BBK 10: ವನ್ಯಜೀವಿ ಸಂರಕ್ಷಣಾ ಕಾಯಿದೆ ಉಲ್ಲಂಘನೆ ಹಿನ್ನೆಲೆ ಸ್ಪರ್ಧಿ ವರ್ತೂರು ಸಂತೋಷ್‌ ಅರೆಸ್ಟ್‌! ಬಿಗ್‌ ಬಾಸ್‌ ಇತಿಹಾಸದಲ್ಲೇ ಇದು ಮೊದಲು
Varthur Santhosh Arrest: ಬಿಗ್‌ ಬಾಸ್‌ ಕನ್ನಡ ಸೀಸನ್‌ 10ರ ಸ್ಪರ್ಧಿ ವರ್ತೂರು ಸಂತೋಷ್‌ ಅವರನ್ನು ಭಾನುವಾರ ತಡರಾತ್ರಿ ಬಂಧಿಸಲಾಗಿದೆ. ವನ್ಯಜೀವಿ ಕಾಯಿದೆ ಅಡಿಯಲ್ಲಿ ಅರಣ್ಯ ಇಲಾಖೆ ಅಧಿಕಾರಿಗಳಿಂದ ಬಂಧನವಾಗಿದೆ. ಕಾರಣ ಹೀಗಿದೆ.
Bigg Boss Kannada: ಬಿಗ್‌ ಬಾಸ್‌ ಸೀಸನ್‌ ಶುರುವಾಗಿ ಎರಡು ವಾರಗಳು ಪೂರ್ಣಗೊಂಡಿವೆ. ಮೊದಲ ವಾರ ಸ್ನೇಕ್‌ ಶ್ಯಾಮ್‌, ಎರಡನೇ ವಾರ ಗೌರೀಶ್‌ ಅಕ್ಕಿ ಬಿಗ್‌ ಮನೆಯಿಂದ ಹೊರಬಂದಿದ್ದಾರೆ. ಈ ನಡುವೆ, ಇದೇ ಮನೆಯಲ್ಲಿನ ಸ್ಪರ್ಧಿಯೊಬ್ಬರು ಪೊಲೀಸರ ಅತಿಥಿಯಾಗಿದ್ದಾರೆ. ಭಾನುವಾರ ತಡರಾತ್ರಿ ಬಿಗ್‌ ಮನೆಗೆ ಅರಣ್ಯಾಧಿಕಾರಿಗಳು ಪ್ರವೇಶಿಸಿ ವರ್ತೂರು ಸಂತೋಷ್‌ ಅವರನ್ನು ರಾಮೋಹಳ್ಳಿ ಅರಣ್ಯಾಧಿಕಾರಿಗಳು ಬಂಧಿಸಿದ್ದಾರೆ.
ಕೆಲ ಮೂಲಗಳ ಪ್ರಕಾರ ವರ್ತೂರು ಸಂತೋಷ್‌ ಅವರನ್ನು ಬಂಧಿಸಲಾಗಿದೆ ಎಂದು ಹೇಳಲಾಗುತ್ತಿದೆ. ಅಷ್ಟಕ್ಕೂ ಕಾರಣವೇನು? ಅವರ ಬಂಧನವಾಗಿದ್ದು ನಿಜವೇ? ವರ್ತೂರು ಸಂತೋಷ್‌ ಅಪ್ಪಟ ಕೃಷಿಕ ಮತ್ತು ಓರ್ವ ಹಸು ಸಾಕಾಣಿಕೆದಾರ. ಇದೀಗ ಇದೇ ವರ್ತೂರು ಸಂತೋಷ್‌ ವಿರುದ್ಧ ವನ್ಯಜೀವಿ ರಕ್ಷಣೆ ಕಾಯ್ದೆಯ ಉಲ್ಲಂಘನೆ ಅಡಿಯಲ್ಲಿ ಅವರನ್ನು ಬಂಧಿಸಲಾಗಿದೆ. ಈ ಬಗ್ಗೆ ಇನ್ನಷ್ಟೇ ವಾಹಿನಿ ಅಧಿಕೃತವಾಗಿ ತಿಳಿಸಬೇಕಿದೆ.
