ್ಟು ಬಿಡುತ್ತೇನೆ. ಕಾಟೇರ ಚಿತ್ರದ ಕಥೆ ನಾನು ಮಾಡಿಸ್ಧೆ, ಟೈಟಲ್‌ ನಾನು ಮಾಡಿಸ್ದೆ, ನಾ...ನೇ.... ಮಾಡಿಸ್ದೆ ಟೈಟಲ್‌ ಇಟ್ಟಿದ್ದೇ ನಾನು.. ಎಂದೆಲ್ಲ ಹೇಳ್ತಾರೆ. ಅಯ್ಯೋ ತಗಡೇ... ನಿನಗೆ ರಾಬರ್ಟ್‌ ಟೈಟಲ್‌ ಕೊಡಿಸಿರೋದೇ ನಾನು. ನೀನೇ ಟೈಟಲ್‌ ಮಾಡಿಸ್ದೆ ಎಂದಾದರೆ ಇಂತಹ ಒಳ್ಳೆಯ ಕಥೆ ಯಾಕೆ ಬಿಟ್ಟೆ ನೀನು? ನಿನ್ನ ಜಡ್ಜ್‌ಮೆಂಟ್‌ ಅಷ್ಟು ಚೆನ್ನಾಗಿದ್ದರೆ ನೀನೇ ಮಾಡಬಹುದಿತ್ತಲ್ವ?" ಎಂದು ವೇದಿಕೆಯಲ್ಲಿ ದರ್ಶನ್‌ ಹೇಳಿದ್ದಾರೆ. ಈ ಮೂಲಕ ಕಾಟೇರ ಟೈಟಲ್‌ ಕುರಿತು ಈ ಹಿಂದೆ ಮಾತನಾಡಿದ್ದ ರಾಬರ್ಟ್‌ ನಿರ್ದೇಶಕ ಉಮಾಪತಿ ಶ್ರೀನಿವಾಸ್‌ ಗೌಡರಿಗೆ ಈ ವೇದಿಕೆಯಲ್ಲಿ ದರ್ಶನ್‌ ತಿರುಗೇಟು ನೀಡಿದ್ದಾರೆ.
