Shiva Rajkumar: ಶಿವಣ್ಣ-ಪ್ರಭುದೇವ ಚಿತ್ರದ ಶೀರ್ಷಿಕೆ 'ಕರಟಕ ದಮನಕ'; ಯೋಗರಾಜ್ ಭಟ್ ನೀಡಿದ ವಿವರಣೆ ಹೀಗಿದೆ..
ನಿರ್ದೇಶಕ ಯೋಗರಾಜ್ ಭಟ್, ಶಿವರಾಜ್‌ಕುಮಾರ್‌ ಮತ್ತು ಪ್ರಭುದೇವ ಕಾಂಬಿನೇಷನ್‌ ಸಿನಿಮಾಕ್ಕೆ ಅದ್ಯಾವ ಟೈಟಲ್‌ ಇಡಲಿದ್ದಾರೆ ಎಂದು ಎಲ್ಲರೂ ನಿರೀಕ್ಷಿಸಿದ್ದರು. ಅದಕ್ಕೀಗ ಉತ್ತರ ಸಿಕ್ಕಿದೆ.
ಬೆಂಗಳೂರು: ನಿರ್ದೇಶಕ ಯೋಗರಾಜ್ ಭಟ್ ಸಿನಿಮಾ ಅಂದರೆ ಅಲ್ಲಿ ಏನಾದರೊಂದು ಹೊಸತು ಕಂಡೇ ಕಾಣಿಸುತ್ತದೆ. ಅದು ಹಾಡಿನ ವಿಚಾರವೇ ಆಗಿರಬಹುದು. ಹಾಡಿನಲ್ಲಿ ಬಳಸುವ ಸಾಹಿತ್ಯವೇ ಇರಬಹುದು. ಇದೀಗ ಅದೇ ಹೊಸತನ ಸಿನಿಮಾ ಶೀರ್ಷಿಕೆಗೂ ಮುಂದುವರಿದಿದೆ. ಶಿವರಾಜ್‌ಕುಮಾರ್‌ ಮತ್ತು ಪ್ರಭುದೇವ ಕಾಂಬಿನೇಷನ್‌ ಸಿನಿಮಾಕ್ಕೆ ಅದ್ಯಾವ ಟೈಟಲ್‌ ಇಡಲಿದ್ದಾರೆ ಎಂದೇ ಎಲ್ಲರೂ ನಿರೀಕ್ಷಿಸಿದ್ದರು. ಅದಕ್ಕೀಗ ಉತ್ತರ ಸಿಕ್ಕಿದೆ. ಶೀರ್ಷಿಕೆಯೂ ಅನಾವರಣಗೊಂಡಿದೆ.
ರಾಕ್ಲೈನ್ ವೆಂಕಟೇಶ್‌ ನಿರ್ಮಾಣದಲ್ಲಿ ಮೂಡಿಬರುತ್ತಿರುವ ಈ ಸಿನಿಮಾದ ಶೂಟಿಂಗ್‌ ಈಗಾಗಲೇ ಬೆಂಗಳೂರಿನಲ್ಲಿ ಜೋರಾಗಿಯೇ ನಡೆಯುತ್ತಿದೆ. ಶಿವಣ್ಣ ಮತ್ತು ಪ್ರಭುದೇವ ಸಹ ಶೂಟಿಂಗ್‌ನಲ್ಲಿ ಭಾಗವಹಿಸಿದ್ದಾರೆ. ಇದೀಗ ಇದೇ ಚಿತ್ರದ ಶೀರ್ಷಿಕೆಯನ್ನು ವಿಭಿನ್ನ ರೀತಿಯಲ್ಲಿಯೇ ಚಿತ್ರ ಪ್ರೇಮಿಗಳ ಮುಂದಿಟ್ಟಿದ್ದಾರೆ ಯೋಗರಾಜ್ ಭಟ್. ಈ ಚಿತ್ರಕ್ಕೆ "K ಕರಟಕ D ದಮನಕ" ಎಂಬ ಟೈಟಲ್‌ ಅಂತಿಮ ಮಾಡಿದ್ದಾರೆ.
ಹಾಗಾದರೆ ಏನಿದು 'ಕರಟಕ ದಮನಕ'?
ಈಗಾಗಲೇ "ಪಂಚತಂತ್ರ" ಹೆಸರಿನ ಸಿನಿಮಾ ಮಾಡಿರುವ ನಿರ್ದೇಶಕರು ಇದೀಗ ಶಿವಣ್ಣ ಮತ್ತು ಪ್ರಭುದೇವ ಕಾಂಬಿನೇಷನ್‌ ಸಿನಿಮಾಕ್ಕೂ ಪಂಚತಂತ್ರದ ಎಳೆಯನ್ನೇ ಹಿಡಿದು ಬಂದಿದ್ದಾರೆ. ಕರಟಕ ದಮನಕ ಎಂಬುದು ಪಂಚತಂತ್ರದಲ್ಲಿ ಬರುವ ಎರಡು ನರಿಗಳ ಹೆಸರು. ಈ ಎರಡೂ ನರಿಗಳು ಕಾಡಿನ ರಾಜ ಸಿಂಹದ ಎಡಗೈ ಮತ್ತು ಬಲಗೈ. ವಿಭಿನ್ನ ಸ್ವಭಾವ ಹೊಂದಿರುವ ಈ ಎರಡು ನರಿಗಳ ಕಥೆಯನ್ನೇ ಇದೀಗ ನಿರ್ದೇಶಕ ಯೋಗರಾಜ್ ಭಟ್ ಸಿನಿಮಾ ಮಾಡಲು ಹೊರಟಿದ್ದಾರೆ. ಸದ್ಯಕ್ಕೆ ಶೀರ್ಷಿಕೆ ಅಂತಿಮವಾಗಿದ್ದು, ಮುಂದಿನ ದಿನಗಳಲ್ಲಿ ಒಂದೊಂದಾಗಿ ಚಿತ್ರದ ಇನ್ನಷ್ಟು ಮಾಹಿತಿ ಹೊರಬೀಳಲಿದೆ.
