Amitabh Bachchan: ಕೆಬಿಸಿ ವೇದಿಕೆಯಲ್ಲೇ ಕಣ್ಣೀರು ಹಾಕಿದ ಅಮಿತಾಬ್‌ ಬಚ್ಚನ್‌, 81ನೇ ವರ್ಷದ ಹುಟ್ಟುಹಬ್ಬದ ಭಾವನಾತ್ಮಕ ಕ್ಷಣ
Amitabh Bachchan Birthday: ಬಾಲಿವುಡ್ ನಟ ಅಮಿತಾಬ್‌ ಬಚ್ಚನ್‌ ಅವರಿಗೆ ಇದೇ ಅಕ್ಟೋಬರ್‌ 11ರಂದು 81ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳಲಿದ್ದಾರೆ. ಬಿಗ್‌ಬಿ ಹುಟ್ಟುಹಬ್ಬಕ್ಕೆ ಕೌನ್‌ ಬನೇಗಾ ಕರೋಡ್‌ಪತಿಯ ವಿಶೇಷ ಎಪಿಸೋಡ್‌ ನಡೆಯಲಿದೆ. ಈ ಕಾರ್ಯಕ್ರಮದ ಪ್ರಮೋದಲ್ಲಿ ಅಮಿತಾಬ್‌ ಬಚ್ಚನ್‌ ಕಣ್ಣೀರು ಹಾಕುವ ಸೀನ್‌ ಇದೆ.
ಬೆಂಗಳೂರು: ಬಾಲಿವುಡ್‌ನ ಹಿರಿಯ ನಟ, ಎಲ್ಲರ ಅಚ್ಚುಮೆಚ್ಚಿನ ಬಿಗ್‌ಬಿ ಇದೇ ಅಕ್ಟೋಬರ್‌ 11ರಂದು 81ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳಲಿದ್ದಾರೆ. ಅವರ ಹುಟ್ಟುಹಬ್ಬದ ಪ್ರಯುಕ್ತ ಕೌನ್‌ ಬನೇಗಾ ಕರೋಡ್‌ಪತಿ ವಿಶೇಷ ಸಂಚಿಕೆ ಪ್ರಸಾರಗೊಳ್ಳಲಿದೆ. ಈ ಕುರಿತಾದ ಪ್ರಮೋ ಈಗಾಗಲೇ ಬಿಡುಗಡೆಯಾಗಿದ್ದು, ಇದರಲ್ಲಿ ಅಮಿತಾಬ್‌ ಭಾವನಾತ್ಮಕವಾಗಿರುವುದು ಕಾಣಿಸುತ್ತದೆ. ಹುಟ್ಟುಹಬ್ಬಕ್ಕೆ ಸಂಬಂಧಪಟ್ಟ ಹಲವು ಸರ್‌ಪ್ರೈಸ್‌ಗಳನ್ನು ನೋಡಿ ಬಿಗ್‌ಬಿ ಅಚ್ಚರಿಗೊಂಡು ಕಣ್ಣೀರು ಹಾಕಿದ್ದಾರೆ.
ಕಣ್ಣೀರು ಹಾಕಿದ ಅಮಿತಾಬ್‌ ಬಚ್ಚನ್‌
ಹುಟ್ಟುಹಬ್ಬಕ್ಕೆ ಸಂಬಂಧಪಟ್ಟ ಪ್ರಮೋ ವಿಡಿಯೋದಲ್ಲಿ ನಗುತ್ತ, ಕಣ್ಣೀರು ಸುರಿಸುತ್ತಾ, ವಿವಿಧ ಭಾವಗಳಲ್ಲಿ ಅಮಿತಾಬ್‌ ಬಚ್ಚನ್‌ ಕಾಣಿಸಿಕೊಂಡಿದ್ದಾರೆ. "ಔರ್‌ ಕಿತ್ನಾ ರುಲಾಯೆಂಗೆ ಆಪ್‌ ಲೋಗ್‌" ಎಂದು ಕೇಳುತ್ತಾರೆ. ಇನ್ನೂ ನನ್ನನ್ನು ಎಷ್ಟು ಭಾವನಾತ್ಮಕಗೊಳಿಸುವಿರಿ? ಎಂದು ಅವರು ಪ್ರಶ್ನಿಸುತ್ತಾರೆ. "ಸಾಮಾನ್ಯವಾಗಿ ನಾನು ಜನರಿಗೆ ಕಣ್ಣೀರು ಒರೆಸಲು ಟಿಶ್ಯೂ ಪೇಪರ್‌ ನೀಡುವೆ, ಇಂದು ನನ್ನ ಸರದಿ" ಎಂದು ಅವರು ಹೇಳುತ್ತಾರೆ. ಈ ಸಂದರ್ಭದಲ್ಲಿ ಅವರು ಕಣ್ಣೀರು ಒರೆಸಿಕೊಳ್ಳುತ್ತಾರೆ. ಇದೇ ಸಮಯದಲ್ಲಿ ಹುಟ್ಟುಹಬ್ಬ ಆಯೋಜಿಸಿದ ಕೆಬಿಸಿ ತಂಡಕ್ಕೆ ಅವರು ಧನ್ಯವಾದ ತಿಳಿಸಿದ್ದಾರೆ.