ಹಳ್ಳಿಕಾರ್‌ ತಳಿಯ ರಕ್ಷಣೆಯಲ್ಲಿ ನಿರತರಾಗಿರುವ ವರ್ತೂರು ಸಂತೋಷ್‌, ಬಿಗ್‌ ಬಾಸ್‌ ಶೋಗೆ ಬರುವ ವೇಳೆ ಕೈತುಂಬ ಬಂಗಾರದ ಆಭರಣ, ಕೊರಳಲ್ಲಿ ಚಿನ್ನದ ಸರ ಧರಿಸಿ ಎಂಟ್ರಿ ಕೊಟ್ಟಿದ್ದರು. ಇದೆಲ್ಲದಕ್ಕಿಂತ ಹೆಚ್ಚಾಗಿ, ಕೊರಳಲ್ಲಿನ ಚಿನ್ನದ ಪೆಂಡೆಂಟ್‌ವೊಂದರಲ್ಲಿ ಹುಲಿಯ ಉಗುರೂ ಕಾಣಿಸಿತ್ತು. ಇದೀಗ ಆ ಉಗುರು ಧರಿಸಿದ ಹಿನ್ನೆಲೆಯಲ್ಲಿಯೇ ವರ್ತೂರು ಅವರನ್ನು ರಾಮೋಹಳ್ಳಿ ಅರಣ್ಯಾಧಿಕಾರಿಗಳು ಬಂಧಿಸಿದ್ದಾರೆ.
ಜಾಮೀನು ರಹಿತ ಕೇಸ್‌
ವನ್ಯಜೀವಿ ಸಂರಕ್ಷಣೆ ಕಾಯ್ದೆ ಅಡಿಯಲ್ಲಿ ಬಂಧಿತನಾಗಿರುವ ವರ್ತೂರು ಅವರ ಮೇಲೆ ನಾನ್‌ ಬೇಲೇಬಲ್‌ ಕೇಸ್‌ ದಾಖಲಾಗಿದೆ. ಸಂತೋಷ್‌ ಧರಿಸಿದ ಹುಲಿ ಉಗುರಿನ ಪೆಂಡೆಂಟ್‌ ಪಡೆದುಕೊಂಡಿರುವ ಅರಣ್ಯ ಇಲಾಖೆ ಅಧಿಕಾರಿಗಳು, ವಿಚಾರಣೆ ಮುಂದುವರಿಸಿದ್ದಾರೆ. ಇಂದು ಕೋರ್ಟ್‌ಗೂ ಹಾಜರು ಪಡಿಸಲಿದ್ದಾರೆ ಎಂಬ ಮಾಹಿತಿಯೂ ಲಭ್ಯವಾಗಿದೆ.
ಭಾನುವಾರ ತಡರಾತ್ರಿ ವರ್ತೂರು ಸಂತೋಷ್‌ ಅವರನ್ನು ಅರಣ್ಯಾಧಿಕಾರಿಗಳು ಬಂಧಿಸಿ ಕರೆದೊಯ್ದಿದ್ದಾರೆ. ಇತ್ತ ಕನ್ನಡದ ಬಿಗ್‌ ಬಾಸ್‌ ಇತಿಹಾಸದಲ್ಲಿಯೇ ಈ ರೀತಿ ಆಗುತ್ತಿರುವುದು ಇದೇ ಮೊದಲು. ವ್ಯಕ್ತಿಯನ್ನು ನೇರವಾಗಿ ಬಿಗ್‌ ಮನೆಯಿಂದ ಯಾರೂ ಅರೆಸ್ಟ್‌ ಆಗಿರಲಿಲ್ಲ. ಅರೆಸ್ಟ್‌ ಆದ ವರ್ತೂರು ಮತ್ತೆ ಬಿಗ್‌ ಬಾಸ್‌ ಮನೆ ಪ್ರವೇಶಿಸುತ್ತಾರಾ? ಕಾದು ನೋಡಬೇಕು.