ನಿರ್ದೇಶಕರ ಶೀರ್ಷಿಕೆ ವಿವರಣೆ ಹೀಗಿದೆ...
ಶೀರ್ಷಿಕೆಯನ್ನು ನಿರ್ದೇಶಕ ಯೋಗರಾಜ್ ಭಟ್ ಖಾಲಿ ಹಾಳೆಯಲ್ಲಿ ಡೈಗ್ರಾಮ್‌ ಹಾಕುವ ಮೂಲಕ ಶೀರ್ಷಿಕೆಯನ್ನು ವಿವರಣೆ ಮಾಡಿದ್ದಾರೆ. ಶಿವಣ್ಣ+ ಪ್ರಭುದೇವ+ ರಾಕ್ಲೈನ್+ಯೋಗರಾಜ್= ಕರಟಕ ದಮನಕ ಎಂದು ವಿವರಣೆ ಮಾಡಿದ್ದಾರೆ. ಕರಟಕದ ಮುಂದೆ K, ದಮನಕದ ಮುಂದೆ D ಎಂದು ಇಂಗ್ಲೀಷ್‌ ಅಕ್ಷರಗಳನ್ನೂ ಜೋಡಿಸಿದ್ದಾರೆ. KD ಶಾರ್ಟ್‌ ಅರ್ಥವೂ ಈ ಸಿನಿಮಾಕ್ಕಿದೆ.
ನಾಯಕಿಯರಾಗಿ ಪ್ರಿಯಾ, ನಿಶ್ವಿಕಾ..
ಈ ಸಿನಿಮಾದಲ್ಲಿ ನಾಯಕಿಯಾಗಿ ಕಾಣಿಸಿಕೊಳ್ಳುವುದು ಯಾರು ಎಂಬ ಪ್ರಶ್ನೆ ಇತ್ತು. ಇತ್ತೀಚೆಗಷ್ಟೇ ಈ ಚಿತ್ರದಲ್ಲಿ "ರಾಜಕುಮಾರನ" ಬೆಡಗಿ ಪ್ರಿಯಾ ಆನಂದ್‌ ನಟಿಸಲಿದ್ದಾರೆ ಎಂಬ ಸುದ್ದಿ ಹರಿದಾಡಿತ್ತು. ಇದೀಗ ಆ ಸುದ್ದಿ ಅಧಿಕೃತವಾಗಿದ್ದು, ಮತ್ತೋರ್ವ ನಾಯಕಿಯಾಗಿ ನಿಶ್ವಿಕಾ ನಾಯ್ಡು ತಂಡ ಸೇರಿದ್ದಾರೆ. ಈಗಾಗಲೇ ಶೂಟಿಂಗ್‌ನಲ್ಲಿಯೂ ಭಾಗವಹಿಸಿದ್ದಾರೆ. ಇವರ ಪಾತ್ರವೇನು? ಇನ್ನುಳಿದ ತಾರಾಗಣದಲ್ಲಿ ಯಾರೆಲ್ಲ ಇರಲಿದ್ದಾರೆ ಎಂಬ ಬಗ್ಗೆ ಇನ್ನಷ್ಟೇ ಮಾಹಿತಿ ಹೊರಬೀಳಬೇಕಿದೆ. ಈ ಚಿತ್ರಕ್ಕೆ ವಿ.ಹರಿಕೃಷ್ಣ ಸಂಗೀತ ನಿರ್ದೇಶನ ಮಾಡುತ್ತಿದ್ದು, ಸಂತೋಷ್ ರೈ ಪಾತಾಜೆ ಛಾಯಾಗ್ರಹಣದ ಜವಾಬ್ಧಾರಿ ಹೊತ್ತಿದ್ದಾರೆ. ನಿರ್ಮಾಪಕ ರಾಕ್ಲೈನ್ ವೆಂಕಟೇಶ್‌ ಸಹ ಈ ಚಿತ್ರದಲ್ಲಿ ಪೊಲೀಸ್‌ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದಾರೆ.
ಶಿವರಾಜ್‌ಕುಮಾರ್‌ ಮತ್ತು ಬಹುಭಾಷಾ ನಟ ಪ್ರಭುದೇವ ನಟಿಸುವ ಈ ಚಿತ್ರ ಕಳೆದ ಜೂನ್‌ನಲ್ಲಿ ಅಧಿಕೃತವಾಗಿ ಮುಹೂರ್ತ ಮುಗಿಸಿಕೊಂಡಿತ್ತು. ಚಿತ್ರದ ಮೊದಲ ದೃಶ್ಯಕ್ಕೆ ಶಿವರಾಜ್‌ಕುಮಾರ್‌ ಪತ್ನಿ ಗೀತಾ ಕ್ಲಾಪ್‌ ಮಾಡಿದರೆ, ರಾಕ್ಲೈನ್ ವೆಂಕಟೇಶ್‌ ಪತ್ನಿ ಪುಷ್ಪಕುಮಾರಿ ಕ್ಯಾಮರಾಕ್ಕೆ ಚಾಲನೆ ನೀಡಿದ್ದರು. ಇದೀಗ ಇದೇ ಚಿತ್ರ ಶೂಟಿಂಗ್‌ ಕೆಲಸದಲ್ಲಿ ಜತೆಗೆ ಶೀರ್ಷಿಕೆಯೂ ಅನಾವರಣವಾಗಿದೆ.