"ಈ ಮೂಲಕ ನನ್ನ ಹುಟ್ಟುಹಬ್ಬ ಇಲ್ಲಿ ಸುಂದರವಾಗಿ ಆಚರಿಸಲ್ಪಟ್ಟಿತ್ತು" ಎಂದು ಈ ಪ್ರಮೋದಲ್ಲಿ ಅಮಿತಾಬ್‌ ಹೇಳುತ್ತಾರೆ. ವೀಕ್ಷಕರು ಚಪ್ಪಾಳೆ ತಟ್ಟುವ ದೃಶ್ಯವೂ ಇದೆ.
ಕೌನ್‌ ಬನೇಗಾ ಕರೋಡ್‌ಪತಿ ವಿಶೇಷ ಎಪಿಸೋಡ್‌
ವರದಿಗಳ ಪ್ರಕಾರ, ಈ ಬಾರಿಯ ಕೌನ್‌ ಬನೇಗಾ ಕರೋಡ್‌ಪತಿಯಲ್ಲಿ ಹಲವು ವಿಶೇಷಗಳು ಇರಲಿವೆ. ಬಿಗ್‌ಬಿ ಹುಟ್ಟುಹಬ್ಬದ ಪ್ರಯುಕ್ತ ಕೌನ್‌ ಬನೇಗಾ ಕರೋಡ್‌ಪತಿ ಕಾರ್ಯಕ್ರಮದಲ್ಲಿ ಜನಪ್ರಿಯ ಸರೋದ್ ವಾದಕ ಪದ್ಮವಿಭೂಷಣ ಉಸ್ತಾದ್ ಅಮ್ಜದ್ ಅಲಿ ಖಾನ್ ಅವರ ಪ್ರದರ್ಶನ ಇರಲಿದೆ ಎಂದು ಇಟಿಟೈಮ್ಸ್‌ ವರದಿ ತಿಳಿಸಿದೆ. ಚಿರಂಜಿವಿ, ಅನುಪಮ್‌ ಖೇರ್‌, ವಿದ್ಯಾಬಾಲನ್‌, ವಿಕ್ಕಿ ಕೌಶಲ್‌, ಆರ್‌ ಮಾಧವನ್‌, ಬೊಮನ್‌ ಇರಾನಿ ಸೇರಿದಂತೆ ಹಲವು ಸೆಲೆಬ್ರಿಟಿಗಳು ಈ ಕಾರ್ಯಕ್ರಮದಲ್ಲಿ ಅಮಿತಾಬ್‌ ಬಚ್ಚನ್‌ಗೆ ವಿಶೇಷ ವಿಡಿಯೋ ಮೂಲಕ ವಿಶ್‌ ಮಾಡಲಿದ್ದಾರೆ.
ಈ ಎಪಿಸೋಡ್‌ನಲ್ಲಿ ಈ ಹಿಂದೆ ಕೌನ್‌ ಬನೇಗಾ ಕರೋಡ್‌ಪತಿಯಲ್ಲಿ ಗೆದ್ದವರು ಕೂಡ ಇರಲಿದ್ದಾರೆ. ಅಂದರೆ, ಕೌನ್‌ ಬನೇಗಾ ಕರೋಡ್‌ಪತಿಯ ಸೆಸನ್‌ 11ರಿಂದ ಸೆಸನ್‌ 13ರವರೆಗಿನ ವಿನ್ನರ್‌ಗಳು ಭಾಗವಹಿಸಲಿದ್ದಾರೆ. ಕೆಬಿಸಿಯ ಮೊದಲ ವಿನ್ನರ್‌ ಜಸ್‌ಕರನ್‌ ಸಿಂಗ್‌ ಕೂಡ ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ ಎನ್ನಲಾಗಿದೆ. ಭಾರತೀಯ ಸೇನೆಯ ಸೋಷಿಯಲ್‌ ಸರ್ವೀಸ್‌ ತಂಡದಿಂದ ವಿಶೇಷ ಸಂದೇಶವೂ ಇರಲಿದೆ. ಒಟ್ಟಾರೆ, ಈ ಬಾರಿಯ ಕೌನ್‌ ಬನೇಗಾ ಕರೋಡ್‌ಪತಿಯ ವಿಶೇಷ ಎಪಿಸೋಡ್‌ ಬಿಗ್‌ಬಿಮಯವಾಗಿರಲಿದೆ.
